លូកា 11

ឞ្រាសយេឆូ នតីនាវមឞើសឆើម

(មថ ៦:៩-១៣; ៧:៧-១១)

1គែសទូនារឞ្រាសយេឆូ មឞើសឆើមតាទូនតុក។ ជេសពាង់មឞើសឆើមរី គែសទូហ្វេអ៝សម៝នលាសមាពាង់៖ “ហើយកោរាញ ដាៈមៃនតីអ៝ន់ហេនឞ្លាវមឞើសឆើមបាៈអើ កើតយោហាន-បាប់តែម នតីមាមពោលអ៝សម៝នពាង់”។#លក ៥:១៦ 2ឞ្រាសយេឆូ អើសមាខាន់ពាង់៖ “អ៝ន់ខាន់អៃមៃមឞើសឆើមកើតនអា៖

«អើឞឹ[គុតាកាលើត្រោក]‌

អ៝ន់ទឹងលែៈឞូនុយ្សយើកមឞាសមាមៃ#១១:២៖ មោលាស «អ៝ន់ឞ្រីមៃគើញត៝ត់» មោលាស «អ៝ន់នោកមៃម៝ត់អ្វាញ់ទឹងលែៈឞូនុយ្សគើញត៝ត់»។ [ទាន់ទឹងលែៈនាវតានែសនតូអ្យាតឹងនាវមៃអុច តឹមឞានមានាវមៃនើមលែៈអុចតាកាលើត្រោកដ៝ង់]។#អេឆា ២៩:២៣

3អ៝ន់នទើឆោងឆាមាហេនអាប់នារអ៝ន់ត៝ង់។#១ពេ ៥:៧

4យោៈនអាចលើយហោមកើបនាវតីសហេន

តឹមឞានមាហេនយោៈនអាចមាឞូនុយ្សជានតីសមាហេន មោហោមកើបនាវតីសពាង់ដ៝ង់។

កើលហេនលើយអោសជានតីស នោកហេនគែសនាវនទើម [ទាន់រាក្លាយ្សហេនឞើសនាវអ្យើសមហឹក]»”។#មថ ១៨:២១-៣៥; ១កោ ១០:១៣

នាវងើយនតឹតមាមឞើសឆើម

5ជេសរីឞ្រាសយេឆូ លាសដ៝ង់មាមពោលអ៝សម៝ននៃ៖ “តាមពោលខាន់អៃមៃ លាសគែសទូហ្វេឞូនុយ្សឞ្រោៈតាជៃមឹតជាង់ងគូលផុតងគូលមាង់ ពាង់ក្វាល់៖ «ហើយជាង់ អ៝ន់គ៝ប់មាញនទើឆោងឆាអាបាៈប៝ត់អើ‌#លក ១៨:១-៨ 6យ៝រលាសគ៝ប់គែសជាង់មហែត៝ត់តាៈឞើសងាយលាស។ គ៝ប់មោគែសនទើមាអ៝ន់ពាង់ឆោងឆាមេ»។ 7ខាន់អៃមៃលាស ឞូនុយ្សតាត្រោមជៃនៃអើសមាពាង់កើតនអាបាស?៖ «លើយហោមរាខ្វាកគ៝ប់ហ្យា មពោងលែៈជេសរាដាង់ អ៝សក៝នគ៝ប់លែៈឞិចដ៝ង់ គ៝ប់មោទើយទ៝ក់ឆ៝ៈអ៝ន់មាមៃជាង់មេ»។ 8មោទីនទ្រីអោស។ គ៝ប់មឞើសមាខាន់អៃមៃ ឞូនុយ្សតើមជៃនៃមរាទ៝ក់នទឹរ៝ នទ្រែលមាអ៝ន់ម៝សនទើអាបាៈអេងជឹតមឹតជាង់ពាង់អុច។ ពាង់ទ៝ក់នទឹនៃ យ៝រលាសឞូនុយ្សអីនៃឞាញ់រាខ្វាកពាង់មោឞ្លាវទុត មោអោសយ៝រមាជេងមឹតជាង់ទើម។ 9កើតនទ្រីគ៝ប់មឞើសមាខាន់អៃមៃ ទាន់មរ៝មរាង់ហ៝ម់មាកោរាញឞ្រាសទឹងពាង់អ៝ន់មាខាន់អៃមៃ ជ៝យមរ៝មរាង់ហ៝ម់ទឹងឆៃ ក្វាល់#១១:៩៖ តានាវងើយគ្រែក លាស៖ «គ៝ស» យ៝រលាសតានតុកនៃលាសអុចលាប់តាត្រោមជៃឞូវៃគ៝សមពោង។មរ៝មរាង់ហ៝ម់ឞើសទីសមពោងទឹងកោរាញឞ្រាសពើកអ៝ន់មាខាន់អៃមៃរ៝។#យេរ ២៩:១៣-១៤; យហ ១៥:៧ 10យ៝រលាសឞូម៝សទាន់មរាគែស ឞូម៝សជ៝យមរាឆៃ ជេសរីឞូម៝សអីក្វាល់ឞើសទីសមពោងមរាពើកអ៝ន់មាពាង់។ 11តាមពោលខាន់អៃមៃវៃគែសដ៝ង់ [លាសក៝នទាន់ព្យាង់អ៝ន់ងខើងលុមាពាង់?] លាសក៝នទាន់កា ឞឹពាង់អ៝ន់ងខើងឞេសគែសកាច់មាពាង់ឞើស? 12មោលាសក៝នទាន់តាប់អ្យារ់អ៝ន់ងខើងនទើរវីងមាពាង់? 13ឞ៝លលាសខាន់អៃមៃជេងឞូនុយ្សតីសកាដោយ ខាន់អៃមៃហោមឞ្លាវអ៝ន់នទើអ្វែសមាក៝នដ៝ង់ លាសនទ្រីឞឹគុតាកាលើត្រោករាលាវឞើសនៃអ៝ន់ឞ្រាសហ្វេងអ្វែសអីក្ល៝សអ្វែសមាឞូម៝សទាន់ឞើសពាង់”។

