រូត 1
1
គែសនាវត៝ត់ជេរតារានាក់វ៝ល់អេលីមាលេក
1រានោកកាល់អែតាឞ្រីអីឆ្រាអែល អេល៝រមាគែសកាដាច់ គែសកោរាញផាតទោយ្សទើមកើលម៝ត់អ្វាញ់ប៝នលានតាឞ្រីអីនៃ។ នោកនៃគែសឞារហៃអូរឆាយគុតាប៝នបេតលេហឹម តាឞ្រីយូដា ។ តាឞ្រីនៃគែសនាវត៝ត់ជីឆ៝ត់ជីង៝តក្វ៝ង់ឞេងឞ្រីងាន់។ យ៝រមាគែសនាវជីឆ៝ត់ជីង៝តក្វ៝ង់អីនៃខាន់ពាង់លែវឞារហៃក៝នឞូក្លោខាន់ពាង់ទូឞើសឞ្រីយូដា ហាន់គុជឹតឞ្រីមោអាប់ ។ 2អីឆាយនៃរាញាអេលីមាលេក អីអូរពាង់រាញានាអោមី អីក៝នពាង់រាញាមាលោន នទ្រែលមាកីលីយោន #១:២៖ តានាវងើយហេឞ្រើ«អេលីមាលេក »គែសនាវខ្លៃលាស៖ «កោរាញឞ្រាសជេងកាដាច់គ៝ប់» «នាអោមី »គែសនាវខ្លៃលាស៖ «នាវមអាក» «មាលោន »គែសនាវខ្លៃលាស៖ «នាវជី» «កីលីយោន »គែសនាវខ្លៃលាស៖ «លើមារាគៃហោងាន់»។ ខាន់ពាង់តាៈឞើសឞាល់មពោលអេព្រាតា តាប៝នបេតលេហឹម តាឞ្រីយូដា ជេសរីខាន់ពាង់គុតាឞ្រីមោអាប់ ។#ផក ២:១៦; ១ឆា ១៧:១២; ២២:៣-៤; មកា ៥:១ 3ត៝ត់អាកើយរី អេលីមាលេក ខឹត នត្លើយអូរនទ្រែលមាក៝នពាង់ឞារហៃអីនៃ។ 4ជេសរីក៝នពាង់ឞារហៃអីនៃឆ៝ៈអូរឞើសផូងមោអាប់ ទូហ្វេរាញាអោរពា ទូហ្វេជឹតរាញារូត ខាន់ពាង់គុតាឞ្រីអីនៃក្លាប់លាសគែសជឹតនាម់។ 5ជេសរីមាលោន នទ្រែលមាកីលីយោន នៃខឹតដ៝ង់ នត្លើយអីមេៈគុទូហ្វេអេង ខឹតលែៈក៝នលែៈឆាយរ៝។
នាអោមី នទ្រែលមាន់ពាង់ព្លឹឆឹតតៃតាប៝នបេតលេហឹម
6គែសទូនាររីនាអោមី លឺតាង់ឞូងក៝ចលាសឞ្រាសយេហោវា លែៈកើលប៝នលានផូងអីឆ្រាអែល អីប៝នលានពាង់នើមអ៝ន់គែសជេងគែសនទើឆោងឆាត៝ង់តាឞ្រីយូដា ។ ជេសរីពាង់នទ្រែលឞារហៃអីមាន់នៃនទ្រាប់នទ៝សនទើព្លឹឆឹតជឹតប៝នពាង់នើមរី។ 7ពែនុយ្សខាន់ពាង់ទូឞើសនតុកនៃហាន់រ៝ៈត្រ៝ងងាយឆឹតតៃតាឞ្រីយូដា ។
