នាវនតើម 31
31
យាកោបទូញច្វាត់ឞើសលាបាន
1ជេសរីយាកោបតាង់ផូងក៝នឞូក្លោលាបានតឹមលាស៖ “លែៈយាកោបឆ៝ៈញឆ្យាន់ទ្រាប់នទើឞឹឞ៝ន់។ ពាង់នទ្រ៝ង់អ៝ក់ទ្រាប់នទើនៃតាៈឞើសទ្រាប់នទើឞឹឞ៝ន់”។ 2យាកោបឆៃលាបានមោហោមអោសលាង់មឞើសងើយមាពាង់។ 3ជេសរីឞ្រាសយេហោវាលាសមាពាង់៖ “មៃព្លឹឆឹតហ៝ម់តាឞ្រីអូចែមៃនើម តានទុលមពោលមៃនើមរី គ៝ប់មរាគុនទ្រែលមៃ”។#២៨:២០ 4ជេសរីយាកោបដាៈឞូហាន់ក្វាល់រាចែល នទ្រែលមាលេអា ហាន់គុនទ្រែលពាង់តានតុកច្យាប់ឞែឞ្យាប់តានទ្រិចរី។ 5យាកោបលាសមាឞារហៃអូរពាង់នៃ៖ “លែៈគ៝ប់ឆៃឞឹខាន់អៃមោហោមអោសលាង់មឞើសងើយមាគ៝ប់កើតឞើសនតើមនើស យើនមាកោរាញឞ្រាសអីឞឹគ៝ប់យើកមឞាសលែៈគុនទ្រែលគ៝ប់។ 6ខាន់អៃលែៈគឹតដ៝ង់គ៝ប់គុជានការអ៝ន់មាឞឹខាន់អៃ លែៈឞើសឞ្រាត់ឆ្វានគ៝ប់ងាន់។ 7យើនមាឞឹខាន់អៃពាង់នទើមមរោសគ៝ប់ ពាង់ងើយមព្លាច់នទើងខោមមាគ៝ប់លែៈជឹតតឹ។ យើនមាកោរាញឞ្រាសមោអោសអ៝ន់ពាង់ជានអ្យើសមាគ៝ប់។ 8លាសឞឹខាន់អៃលាស៖ «ទឹងលែៈមពោមពា(ឆ្យុម)អីគែសរាវាញរុកលុកទើម ជេងនទើងខោមមាអ៝ន់បែទាទេ» ជេសរីទឹងលែៈមពោមពា(ឆ្យុម)ត៝ត់មាទែសក៝នគែសរាវាញរុកលុកទាទេរ៝ លាសឞឹខាន់អៃលាស៖ «ទឹងលែៈមពោមពា(ឆ្យុម)អីគែសរាវាញមព៝រទើម ជេងនទើងខោមមាអ៝ន់បែទាទេ» ជេសរីត៝ត់មាទែសក៝នគែសរាវាញមព៝រទាទេដ៝ង់។ 9កើតនទ្រីកោរាញឞ្រាសឆ៝ៈមពោមពា(ឆ្យុម)ឞឹខាន់អៃអ៝ន់មាគ៝ប់។ 10នោកខៃតឹមជើងមពោមពា(ឆ្យុម) គែសទូមាង់គ៝ប់មឞើយឆៃឞែងក្វ៝ង់ជើងឞែមែ តានៃឞែងក្វ៝ង់គែសរាវាញមព៝រ នទ្រែលមាគែសរាវាញរុកលុកទាទេ។ 11ជេសរីតោងពារ់កោរាញឞ្រាសក្វាល់គ៝ប់៖ «ហើយយាកោប!” គ៝ប់អើស៖ «ម៝សនទើ»។ 12តោងពារ់នៃលាស៖ «មៃអ្វាញ់នៃ! ទឹងលែៈឞែងក្វ៝ង់ជើងឞែមែ តានៃឞែងក្វ៝ង់គែសរាវាញមព៝រ នទ្រែលមារាវាញរុកលុកទាទេ យ៝រលាសគ៝ប់លែៈឆៃនាវលាបានទែជានមាមៃ។ 