លូកា 14

ឞ្រាសយេឆូ ជានឞាសឞូនុយ្សជីតានារឆាបាត់

1គែសទូនារជេងនារឆាបាត់ ឞ្រាសយេឆូ ហាន់ឆោងឆាតាជៃទូហ្វេកោរាញផូងផារីឆី ។ ត៝ត់តានៃលែៈមពោលអីគុតាជៃនៃក៝ប់រាម្យាង់អ្វាញ់ឞ្រាសយេឆូ ។#លក ៧:៣៦; ១១:៣៧ 2តានៃឆៃទូហ្វេឞូនុយ្សជីពុកជីមោរ គុឞើសនាប់ឞ្រាសយេឆូ រី។ 3ជេសរីឞ្រាសយេឆូ អោបផូងនើមនតីនាវវៃផូងអីឆ្រាអែល នទ្រែលមាផូងផារីឆី ៖ “តឹងមានាវវៃផូងឞ៝ន់ អាសទីដ៝ង់ឞើស ជានឞាសឞូនុយ្សជីតានារឆាបាត់ អីនារគុរាលូឞ្វៃជានការ?” 4លែៈខាន់ពាង់រីគុអ្យាត់ឆាក់រាក់ក្លាក់ទើម មោអោសទូហ្វេងើយ ជេសរីឞ្រាសយេឆូ ក្វាន់ឞូនុយ្សអីនៃជានឞាសនាវជី ដាៈពាង់ឆឹតអារី។ 5ជេសរីឞ្រាសយេឆូ លាសមាខាន់ពាង់អីនៃ៖ “តាផូងខាន់មៃ លាសគែសក៝នឞូក្លោ មោលាសនទ្រោកខាន់មៃតុបតាត្រោមនតូទាកតានារឆាបាត់ លាសនទ្រីអើមមោលាសខាន់មៃឆ៝ៈពាង់ឞើស? នទើអីនៃជេងជានការដ៝ង់”។#លក ១៣:១៥ 6ខាន់ពាង់មោអោសឞ្លាវអើសនាវអីនៃមាឞ្រាសយេឆូ ។

លើយជ៝យនតុកអីឞូលឺ

7 ឞ្រាសយេឆូ ឆៃមពោលឞូនាច់កើយ្សនតុកគុឞូលឺ ជេសរីពាង់ងើយនាវនតឹតមាមពោលអីនៃ៖ 8“លាសគែសឞូក្វាល់ខាន់មៃលាប់ញេតឆោងតានតុកតឹមនអាប់ទូនតុក លើយខាន់មៃគុអោសតានតុកឞូរ៝ងអ៝ន់មាឞូតេសឞូក្វ៝ង់ ងខេបលាសគែសពាង់ក្វាល់ដ៝ង់ឞូអីក្វ៝ង់រាលាវមៃ។#នហ ២៥:៦-៧ 9លាសឞូនុយ្សអីតើមតឹមនអាប់នៃ ពាង់ក្វាល់មៃ នទ្រែលមាក្វាល់ឞូនុយ្សអីក្វ៝ង់រាលាវមៃដ៝ង់ ពាង់មរាលាសមាមៃ៖ «ទាន់នតុកអីអ្យាអ៝ន់មាឞូនុយ្សអីអ្យា»រ៝។ ជេសរីមៃព្លាច់គុឞើសកើយទុតឞូរី តាម៝ងអីនៃមៃគែសនាវដីតព្រេងឞូទុតហោ។ 10លាសនទ្រី អ៝ន់ខាន់មៃគុឞើសកើយទុតឞូរីប៝ត់ ក៝ប់ពាង់នើមអីតើមតឹមនអាប់នៃលាស៖ «ហើយជាង់ ហាន់គុអានតុកអីអ្វែសអីឞូលឺអានាប់អ្យាហ៝ម់» អីនៃជេងនាវឞូយើកមាមៃមាលែៈឞូអីគុឆោងឆានទ្រែលតានៃ។ 11ឞូម៝សអីនហាវអេងឆាក់ពាង់នើម កោរាញឞ្រាសញជុរលើយពាង់ យើនមាឞូម៝សអីញជុរអេងឆាក់អុចអ្យាត់ពាង់ កោរាញឞ្រាសឆើមនហាវពាង់”។#លក ១៨:១៤

