Mako 5

Yesu wafumya mipasi yankota mu muntu

(Mat 8:28-34; Luk 8:26-39)

1Yesu na alondezi yakwe yafika ku mbalama yuze yakwe yemba waku Galile, ku mpanga ya Gelasa. 2Lino Yesu wapatuka mu wato, umuntu uwali ni mipasi yankota afuma ku malindi amukomanya. 3Wene wikalanga ku malindi. Kutali nanti umwi uwakuti angamusunga nanti kumunyepa mu minyololo, 4pano nsita zyonsi ndi yamunyepa, waputolanga minyololo nu kuvuna ivyela ivyali ku ngazo zyakwe. Wali na maka avule caleka kutali nanti umwi wakumulema. 5Musanya nu usiku wapitananga sile mu malindi nu mu myamba, ala akupunda nu kuitemola ku mawe.

6Wali katalamukila lino waweni Yesu, alino asimula aya amufukamila, 7apunda ni zwi likulu ati, “Yesu, we Mwana wakwe Leza uwa papelapela, uzye ukulonda cani kunondi? Lapa pa manso yakwe Leza, ukuti, utakuncuzya!” 8Wene wavwanzile cii, pano Yesu wavwanzile ati, “Mupasi wankota, fuma mu muntu wii!”

9Caleka Yesu amuuzya ati, “Uzye izina lyako wewe weni?” Nawe amwaasuka ati, “Izina lyane nene Mazimbi, pano tuli aingi!” 10Lyene mipasi yankota ipapata Yesu kuti ataizingila ku mpanga yuze.

11Lyene kwali ufyo wakwe yakapoli ukulu mupipi, ala ukulya umu mbali ya mwamba. 12Caleka mipasi yankota ipapata Yesu iti, “Tuzingile muli yakapoli amuno tukingile.” 13Wailesile ipita, alino mipasi yankota ifuma mu muntu iya iingila muli yakapoli. Alino ufyo onsi kulingana na mazimbi yaili, utantamukila ku lwema, uponela muli yemba umwela.

14Acemanga yakapoli, yasimula yaya yalanda vintu vii mu musumba nu mu mizi iyapalime. Alino antu yapita kuyalola icati cicitika. 15Lyene lino iiza kuli Yesu, yalola umuntu uwali ni mipasi yankota, atenzi papa kwene, watazwala, nupya wali na mano ya untu. Alino yonsi yuvwa intete. 16Yao aciweni yanena antu cati cicitika ku muntu uwali ni mipasi yankota, nga ni cati icicitika kuli yakapoli.

17Alino yapapata Yesu kuti afume mu mpanga yao. 18Lino wapatama mu wato, umuntu wino mipasi yankota yafumilemo amupapata ati, “Leka nkulondele!”

19Lelo Yesu atamuzumilizye. Lyene amunena ati, “Pitanga ku muzi ku mwinu ku akazi kako ukayanene cino Mwene watakucitila na vino wakukumbusuka.”

20Muntu wiyo apita mu misumba ikumi yonsi, ala akunena antu pali cino Yesu watamucitila. Lyene na yonsi acuvwile yazunguka cuze.

Yesu wapozya mwana Yailo nu mwanaci umwi

(Mat 9:18-26; Luk 8:40-56)

21Lino Yesu walamba ku mbalama yuze yakwe yemba, lino acili mu nkumba iumba lya antu limuzinguluka. 22Yailo, intunguluzi yamu ng'anda yamapepo aiiza. Lino walola Yesu, amufukamila 23amupapata cuze ati, “Mwanane kaci umulwalisye ali pipi nu kufwa. Nakulenga kuti wize umwikepo makasa yako, pakuti apole aye nu umi.”

24Yesu apita nawe, nga iumba likulu lilondela Yesu limuunganila.

25Kwali umwanaci umwi uwalwile cendamongo pa myaka ikumi na iili. 26Nanti angala wapitanga muli yasing'anga aingi, nu kusumba impiya zyonsi, mu cifulo cakuti aye ningo, indwala yayanga sile pa nkolelo. 27Lino uvwile ilandwe lya pali Yesu, aiiza mwi umba afyenka afika cisila cakwe Yesu, nga akumya ku nsalu yakwe, 28ala akwelenganya ati, “Ndi ningakumya nanti ku nsalu yakwe sile, namapola.”

29Lilyo kwene cendamongo cisila, nga auvwa mu mwili wakwe ukuti wapoziwa kufuma ku ndwala yakwe. 30Papo kwene Yesu amanya ukuti maka yapungukako mu mwili wakwe. Lyene aseleukila kwi umba auzya ati, “Uzye aweni wakumya ku nsalu yane?”

31Alondezi yakwe yamwasuka yati, “Watulola vino antu yati yakuunganila, Lyene nawe ukuuzya uli uti, ‘Aweni wankumya?’”

32Lelo Yesu acelecensya manso monsi kuti alole uwatamukumya. 33Umwanaci lino wamanya cati cicitika kunoli, alino aiiza, ala akuzakaza ni ntete, amufukamila, amunena cumi consi. 34Yesu nawe amunena ati, “Kaciwe, utailo wako wakupozya. Pita ulumi, uposiwe ku ndwala yako.”

35Lino Yesu acili akuvwanga vii, inkombe zyafumile ku ng'anda yakwe Yailo, zinena Yailo ziti, “Mwana wako kaci watafwa. Pacani cino ukusakamika Kasambilizya?”

36Nawe Yesu atasumvile amano pali vino yalandanga, lelo anena Yailo ati, “Utuvwa intete, taila sile.” 37Nupya atazumilizye umuntu nanti umwi kuti alondele, suka sile Petulo na Yakobo na Yoane mwina wakwe Yakobo. 38Lino yafika ku ng'anda yakwe Yailo, Yesu alola icimvulunganya, na antu ala yakulosya ni mpoma ikulu. 39Aingila mu ng'anda nu kuyuzya ati, “Pacani cino mukwangula nu kupongomoka impooma? Ala umwana atafwile, lelo watakasula sile.”

40Lelo yene yamuseka. Pacisila ca kufumya antu yonsi panzi, atoola isi na nyina wa mwana pamwi na alondezi yakwe yatatu, iingila mu muputule muno mwana wali. 41Amulemelela ikasa amunena ati, “Talita kumi,” kuli kuti, “Kaci we nakunena nati katuka!”

42Lilyo kwene mukazyana akatuka apitana monsi monsi. (Wali ni myaka yakuvyalwa ikumi na iili.) Lino cii cacitike, antu yonsi yazunguka cuze. 43Lelo Yesu ayapeela ilamulo kuti yatanena umuntu nanti umwi. Alino ayanena ati, “Mupelini cimwi cakuti alye.”

Currently Selected:

Mako 5: MamL13

Highlight

Copy