13គ៝ប់អ្យាកោរាញឞ្រាសអីញហើឆាក់មាមៃតាប៝នបេតអែល នតុកមៃត៝ៈទាកងីតាងគ៝ង់លុនៃនើស នអ៝ប់មាមៃត៝នមាគ៝ប់ដ៝ង់។ អាបៃអ្យាមៃទ៝ក់លោសឞើសឞ្រីទាកអ្យាហ៝ម់ ព្លឹឆឹតតានតុកឞ្រីទាកទែសមៃនើមរីនើស»”។#២៨:១៨-២២; ៣៥:១, ១៤-១៥ 14រាចែល នទ្រែលមាលេអាអើសមាយាកោប៖ “ឞឹហេនពាង់មោគែសអោសអ៝ន់ទ្រាប់នទើខ្លៃមានទ្រៃអ៝ន់មាហេន។ 15ពាង់លែៈកើបហេនជេងតឹមឞានមាផូងឞូនាច់ដ៝ង់ ពាង់តឹមឞានមាតាច់ហេន ជេសរីទ្រាប់នទើអីមៃលែៈជានការមាពាង់យ៝រមាហេន ពាង់ឆ៝ៈមាពាង់នើមទើម។ 16ទឹងលែៈទ្រាប់នទើកោរាញឞ្រាសទែអ៝ន់មាមៃឆ៝ៈតាៈឞើសឞឹហេន ជេងទ្រាប់នទើមាហេន នទ្រែលមាផូងអ៝សក៝នហេន។ លាសនទ្រីមៃជានហ៝ម់ម៝សនទើកោរាញឞ្រាសទែដាៈមាមៃ”។
17ជេសរីយាកោបទ៝ក់ហាន់ ពាង់អ៝ន់អូរអ៝ន់ក៝នពាង់ញច៝ឆែសឆាមោ 18ជេសរីពាង់វែងទឹងលែៈមពោមពា(ឆ្យុម)ផូងពាង់នើម នអ៝ប់មាញអោតលែវទឹងលែៈទ្រាប់នទើពាង់គែសទោលពាង់គុតាឞ្រីពាដាន-អារាមនៃនើស គៃមាព្លឹឆឹតតាអីឆាក់ឞឹពាង់នើមតាឞ្រីកានានរី។ 19ទោលនៃលាបាននទុតហាន់ក៝សរាឆៅឞែឞ្យាប់ពាង់នើម ជេសរីរាចែលនតុងលែៈផ្យៅរូបឞ្រាសឞឹពាង់តាជៃរីដ៝ង់។#៣៥:២ 20យាកោបញច្វាត់នតុងមាលាបានផូងអារាមនៃ ពាង់មោអោសមឞើសអ៝ន់លាបានគឹត។ 21យាកោបញអោតលែវលែៈផ្យៅទឹងលែៈទ្រាប់នទើពាង់គែស។ ពាង់ហាន់គ្លាត់ទាករាលាយអើប្រាត ហាន់លែតជឹតយោកឞ្រីកាលាតរី។
លាបានតឹងឞានយាកោប
22ត៝ត់លែៈពែនារ គែសឞូហាន់មឞើសមាលាបាននាវយាកោបលែៈញច្វាត់នៃ។ 23ជេសរីលាបានលែវនទុលមពោលពាង់ហាន់តឹងយាកោប ខាន់ពាង់តឹងពើសនារ រីមើទឹងឞានតាយោកកាលាតរី។ 24យើនមាកោរាញឞ្រាសហាន់មឞើសមាលាបានផូងអារាមនៃតានាវមឞើយតានោកមាង់ ពាង់លាស៖ “មៃញជ្រាង់ហ៝ៈ មៃលើយអោសទាសមាងើយមាយាកោប ឞ៝លលាសនាវអ្វែស មោលាសនាវអ្យើស”។ 25លាបានតឹងឞានយាកោប នោកយាកោបលែៈគុរាទ៝ក់ចូនឞ៝កតាកាលើយោកឞ្រីកាលាតរី លាបាន នទ្រែលមានទុលមពោលពាង់គុរាទ៝ក់ចូនឞ៝កតាកាលើយោកកាលាតរីដ៝ង់។ 26លាបានលាសយាកោប៖ “ម៝សទឹងបែជានក្វែញច្វាត់នតុងមាគ៝ប់? រាទូក៝នឆៅគ៝ប់ តឹមឞានមាឞូញុបវែងឞើសនតុកតឹមលើសតឹមឆ្រែសនៃ ម៝សទឹងបែជានកើតនៃ? 