ឞ្រាសយេឆូ អើសនាវឞូនតោនញច្រ៝សពាង់

(មថ ១២:២២-៣០, ៤៣-៤៥; មក ៣:២០-២៧)

14គែសទូហ្វេឞូក្លោឞ្រាសអ្យើសលាប់អ៝ន់ពាង់មល៝ ត៝ត់ទូនាររីឞ្រាសយេឆូ នត្រុតឞ្រាសអ្យើសអីនៃលោសឞើសពាង់ ជេសរីពាង់ឞ្លាវងើយរ៝។ ឞូនុយ្សគុតានៃអ៝ក់ងាន់។ ត៝ត់ឆៃនាវអីនៃទឹងលែៈខាន់ពាង់នទ្រ៝ត់ហីសរាហ៝ល់ទាទេងាន់។#មថ ១២:២២-៣០; មក ៣:២២-២៧ 15យើនមាគែសឞូអាបាៈលាស៖ “យ៝រលាសឆាតាង់ #១១:១៥៖ មោលាស «បេលឆេបូល »។អីកោរាញមពោលឞ្រាសអ្យើសអ៝ន់នាវទើយតាពាង់ ទឹងពាង់ទើយនត្រុតឞ្រាសអ្យើស”។ 16គែសឞូអាបាៈជឹតអុចរាល៝ងឞ្រាសយេឆូ ទើម ដាៈពាង់ជានទូនាវមឞេនគៃមាញហើនាវទើយពាង់តាៈឞើសកោរាញឞ្រាសរី។#មថ ១២:៣៨; មក ៨:១១ 17យើនមាឞ្រាសយេឆូ លែៈគឹតជេសនាវខាន់ពាង់មឹន ជេសរីពាង់លាស៖ “ទឹងលែៈឞ្រីអីគែសនាវតឹមល៝ក់តឹមជាញចាសច្រាយឞាល់ ឞ្រីអីនៃរ៝សហេងរ៝។ ទឹងលែៈរានាក់អីគែសនាវតឹមល៝ក់តឹមជាញនទ្រាង់នើម រានាក់អីនៃរ៝សហេងមោហោមគែសដ៝ង់។ 18លាសគ៝ប់នត្រុតឞ្រាសអ្យើសតាៈឞើសនាវទើយឆាតាង់ អីកោរាញមពោលឞ្រាសអ្យើស ឞ្រាសអ្យើសគែសនាវតឹមរាលាច់តឹមជាញចាសច្រាយឞាល់ លាសនទ្រីមើមទឹងហោមគែសឞ្រីជឹត? គ៝ប់ងើយកើតនអា យ៝រលាសខាន់មៃលាសគ៝ប់នត្រុតឞ្រាសអ្យើសយ៝រមាឆាតាង់ #១១:១៨៖ មោលាស «បេលឆេបូល »។អ៝ន់នាវទើយមាគ៝ប់។ 19លាសគ៝ប់នត្រុតឞ្រាសអ្យើសយ៝រមានាវទើយឆាតាង់ #១១:១៩៖ មោលាស «បេលឆេបូល »។ងាន់ ឞើសតាៈនាវទើយអ៝សម៝នខាន់មៃនត្រុតឞ្រាសអ្យើសដ៝ង់? លាសនទ្រីអ៝សម៝នខាន់មៃនើមអីនៃមរាតេៈទោយ្សខាន់មៃងាន់រ៝។#ការ ១៩:១៣-១៦; លក ១១:៣១-៣២ 20យើនមាលាសនាវទើយគ៝ប់នត្រុតឞ្រាសអ្យើសតាៈឞើសកោរាញឞ្រាស លាសនទ្រីនាវកោរាញឞ្រាសម៝ត់អ្វាញ់មាខាន់មៃលែៈត៝ត់ជេស#១១:២០៖ មោលាស «លាសនទ្រីឞ្រីកាដាច់កោរាញឞ្រាសលែៈត៝ត់មាខាន់មៃជេស»។។#លក ១៧:២១; ១យហ ៣:៨

