Luka 20

Yesu yamuzya kuno wafumya maka

(Mat 21:23-27; Mk 11:27-33)

1Uwanda umwi lino Yesu wasambilizyanga antu mu Ng'anda ikulu yakwe Leza nu kukosola Ilandwe Lisuma, yasimapepo akalamba na yakasambilizya ya Masunde, pali pamwi na aikolo, iiza kunoli. 2Alino yamunena yati, “Tunene, uzye maka cii yano ukweti akucita vintu vii? Uzye aweni uwakupeela maka kwene yaa?”

3Yesu nawe aasuka ati, “Nani kwene namamuzya iuzyo. Nenini, 4uzye Yoane wafumizye kwi maka akuwatizya? Uzye akuli Leza nanti ku antu?” 5Nao yatandika kupazyanya aisikulu yati, “Uzye tumati uli? Ndi twati, ‘Wafumizye kuli Leza,’ nawe amati, ‘Uzye lyene, pacani mutataile Yoane?’ 6Nupya tutangati, ‘Wafumizye ku antu,’ pano antu yaa yonsi yamatutama na mawe, pamulandu wakuti yasininkizya vino Yoane wali a kasema.” 7Acino yaasuka yati, “Tutamanyile kuno wafumizye.”

8Yesu nawe ayanena ati, “Nani kwene ntakumunena uwampela maka akucita vintu vii.”

Mulumbe wa alimi ya calo ca matingi

(Mat 21:33-46; Mk 12:1-12)

9 # Eza 5:1 Lyene Yesu atwalilila kulanda, aumila antu mulumbe uu ati, “Kwali umuntu uwalimile calo ca matingi. Alino acipanzisya ku alimi, nga apita ku mpanga yuze pa nsita ntali. 10Lino nsita yakuzombola yafika, atuma muomvi wakwe ku alimi kuti yakamupeleko mulingo wakwe uwa vizao vya matingi. Lelo alimi yamuma alino yamuzinga, nawe apita minwe mitupu. 11Lyene atuma muomvi namuze, lelo nawe kwene yamuma nu kumuvundanya, alino yamuzinga, apita minwe mitupu. 12Umwine wa calo atuma muomvi wakwe citatu, lelo nawe kwene yamucisa, alino yamusumbila kunzi ya calo. 13Lyene mwine wa calo ca matingi ati, ‘Uzye namacita uli? Namatuma umwanane umonsi mukundwe. Mwanane wene yalamucindika!’ 14Lelo lino alimi yamulola, yavwanzyanya yati, ‘Wii ali mwana wakwe aalatoola icuma. Tuini tumukome, ni calo cimaya icitu!’ 15Caleka yamufumya kunzi ya calo ca matingi, nga yamukoma. Yesu auzya ati,

“Uzye lyene, umwine wa calo ca matingi alacita uli ku alimi yao? 16Aliza akome alimi yao, nu kupeela icalo ca matingi ku alimi yauze.”

Lino antu yuvwile cii, yavwanga yati, “Citanga ciye vii awe!”

17 # Mas 118:22 Yesu ayalolekesya nga ayauzya ati, “Uzye lyene, icalembwa cino cikati,

‘Iwe lino yakakuula yakanyile

lyene lyacisilwe iwe lya pitungi lya ng'anda,’ cikasenula uli?

18Wensi wino alaponela piwe lili, wene alavunolwa, Lelo wino wensi wino iwe lili lilaponela, wene alavungolwa.”

Iuzyo lya pa musonko

(Mat 22:15-22; Mk 12:13-17)

19Yakasambilizya ya Masunde na yasimapepo akalamba yalondanga inzila yakuti yalemelemo Yesu pa nsita kwene ilya, pano yamanyile vino wayasyentekanga mu mulumbe. Lelo yoopa antu. 20Lino yakwata kasita kasuma, yatuma inengu izyaicisile kwati zya cumi, pakuti ziteye Yesu mu mazwi yano walandanga, kuti zingamupeela mu makasa ya mulasi uwali na maka pa uteko. 21Caleka inengu zimuzya ziti, “Kasambilizya, twamanya vino ukalanda nga nu kusambilizya ivya cumi. Nupya twamanya vino utaya na kasoozi, lelo ukasambilizya Masunde yano Leza akalonda kuti antu yayela. 22Uzye, ciine na Masunde yakwe Leza kuti, twasonka kuli Kesa nanti foo?” 23Lelo Yesu lino wamanya ucenjezi wao, ayanena ati, 24“Ndangizyini lupiya longa. Uzye usyu ni zina ilyaya penepo ivyakwe weni?”