27ម៝សទឹងបែញច្វាត់នតុងមាគ៝ប់កើតនៃ មោមឞើសអ៝ន់គ៝ប់គឹត? លាសគ៝ប់គឹត គ៝ប់ញជុនខាន់បែមានាវរាម់មអាក នអ៝ប់មាមព្រឹតមាមព្រើ នអ៝ប់មាគ៝សគ៝ងគ៝សគ៝រ់ គ៝សគ៝ងរេងងាន់រ៝។ 28ម៝សបែមោអ៝ន់គ៝ប់ចុមគ៝ប់នតិញក៝នឆៅគ៝ប់? បែជានកើតនៃជេងរាលូកម៝ល់ងាន់។ 29គ៝ប់គែសនាវទើយលើសខាន់បែ យើនមាកោរាញឞ្រាសអីឞឹបែយើកមឞាសលែៈពាង់ឞ្វៃគ៝ប់អាមាង់នើស ពាង់លាស៖ «មៃញជ្រាង់ហ៝ៈ មៃលើយអោសទាសមាងើយមាយាកោប ឞ៝លលាសនាវអ្វែស មោលាសនាវអ្យើស»។ 30អាបៃអ្យាលាសបែញច្វាត់យ៝រមាមោអ្យាង់ឞឹមោច្រាវវាៈ លាសនទ្រីម៝សទឹងបែនតុងនអ៝ប់មារូបឞ្រាសគ៝ប់?” 31យាកោបអើសមាលាបាន៖ “ទឹងគ៝ប់ជានកើតនអា យ៝រលាសគ៝ប់ក្លាចបែឆ៝ៈពីតអ៝សក៝នបែនើមតាៈឞើសគ៝ប់។ 32ល៝ង់រូបឞ្រាសបែរី លាសបែឆៃតាឞូម៝ស អ្យាត់មាងខឹតឞូនុយ្សអីនៃ។ បែញឆើរជ៝យអាប់ឞូនុយ្សតានាប់ឞាល់មពោលបែនៃទោ លាសឆៃគែសនទើបែ បែឆ៝ៈឆឹតទោ”។ យើនមាយាកោបមោអោសគឹតលាសលែៈរាចែលទែញអោតនតុងរូបឞ្រាសរី។ 33ជេសរីលាបានលាប់តាចូនយាកោប លាប់តាចូនលេអា នទ្រែលមាលាប់តាចូនឞូនុយ្សឆើមកើលជានការមាលេអា រាចែល ជ៝យនទើនៃមោឆៃអោស។ លាបានលោសឞើសចូនលេអារី លាប់តាចូនរាចែល។ 34រាចែលឆ៝ៈទឹងលែៈរូបឞ្រាសអីនៃ ពាង់ពោនតាទុរឆែសឆាមោរី ជេសរីពាង់នើមគុឞើសលើ។ លាបានជ៝យលាមចូននៃ ជ៝យមោអោសឆៃនទើ។ 35រាចែលមឞើសមាឞឹពាង់៖ “លើយតាឞឹក្លាប់នទាង់មាគ៝ប់ គ៝ប់មោទ៝ក់តានាប់មៃ គ៝ប់មោទើយទ៝ក់ យ៝រលាសគ៝ប់មោអ្វែសឆាក់”។ កើតនទ្រីពាង់ជ៝យរូបឞ្រាសអីនៃ យើនមាមោអោសឆៃ។
