នាវនតើម 24
24
តឹមនអាប់អីឆាក់
1 អាឞ្រាហាម់ លើមារាញងាន់ ឞ្រាសយេហោវាលែៈអ៝ន់នាវគែសជេងតាលែៈនតីលនទើមាពាង់។ 2គែសទូនាររីអាឞ្រាហាម់ លាសមាឞូនុយ្សជានការមាពាង់ ឞូនុយ្សអីរាញរាលាវឞូគុតាជៃពាង់ នទ្រែលមានើមអីនៃជេងឞូនុយ្សម៝ត់អ្វាញ់ទឹងលែៈទ្រាប់នទើពាង់ដ៝ង់ ពាង់លាស៖ “អ៝ន់មៃតេៈតីតាន៝ម់តឹមឞ្លូគ៝ប់អ្យា 3ជេសរីអ៝ន់មៃត៝នមាឞ្រាសយេហោវា អីកោរាញឞ្រាសមាត្រោក នទ្រែលមានែសនតូ អ៝ន់មៃលាស មៃលើយអោសជ៝យអូរអ៝ន់មាក៝នគ៝ប់តាៈឞើសឞូអូរផូងកានានតានតុកឞ្រីគ៝ប់គុអ្យា។#២៦:៣៤-៣៥; ២៧:៤៦; ២៨:១-២, ៦-៩; នវ ៧:៣-៤ 4អ៝ន់មៃហាន់តានតុកឞ្រីទែសគ៝ប់នើមរី ជេសរីឆើមជ៝យអូរតាៈឞើសនទុលមពោលគ៝ប់នើមតានៃអ៝ន់មាក៝នអីឆាក់គ៝ប់”។ 5ឞូនុយ្សជានការនៃអើសមាពាង់៖ “ក្លាប់លាសឞូអូរនៃមោអុចអោសហាន់តឹងគ៝ប់តាឞ្រីអ្យា លាសនទ្រីអ៝ន់គ៝ប់លែវក៝នមៃហាន់ព្លឹគុតាឞ្រីនតុកឞ្រីមៃទូលោសនៃនើសឞើស?” 6អាឞ្រាហាម់ លាសមាពាង់៖ “មៃញជ្រាង់ហ៝ៈ គ៝ប់លាសមាមៃ ក៝នគ៝ប់មោអោសអ៝ន់លែវហាន់តាឞ្រីនៃ! 7យ៝រលាសឞ្រាសយេហោវាអីកោរាញតាកាលើត្រោកលែៈលែវជេសគ៝ប់ទូលោសឞើសនទុលមពោលគ៝ប់ ឞើសនតុកឞ្រីទែសគ៝ប់នើម ជេសរីពាង់លែៈលាសមាគ៝ប់ នទ្រែលមាលែៈត៝នដ៝ង់ នហេលនានេៈងាន់ឞ្រីអ្យាពាង់ត៝នអ៝ន់មារាន៝យទែសគ៝ប់។ លាសនទ្រីពាង់ដាៈតោងពារ់ពាង់នើមហាន់ឞើសនាប់មៃរ៝គៃមាកើលមៃ ជេសរីអ៝ន់មៃឆ៝ៈអូរមាក៝នគ៝ប់តាៈឞើសឞ្រីនៃ។#១២:១, ៧ 8យើនមាលាសឞូអូរនៃរាលាច់មោអុចហាន់តឹងមៃ មៃលែៈក្លាយ្សជេសនាវមៃត៝នអ្យាមាគ៝ប់ អ្យាត់មាមៃលើយអោសលែវក៝នគ៝ប់ហាន់តាឞ្រីនៃ”។ 9ជេសរីឞូនុយ្សជានការនៃតេៈតីតាតឹមឞ្លូអាឞ្រាហាម់ កោរាញពាង់រី នហ៝មាពាង់ត៝ននាវនៃដាសអាឞ្រាហាម់ ។
10ជេសរីឞូនុយ្សជានការនៃឆ៝ៈឆែសឆាមោជឹតអឹ នទ្រែលមាញអោតទ្រាប់នទើគែសនាវខ្លៃអីកោរាញរីអ៝ន់ ពាង់ហាន់តាប៝ននាហោរឞ្រីមេឆោពោតាមៀរី។ 11ហាន់ត៝ត់កេងទូនតូទាកតាឞើសទីសប៝នរី ពាង់អ៝ន់ទឹងលែៈឆែសឆាមោពាង់រីទ្រោមទាទេ នោកនៃឞ្រីលែៈកេងមាង់តឹមទីមាផូងឞូអូរវៃហាន់ឞ្រោៈឞុកទាកត៝។ 12ឞូនុយ្សជានការនៃមឞើសឆើម៖ “អើឞ្រាសយេហោវា អីឞ្រាសអាឞ្រាហាម់ ជេងកោរាញគ៝ប់យើកមឞាស នារអ្យាទាន់មៃកើលគ៝ប់ អ៝ន់គ៝ប់តឹមម៝ប់មាឞូអូរទូហ្វេមាជានអូរអីឆាក់។ ទាន់ញហើហ៝ម់នាវរ៝ង់រាប់ជាប់មៃអីហោមនឹងមាអាឞ្រាហាម់ កោរាញគ៝ប់។ 13គ៝ប់លែៈគុទាច់កេងមែងនតូទាកអ្យាជេស លាសត៝ត់ផូងក៝នឞូអូរតាប៝នអ្យាហាន់ឞុកទាក 14លាសឞូម៝សឞូអូរទ្រោសអីគ៝ប់ទែលាស៖ «ទាន់ទាកតារាឞ៝ង់អៃនៃគ៝ប់ឞែមាញេតដេៈយោសអើ» ជេសរីលាសពាង់អើសមាគ៝ប់៖ «ញេតហែសកោញ តៃគ៝ប់ឞុកទាកមាអ៝ន់ឆែសឆាមោមៃញេតដ៝ង់» លាសនទ្រីទាន់អ៝ន់តឹមទីមាឞូអូរអីមៃលែៈនត្រ៝ង់មាជេងអូរអីឆាក់។ នទ្រីទឹងគ៝ប់គឹតនទើនៃនហេលនានេៈងាន់ ជេងនទើមៃញហើនាវរ៝ង់រាប់ជាប់មៃអ៝ន់មាកោរាញគ៝ប់ងាន់”។
15អេហ៝ៈនាន់អោសលោចនាវពាង់មឞើសឆើមនៃ ទោមាឆៃរេបេកាលោសឞើសប៝ននៃ តេៈនោងរាឞ៝ង់តាមលីកពាង់នើមរី។ រេបេកានៃអីក៝នឞូអូរបេថូអែល បេថូអែលអីក៝នឞូក្លោមីលកា មីលកា អីអូរនាហោរអ៝សអាឞ្រាហាម់ នៃនើស។ 16រេបេកាជេងឞូអូរអ្វែសរែសងាន់ ហោមអែទ្រោសអេហ៝ៈគែសអោសដាសឞូក្លោ។ ពាង់ហាន់ត៝ត់តានតូទាកនៃ ពាង់ជុរឞុកទាកឞេងនោងរាឞ៝ង់រី ជេសរីពាង់ទ៝ក់ឆឹត។ 17ឞូនុយ្សជានការអាឞ្រាហាម់ នៃញច្វាត់រានជឹតពាង់រី ជេសរីលាស៖ “ទាន់ទាកតារាឞ៝ង់អៃនៃគ៝ប់ឞែមាញេតដេៈយោសអើ”។ 18ឞូអូរនៃអើស៖ “ញេតហែសកោរាញ”។ ឞូអូរនៃជុយ្សរ៝អ៝ន់ពាង់ញេត។ 19ជេសអ៝ន់ពាង់ញេតរី ឞូអូរនៃលាស៖ “តៃគ៝ប់ហាន់ឞុកទាកមាអ៝ន់ឆែសឆាមោមៃញេតអ៝ន់ត៝ត់ហើមដ៝ង់”។ 20ជេសរីពាង់ងខុតទាកតាឞ៝ងរីរ៝ ពាង់ព្លឹឞុកតៃទាកមាអ៝ន់ឆែសឆាមោរីញេតត៝ត់ហើមទាទេ។ 21ឞូក្លោអីនៃអ្វាញ់ជឹតពាង់រីរាល៝ល់ ពាង់មឹនអេងតានូយ្សនហ៝ម់រីអុចគឹត គឹតឞ្រាសយេហោវាជានអ៝ន់ពាង់កើតនាវពាង់អុចនើសងាន់លាសមោ។ 