25Nao yaasuka yati, “Ivyakwe Kesa.” Caleka nawe ayanena ati, “Lyene pelini Kesa vyakwakwe, Leza nawe mumupele vyakwakwe.”

26Lyene yaposiwa kumuteya mu mazwi yano walanzile kuku pa manso ya antu. Lyene lino yazunguka cuze pa kwasuka kwakwe, yazuka yaya cele.

Iuzyo lya pamulandu wa kuzyukuka kufuma ku afwe

(Mat 22:23-33; Mk 12:18-27)

27 # Mil 23:8 Lyene Asaduki yamwi, yano akati antu yatalazyukuka kufuma ku afwe, iiza kuli Yesu yamuzya yati, 28#Malg 25:5 “Kasambilizya, Mose watulembile Isunde, ati, ‘Muntu ndi wafwa nu kusya umuci kwaula ana, umwina wakwe alinzile kupyana silenzi kuti amuvyalile ana.’ 29Lyene kwali aina cinimbali. Uwakutandika watwite mama, nga afwa kwaula kusya nanti umwana. 30Lyene wakwe ciili apyana silenzi, 31nga pacisila na wakwe citatu kwene. Mu musango uli onga yonsi kwene cinimbali yafwile, kwaula kusya umwana nanti wenga. 32Pacisila umwanaci nawe kwene afwa. 33Uzye lyene, pa wanda wakuzyukuka wene alaya muci wakwe weni? Pano yonsi cinimbali yamutwite.”

34Yesu nawe ayaasuka ati, “Antu amu mukulo uu yakatwala nga nu kutwalwa. 35Lelo yao yano calinga kuzyukuka kufuma ku afwe nu kwikala pamwi na Leza mu umi upya, yene yatalatwala nanti kutwalwa. 36Pano yene yalakolana wa angeli, nupya yatangafwa. Yene ana yakwe Leza, pano yene yalazyukuka kufuma ku afwe. 37#Kuf 3:6 Na Mose kwene, mu mazwi alembwa pamulandu wa kupya kwa cimpuza, wasininkizye vino afwe yalazyukuka yaye nu umi, lino wamile Mwene ati, ‘Leza wakwe Abulaamu, na wakwe Isaki na Yakobo.’ 38Wene asi Leza wa afwe, lelo a Leza wa antu aumi. Pano kunoli antu yonsi aumi.”

39Lyene yakasambilizya ya Masunde yamwi yamunena yati, “Kasambilizya, wavwanga ningo!” 40Lyene kutali umuntu wakuti auzye Yesu iuzyo na lyuze.

Iuzyo lya pali katuula uwalavilwe

(Mat 22:41-46; Mk 12:35-37)

41Yesu ayauzya ati, “Uzye yangalanda uli yati Katuula Uwalavilwe umwana wakwe Davidi? 42#Mas 110:1 Davidi umwisikulu walanda mu lupapulo lwakwe Masamu ati,

‘Mwene wanenyile Mwene wane ati,

Ikala kwi kasa lilunji lyane

43kufika lino ndakucimvizya anisi yako kuti yaye wa cilimba ca ngazo zyako.’

44Davidi wamwamile ati, ‘Mwene.’ Uzye lyene, Katuula uwalavilwe angaya uli umwana wakwe Davidi?”

Yesu wasokela alondezi yakwe pamulandu wakwe yakasambilizya ya Masunde

(Mat 23:1-36; Mk 12:38-40)

45Lino antu yonsi yakuuvwa kunoli, Yesu anena alondezi yakwe, ati, 46“Cenjelini kuli yakasambilizya ya Masunde, yano atemwa kutandala ni mingila yao itali nu kulamukwa nu mucinzi mu masokoni. Yano atemwa kwikala pa vilimba vya ucindami mu mang'anda ya mapepo na pa vifulo visuma pa vimulo. 47Yano akaliila yamukamfwilwa vyuma mu ucenjezi nu kuyasomba pa kuyapepela mapepo atali. Yaa, kuvunukwa kwao kulaya kukulu cuze.”

Currently Selected:

Luka 20: MamL13

Highlight

Copy