Luka 23

Yaleta Yesu kwi Tengo lyakwe Pilato

(Mat 27:1-2, 11-14; Mk 15:1-5; Yoa 18:28-38)

1Lyene iumba lyonsi likatuka limutwala kuli Pilato. 2Alino yatandika kumulongwela, yati, “Twazana ukuti umuntu wii akutunkola antu amu luko lwitu kuti yatasonka musonko kuli Kesa nu kuilanda vino wene ali Katuula uwalavilwe.”

3Pilato nawe amuuzya ati, “Uzye wewe uli Mwene wa Ayuda?”

Yesu nawe aasuka ati, “Watuvwanga.”

4Lyene Pilato anena yasimapepo akalamba nga ni iumba ati, “Umuntu wii ntamuzanyile nu mulandu.”

5Lelo yene yakomapo kulanda yati, “Usambilizyo wakwe ukasongelekanya antu yonsi amu mpanga ya Yudeya. Watandike ku Galile lyene wataiza na kuno.”

Yesu kwi Tengo lyakwe Helodi

6Lino Pilato uvwa cii, auzya ati, “Uzye umuntu wii umwina Galile?” 7Lyene lino wamanya vino Yesu wali uwamu mpanga yakwe Helodi, amutuma kuli Helodi. Pano nawe kwene wali mu Yelusalemu pa kasita kaka. 8Lyene lino Helodi walola Yesu, azanga cuze. Pano pa nsita ntali walondesyanga kumulola, pamulandu wakuti uvwile ilandwe lya panoli, nupya wapaalilanga kulola vino Yesu akucita cinjelengwe cimwi. 9Caleka Helodi auzya Yesu amauzyo aingi, lelo Yesu atamwasukanga. 10Yasimapepo akalamba na yakasambilizya ya Masunde izile ku nkolelo nu kumulongwela na maka. 11Lyene Helodi na asilika yakwe yatumfya Yesu nu kumusaalula. Alino lyene yamuzwika umwingila uyembe cuze, yamuswilizya kuli Pilato. 12Uwanda kwene ulya Helodi na Pilato yatandana ucuza, pano yalanga yapatana.

Yesu wapingwilwa ukufwa

(Mat 27:15-26; Mk 15:6-15; Yoa 18:39; 19:16)

13Lyene Pilato aama yasimapepo akalamba, intunguluzi zya Ayuda nga na antu silesile, 14ayanena ati, “Mwati muleta umuntu wii kunondi wino mukuti akutunkola antu. Nati mpitulukamo mu mulandu wakwe nkolelo inu. Lelo ntamuzanyile nu mulandu pa vintu vyonsi vino mwati mumulongwela. 15Nanti a Helodi kwene atamuzanyile nu mulandu, acino wamuwezezya kunotuli. Pasi nanti cimwi cino wacita iciipe cakuti afwilepo. 16Caleka namamunyambola sile nu kumusapula.” [17Pa nsita ya kuzevya Cimulo ca Ucilo, lyonsi Pilato wayasapwilanga wenga uwamu anyepwe.]

18Iumba lyonsi lisanzika izwi liti, “Leka umuntu wii akomwe! Tusapwile Balaba!” 19(Balaba wanyefilwe mu ng'anda yaminyololo pamulandu wa kusangukila uteko ukwacitike mu musumba na pamulandu wa kukoma.)

20Pilato walondanga kuti asapule Yesu, caleka nupya avwanga kunoyali. 21Lelo yasanzika mazwi yao, yati, “Atanwe pa lupanda! Atanwe pa lupanda!”

22Pilato avwanga kunoyali iila lyakwe citatu ati, “Uzye wataifya cani? Ntazanyile mulandu umwi uno watacita uwakuti afwilepo. Caleka namamunyambola sile nu kumusapula.”

23Lelo yatwalilila kulaizya nu kupamvya kuti Yesu atanwe, nga nu kulaizya kwao kusuka kutonsya Pilato. 24Caleka Pilato apingula ukulingana na vino yalondanga. 25Ayasapwila umuntu wino yalondanga, wiyo uwanyefilwe pamulandu wa kusangukila uteko nga na pamulandu wa kukoma. Lelo apeela Yesu kunoyali, kuti yacite mwaelile kulonda kwao.

Yesu watanwa pa lupanda

(Mat 27:32-44; Mk 15:21-32; Yoa 19:17-27)

26Lyene lino asilika yasenda Yesu, umu nzila iyalema Simoni uwaku Kuleni, ala akwiza mu musumba kufuma mu mpanga. Alino yamutwika lupanda kuti asende alondele Yesu cisila.