22ទឹងលែៈឆែសឆាមោរីញេតទាកលែៈហើមទាទេជេស ជេសរីពាង់ឆ៝ៈទូមល៝ម់រាគេនមាយ្សជ៝ក់ទូចីងគូលតេៈតាត្រោមមុសឞូអូរ#២៤:២២៖ ឞូអូរនោកនៃវៃតេៈរាគេនមាយ្សតាត្រោមមុស។នៃ ឆ៝ៈដ៝ង់ឞារមល៝ម់កោងតីមាយ្សជ៝ក់ ៣០ ចីអ៝ន់មាឞូអូរទ្រោសនៃ។ 23ជេសរីពាង់អោបឞូអូរទ្រោសនៃ៖ “អៃឞូម៝សក៝ន? ទាន់មឞើសមាគ៝ប់។ អាសតាជៃឞឹអៃគឹតគែសនតុកហេនទែមាឞិចមាង់អ្យា?” 24ឞូអូរទ្រោសនៃអើសមាពាង់៖ “គ៝ប់ក៝នបេថូអែល អីក៝នចែនាហោរ នទ្រែលមាអូមីលកា ”។ 25ឞូអូរទ្រោសនៃលាសតៃមាពាង់៖ “តាជៃហេនគែសអ៝ក់រាហែមាឆែសឆាមោឞិច នទ្រែលមារេបលែៈឆើសមាមពាឆែសឆាមោឆា នទ្រែលមានតុកមាអ៝ន់ខាន់មៃឞិចគែសដ៝ង់”។ 26ជេសរីឞូនុយ្សជានការនៃពាង់កុញឞោក យើកមឞាសមាឞ្រាសយេហោវា 27ពាង់លាស៖ “រានេមាឞ្រាសយេហោវា អីឞ្រាសអាឞ្រាហាម់ ជេងកោរាញគ៝ប់យើកមឞាស មៃមោរាលូនអោសអ៝ន់នាវរ៝ង់រាប់ជាប់មៃ មៃជានកើតនាវមៃលែៈលាសបាបើមាកោរាញគ៝ប់ ល៝ង់គ៝ប់អ្យាឞ្រាសយេហោវាដ៝ង់លែវត្រ៝ងទឹងត៝ត់តាជៃនទុលមពោលកោរាញគ៝ប់”។ 28ជេសរីឞូអូរនៃញច្វាត់អាជៃមេៈពាង់ នហ៝មាមឞើសងក៝ចនាវអីនៃមាទឹងលែៈឞូនុយ្សតាជៃនៃ។
29 រេបេកាគែសទូហ្វេនោរាញាលាបាន លាបានញច្វាត់ជ៝យឞូក្លោនៃអានតូទាករី 30យ៝រលាសពាង់ឆៃកោងតាតីដ៝ង់ ឆៃរាគេនតាត្រោមមុសដ៝ង់ នទ្រែលមាតាង់រេបេកាអីអ៝សទែមឞើសងក៝ចទឹងលែៈនាវឞូក្លោនៃលាស ជេសរីពាង់ហាន់ម៝ប់ឞូក្លោនៃ ឆៃពាង់ទ៝ក់កេងនតូទាករីនទ្រែលមាឆែសឆាមោ។ 31លាបានលាសមាឞូក្លោអីនៃ៖ “អើឞូនុយ្សលែៈឞ្រាសយេហោវាទែអ៝ន់គែសជេង លាប់ហ៝ម់ ម៝សគុមៃឞើសទីសអ្យា? លែៈជេសគ៝ប់នទ្រាប់ជៃមាមៃ នទ្រែលមានតុកអ៝ន់ឆែសឆាមោមៃដ៝ង់”។
32ជេសរីឞូក្លោអីនៃលាប់អាត្រោមជៃតី។ លាបានទ្រីសញជុរនទ៝សនទើឞើសលើឆែសឆាមោរីផ្យៅ ឞូឆ៝ៈជាឆ៝ៈរាហែមាអ៝ន់ឆែសឆាមោទែឆា នទ្រែលមាឆ៝ៈទាកមាអ៝ន់ឞូក្លោនៃរាវជ៝ង់ នអ៝ប់មាមពោលអីហាន់នទ្រែលពាង់នៃដ៝ង់។ 33ជេសរីឞូលែៈនទ្រាប់ព្យាង់ត្រាវអ៝ន់ពាង់ឆោង យើនមាពាង់លាស៖ “គ៝ប់មោហ៝ៈអោសឆោង លាសនាវគ៝ប់ហាន់អ្យាគ៝ប់មោហ៝ៈមឞើសងក៝ចមាខាន់មៃ” លាបានលាស៖ “នែស ងក៝ចហ៝ម់!” 