Mateo 6

Ukupeela ku alanda

1 # Mat 23:5 “Mutacita milimo isuma kuti mwalolwa na antu. Pano ndi mumacita vivyo ale musi ni cilambu kuli So winu uwa mwiyulu.

2“Caleka lino mukupeela uwila kuli umwi, mutaleka yauze yamanye, wakwe vino asomvi yakacita mu mang'anda ya mapepo nu mu misolo kuti antu yayalumbanye. Cumi namunena vino yene yapokelela cilambu cao. 3Lelo lino ukupeela uwila kuli umwi, utaleka umuntu umwi amanye cino ukucita, 4pakuti uwila upelwe mu nkama. Na So wino akalola vino ukacita mu nkama alakupeela cilambu.

Ukupepa

(Luk 11:2-4)

5 # Luk 18:10 “Na lino mukupepa, mutakolana wa asomvi! Yene yatemwa kwimilila nu kupepa mu mang'anda ya mapepo nu mu masansa ya miseo, kuti yalolwe na antu. Cumi namunena vino, yene yapokelela cilambu cao. 6Lelo mwemo, lino mukupepa, ingilini mu muputule winu uwa mukasi, nga lino mwayala cisasa, mupepe kuli So asyaloleka. Na So akalola vino mukacita mu nkama alamupeela cilambu.

7“Lino mukupepa, mutaswililoka mu mazwi wakwe vino antu atataila Leza yakacita, pano yene yakaelenganya ukuti Leza alaasuka mapepo yao atali. 8Caleka lino mukupepa mutakolana nao. Pano So wene wamanya vino mukulonda lino mutali mumulenge. 9Acino mwemo mwapepa mukuti,

‘Tata witu uwa mwiyulu,

Izina lyako licindikwe,

10Uwene wako wize, kulonda kwako kucitike

pansi vino kukacitika mwiyulu.

11Utupeele vyakulya vitu vya manda pe.

12Utwelele maifyo itu vino naswe tukaelela yano akatwifya.

13Utaleka tuponele mukweziwa kukome lelo ututuule ku Mwipe wilya.’

14 # Mk 11:25 “Pano ndi mwemo mwelela antu lino yaifya kunomuli, So uwa mwiyulu nawe kwene alamwelela. 15Lelo ndi musyakwelela antu maifyo yao, So nawe kwene atalamwelela maifyo inu.

Kusambilizya kwa pa kuizilizya ukulya

16“Nupya lino mukuizilizya ukulya mutaya wa asomvi, akanyomeka mausyu yao pakuti antu yamanye vino yati yaizilizya ukulya. Cumi namunena nati, yene yapokelela cilambu cao. 17Lelo wemo lino ukuizilizya ukulya, ufulale pa manso. Paka umutwe wako na mafuta, 18kuti yauze yatamanya ukuti ukuizilizya ukulya suka sile So asyaloleka. Lyene So, wino akalola vino ukacita mu nkama alakupeela cilambu.

Kwika vyuma mwiyulu

(Luk 12:33-34)

19 # Yak 5:2 “Mutaika vyuma vinu muno nsi, umwaya uwonyi ni ngalawa, muno aiivi yakatama nu kwiya. 20Lelo ikini vyuma vinu mwiyulu, mumo muno uwonyi ni ngalawa vitangalya, na muno aiivi yatangatama nu kwiya. 21Pano ukuli vyuma vinu, ukuli ni myenzo inu kwene.

Manso ilampi lya kukozezya mwili

(Luk 11:34-36)

22“Manso yakoline wi lampi lya kukozezya mwili. Caleka manso inu ndi yali ningo, mili inu nayo kwene ilazulamo luswepo. 23Lelo manso inu ndi yasi ningo, mili inu ilazulamo mfinzi. Caleka luswepo ululi munomuli ndi lwasenuka lwaya mfinzi, mfinzi iyo imaya ikulu cuze.

Leza ni vyuma

(Luk 16:13; 12:22-31)

24“Pasi umuntu angaombela aene yaili; pano angapata wenga nu kutemwa umuze, nupya angayela wenga nu kusula umuze. Mutangaombela Leza nga ni vyuma. 25Caleka namunena ukuti mutasakamala pali vino mumalya pakuti muye nu umi, nanti pa vizwalo vyakuzwika imili inu. Uzye umi utalusile ivyakulya, nu mwili utalusile vizwalo? 26Lolini vyunyi vya mulwelele! Vyene visyakomela imbezu nanti kuzombola. Vyene vitakwata incende nanti inkoma mwakusezya vilyo. Lelo So uwa mwiyulu akavilisya. Uzye mwemo mutavilusile? 27Uzye aweni uwa munomuli, pa kusakamikwa kwakwe, angalundako wanda ku umi wakwe?

28“Pacani cino mungasakamikwa pali vino mumazwala? Lolini vino maluwa yakakula. Yene yasyaomba nanti kupikula vizwalo. 29#1Yam 10:4; 2Mil 9:3 Lelo namunena vino mwene Solomoni mukuyemba kwa kuzwala kwakwe konsi, wene atafisile nanti kukuyemba kwi luwa lyonga wakwe yaa. 30Leza akazwika isote lyamu mpanga, ililipo ilelo na mutondo lisontekwa umoto. Uzye wene atalalusya kuzwika mwemwe, mwe ya utailo unono?

31“Caleka mutasakamala muti, ‘Tumalya cani? Nanti tumamwa cani? Nanti tumazwala cani?’ 32Suka sile antu atataila Leza alio yakasakamala pa vintu vii vyonsi. So uwa mwiyulu wene wamanya vino mukalonda vintu vii vyonsi. 33Mu cifulo cakwe cii mutale mulonde Uwene wakwe Leza nga nu wololoke wakwe, nga nawe alamupeela vintu vii vyonsi. 34Caleka mutasakamala pa vintu vya mutondo, pano uwa mutondo wene ulaisakamala uwisikulu. Amanda yasyacela mumwi.

Currently Selected:

Mateo 6: MamL13

Highlight

Copy