អ៝ន់ក្វាល់ឞូនុយ្សអ៝អាចលាប់ឆោងឆានទ្រែល

12ជេសរីឞ្រាសយេឆូ លាសមាឞូនុយ្សអីតើមជាៈពាង់ញេតឆោងអីនៃ៖ “លាសមៃនទ្រាប់នាវញេតឆោង ងគូលនារ មោលាសកេងមាង់ មៃលើយជាៈអោសមឹតជាង់ អ៝សនោ ឞាល់មពោល មោលាសឞូនុយ្សច្យៅមែងអីគែសទ្រាប់នទើអ៝ក់ យ៝រលាសមពោលអីនៃព្លើងជាៈមៃទើយ លាសនទ្រីលែៈគែសឞូត្រ៝ៈមាមៃជេស។ 13យើនមាលាសមៃនទ្រាប់នាវញេតឆោង អ៝ន់មៃជាៈផូងអ៝អាច ផូងលុតជ៝ង់តី ផូងក្វែតរាវែន នទ្រែលមាផូងចែសមាត់ហ៝ៈ។#នវ ១៤:២៨-២៩ 14កើតនទ្រីកោរាញឞ្រាសអ៝ន់នាវគែសជេងមាមៃរ៝ យ៝រលាសទឹងលែៈឞូនុយ្សអីនៃ ខាន់ពាង់មោអោសទើយព្លើងជាៈមៃដ៝ង់ យើនមាកោរាញឞ្រាសទើមឆើមព្លើងត្រ៝ៈអ៝ន់មាមៃ ត៝ត់មាពាង់អ៝ន់ឞូនុយ្សឆ៝ង់ឆ្រាង់ទ៝ក់រេសតៃ”។

នាវងើយនតឹតមាឞូនុយ្សអ៝អាចត្រ៝ៈលាប់ញេតឆោង

ឞ្រាសយេឆូ នតី គែសអ៝ក់ឞូនុយ្សទូនមោតឹងនាវកោរាញឞ្រាសក្វាល់

(មថ ២២:១-១០)

15ជេសឞ្រាសយេឆូ ងើយនៃ ទូហ្វេឞូក្លោអីគុឆោងឆានទ្រែល ពាង់លាសមាឞ្រាសយេឆូ ៖ “អ្វែសមអាកងាន់មាឞូនុយ្សអីគុឆោងក្វ៝ង់ញេតក្វ៝ង់នទ្រែលតាប៝នអ្វែសកោរាញឞ្រាស”។#លក ១៣:២៩ 16យើនមាឞ្រាសយេឆូ លាសនាវងើយនតឹតមាពាង់៖ “គែសទូហ្វេឞូក្លោនទ្រាប់នាវញេតឆោងទុតក្វ៝ង់ ជេសរីពាង់ជាៈឞូនាច់អ៝ក់ងាន់។ 17ត៝ត់ទីម៝ងញេតឆោងអីនៃ ពាង់ដាៈទឹកពាង់រីហាន់មឞើសឞូលាស៖ «ហាន់ហ៝ម់! ព្យាង់ត្រាវនទ្រាប់លែៈជេសលែៈផ្យៅ»។ 18តីសមាទឹងលែៈឞូនាច់អីនៃរាលាច់ទាទេ ពាង់អីឞើសនាប់រីលាសនអា៖ «គ៝ប់មហែរាវាត់មីរទូលោក អាបៃរីគ៝ប់អុចហាន់អ្វាញ់ងាន់រ៝ គ៝ប់ទាន់ទោយ្សមាកោរាញមៃហៃ»។ 19ពាង់អីទូហ្វេជឹតលាសនអា៖ «គ៝ប់មហែរាវាត់ជឹតអឹនទ្រោកងក្វ៝ង់ គ៝ប់អុចរាល៝ងតេៈពាង់ គ៝ប់ទាន់ទោយ្សមាកោរាញមៃហៃ»។ 20អីទូហ្វេរីជឹតលាសនអា៖ «គ៝ប់មហែនអាប់មេ កើតនទ្រីទឹងគ៝ប់មោគែសហាន់ឆោងឆានទ្រែល»។ 21ទឹកអីនៃព្លឹមឞើសមាកោរាញរីតឹងនាវអីនៃ។ ជេសរីកោរាញអីនៃជីនូយ្សហោងាន់ លាសមាទឹកពាង់រី៖ «ឞ្រោៈអ៝ន់គើញហ៝ម់ រ៝ៈត្រ៝ងក្វ៝ង់ត្រ៝ងជេៈ តាប៝នក្វ៝ង់អ្យា ជាៈលែវផូងអ៝អាច ផូងលុតជ៝ង់តី ផូងក្វែតរាវែន ផូងចែសមាត់ហាន់ញេតឆោងតាអ្យា»។ 22ជេសជានកើតនៃ ពាង់មឞើសមាកោរាញពាង់៖ «ហើយកោរាញ! លែៈជេសគ៝ប់ជានតឹងនាវមៃដាៈនៃ យើនមានតុកហោមអែរាមែសដ៝ង់»។ 23អីកោរាញនៃដាៈជឹត៖ «ហាន់ឞ្រោៈរ៝ៈត្រ៝ងរ៝ៈមីរ ញច៝ប់ដាៈឞូហាន់អ៝ន់ឞេងជៃគ៝ប់។ 24ខាន់អៃមៃអ្យាត់នាវគ៝ប់លាស លែៈឞូនុយ្សអីលែៈជេសគ៝ប់ជាៈនើស គ៝ប់មោហោមអោសអ៝ន់ទូហ្វេច៝ក់ព្យាង់ត្រាវគ៝ប់!»”