34ពាង់លាស៖ “គ៝ប់អ្យាជេងឞូនុយ្សជានការអាឞ្រាហាម់ ។ 35ឞ្រាសយេហោវាអ៝ន់គែសជេងមាកោរាញគ៝ប់លែៈទុតអ៝ក់ នហ៝មាពាង់ត៝ត់ជេងឞូនុយ្សនទ្រ៝ង់ងាន់ កោរាញឞ្រាសអ៝ន់ពាង់គែសឞែឞ្យាប់ គែសនទ្រោក គែសឆែសឆាមោ គែសឆែសលៀ នទ្រែលមាគែសព្រាក់ គែសមាយ្ស គែសនអ៝ប់មាទឹកឞូអូរទឹកឞូក្លោអ៝ក់ងាន់។ 36នោកកោរាញគ៝ប់ពាង់លែៈរាញងាន់ អីអូរពាង់រាញាឆារាគុអ៝សទូហ្វេក៝នឞូក្លោមាពាង់ កោរាញគ៝ប់លែៈអ៝ន់ជេសទឹងលែៈទ្រាប់នទើពាង់គែសមាក៝នអីនៃ។ 37កោរាញគ៝ប់ពាង់ដាៈគ៝ប់ត៝នអ្យាត់នាវពាង់ ពាង់លាស៖ «មៃលើយអោសជ៝យអូរមាក៝នគ៝ប់តាៈឞើសផូងកានាននតុកឞ្រីគ៝ប់គុអ្យា។ 38អ៝ន់មៃហាន់តាជៃឞឹគ៝ប់ តានទុលមពោលគ៝ប់នើមរី ជេសរីឆើមជ៝យអូរមាក៝នគ៝ប់តាៈឞើសមពោលនៃ»។ 39គ៝ប់លាសមាកោរាញគ៝ប់៖ «ក្លាប់លាសឞូអូរអីនៃមោអុចអោសតឹងគ៝ប់តាឞ្រីអ្យា»។ 40ពាង់លាសមាគ៝ប់៖ «ឞ្រាសយេហោវាអីគ៝ប់ទែអ្យាត់បាបើ ពាង់អ៝ន់តោងពារ់ពាង់នើមហាន់នទ្រែលមៃ គៃមាជានអ៝ន់មៃត៝ត់គែសងាន់។ អ៝ន់មៃឆើមជ៝យអូរមាក៝នគ៝ប់តាៈឞើសនទុលមពោលតាៈឞើសរានាក់វ៝ល់គ៝ប់។ 41អ៝ន់មៃហាន់ត៝ត់តានទុលមពោលគ៝ប់រី លាសឞូមោអោសអ៝ន់ក៝នមាមៃ រីមើមៃមោហោមអោសក្រេបដាសនាវលែៈជេសត៝នអ្យា»។ 42នារអ្យាគ៝ប់ហាន់ត៝ត់តានតូទាក គ៝ប់មឞើសឆើម៖ «អើឞ្រាសយេហោវា អីឞ្រាសអាឞ្រាហាម់ ជេងកោរាញគ៝ប់យើកមឞាស ទាន់មៃអ៝ន់គែសងាន់នទើអីកោរាញគ៝ប់ដាៈមាគ៝ប់។ 43អាបៃរីគ៝ប់លែៈគុទាច់កេងនតូទាកអ្យាជេស លាសគែសឞូអូរទ្រោសហាន់ឞុកទាក លាសគ៝ប់លាសមាពាង់៖ «អើយោស ទាន់ទាកតារាឞ៝ង់អៃនៃគ៝ប់ឞែមាញេតដេៈអើ» 44លាសឞូអូរនៃអើស៖ «អ្យាញេតហ៝ម់ តៃគ៝ប់ឞុកជឹតមាអ៝ន់ឆែសឆាមោមៃញេតដ៝ង់» លាសនទ្រីអ៝ន់តឹមទីមាឞូអូរអីមៃលែៈជេសនត្រ៝ង់មាជេងអូរអីក៝នកោរាញគ៝ប់ងាន់»។ 