8ជេសរីនាអោមី លាសមាអីមាន់ពាង់ឞារហៃនៃ៖ “ខាន់បែហាន់ឆឹតតឹងមេៈឞឹខាន់បែនើមអារីទោស! ខាន់បែនើសលែៈជាននាវអ្វែសមាក៝នគ៝ប់លែៈខឹត នទ្រែលមាគ៝ប់នើមដ៝ង់។ គ៝ប់ទាន់ឞ្រាសយេហោវាជាននាវអ្វែសមាខាន់បែកើតនៃដ៝ង់។ 9គ៝ប់ទាន់ឞ្រាសយេហោវាអ៝ន់ខាន់បែឞារហៃអ្យាគែសឆាយតៃ រេសជេងអ្វែសដាប់មពាន់តារានាក់វ៝ល់”។ ជេសរីអីព៝ចុមនតិញអីមាន់ពាង់ឞារហៃនៃតឹងមានាវវៃខាន់ពាង់។ ខាន់ពាង់ឞារហៃនៃញុមលុងងាន់ 10ងើយមាអីព៝ពាង់លាស៖ “ហេនមោអុចអោសតឹមងខាស! ហេនអុចតឹងគុនទ្រែលបែ នទ្រែលមាប៝នលានបែដ៝ង់”។ 11តីសមានាអោមី មោរ៝ម៖ “ហើយក៝ន! ខាន់បែព្លឹឆឹតអារីហ៝ម់ ម៝សនាវខាន់បែអុចឞ្រោៈនទ្រែលគ៝ប់? គ៝ប់លែៈអ៝ក់នាម់ហើយ មោហោមអោសឞាៈក៝នមានត្រ៝ៈឆាយខាន់បែតឹងនាវវៃឞ៝ន់#១:១១៖ តឹងនាវវៃផូងអីឆ្រាអែល លាសឆាយខឹតមោអោសគែសក៝ន យើនមាលាសហោមគែសអ៝សនោអីឆាយពាង់ អ៝សនោអីនៃមរានត្រ៝ៈឆ៝ៈឞូអូរអីលែៈខឹតឆាយអីនៃ គៃមាគែសក៝នមាអ៝សនោអីលែៈខឹតនៃនើស។។#នវ ២៥:៥-១០ 12ព្លឹឆឹតអារីហ៝ម់! យ៝រលាសគ៝ប់លែៈរាញហើយ្សលិចហោមគែសឆាយតៃអោស។ ឞ៝លលាសគ៝ប់ហោមរានើមគែសក៝ន លាសគែសឆាយគុដាសគ៝ប់តាមាង់អ្យា ជេសរីគែសឞារហៃក៝នឞូក្លោ 13លាសនទ្រីអើមខាន់បែអុចក៝ប់ខាន់ពាង់ត្រុយ្សក្វ៝ង់លាស? អើមខាន់បែអុចគុទើមលិចអុចឆ៝ៈឆាយលាស? មោអោស! ជានកើតរីលិចទីអោស! ឞ្រាសយេហោវាលែៈតឹមរាទ៝ង់ដាសគ៝ប់ជានអ៝ន់នាវរេសគ៝ប់អ៝តនូយ្សអ៝តនហ៝ម់រាលាវមាខាន់បែនៃជឹត”។
14ជេសរីឞារហៃអីមាន់ពាង់នៃញុមលុងទូតឹជឹត អីមាន់រាញាអោរពា នៃចុមនតិញព៝ពាង់ទូតឹជឹត យ៝រមាពាង់លែៈអុចព្លឹឆឹតតារានាក់វ៝ល់ពាង់នើម យើនមាអីមាន់រាញារូត នៃក្វាន់រាទ៝ង់ព៝ពាង់ហោងាន់ មោអុចអោសងខាសដាសពាង់។ 15នាអោមី ងើយមារូត ៖ “ហើយមាន់ មាន់បែលែៈព្លឹឆឹតជ៝យនទុលមពោលពាង់នើម ព្លឹឆឹតយើកមឞាសឞ្រាសពាង់នើមដ៝ង់។ អ៝ន់បែតឹងមាន់បែអារីហ៝ម់!” 16ជេសរីរូត អើស៖
“ទាន់បែលើយអោសនត្រុតគ៝ប់ទូឞើសបែ
លើយអោសឞ្វៃគ៝ប់តឹងបែ!