នាវជេងអ៝សម៝នឞ្រាសយេឆូ ងាន់

(មថ ១០:៣៧-៣៨)

25គែសអ៝ក់ឞូនុយ្សឞ្រោៈតឹងឞ្រាសយេឆូ ។ ពាង់ងគឹលជឹតផូងអីនៃ ជេសរីលាសមាខាន់ពាង់៖ 26“លាសឞូម៝សអុចតឹងគ៝ប់ តីសមាមោរ៝ង់គ៝ប់រាលាវដាសនាវពាង់រ៝ង់មេៈឞឹ អូរក៝ន អ៝សនោអ៝សនូរ ឞ៝លលាសដាសនាវរេសពាង់នើមកាដោយ ឞូនុយ្សអីនៃជានអ៝សម៝នគ៝ប់មោទើយអោស។#លក ៩:៥៩-៦០; ១២:៥២-៥៣; ១កោ ៧:២៩ 27ជេសរីឞូម៝សអីមោតូយឆីតឹមរាកាង់ពាង់នើមឞ្រោៈតឹងគ៝ប់ ជេងគែសនាវខ្លៃមោអ្យាត់ទឹងលែៈនាវកោរាញឞ្រាសដាៈឞ៝លលាសត៝ត់ខឹតឆាក់កាដោយ ឞូនុយ្សអីនៃមោទើយជានអ៝សម៝នគ៝ប់ដ៝ង់។#លក ៩:២៣ 28លាសខាន់អៃមៃអុចតឹងគ៝ប់ អ៝ន់ខាន់អៃមៃគឹតនហេលល៝រ។ កើតនទ្រីលាសគែសទូហ្វេឞូនុយ្សអុចជានជៃក្វ៝ង់ ពាង់គុមឹនល៝រមើ ទាសអ៝ក់លែៈហ្វាចជាន ទាសអ៝ក់គែសព្រាក់តាឆាក់ពាង់នើមរីគៃមាគឹតជានជេស មោលាសមោជេស។ 29ក្លាចលាសតេៈមែសជេសលែៈផ្យៅ តីសមាជានមោទើយជេស។ កើតនទ្រីឞូម៝សអីឆៃ ឞូគើមមឺច 30កើតនអា៖ «ពាង់អ្យាជានជៃ តីសមាមោទើយជេសហ្យាស!» 31មោលាស លាសគែសទូហ្វេកាដាច់ ជេសរីពាង់អុចតឹមលើសដាសទូហ្វេកាដាច់អេង លាសនទ្រីកាដាច់អីនៃគុមឹនតឹមញច្រាៈល៝រមើ លាសពាង់គែសតាហែន ១០០០០ នុយ្សទើម ទើយតឹមរាទ៝ង់ដាសកាដាច់អីលែវតាហែន ២០០០០ នុយ្សនៃលាសមោ។ 32លាសពាង់គឹតលាសមោទើយរ៝ ពាង់ដាៈឞូនុយ្សឆើមនតាងពាង់ឞ្រោៈអោប មើមជានគៃមាគែសនាវដាប់មពាន់ ទោលកាដាច់អីនៃហោមអែងាយ។ 33កើតនទ្រីតាផូងខាន់អៃមៃនៃ ឞូម៝សអីមោទើយបាសមាទឹងលែៈទ្រាប់នទើពាង់នើមគែស ឞូនុយ្សអីនៃមោអោសទើយជានអ៝សម៝នគ៝ប់”។#លក ៩:៦២

លើយអ៝ន់រ៝សកាសឞ៝ស

(មថ ៥:១២; មក ៩:៥០)

34“ឞ៝សជេងទូនតីលនទើតេៈត្រាវមាកាសងាន់ លាសឞ៝សអីនៃមោហោមគែសកាស មើមហោមឞ្លាវជានគៃមាអ៝ន់ព្លឹកាសជឹត?#យហ ១៥:៦ 35ពាង់មោហោមអោសគែសនាវខ្លៃជឹត ឞ៝លលាសឆ៝ៈព៝តលាយមានែស មោលាសមាអាច់នទ្រោកមោហោមគែសនាវខ្លៃដ៝ង់ ផាលាសមាងខុតមអារ់លើយឞើសទីសទើម។ ឞូម៝សគែសតោរមាអ្យាត់ អ៝ន់អ្យាត់ទោ!”

Currently Selected:

លូកា 14: cmoK

Highlight

Copy