45នោកនៃគ៝ប់មឞើសឆើមអេហ៝ៈនាន់លោចអោស ទោមាឆៃរេបេកាលោសឞើសប៝ន តេៈនោងរាឞ៝ង់តាមលីកពាង់រីហាន់អានតូទាក។ ជេសពាង់ជុរឞុកទាកឞេង គ៝ប់លាសមាពាង់៖ «អើយោស ទាន់ទាកអៃនៃគ៝ប់ឞែមាញេតដេៈអើ»។ 46ពាង់ជុយ្សនោងរាឞ៝ង់ឞើសមលីករីរ៝ ពាង់លាសមាគ៝ប់៖ «អ្យាញេតហ៝ម់ តៃគ៝ប់ឞុកជឹតទាកមាអ៝ន់ឆែសឆាមោមៃញេតដ៝ង់»។ ជេសរីគ៝ប់ញេតទាកអីរី ពាង់ឞុកតៃទាកមាអ៝ន់ឆែសឆាមោគ៝ប់ញេតដ៝ង់។ 47គ៝ប់អោបពាង់៖ «អៃឞូម៝សក៝ន?» ពាង់អើស៖ «គ៝ប់ក៝នបេថូអែល អីក៝នចែនាហោរ នទ្រែលមាអូមីលកា »។ ជេសរីគ៝ប់ឆ៝ៈរាគេនតេៈតាត្រោមមុសពាង់ នទ្រែលមាកោងតីនទ៝កតាពាង់រី។ 48ជេសរីគ៝ប់ពាន់យើកមឞាសមាឞ្រាសយេហោវា រានេមាឞ្រាសយេហោវាអីឞ្រាសអាឞ្រាហាម់ ជេងកោរាញគ៝ប់យើកមឞាស យ៝រមាពាង់ឆើមលែវត្រ៝ងមាគ៝ប់ទឹងត៝ត់តានទុលមពោលកោរាញគ៝ប់ នទ្រែលមាឆៃក៝នឞូអូរខាន់ពាង់ គៃមាឆ៝ៈជេងអូរអីក៝នកោរាញគ៝ប់។ 49អាបៃអ្យា លាសខាន់មៃជានអ្វែស នទ្រែលមានាវងាន់មាកោរាញគ៝ប់ ទាន់ខាន់មៃងើយ អុចមោលាសមោ គៃមាគ៝ប់គឹតដ៝ង់ ម៝សនទើគ៝ប់ជានជឹត”។
50ជេសរីលាបាន នទ្រែលមាបេថូអែលលាសមាពាង់៖ “ទឹងគែសជេងនាវអ្យានើសតាៈឞើសឞ្រាសយេហោវា លាសនទ្រីហេនមោឞ្លាវលាសអុច មោឞ្លាវលាសមោអុចមាមៃរី។ 51នៃរេបេកាលែៈតានៃ មៃញអោតលែវពាង់អារី មាអ៝ន់ដាសក៝នកោរាញមៃរី កើតនាវឞ្រាសយេហោវាទែលាសនៃ”។ 52ត៝ត់មាឞូនុយ្សជានការអាឞ្រាហាម់ តាង់លាសកើតនៃ ពាង់ពាន់យើកមឞាសមាឞ្រាសយេហោវា។ 53ជេសរីពាង់ងលោសទ្រាប់នទើងក្រឹ ព្រាក់ មាយ្ស នទ្រែលមាឞ៝កអាវអ៝ន់មារេបេកានៃ ពាង់អ៝ន់ដ៝ង់នទើទុតខ្លៃមាមេៈមានោរេបេកានៃដ៝ង់។ 54ជេសរីមើទឹងពាង់ នទ្រែលមាមពោលអីហាន់ដាសពាង់នៃនើសញេតឆោង។ មាង់នៃខាន់ពាង់ឞិចតានៃ កាសអោយតៃរីអើមអោយពាង់ទ៝ក់ ពាង់លាសមាផូងតើមជៃនៃ៖ “ទាន់អ៝ន់គ៝ប់ព្លឹឆឹតអាកោរាញគ៝ប់នើមនារអ្យាយឹ”។ 55យើនមាអីនោ នទ្រែលមាអីមេៈរេបេកានៃលាសមាពាង់៖ “អ៝ន់រេបេកាគុនទ្រែលមាហេនតាអ្យាប៝ត់ហែស