21លាសឞូនុយ្សទាង់ញអោតតាកញអោតដាវ គុញជ្រាង់ញីសជៃពាង់នើម លាសនទ្រីទ្រាប់នទើពាង់ហោមកើន។ 22យើនមាលាសគែសទូហ្វេឞូនុយ្សជឹតទាង់រាលាវពាង់ តឹមលើសទើយឞូ ឞូមរាឆ៝ៈតាកដាវពាង់អីនៃ នទ្រែលមាឆ៝ៈទ្រាប់នទើពាង់ពាៈអ៝ន់មាឞូនុយ្សអេងជឹត#១១:២២៖ ឞ្រាសយេឆូ ជេងតឹមឞានមាឞូនុយ្សទាង់អីនៃ ពាង់ទើយដាសឆាតាង់ ។។#កោល ២:១៥; ១យហ ៤:៤ 23ឞូម៝សអីមោគុមពែសមាគ៝ប់ ឞូនុយ្សអីនៃតឹមរាទ៝ង់ដាសគ៝ប់ ឞូម៝សអីមោគុគូមនទ្រែលគ៝ប់ ឞូនុយ្សអីនៃចាសច្រាយញហីងញហាង”។#លក ៩:៥០

24“លាសឞ្រាសអ្យើសលោសឞើសទូហ្វេឞូនុយ្ស ជេសរីពាង់ឞ្រោៈរ៝ៈឞ្រីរាទាស ពាង់ជ៝យនតុកមាគុមោគែសអោស ជេសរីពាង់មរាលាសអេងកើតនអា៖ «គ៝ប់ព្លឹគុតាជៃអើមគ៝ប់នតុកគ៝ប់មហែលោសនើសប៝ត់»។ 25ត៝ត់ពាង់ព្លឹតានៃ ឆៃជៃអីនៃលែៈមពេសអ្វែស នទ្រាប់អ្យាហែប‌ 26ជេសរីពាង់ហាន់ជាៈឞ្រាសអ្យើសអាអេងពើសអឹជឹត ឞ្រាសអ្យើសអីនៃជាញរាលាវពាង់ងាន់ ហាន់លាប់គុនទ្រែលតានៃដ៝ង់ ជានអ៝ន់ឞូនុយ្សអីនៃគែសនាវជេរអ្យើសរាលាវអើមនើសជឹត”។#២ពេ ២:២០ 27ទោលឞ្រាសយេឆូ ហោមងើយនាវនៃ គែសទូហ្វេឞូអូរតាផូងឞូនុយ្សអ៝ក់នៃលាស៖ “ឞូអូរអីទែសមៃ អីមពូមៃមាត៝ស ឞូអូរអីនៃលាបងាន់រ៝”។ 28យើនមាឞ្រាសយេឆូ អើស៖ “ឞូនុយ្សអីអ្យាត់នាវកោរាញឞ្រាសងើយ នហ៝មាតឹងកើត ពាង់អីនៃលាបអ៝ក់រាលាវ”។#លក ៦:៤៧-៤៨; យាក ១:២២-២៥

