នាវនតើម 22
22
អាឞ្រាហាម់ នទ្រាប់ពូរក៝នពាង់ញហើរមាកោរាញឞ្រាស
1ជេសគែសនាវនៃ កោរាញឞ្រាសអុចរាល៝ងនូយ្សនហ៝ម់អាឞ្រាហាម់ ពាង់ក្វាល់អាឞ្រាហាម់ ៖ “ហើយអាឞ្រាហាម់ !” អាឞ្រាហាម់ អើស៖ “ម៝សកោរាញ?”#នង ១៦:៤; ២០:២០; នវ ៨:២; ១៣:៤; ផក ២:២២; នម ៨១:៨; ហេឞ ១១:១៧-១៩; យាក ១:១៣ 2កោរាញឞ្រាសលាសមាពាង់៖ “ឆ៝ៈអីឆាក់ក៝នមៃនៃអីមៃរ៝ង់មាពាង់ទុតហោ ជេងក៝នឞូក្លោមៃនើមង្វាយអឹទើមនៃ លែវពាង់ហាន់តាឞ្រីមោរីយា។ តារីអ៝ន់មៃពូរញហើរពាង់អ៝ន់មាគ៝ប់តាកាលើយោក តាទូមល៝ម់យោកនតុកគ៝ប់មឞើសមាមៃរីតៃ”។#២នរ ៣:១
3 អាឞ្រាហាម់ ទ៝ក់អើមអោយ ពាង់ចោកល៝ងមាពូរនទើញហើរ ពាង់ឆ៝ៈទុរតេៈតាកាលើឆែសលៀរី ជេសរីឆ៝ៈឞារហៃឞូក្លោជានការពាង់នើម នទ្រែលមាអីឆាក់អីក៝នពាង់នើមរី ហាន់នទ្រែលមាពាង់នើមជឹតនតុកកោរាញឞ្រាសទែមឞើសមាពាង់រីនើស។ 4ត៝ត់ឞ្រោៈលែៈគែសពែនារ អាឞ្រាហាម់ ងគើរឆៃនតុកនៃឞើសងាយ 5ជេសរីលាសមាឞារហៃមពោលឞូនុយ្សជានការនៃ៖ “ឞារហៃខាន់មៃអ្យាមាគុចាម់ឆែសលៀតាអ្យាប៝ត់ គ៝ប់ នទ្រែលមាក៝នគ៝ប់អ្យាមាហាវយើកមឞាសកោរាញឞ្រាសតាកាលើយោករី ជេសទឹងហេនព្លឹឆឹតតៃតាអ្យា”។ 6អាឞ្រាហាម់ ក៝ត់ល៝ងមាពូរនទើញហើររីអ៝ន់អីឆាក់តូយ ពាង់នើមរីញអោតអុញ នទ្រែលមាពេស ជេសរីហាន់លែៈឞារហៃឞឹក៝នអារីរើនទ្រើន។ 7ទោលនៃអីឆាក់ងើយដាសអីឞឹពាង់៖ “ហើយឞឹ” អាឞ្រាហាម់ អើស៖ “ម៝សក៝ន?” អីឆាក់លាស៖ “តាអ្យាឞ៝ន់លែៈគែសអុញ លែៈគែសពេស លាសនទ្រីអាសឞែឞ្យាប់នទើមាពូរញហើរ?” 8អាឞ្រាហាម់ អើស៖ “អើក៝ន ឞែឞ្យាប់នទើមាពូរញហើរអីនៃ កោរាញឞ្រាសនើមឆើមអ៝ន់”។ ជេសរីលែៈឞារហៃឞឹក៝នរីហាន់ជឹតនាប់រើនទ្រើនជឹត។
9ត៝ត់តានតុកកោរាញឞ្រាសទែមឞើសមាពាង់រីនើស អាឞ្រាហាម់ ឞូនលុទូនតុកតានតុកនៃមានតុកជានឞ្រាស ជេសឞូននៃ ពាង់ឞូនល៝ងឞើសលើរី ពាង់ញុបក៝ត់អីឆាក់អីក៝នពាង់នើមរីតេៈឞើសលើល៝ងឞើសលើនតុកជានឞ្រាសរី#យាក ២:២១ 10ជេសរីពាង់ឆ៝ៈពេសនតើមយាតតីមាលាច់ត៝ងក៝អីក៝នរី។#ហេឞ ១១:១៧-១៩ 11ទោលនៃទោមាតាង់តោងពារ់ឞ្រាសយេហោវាទែក្វាល់ពាង់តាៈឞើសលើត្រោកតីលាស៖ “អាឞ្រាហាម់ ! អាឞ្រាហាម់ !” ពាង់អើស៖ “ម៝សកោរាញ?” 12តោងពារ់នៃលាស៖ “លើយមៃងខឹតក៝នឆែនៃ លើយតាលើសពាង់អោស អាបៃរីលែៈគ៝ប់គឹតជេសមៃក្លាចយើកមាកោរាញឞ្រាស យ៝រលាសមៃមោអោសញហ្វាចក៝នមៃនើមអើមង្វាយអឹកោលឹនៃអ៝ន់មាគ៝ប់”។ 13ជេសរីអាឞ្រាហាម់ ងគឹលឆៃទូមល៝ម់ឞែឞ្យាប់ងក្វ៝ង់តារី វាក់ខានងកែតាតើមឆី។ ជេសរីពាង់ហាន់ឆ៝ៈឞែឞ្យាប់អីនៃព្លាច់មាពូរញហើរនត្រ៝ៈអីក៝នពាង់នើមរីនើស។ 14អាឞ្រាហាម់ ក្វាល់នតុកនៃរាញា៖ «ឞ្រាសយេហោវានើមឆើមអ៝ន់» នទ្រីទឹងឞូក្វាល់នតុកនៃត៝ត់អាបៃរីរាញា៖ «តាកាលើយោកឞ្រាសយេហោវា ពាង់នើមឆើមអ៝ន់»។
15តោងពារ់ឞ្រាសយេហោវាក្វាល់តៃអាឞ្រាហាម់ ឞើសលើត្រោកតីទូតឹជឹត 16ពាង់លាស៖ “គ៝ប់អ្យាឞ្រាសយេហោវា គ៝ប់ឆ៝ៈរាញាគ៝ប់នើមមាត៝ន មៃមោអោសញហ្វាចក៝នមៃនើមអើមង្វាយអឹកោលឹនៃអ៝ន់មាគ៝ប់។ យ៝រមាមៃលែៈជានជេសកើតនៃ#ហេឞ ៦:១៣-១៤ 17គ៝ប់អ៝ន់គែសជេងមាមៃទុតអ៝ក់ តៃគ៝ប់អ៝ន់នាវគែសជេងមាមៃអ៝ក់ឞេងលែរងាន់ងេន ជេសរីជានរាន៝យទែសមៃអ៝ន់អ៝ក់ឞឹករឹតឹមឞានមាមាញ់មឞីងតាកាលើត្រោក មោលាសតឹមឞានមាច៝យ្សរ៝ៈមែងទាកវាច់ទាកវារ់ដ៝ង់។ ជេសរីរាន៝យទែសមៃតៃទើយម៝ត់អ្វាញ់ផូងរាលាង់ដាសខាន់ពាង់នើម។#១២:២; ហេឞ ១១:១២ 18នទ្រីទឹងលែៈផូងឞូនុយ្សតានែសនតូអ្យា ឞូគែសជេងតាៈឞើសរាន៝យទែសមៃ យ៝រលាសមៃលែៈអ្យាត់ជេសនាវគ៝ប់”។#ការ ៣:២៥; យាក ២:២១ 19ជេសនៃអាឞ្រាហាម់ នទ្រែលមាក៝នពាង់ព្លឹឆឹតតៃតាផូងឞូក្លោជានការពាង់នើមរីនើស ជេសរីខាន់ពាង់ទ៝ក់ហាន់នទ្រែលជឹតប៝នបេរឆេបារី។ ត៝ត់តាបេរឆេបារី អាឞ្រាហាម់ គុតាប៝ននៃ។
រាន៝យទែសនាហោរ
20ជេសគែសនាវនៃ គែសឞូហាន់មឞើសងក៝ចមាអាឞ្រាហាម់ ៖ “ល៝ង់មីលកា គុអ៝សគែសក៝នឞូក្លោអ៝ក់ងាន់អ៝ន់មានាហោរអ៝សមៃ តានៃគែស៖ 21អុសជេងក៝នឞោកទាក គែសបុសជេងអីអ៝ស គែសកេមោអែលអីឞឹអារាម 22គែសកេឆែត គែសហាឆោ គែសពីលដាស គែសយិតលាប នទ្រែលមាគែសបេថូអែល។ 23បេថូអែលនៃអីឞឹឞូអូររេបេកា។ លែៈផាមនុយ្សក៝នអីនៃជេងមីលកា ទែសមានាហោរអីអ៝សអាឞ្រាហាម់ រី។ 24ល៝ង់អីអូរចោងនាហោររីរាញារេយោមា ពាង់គែសក៝នឞូក្លោដ៝ង់ តានៃគែស៖ ថេបា គែសកាហាម់ គែសថាហាស នទ្រែលមាគែសមាកា។
Currently Selected:
នាវនតើម 22: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