ក្លាប់លាសត៝ត់ជឹតនារប៝ត់ទឹងហាន់”។ 56ឞូនុយ្សជានការអាឞ្រាហាម់ នៃអើសមាខាន់ពាង់៖ “ខាន់អៃមៃលើយអោសក៝ន់គ៝ប់ អ៝ន់គ៝ប់ព្លឹឆឹតមាកោរាញគ៝ប់នើម យ៝រលាសនាវឞ្រោៈហាន់គ៝ប់អ្យាលែៈឞ្រាសយេហោវាជានជេសផ្យៅជេស”។ 57ខាន់ពាង់លាស៖ “ក៝ប់ហេនក្វាល់រេបេកា អោបពាង់នើមប៝ត់”។ 58ជេសរីខាន់ពាង់ក្វាល់រេបេកា អោបពាង់៖ “អ៝ស អៃអុចហាន់នទ្រែលមាពាង់អ្យាឞើស?” រេបេកាអើស៖ “អើ គ៝ប់អុច”។ 59ជេសរីអ៝ន់រេបេកាអីអ៝សឞូអូរពាង់រី នទ្រែលមាឞូនុយ្សឆើមមពូត៝សពាង់នៃ អ៝ន់ហាន់នទ្រែលមាឞូនុយ្សជានការអាឞ្រាហាម់ ឞូអ៝ន់ខាន់ពាង់ហាន់ទាទេនទ្រែលមាលែៈឞូនុយ្សអីហាន់ដាសពាង់នៃនើស។ 60រានាក់វ៝ល់រេបេកាអ៝ន់នាវគែសជេងមាពាង់៖
“អើអ៝ស អ៝ន់អៃគែសក៝នឞឹករឹងាន់
ជេសរីរាន៝យទែសអៃអ៝ន់ជេងកោរាញមាផូងរាលាង់ដាសខាន់ពាង់”។#២៦:៤
61ជេសរីរេបេកា នទ្រែលមាមពោលឞូអូរជានការមាពាង់ញច៝ឆែសឆាមោហាន់តឹងឞូក្លោអីឞូនុយ្សជានការអាឞ្រាហាម់ ហាន់ព្លឹឆឹត។
62នោកខាន់ពាង់ហោមហាន់រ៝ៈត្រ៝ង អីឆាក់លែៈលោសឞើសនតុករាញាតូទាកលាហាយរ៝យ ពាង់គុតាឞ្រីរាទាសនេកិប។#១៦:៤ 63នោកឞ្រីកេងមាង់ ពាង់ហាន់ព៝ល់រ៝ៈមីរ ពាង់ងើកឆៃហាន់នហ៝ចឆែសឆាមោត៝ត់តារី។ 64រេបេកានៃឆៃដ៝ង់ ត៝ត់មាឆៃអីឆាក់រី ពាង់ជុរឞើសលើឆែសឆាមោ 65អោបឞូនុយ្សជានការអាឞ្រាហាម់ នៃ៖ “ឞូម៝សអីគុតាមីររី ហាន់ជឹតអ្យារី?” ពាង់អើស៖ “ពាង់អីនៃអីឆាក់អីកោរាញគ៝ប់”។ នទ្រីរេបេកាឆ៝ៈឞ៝កងកុមលើយមុសមាត់ពាង់នើម។ 66ឞូនុយ្សជានការអីនៃមឞើសងក៝ចមាអីឆាក់ទឹងលែៈនតីលនទើពាង់ជានរីនើស។ 67ជេសរីអីឆាក់ឆ៝ៈរេបេកាជេងអូរពាង់ ពាង់លែវរេបេកាលាប់តាត្រោមចូនឆារាអីមេៈពាង់រីនើស ពាង់គែសនូយ្សនហ៝ម់រ៝ង់មារេបេកាហោងាន់ នហ៝មាឞាសងក្ល៝ន់រាវៃអីមេៈពាង់ខឹតរីនើស។
Currently Selected:
នាវនតើម 24: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
