នាវនតើម 27
27
យាកោបនតុងនាវគែសជេងអេឆាវ
1ត៝ត់អីឆាក់លែៈរាញងាន់ មាត់ពាង់ង៝អ្វាញ់មោហោមអោសឆៃ។ ពាង់ក្វាល់អេឆាវក៝នឞោកទាកពាង់រី៖ “ហើយនោ” អេឆាវអើស៖ “ម៝សឞឹ!” 2ឞឹពាង់លាស៖ “គ៝ប់អ្យាលែៈរាញ មោគឹតនារខឹត។ 3លាសនទ្រីមៃឆ៝ៈនទើមៃវៃពាញ់ នាដូតហារ់ទឹងកាម់ ហាន់អាឞ្រីពាញ់ព្វាច់អ៝ន់មាគ៝ប់។#២៥:២៧-២៨ 4មៃជានត្រាវព្វាច់នៃអ៝ន់ទុតកាសមាគ៝ប់ អ៝ន់ទីក៝គ៝ប់វៃឆា គ៝ប់ឞែមាឆោង ជេសរីទឹងគ៝ប់អ៝ន់គែសជេងមាមៃ អេល៝រមាគ៝ប់ខឹត”។ 5ជេសរីអេឆាវហាន់អាឞ្រីរី ជ៝យពាញ់ព្វាច់មាអ៝ន់អីឞឹពាង់។ នោកអីឆាក់ងើយមាអេឆាវក៝នពាង់នៃនើស រេបេកាតាង់ដ៝ង់។
6ជេសរីរេបេកាមឞើសមាយាកោបក៝នពាង់នៃ៖ “គ៝ប់តាង់ឞឹមៃលាសមាអេឆាវនោមៃកើតនអា៖ 7«ពាញ់ព្វាច់អ៝ន់មាគ៝ប់ ជេសរីជានត្រាវអ៝ន់ទុតកាសមាគ៝ប់ អ៝ន់ទីក៝គ៝ប់វៃឆា គ៝ប់ឞែមាឆោង ជេសរីទឹងគ៝ប់អ៝ន់គែសជេងមាមៃតានាប់មាត់ឞ្រាសយេហោវា អេល៝រមាគ៝ប់ខឹត»។ 8លាសនទ្រីអើនោ មៃអ្យាត់នាវគ៝ប់ ជានតឹងនាវគ៝ប់ដាៈមាមៃ។ 9មៃហាន់តាឞែឞ្យាប់ផូងរី ជេសរីឆ៝ៈឞារអឹក៝នឞែអីអ្វែសៗអ៝ន់មាគ៝ប់ គ៝ប់ឞែមាជានត្រាវអ៝ន់ទុតកាស អ៝ន់ទីក៝ឞឹមៃវៃឆា។ 10មៃញអោតត្រាវនៃញជុនអ៝ន់ឞឹមៃឆា គៃមាពាង់អ៝ន់គែសជេងមាមៃ អេល៝រមាពាង់ខឹត”។ 11យើនមាយាកោបអើសមាមេៈពាង់៖ “អេឆាវនោគ៝ប់ ពាង់គែសរាឆៅលាមឆាក់ ល៝ង់គ៝ប់មោអោសគែសរាឆៅ។#២៥:២៥ 12ក្លាប់លាសឞឹគ៝ប់ពាង់ឞូតគ៝ប់ ជេសរីគឹតគ៝ប់ជេងឞូនុយ្សនទើមពាង់ លាសនទ្រីគ៝ប់មោអោសគែសឆ៝ៈទើនគែសជេងតាៈឞើសឞឹគ៝ប់ គែសងខើងនាវរាតាប់ច្រាវ”។ 13មេៈពាង់លាស៖ “អើនោ អ៝ន់នាវរាតាប់នៃគែសតាគ៝ប់ អ៝ន់មៃជានតឹងនាវគ៝ប់ ហាន់ឆ៝ៈហ៝ម់ឞែលែវអាគ៝ប់អ្យា”។ 14ជេសរីយាកោបហាន់ឆ៝ៈឞែញជុនអ៝ន់មេៈពាង់ មេៈពាង់ជានត្រាវអ៝ន់ទុតកាស អ៝ន់ទីក៝អីឞឹពាង់វៃឆា។ 15ជេសរីមេៈពាង់ឆ៝ៈអាវអេឆាវ អាវអីទុតអ្វែសអីគែសតាជៃរេបេកានើមរី ឆើមញឆ៝សអ៝ន់មាយាកោបអីអ៝សពាង់នៃ។ 16ពាង់ឆ៝ៈដ៝ង់រាឆៅឞែពូតតាគ្លាន់តី នទ្រែលមាតាត៝ងក៝យាកោបរី។ 17ជេសឞើសនៃមេៈពាង់រីឆ៝ៈត្រាវព្វាច់ទុតកាស នទ្រែលមានុមពាង់អីព្រែលែៈជេសជានរីនើស នទឹអ៝ន់យាកោបញអោត។