អាសនតុកបែហាន់ គ៝ប់ហាន់តារីដ៝ង់
អាសនតុកបែគុ គ៝ប់គុតារីដ៝ង់
ផូងប៝នលានបែជេងផូងប៝នលានគ៝ប់
ឞ្រាសអីបែយើកមឞាសជេងឞ្រាសអីគ៝ប់យើកមឞាសដ៝ង់។#២ឆា ១៥:២១
17អាសនតុកបែខឹត គ៝ប់ខឹតតារីដ៝ង់
ជេសរីឞូត៝ប់គ៝ប់តានតុកនៃដ៝ង់។
នាវខឹតទើមទើយតឹមងខាសគ៝ប់ឞើសបែ
លាសមោងាន់
ទាន់ឞ្រាសយេហោវា តេៈទោយ្សក្វ៝ង់មាគ៝ប់ទោស!”
18ត៝ត់តាង់អីមាន់ពាង់អុចគុនទ្រែលទុតហោកើតនទ្រី នាអោមី រ៝ម ជេសរីគុអ្យាត់ឆាក់រាក្លាក់។
19ជេសរីខាន់ពាង់ឞ្រោៈត៝ត់តាប៝នបេតលេហឹម។ នោកខាន់ពាង់ឞារហៃត៝ត់តាប៝ននៃលែៈរាងោចប៝នលាននទ្រ៝ត់ទាទេ ជេសរីគែសផូងឞូអូរតឹមអោបលាស៖ “យោសអីនៃ នាអោមី ងាន់លាសហ្យាស?” 20យើនមាពាង់អើសលាស៖
“លើយហោមក្វាល់គ៝ប់«នាអោមី »ជឹតអោស
ក្វាល់គ៝ប់«មារា »ហ៝ៈ
យ៝រលាសនាអោមី គែសនាវខ្លៃ«នាវរាម់មអាក» តីសមាមារា គែសនាវខ្លៃ«នទើតាង់ខែរងាន់»។ យ៝រលាសកោរាញឞ្រាសអីគែសនាវទើយទុតព្រេសទុតក្វ៝ង់ជានអ៝ន់នាវរេសគ៝ប់អ៝តនូយ្សអ៝តនហ៝ម់។
21គ៝ប់ទូតាៈឞើសអ្យានើសគែសនទើអាប់នតីល
តីសមាឞ្រាសយេហោវាអ៝ន់គ៝ប់ព្លឹឆឹតតាអ្យាជ៝ង់លាងមពាងតីទើម
ម៝សនាវហោមក្វាល់គ៝ប់ «នាអោមី »?
ឞ្រាសយេហោវា តឹមរាទ៝ង់ដាសគ៝ប់
ជេងកោរាញឞ្រាសអីគែសនាវទើយទុតព្រេសទុតក្វ៝ង់អ៝ន់គែសនាវជេរជ៝ត់មាគ៝ប់!”
22នទ្រីនាវនាអោមី ព្លឹឆឹតតាប៝នពាង់នើម លែវនអ៝ប់មាអីមាន់ពាង់តាៈឞើសឞ្រីមោអាប់ ឆឹតនហាញដ៝ង់។ ខាន់ពាង់ឞារហៃត៝ត់តាប៝នបេតលេហឹម តាខៃនតើមរែកឞាព្រាង់ #១:២២៖ នតីលឞាព្រាង់ តានាវកោរាញឞ្រាសងើយគែសឞារនតីល។ នតីលឞាព្រាង់ គែសតាឆ៝ម់បុតរូតជេងនតីលអីថ៝កមោលាង់កាសមាជាននុមពាង់។ ។
Currently Selected:
រូត 1: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.