នាវមឞេនយោនាយ្ស

(មថ ១២:៣៨-៤២)

29ជេសរីឞូនុយ្សគុគូមលើមាអ៝ក់ងាន់ ឞ្រាសយេឆូ លាសមាផូងអីនៃ៖ “ឞូនុយ្សតារានោកអាបៃរីអ្យើសមហឹកហោងាន់ អុចឆៃមានាវមឞេនទើម យើនមាកោរាញឞ្រាសមោអោសអ៝ន់នាវមឞេនអេងជឹត ពាង់អ៝ន់ទូនាវមឞេនតឹមឞានមានាវមឞេនយោនាយ្ស អីឞូនុយ្សនតើយ្សនាវងើយកោរាញឞ្រាសកាល់អែនើសទើម#១១:២៩៖ មោលាស «ពាង់អ៝ន់ទូនាវមឞេនទើម ជេងគែសទូហ្វេឞូនុយ្សដាៈរាគ៝ល់លើយនូយ្សនហ៝ម់អ្យើសតឹមឞានមាយោនាយ្ស អីឞូនុយ្សនតើយ្សនាវងើយកោរាញឞ្រាសកាល់អែនើសពាង់មឞើសងក៝ចមាប៝ននីនីវេ »។។#យោន ២:១-១០; មថ ១២:៣៨-៤២ 30យោនាយ្ស ជេងនាវមឞេនមាប៝ននីនីវេ ឆៃ នទ្រីតានារជឹតនាប់តៃគ៝ប់អីក៝នឞូនុយ្សតាៈឞើសកោរាញឞ្រាសជេងនាវមឞេនតារានោកអាបៃអ្យាដ៝ង់។ 31តានារកោរាញឞ្រាសផាតទោយ្សទឹងលែៈឞូនុយ្សតានែសនតូ គែសកាដាច់ឞូអូររាញាពាង់ឆេបា ពាង់មរាតេៈទោយ្សមាឞូនុយ្សរានោកអាបៃអ្យា។ កាល់អែនើសពាង់កាដាច់តាឞ្រីអេងងាយមពែសឞើសទ៝ង់ឞ្រីអីឆ្រាអែល ឞ៝លលាសពាង់គុងាយទុតឞ្រីទុតនែសកាដោយ ពាង់ហាន់តាឞ្រីអីឆ្រាអែល គៃមាអ្យាត់នាវមឹនគឹតឞ្លាវកាដាច់ឆាលោមោន តាឞ្រីអ្យា។ យើនមានារអ្យាតានតុកអ្យាគែសទូហ្វេឞូនុយ្សនាវងើយពាង់ខ្លៃរាលាវនាវងើយកាដាច់ឆាលោមោន តីសមាខាន់អៃមៃមោអុចអោសអ្យាត់ពាង់។#១កក ១០:១-១០ 32តានារកោរាញឞ្រាសផាតទោយ្សទឹងលែៈឞូនុយ្សតានែសនតូអ្យា ឞូនុយ្សប៝ននីនីវេ មរាតេៈទោយ្សឞូនុយ្សតារានោកអាបៃអ្យាដ៝ង់ យ៝រលាសរានោកកាល់អែនើស ជេសខាន់ពាង់តាង់នាវយោនាយ្ស មឞើស ខាន់ពាង់រាគ៝ល់លើយនូយ្សនហ៝ម់អ្យើសរ៝ ខាន់ពាង់រាង៝តលែៈលាន់នាវខាន់ពាង់ជានតីសនើស យើនមាតាអ្យាអាបៃអ្យាគែសដ៝ង់ទូហ្វេឞូនុយ្សក្វ៝ង់រាលាវមាយោនាយ្ស នៃជឹត”។#យោន ៣:៥-៩

នាវងើយនតឹតមាអុញឆាគេង

(មថ ៥:១៥; ៦:២២-២៣)