18ជេសរីយាកោបញជុនព្យាង់ត្រាវនៃមាឞឹពាង់ ពាង់លាស៖ “ហើយឞឹ!” អីឆាក់អើស៖ “គ៝ប់តាអ្យា ឞូម៝សមៃរីអើនោ?” 19យាកោបអើស៖ “គ៝ប់ហែសឞឹ គ៝ប់អេឆាវក៝នឞោកទាកមៃហែស លែៈជេសគ៝ប់ជានតឹងនាវមៃដាៈមាគ៝ប់នើស ទ៝ក់ហ៝ម់ ឆាព្វាច់អីគ៝ប់ឞែពាញ់តាៈឞើសឞ្រីអ្យាប៝ត់ ជេសរីទឹងមៃអ៝ន់គែសជេងមាគ៝ប់”។ 20អីឆាក់អោបពាង់៖ “អើនោ មើមទឹងងាច់គែសពាញ់មរែរី?” យាកោបអើស៖ “ឞ្រាសយេហោវាអីឞ្រាសមៃយើកមឞាសឆើមកើលអ៝ន់គ៝ប់”។ 21អីឆាក់លាសមាយាកោប៖ “អើនោ មៃហាន់ទាច់អាគ៝ប់អ្យាដេៈគ៝ប់ឞែមាឞូត គៃមាគឹតនហេលមៃក៝នគ៝ប់អេឆាវងាន់លាសមោ”។ 22យាកោបហាន់ទាច់អាឞឹពាង់រី ជេសរីឞឹពាង់ឞូត ពាង់លាស៖ “តីអ្យាជេងតីអេឆាវងាន់ តីសមាងើយរីងើយយាកោប”។ 23អីឆាក់មោអោសគឹតនាល់យាកោប យ៝រលាសអីតីពាង់រីគែសរាឆៅតឹមឞានមាតីអេឆាវដ៝ង់។ យើនមាអេល៝រពាង់អ៝ន់គែសជេងមាយាកោប 24ពាង់អោបនហេល៖ “មៃអេឆាវក៝នគ៝ប់ងាន់ឞើស?” យាកោបអើស៖ “អើគ៝ប់ងាន់”។ 25អីឆាក់លាសមាក៝នពាង់៖ “ពឺត្រាវព្វាច់អ៝ន់ទាច់កេងគ៝ប់អ្យា គ៝ប់ឞែមាឆាព្វាច់អីមៃពាញ់នៃប៝ត់នោ តៃទឹងគ៝ប់អ៝ន់គែសជេងមាមៃ”។ យាកោបពឺត្រាវព្វាច់អ៝ន់ឞឹពាង់ឆា ពាង់កេតដ៝ង់នទ្រាញ់ព្លៃយុងយារប៝នអ៝ន់ឞឹពាង់ញេត។ 26ជេសរីអីឆាក់ឞឹពាង់រីលាសមាក៝នពាង់៖ “អើនោ មៃហាន់ទាច់អាអ្យាចុមគ៝ប់ប៝ត់”។ 27យាកោបហាន់ទាច់ចុមអីឞឹពាង់រី អីឞឹពាង់រីនាល់បោងលុមឞ៝កអាវអេឆាវ ជេសរីពាង់អ៝ន់គែសជេងមាយាកោប ពាង់លាស៖
“បោងលុមក៝នគ៝ប់រីជេងបោងលុមមីរឞ្រាសយេហោវាទែលែៈអ៝ន់គែសជេង។#ហេឞ ១១:២០
28ទាន់កោរាញឞ្រាសអ៝ន់មាមៃគែសទាករាងេតតាៈឞើសកាលើត្រោក