27Iumba likulu lilondela Yesu. Pakasi kao pali anaci alosyanga ni mpoma pamulandu wakwe. 28Yesu aseleukila kunoyali ayanena ati, “Mwe anaci amu Yelusalemu, mutandilila, lelo muililile mweisikulu na ana inu. 29Pano manda yaliza lino antu yalavwanga yati, ‘Alongo ing'umba, na anaci atatazile yavyale, nga na yao atatazile yonsye.’ 30#Ose 10:8; Umb 6:16 Lilyo alino antu yalanena imyamba yati, ‘Tuponelini,’ nga nu kunena twamba yati, ‘Tufisini.’ 31Pano ndi yacita vivyo ku muti wisi, nga fwandi cilaya uli ku muti ume?”

32Antu yauze yaili, ali vipondo, nayo kwene yasenzilwe ku kukomwa pamwi na Yesu. 33Lino yafika ku cifulo camwangwa, “Pi panga,” yatana Yesu ni vipondo vyoili kwene, conga kwi kasa lilunji ni cuze kwi mani lyakwe. 34#Mas 22:18 Lyene Yesu avwanga ati, “Tata, uyelele, pano yatamanyile cino yakucita.”

Lyene pakwankana vizwalo vyakwe yapendola. 35#Mas 22:7 Antu iimilila, yala yakulola, nga intunguluzi zya Ayuda ala zikumusoweka, zikuti, “Watuulanga auze, lekini aituule umwisikulu ndi cakuti wene ali Katuula wino Leza wasolola!”

36 # Mas 69:21 Na asilika kwene iiza kunoli, yamusaalula, yamuletela waini musasalume, yati, 37“Ndi wewe Mwene wa Ayuda, ituule wemwisikulu.”

38Na papela panoli palemvilwe mazwi yaa akuti, “Wii, ali Mwene wa Ayuda.”

39Wenga uwamu vipondo ivyatanyilwe nawe amusoweka, ati, “Uzye usi wewe Katuula uwalavilwe? Ituule wemwisikulu nga utuule naswe!”

40Lelo icipondo cuze cimukalipila citi, “Uzye wemo usyaopa Leza? Pasi pano nawe kwene uli mu uvunuko uli onga uwakufwa? 41Swemo catulingana ukuvunukwa, pano tukupokelela cilambu ciine ni milimo itu. Lelo pasi cintu cimwi ciipe cino umuntu wii wacita.” 42Lyene civwanga citi, “We Yesu ukanjiusye lino uliza na maka mu Wene wako.” 43Yesu nawe amunena ati, “Nakunena vino ilelo kwene umaya nani mu Paladaise#23:43 Paladaise: icikusenula ukuti cifulo ca nsansa kwiyulu..”

Imfwa yakwe Yesu

(Mat 27:45-56; Mk 15:33-41; Yoa 19:28-30)

44Cali manye lino ilanzi lyafika umutwe papela (12 Koloko), nga impanga yonsi inyepwa ni mfinzi kufika na pano ilanzi lyatemba (3 Koloko), 45#Kuf 26:31 pano ilanzi lyazimile. Cisalu ca mu Ng'anda ikulu yakwe Leza cilepuka pakasi. 46#Mas 31:5 Yesu alaizya ni izwi likulu ati, “Tata, nafumbatika mupasi wane mu makasa yako.” Lyene lino wavwanga cii, afwa.

47Musika wa mpuka ya vita lino walola vino ivyacitike alumbanya Leza, ati, “Cumi umuntu wii wali uwakaele!”

48Lyene antu yonsi yano akongine nu kulola ivyacitike, lino yalola vii, yaswilila kumwao ala yakuyuma pa vifuwa nu ulanda. 49#Luk 8:2 Lelo yano onsi amanyile Yesu, pamwi na anaci yano amulondile kufuma ku Galile, iimilila katalamukila ala yakulola vintu vii.

Kuzikwa kwakwe Yesu

(Mat 27:57-61; Mk 15:42-47; Yoa 19:38-42)

50Kwali umuntu izina lyakwe a Yosefu, uwaku Alimatiya, umusumba uwamu Yudeya. Wali uwamu nkombe zya mwi Tengo. Wali umusuma nupya uwalondelanga masunde, 51wino atazumilizye mapange nga ni vicitwa vyao. Wene walolelanga kwiza kwa Wene wakwe Leza. 52Muntu wii aya kuli Pilato kuya lenga icala cakwe Yesu. 53Lyene aciisya pansi, acipomba mu nsalu itiswe yamutengo, nga aciika mwi lindi lino yafukwile mwi we, umutatazile mulale umuntu. 54Cali pa wanda wakuteyanya, lino Sabata lyati lyatandika.

55Anaci yano alondile Yesu kufuma ku Galile yapita na Yosefu kuya lola ilindi na vino icala cakwe Yesu calalikwa. 56#Kuf 20:10; Malg 5:14 Alino yaswilila kumwao, yateyanya vya mununko usuma nga na mafuta acinunu cisuma.

Lelo pa Sabata yapuza, kulingana ni sunde.

Currently Selected:

Luka 23: MamL13

Highlight

Copy