Luka 5

Yesu wama alondezi ankolelo

(Mat 4:18-22; Mk 1:16-20)

1 # Mat 13:1; Mk 3:9; 4:1 Uwanda umwi lino Yesu wimilile pa nkumba yakwe yemba wa Genesaleti, antu yamuunganila, ala yakuuvwa mazwi yakwe Leza. 2Lyene alola amato yaili ala yati yakulilwa ku cituntu, na alondo yati yafuma mwenemo, ala yakufula amasumbo yao. 3#Mat 13:1; 3:9; 4:1 Yesu aingila mu wato wakwe Simoni, amuuzya kuti ausunke panono kuti ufume ku cituntu. Alino aikala mu wato, asambilizya antu.

4Lino wamala kuvwanga anena Simoni ati, “Sunka uwato uye mwi ziya alino muteye amasumbo inu.”

5 # Yoa 21:3 Simoni aasuka ati, “Kasambilizya, twati tuomba usiku onsi lelo tutumile nanti imwi. Lelo apizwi lyako namateya amasumbo.” 6#Yoa 21:6 Lyene yateya amasumbo yao yuma inswi zingi cuze cakuti na masumbo yali pipi nu kulepuka. 7Alino yakapizya auze ali mu wato uze kuti iize yayazwe. Lyene iiza, yazuzya mato oili cakuti yali pipi nu kuunda. 8Lino Simoni walola cati cicitika, afukama pa ngazo zyakwe Yesu amunena ati, “Ntaluke, Mwene, pano nene mwipe.” 9Wavwanzile vii pano wene pamwi nauze yazunguka uwingi wa nswi zino yumile. 10Nga Yakobo na Yoane, ana yakwe Zebedi, ali yacuza yakwe Simoni, nao kwene yazunguka. Lyene Yesu anena Simoni ati, “Utoopa. Kufuma ndakai umavuwanga antu.”

11Lyene yakulila mato ku cituntu, yasya vyonsi, yamulondela.

Yesu wapozya umuntu uwalwile tembwe

(Mat 8:1-4; Mk 1:40-45)

12Lino Yesu wali mu musumba umwi, kwiza umuntu uwalwile tembwe. Lino walola Yesu, afukama pa nkolelo yakwe Yesu, amupapata ati, “Mwene, ndu kasi ungampozya!”

13Yesu atambalika ikasa lyakwe amulemelela, nga amunena ati, “Nkasi, pola!” Lilyo kwene tembwe auluka ku muntu. 14#Levi 14:1 Lyene Yesu amupeela ilamulo ati, “Utanena umuntu nanti umwi pali cii. Lelo yanga kuli simapepo kuti akakulole, upele impolelwa ino Mose wamunenyile, pakuti yonsi yasininkizye vino watupoziwa.”

15Lelo ilandwe lya pali Yesu lisalangana konsi, na maumba akulu cuze iiza ku kumuvwa nu kupoziwa indwala zyao zyonsi. 16Lelo Yesu watalanga ayasya aya ku cifulo cili cele akuno aya apepa.

Yesu wapozya icite

(Mat 9:1-8; Mk 2:1-12)

17Uwanda umwi lino Yesu wasambilizyanga, Afaliseo na yakasambilizya ya Masunde yamwi apano yali. Yene yafumile mu mizi yonsi yamu Galile nu mu Yudeya nu ku Yelusalemu. Wene wapilwe amaka ya Mwene akupozya alwale. 18Lyene aonsi yamwi izile ala yasenzile umuntu wino wali icite pa cintamba, nga yezya kuti yamwingizye mu ng'anda nu kumulalika pa nkolelo yakwe Yesu. 19Lelo pamulandu ni umba, yatazanyile pa kumwingizizya. Caleka yamukwezya pi paala, yavimbulapo, apano yamwingizizya. Lyene yamwisizya pakasi ki umba, yamwika pa nkolelo yakwe Yesu. 20Lino Yesu walola utailo wao, anena umuntu ati, “Cuza, maifyo yako yelelwa.”

21Yakasambilizya ya Masunde na Afaliseo, nao yatandika kwelenganya aisikulu mu myenzo yao yati, “Uzye umuntu wi aweni wino akuvwanga mazwi ya misuli kuli Leza? A Leza wenga sile angelela maifyo!”

22Lyene Yesu amanya vino yakwelenganya mu myenzo yao, alino ayauzya ati, “Uzye pacani mukwelenganya vii mu myenzo inu? 23Uzye icangupala icani, kunena umulwale kuti, ‘Maifyo yako yelelwa,’ nanti kuti, ‘Katuka utandike nu kupita?’ 24Nkasi musininkizye ukuti Mwana wa Muntu ali na maka muno nsi akwelela amaifyo.” Alino avwanga ku cite ati, “Nakunena, katuka, nyemula icintamba cako, pitanga ukwako!”

25Lilyo kwene umuntu akatuka pa manso yao onsi, anyemula icintamba cakwe, apita ukwakwe, ala akulumbanya Leza. 26Lyene yonsi yazunguka cuze, nga lino yuvwa intete, yalumbanya Leza, yati, “Vintu vino twalola ilelo ivya kuzunguka.”

Yesu waama Levi

(Mat 9:9-13; Mk 2:13-17)

27Lyene Yesu afumamo, alino alola kasonkisya izina lyakwe a Levi, ala atenzi mu ng'anda ya musonko. Yesu amunena ati, “Ndondela.” 28Levi nawe akatuka pano watenzi, asya vyonsi, amulondela.

29Lyene Levi acitila Yesu cimulo cikalamba mu ng'anda yakwe. Pali yao azanyilwe pa cimulo kwali yakasonkesya aingi na antu yauze. 30#Luk 15:1 Afaliseo na yakasambilizya ya Masunde ali amwi umba lyao yailizyanya pa alondezi yakwe Yesu yati, “Uzye pacani mukaliila pamwi na yakasonkesya na yakaifya?”

31Yesu ayanena ati, “Antu apuma yasilonda sing'anga suka sile alwale. 32Ntiza ku kwama aololoke, lelo nizila yakaifya kuti yazenzuke.”

Kuizilizya ukulya

(Mat 9:14-17; Mk 2:18-22)

33Lyene antu yalya yanena Yesu yati, “Alondezi yakwe Yoane na alondezi ya Afaliseo yakaizilizya ukulya lili lingi, nga nu kupepa. Lelo alondezi yako yene yakalya nu kumwa.”

34Yesu aasuka ati, “Uzye ungaleka asukilizi ali pa cimulo ca winga kuti yaizilizya ukulya lino yali pamwi na siwinga? Citangaya vivyo! 35Lelo manda yaliza lino siwinga alasendwa kufuma panoyali, lyene alino yalaizilizya ukulya.”

36Lyene Yesu ayanena mulumbe ati, “Kusi umuntu akakampika cikampa cipya pa nsalu yampiti, pano cikampa cipya cilatunkana nu kulepula insalu yampiti, nga ni cikampa cipya citangayana pa nsalu yampiti. 37Nanti uzye antu yangitulwila waini mupya mu nyambi zyampiti, pano waini mupya angalepula nyambi, na waini angitika, nga ni nyambi zyononeke. 38Acino waini mupya alinzile kwitulwilwa mu nyambi zipya. 39Lyene kusi umuntu wino uwamwa waini mulinde, angalonda waini mupya, pano waini mulinde umusuma kuluta waini mupya.”

Currently Selected:

Luka 5: MamL13

Highlight

Copy