នទ្រែលមាអ៝ន់នែសកាសមាមៃដ៝ង់។ ទាន់កោរាញឞ្រាសអ៝ន់មៃគែសឞា នទ្រែលមាអ៝ន់មៃគែសនទ្រាញ់ព្លៃយុងយារប៝នទុតអ៝ក់។
29ទាន់ពាង់អ៝ន់ផូងឞូនុយ្សអេងៗអ៝ន់ឆើមកើលជានការមាមៃ។
ទាន់ពាង់អ៝ន់ឞូនុយ្សឞ្រីទាកអេងៗកុញឞោកយើកមាមៃ។
ទាន់ពាង់អ៝ន់មៃជេងកោរាញមាអ៝សនោទូនទុលទែសមៃនើម។
ទាន់ពាង់អ៝ន់អ៝សនោទូនទុលទែសមាមៃកុញឞោកយើកមាមៃ។
ឞូម៝សពាង់អីរាតាប់មៃអ៝ន់កោរាញឞ្រាសរាតាប់មាពាង់។
ឞូម៝សពាង់អីអ៝ន់គែសជេងមាមៃអ៝ន់កោរាញឞ្រាសអ៝ន់គែសជេងមាពាង់ដ៝ង់”។#១២:៣; ២៥:២៣; មាល ១:២-៣; រម ៩:១០-១៣
30លែៈជេសអីឆាក់អ៝ន់គែសជេងមាយាកោប នទុតយាកោបទូលោសឞើសឞឹពាង់នៃ អេឆាវឆឹតពាញ់ព្វាច់ឞើសឞ្រីរី។ 31ពាង់ជានត្រាវទុតកាសញជុនអ៝ន់ឞឹពាង់ដ៝ង់ ពាង់លាសមាឞឹពាង់៖ “ហើយឞឹ ទ៝ក់ហ៝ម់ ឆាព្វាច់គ៝ប់ឞែអីពាញ់អ្យាប៝ត់ ជេសរីទឹងមៃអ៝ន់គែសជេងមាគ៝ប់”។ 32អីឆាក់ឞឹពាង់រីអោប៖ “ឞូម៝សមៃរី?” អេឆាវអើស៖ “គ៝ប់អេឆាវហែសឞឹ ក៝នឞោកទាកមៃហែស”។ 33អីឆាក់ញឆ៝រ់ឆាក់ទុតហោ ពាង់អោប៖ “លាសនទ្រីឞូម៝សញអោតព្វាច់អ៝ន់មាគ៝ប់នទើសនើស? ឞើសនាប់មៃនើសអាពើ គ៝ប់ឆាព្វាច់ពាង់លែៈផ្យៅ ជេសរីគ៝ប់អ៝ន់គែសជេងមាពាង់។ កោរាញឞ្រាសមរាអ៝ន់គែសជេងនៃមាពាង់នហ៝រ៝ងាន់”។ 34ត៝ត់អេឆាវតាង់នាវឞឹពាង់លាសនៃ ពាង់នតែរទុតទាង់ នអ៝ប់មារាង៝តហោងាន់ ពាង់លាសមាឞឹពាង់៖ “អើឞឹ អ៝ន់គែសជេងមាគ៝ប់ដ៝ង់អើ!” 35អីឆាក់អើសមាពាង់៖ “អ៝សមៃពាង់ឞ្រោៈនទើម ជេសរីពីតលើយគែសជេងមៃ”។#ហេឞ ១១:២០ 36អេឆាវលាស៖ “ទីងាន់ឞូតេៈរាញាពាង់«យាកោប»នៃ យ៝រលាសពាង់ពីតលើយនទើគ៝ប់លែៈឞារតឹមាអ្យាជេស ទូតឹពាង់ពីតនាវខ្លៃក៝នឞោកទាកគ៝ប់ អាបៃអ្យាពាង់ពីតដ៝ង់គែសជេងគ៝ប់ជឹត។ អើឞឹ លាសនទ្រីមៃមោរ៝ងគែសជេងមាអ៝ន់គ៝ប់ដ៝ង់?”