33 ឞ្រាសយេឆូ នតីជឹត៖ “មោគែសអោសឞូនុយ្សមពេសអុញឆាគេង ជេសរីពោនតាក្វឹល មោលាសកុបលើយដាសឆាសឞើសលើ។ ឞូវៃមពេសឆាគេងយោងតាកាលើ គៃមាអាងលែៈឞូនុយ្សអីលាប់តាត្រោមជៃនៃ។ 34ត្រោមមាត់ខាន់អៃមៃជេងតឹមឞានមាឆាគេងមាឆាក់ជាន់ លាសត្រោមមាត់ខាន់អៃមៃហោមអាងអ្វែស លែៈឆាក់ជាន់ខាន់អៃមៃហោមអាងទាទេ យើនមាលាសត្រោមមាត់ខាន់អៃមៃលែៈង៝ជេស លែៈឆាក់ជាន់ខាន់អៃមៃជេងង៝ទាទេដ៝ង់។#អេផ ១:១៨ 35កើតនអៃអ៝ន់ខាន់អៃមៃឞ្លាវញជ្រាង់ លើយអ៝ន់ខាន់អៃមៃកើបអេងនាវអាង ជេសរីឞូមោអោសឆៃនាវអាង ឆៃនាវង៝ច្រាវ។ 36លាសលែៈឆាក់ជាន់ខាន់អៃមៃហោមអាងទាទេ មោអោសគែសនតុកង៝ លាសនទ្រីលែៈនាវរេសខាន់អៃមៃគែសអាងទាទេ តឹមឞានមាអុញឆាគេងងអាងខាន់អៃមៃនៃដ៝ង់”។#យហ ៨:១២; អេផ ៥:៨; ១តេ ៥:៥

ឞ្រាសយេឆូ លាសផូងផារីឆី នទ្រែលមាផូងនើមនតី

(មថ ២៣:១-៣៦; មក ១២:៣៨-៤០)