36 យាកោបជីនូយ្សងាន់ ពាង់លាសលាបាន៖ “ម៝សទោយ្សគ៝ប់ ម៝សនទើតីសតាគ៝ប់ទឹងបែតឹងគ៝ប់នអ៝ប់មានូយ្ស? 37ទោលបែញឆើររាហីនទើគ៝ប់ ម៝សបាៈបែឆៃនទើបែតាផូងហេន? ល៝ង់បែញហើអ៝ន់មាឞាល់មពោលគ៝ប់ឆៃ ញហើអ៝ន់មាឞាល់មពោលបែឆៃតាអ្យា គៃមាអ៝ន់ផូងខាន់ពាង់នៃឆើមផាតទោយ្សមាឞារហៃឞ៝ន់។ 38លែៈ ២០ នាម់ គ៝ប់គុនទ្រែលបែ ទឹងលែៈឞែឞ្យាប់មែ នទ្រែលមាឞែមែបែ មោគែសអោសទូមល៝ម់រាលេសក៝ន ឞែឞ្យាប់ងក្វ៝ង់បែទូមល៝ម់គ៝ប់មោហ៝ៈគែសឆាដ៝ង់។ 39លាសគែសមពោមពា(ឆ្យុម)ឞ្រីកាប់ឆា បែហោមដាៈគ៝ប់ត្រ៝ៈ មោអោសអ៝ន់គ៝ប់ញអោតមពោមពា(ឆ្យុម)ខឹតនៃនទឹអ៝ន់បែមាឆៃទើម លាសគែសឞូនតុងនោកនារ មោលាសនោកមាង់ បែដាៈគ៝ប់ត្រ៝ៈទាទេ គ៝ប់ត្រ៝ៈអ៝ន់បែមរ៝។ 40កើតនអាងាន់នាវគ៝ប់ញឆ្រោយ្ស នោកនារមាទោសនារ នោកមាង់មានអីក នទ្រែលមារាងែសមាង់គាង់មាត់ងាន់។ 41គ៝ប់គុនទ្រែលបែជ៝ៈ ២០ នាម់ គ៝ប់ជានការមាបែ ១៤ នាម់ គៃមាគែសឆ៝ៈក៝នឞូអូរបែឞារហៃនៃ ជេសរីព្រាវនាម់ជឹតគៃមាគែសមពោមពា(ឆ្យុម)ផូង។ យើនមានទើងខោមគ៝ប់នៃ បេងមាងើយមព្លាច់ជឹតតឹងាន់។#២៩:២០, ៣០; ៣០:៣១-៣៤ 42លាសមោគែសកោរាញឞ្រាសអីចែគ៝ប់យើកមឞាស អីឞឹគ៝ប់ក្លាចយើកនៃគុនទ្រែលគ៝ប់ បែអ៝ន់គ៝ប់ឆឹតមពាងតីទើមងាន់រ៝។ កោរាញឞ្រាសលែៈឆៃនទើជេរតាគ៝ប់ កើតនទ្រីទឹងអាមាង់នើសពាង់លាសបែ”។
43 លាបានលាសមាយាកោប៖ “ផូងឞូអូរអ្យាក៝នគ៝ប់ទាទេ ទឹងលែៈផូងក៝នឆែអ្យាឆៅគ៝ប់ទាទេ ទឹងលែៈមពោមពា(ឆ្យុម)អ្យាមពោមពា(ឆ្យុម)គ៝ប់ នទ្រែលមាទឹងលែៈនទើបែឆៃតាអ្យានទើគ៝ប់ទាទេ នារអ្យាគ៝ប់មោអោសទាន់ឆ៝ៈក៝នឞូអូរគ៝ប់ គ៝ប់មោអោសទាន់ឆ៝ៈឆៅគ៝ប់ខាន់ពាង់ឞាៈនៃ។ 44លាសនទ្រីនារអ្យាអ៝ន់ឞ៝ន់ជាននាវតឹមរាង្លាប់ឞាល់ នអ៝ប់មាជាននទើមឞេនអ៝ន់មាហោមកាសគឹត”។ 45ជេសរីយាកោបឆ៝ៈទូមល៝ម់លុ ពាង់រាទ៝ក់ជានងគ៝ង់តារី។ 46ពាង់លាសមាឞាល់មពោលពាង់៖ “ខាន់អៃមៃឞូនលុហ៝ម់”។ ខាន់ពាង់ទោញលុឞូនរាទុល ជេសរីលែវឞាល់គុឆោងតាមែងនៃ។ 47លាបានក្វាល់នតុកនៃរាញា៖ «យេការ-ឆាហាដូថា» យើនមាយាកោបក្វាល់នតុកនៃរាញា៖ «កាលេត»។ 48ជេសរីលាបានលាស៖ “នារអ្យាឞ៝ន់ឆ៝ៈលុអ្យាជាននទើមឞេនបែនទ្រែលគ៝ប់”។ កើតនទ្រីទឹងឞូក្វាល់លុអីឞូននៃរាញា «កាលេត» គែសនាវខ្លៃលាស«ឞូនលុនាក់ឆៃនាក់តាង់»។#យោឆ ២៤:២៧ 49យើនមាឞូក្វាល់ «មីសពា» ដ៝ង់ គែសនាវខ្លៃលាស«ច្វាញងកើងមានតុកញជ្រាង់» យ៝រលាសលាបានលាស៖ “ទាន់ឞ្រាសយេហោវាញជ្រាង់បែនទ្រែលគ៝ប់ ទោលឞ៝ន់គុតឹមបាសងាយ។ 50លាសបែជានអ្យើសមាក៝នឞូអូរគ៝ប់ មោលាសឆ៝ៈអូរអេងនោកខាន់ពាង់ហោមរេស ឞ៝លលាសខាន់ពាង់មោគែសនទុលមពោលគុនទ្រែលកាដោយ ហោមគែសកោរាញឞ្រាសដ៝ង់ឆៃ យ៝រលាសពាង់អីលែៈគឹតឆៃនាវឞ៝ន់លែៈតឹមរាង្លាប់តាអ្យា”។ 51លាបានងើយតៃមាយាកោប៖ “អ្វាញ់អ្យាយឹ លុឞូនអ្យា នទ្រែលមាងគ៝ង់លុអ្យាលែៈគ៝ប់តេៈតាងក្លាងងគូលវាសវាងបែមាគ៝ប់។ 52លុឞូនអ្យា នទ្រែលមាងគ៝ង់លុអ្យាជេងនទើមឞេនមានាវឞ៝ន់លែៈតឹមរាង្លាប់អ៝ន់មាងកាសតោរឞ៝ន់ គ៝ប់មោអោសមរាហាន់រាលាវឞើសដាសលុអ្យាគៃមាលើសបែ បែក៝ៈមោដ៝ង់មរាហាន់រាលាវឞើសដាសលុអ្យាគៃមាលើសគ៝ប់។ 53ទាន់កោរាញឞ្រាសអីអាឞ្រាហាម់ អីនាហោរ នអ៝ប់មាអីឞឹខាន់ពាង់យើកមឞាសនៃ ឆើមផាតទោយ្សអ៝ន់មាឞ៝ន់”។ ជេសរីយាកោបត៝នដ៝ង់ តារាញាកោរាញឞ្រាសអីអីឆាក់អីឞឹពាង់ក្លាចយើករីពាង់ត៝ន។
54 យាកោបញហើរនទើជានឞ្រាសតាកាលើយោកនៃ ជេសរីពាង់ក្វាល់ទឹងលែៈផូងអីគុតានៃវាច់ឆោងឆានទ្រែល។ ជេសឆោងជេសឆា ខាន់ពាង់ឞិចតាកាលើយោកនៃទូមាង់។ 55អើមអោយលាបានទ៝ក់ ពាង់ចុមក៝នចុមឆៅពាង់រី នទ្រែលមាអ៝ន់គែសជេងមាផូងខាន់ពាង់។ ជេសរីពាង់ព្លឹឆឹតតៃតាឞ្រីពាង់នើម។
Currently Selected:
នាវនតើម 31: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