#នន ២៥:២៩-៣៤ 37អីឆាក់លាសមាអេឆាវ៖ “លែៈគ៝ប់អ៝ន់ពាង់ជានកោរាញមៃជេស ជេសរីលែៈផូងអ៝សនោពាង់ លែៈគ៝ប់អ៝ន់ខាន់ពាង់ឆើមកើលជានការមាពាង់ទាទេ។ ឞា នទ្រែលមាព្លៃយុងយារប៝នលែៈគ៝ប់អ៝ន់មាពាង់ដ៝ង់ លាសនទ្រីមាៈនទើគ៝ប់អ៝ន់មាមៃ?” 38អេឆាវអោបឞឹពាង់៖ “អើឞឹ មៃគែសទូនៃទើមគែសជេងមៃ? ពាៈគ៝ប់ដ៝ង់គែសជេងមៃឞឹអើ”។ នោកនៃអេឆាវញុមនតែរងាន់។#ហេឞ ១២:១៧ 39អីឆាក់ឞឹពាង់រីលាសមាពាង់៖
“មៃតៃគុតានតុកនែសឆ៝ត់
ទាករាងេតតាៈឞើសកាលើត្រោកមោគែសដ៝ង់។#ហេឞ ១១:២០
40មៃតៃរេសឆ្យាម់ឆាក់មាដាវមៃនើម
នទ្រែលមាគុឆើមកើលជានការមាអ៝សមៃនើម។
យើនមាគែសទូនារ មៃមរាក្លាយ្សឞើសអ៝សមៃ
មអារ់លើយម៝ង់មឞាក់ពាង់តាត៝ងក៝មៃ”។#នន ៣៦:៨; ២កក ៨:២០
យាកោបទូគុនទ្រែលលាបាន
41 អេឆាវជីនូយ្សយាកោបទុតហោងាន់ យ៝រមានាវគែសជេងឞឹពាង់អ៝ន់នៃលែៈយាកោបឆ៝ៈ។ អេឆាវលាសអេងតានូយ្សនហ៝ម់ពាង់រី៖ “នារញុមរាង៝តឞឹគ៝ប់ខឹតឞើយមាត៝ត់ នោកនៃតៃទឹងគ៝ប់ងខឹតលើយពាង់”។ 42គែសឞូហាន់មឞើសមារេបេកានាវអេឆាវក៝នឞោកទាកពាង់លាសនៃ ជេសរីរេបេកាដាៈឞូហាន់ក្វាល់យាកោបអីអ៝សរី មឞើសមាពាង់៖ “អេឆាវនោមៃ ពាង់អុចព្លើងមាមៃ អុចងខឹតលើយមៃ។ 43អើនោ អាបៃអ្យាមៃអ្យាត់នាវគ៝ប់ មៃញច្វាត់តាប៝នចារាន គុអានោគ៝ប់លាបានរីទោ។ 44អ៝ន់មៃគុនទ្រែលពាង់ជ៝ៈអ៝យ ត៝ត់នោមៃនអីកនូយ្សប៝ត់។ 45ត៝ត់ពាង់ឞាសនូយ្សមាមៃ លែៈច្វេលនាវមៃជានមាពាង់នើស តៃទឹងគ៝ប់ដាៈឞូហាន់មឞើសមៃព្លឹឆឹតតៃតាអ្យា យ៝រលាសគ៝ប់មោអុចអោសឆៃខាន់មៃខឹតលែៈឞារហៃទូនារ#២៧:៤៥៖ តឹងនាវវៃតានោកនៃ ឞូតេៈទោយ្សត៝ត់ខឹតឆាក់មាឞូនុយ្សអីងខឹតឞូ។ លាសអេឆាវងខឹតយាកោប ឞូមរាងខឹតអេឆាវរ៝។”។ 46រេបេកាលាសមាអីឆាក់៖ “គ៝ប់ទឹលងាន់មាមាន់ឞូអូរផូងហេតអ្យា លាសយាកោបឆ៝ៈអូរផូងហេតតាឞ្រីអ្យាដ៝ង់ គ៝ប់មោហោមអុចអោសរេស”។#២៤:៣-៤
Currently Selected:
នាវនតើម 27: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