37ជេសឞ្រាសយេឆូ ងើយនៃ គែសទូហ្វេផូងផារីឆី ជាៈឞ្រាសយេឆូ ហាន់ឆោងឆាតាជៃពាង់រី។ ឞ្រាសយេឆូ ហាន់ត៝ត់តានៃគុឆោងឆានទ្រែលតារី។#លក ៧:៣៦; ១៤:១ 38ឞូនុយ្សផារីឆី អីនៃគែសនាវនទ្រ៝ត់ហីសរាហ៝ល់ងាន់ឆៃឞ្រាសយេឆូ ឆោងមោគែសរាវតី#១១:៣៨៖ តឹងមានាវវៃផូងផារីឆីខាន់ពាង់រាវតីអេល៝រមាឆោង។ មោគែសអោសរាវយ៝រមាអូករាមាវ។ ខាន់ពាង់រាវគៃមាក្ល៝សតឹងមានាវវៃផូងអីឆ្រាអែល ក្លាចលាសកោរាញឞ្រាសមោរ៝មខាន់ពាង់លាសខាន់ពាង់លែៈគែសពាសនទើមោក្ល៝ស។ល៝រ។#មក ៧:២-៤ 39លាសនទ្រីឞ្រាសយេឆូ លាសមាពាង់៖ “ហើយនោ ផូងផារីឆី ខាន់មៃជេងតឹមឞានមាឞូនុយ្សអីរាវងាន រាវយាង់តាឞើសទីសទើម យើនមាតាត្រោមហោមអែអូករាមាវ ខាន់មៃរាវតីតឹងមានាវវៃខាន់មៃ តីសមាតានូយ្សនហ៝ម់ខាន់មៃរីហោមទុតអុចមានាវឆាញឆ្យាន់ នទ្រែលមានាវមឹនអ្យើសមហឹកហោងាន់។ 40ហើយឞូនុយ្សមឞ្លុ លាសកោរាញឞ្រាសលែៈញជេងជេសនទើឞើសទីស តាត្រោមពាង់ញជេងនទើដ៝ង់ លាសនទ្រីពាង់អុចតានូយ្សនហ៝ម់ខាន់មៃអ៝ន់ក្ល៝សតឹមឞានមាឆាក់ជាន់ខាន់មៃដ៝ង់។ 41លាសនទ្រីអ៝ន់អ៝ក់នទើមាឞូនុយ្សអ៝អាច រីមើខាន់មៃក្ល៝សតានូយ្សនហ៝ម់ដ៝ង់ ជេសរីខាន់មៃក្ល៝សឞើសទីសដ៝ង់ ក្ល៝សតានូយ្សនហ៝ម់ដ៝ង់។#លក ១២:៣៣ 42ហើយផូងផារីឆី រេសរាញាល់ងាន់មាខាន់មៃមេ! ខាន់មៃនើសឆ៝ៈនទើគែសជឹតអឹរាហ្វាត់ង្វាយញហើរមាកោរាញឞ្រាស កើតលាសនទើមោខ្លៃ ក្លោយ្ស គីរ នទ្រែលមានទើបោអាបាៈអេងដ៝ង់។ នាវអីញហើរជេងទី តីសមាខាន់មៃមអារ់លើយនាវឆ៝ង់ នទ្រែលមានាវរ៝ង់កោរាញឞ្រាសអីគែសនាវខ្លៃរាលាវឞូ លាសនទ្រីអ៝ន់ខាន់មៃញឆ្រោយ្សញហើរកើតអីនៃមាកោរាញឞ្រាសដ៝ង់ យើនមាលើយច្វេលនាវឆ៝ង់ នទ្រែលមានាវរ៝ង់ដ៝ង់។#កល ២៧:៣០; មកា ៦:៨ 43ហើយផូងផារីឆី រេសរាញាល់ងាន់មាខាន់មៃមេ! យ៝រលាសតានតុកញីសរាបុនផូងឞ៝ន់ខាន់មៃនើសអុចគុឞើសនាប់ឞូអីនតុកឞូលឺងាន់ នទ្រែលមាអុចហាន់រ៝ៈនតុកឞូតាច់ទ្រាប់ អ៝ក់ឞូនុយ្សឞូកុញឞោកមឞាសមាខាន់មៃ។#លក ១៤:៧-១១ 44រេសរាញាល់ងាន់មាខាន់មៃមេ [អីផូងផារីឆី នទ្រែលមាអីផូងនើមនតីនាវវៃផូងឞ៝ន់ ខាន់មៃមពោលនូយ្សនហ៝ម់នទ៝ប់មពោន] យ៝រលាសខាន់មៃនើសជេងតឹមឞានមានតូមោចអ្វាញ់មោឆៃ ជេសរីឞូទែឞ្រោៈជ៝តកាលើមោអោសគឹតឆាក់ នទ្រីពាង់មោហោមក្ល៝សអោស។ កើតនទ្រីដ៝ង់ខាន់មៃអ្វែសតាឞើសទីស តីសមាតានូយ្សនហ៝ម់រីអ្យើស”។

45គែសទូហ្វេនើមនតីនាវវៃផូងអីឆ្រាអែល អើសមាឞ្រាសយេឆូ ពាង់លាស៖ “ហើយនើមនតី មៃងើយកើតអីនៃ ជេងមៃមឺចញឆ៝តមាផូងហេនដ៝ង់មេ”។ 46ឞ្រាសយេឆូ អើសមាពាង់៖ “ហើយផូងនើមនតីនាវវៃផូងឞ៝ន់ រេសរាញាល់ងាន់មាខាន់មៃ យ៝រលាសខាន់មៃតេៈនាវវៃទុតជ៝ក់អ៝ន់មាឞូនុយ្សជាន តីសមាខាន់មៃនើមមោគែសអោសកើលជាននាវអីនៃ ដេៈក៝ៈមោគែសដ៝ង់។#មថ ១១:២៨-៣០; ២៣:៣ 47រេសរាញាល់ងាន់មាខាន់មៃ យ៝រមាខាន់មៃជានអ្វែសងាន់ជៃមោចមាឞូនុយ្សនតើយ្សនាវងើយកោរាញឞ្រាស អីអូចែខាន់មៃលែៈងខឹតលើយកាល់អែនើស តីសមាខាន់មៃមោអោសជានតឹងនាវនតីឞូនុយ្សនតើយ្សនាវងើយកោរាញឞ្រាសអីនៃ។#ការ ៧:៥២ 48ខាន់មៃជានកើតនៃ ខាន់មៃតឹមទីទូនតោរនាវនទ្រែលអូចែខាន់មៃនៃដ៝ង់ ខាន់ពាង់មាងខឹត ខាន់មៃមាជានជៃមោចទើម។ 49នទ្រីកោរាញឞ្រាសអីគែសនាវគឹតមឹនលាសកើតនអា៖ «គ៝ប់ដាៈឞូនុយ្សនតើយ្សនាវងើយគ៝ប់ហាន់អាខាន់ពាង់ នទ្រែលមាកោរាញអ៝សម៝នដ៝ង់ តីសមាឞូនុយ្សអីនៃ អាបាៈខាន់ពាង់ងខឹតលើយ អាបាៈជឹតខាន់ពាង់ជានជេរ»។ 50កើតនទ្រីគ៝ប់កើបឞូនុយ្សតារានោកអាបៃអ្យាគែសទោយ្សងខឹតឞូនុយ្សនតើយ្សនាវងើយកោរាញឞ្រាសនតើមឞើសញជេងនែសនតូ។ ឞ៝លលាសឞូនុយ្សនតើយ្សនាវងើយកោរាញឞ្រាសអីនៃលែៈឞូងខឹតឞើសកាល់អែនើស ទោយ្សអីនៃហោមតេៈត៝ត់មាឞូនុយ្សតារានោកអាបៃអ្យាដ៝ង់‌ 51ជេងនតើមឞើសក៝នអាដាម់ #១១:៥១៖ អាដាម់ ជេងឞូនុយ្សត៝ល់ង្វាយកោរាញឞ្រាសញជេង។ នាវងក៝ចងខឹតអាបែល គែសញចីសតាឆ៝ម់បុតនាវនតើមអីឆ៝ម់បុតត៝ល់ង្វាយតានាវកោរាញឞ្រាសងើយ។រាញាពាង់កាអីន ងខឹតអីអ៝សពាង់រាញាអាបែល នហ៝មាត៝ត់ឞូងខឹតឆាការី #១១:៥១៖ ឆាការី ជេងឞូនុយ្សនតើយ្សនាវងើយកោរាញឞ្រាសកាល់អែនើស នាវងក៝ចពាង់គែសញចីសតា ២នរ ២៤:២០-២១។ ២នាវរេសជេងអ្យាជេងឆាផៅងគ្លែៈទុតតានាវកោរាញឞ្រាសងើយនោកឞ្រាសយេឆូ យើនមានារអ្យាឞូតេៈតានតុកអេងតានាវកោរាញឞ្រាសងើយ។ អីឞូងខឹតពាង់តាវាសវាងញឆឺងគុចពូរនទើជានឞ្រាស មាញីសជានឞ្រាសរី។ គ៝ប់មឞើសមាខាន់មៃ មហាមខាន់ពាង់អីនៃកោរាញឞ្រាសមរាតេៈទោយ្សតារានោកឞូនុយ្សអាបៃអ្យា។#នន ៤:៨; ២នរ ២៤:២០-២១ 52ហើយឞូនុយ្សនើមនតីនាវវៃផូងអីឆ្រាអែល រេសរាញាល់ងាន់មាខាន់មៃមេ យ៝រលាសខាន់មៃមោអ៝ន់ឞូគឹតនាល់នាវងាន់កោរាញឞ្រាស។ នាវអីនៃតឹមឞានមារាដាង់លើយមពោងឞើសទីសមាលាប់នាវកោរាញឞ្រាសម៝ត់អ្វាញ់ ឆាក់ខាន់មៃនើមលែៈមោគែសលាប់តាមពោងអីនៃ ជេសរីខាន់មៃឞ្វៃដ៝ង់ឞូអេងជឹតអីអុចលាប់ មោអ៝ន់លាប់”។#លក ៦:៣៩

53នតើមឞើសឞ្រាសយេឆូ លោសឞើសនតុកនៃ ផូងនើមនតីនាវវៃផូងអីឆ្រាអែល នទ្រែលមាផូងផារីឆី តឹមរាទ៝ង់ដាសពាង់ទុតហោ ជេសរីអោបមពែតពាង់មានាវអេងៗអ៝ក់។ 54ខាន់ពាង់ជានកើតនៃអុចជ៝យនាវលាសឞ្រាសយេឆូ អើសតីស មោលាសងើយតីស គៃមានតោនពាង់រ៝។

Currently Selected:

លូកា 11: cmoK

Highlight

Copy