Luka 19

Yesu na Zakeyo

1Yesu aingila mu Yeliko lelo ala ali mu kupuzya. 2Lyene kwiza umwi, izina lyakwe a Zakeyo, uwali umukalamba wakwe yakasonkesya. Nupya wali umukama. 3Walondanga ukulola vino Yesu akaloleka. Lelo aposiwa pamulandu wakuti wali umwipi, nupya iumba lyamucinzile. 4Caleka asimula aya ku nkolelo, akwela ku musamvu lwa pano Yesu wali nu kwiza pita, pakuti amulole. 5Lyene lino Yesu wiza penepo alingamila, amunena ati, “Zakeyo, kalauka ika, pano ilelo kwene ndinzile mfikile ku ng'anda yako.”

6Zakeyo nawe aika zuwazuwa nu kupokelela Yesu nu luzango lukulu cuze. 7Lyene antu yonsi lino yalola cii, yailizyanya yati, “Umuntu wii wataya kukufikila kwakwe kaifya.”

8Zakeyo nawe aimilila anena Mwene ati, “Mwene, uvwa! Ndapela citika wa vyuma vyane ku apina. Nupya ndi natala nacenjezya umwi cili consi, ndamuwezezya maila yani kulingana ni cintu cico.”

9Yesu nawe amunena ati, “Ilelo wemo pamwi na amu ng'anda yako mwati mutuulwa, pano na wii kwene uwamu luko lwakwe Abulaamu.” 10#Mat 18:11 “Mwana wa Muntu wizile kuti alonde nu kutuula aponge.”

Mulumbe wa mpiya

(Mat 25:14-30)

11 # Mat 25:14 Walanga lino antu yacili uvwa pali vii, Yesu atwalilila kulanda, ayumila mulumbe. Yesu wali pipi cuze na Yelusalemu, nupya antu yelenginye vino Uwene wakwe Leza wali pipi nu kuloleka. 12Caleka ayanena ati, “Kwali umuntu umwi uwaku wene, uwayanga ku mpanga ya kutali kuti yakamusonte ukuya mwene, nga pacisila akaweluluke. 13Lyene aama aomvi yakwe ikumi, apeela cila wenga lupiya longa, ayanena ati, ‘Kaziomvini mu kuculuzya kufika lino ndawela.’ 14Lelo, aikazi ya mpanga ino walimo yamupasile. Caleka yatuma inkombe pacisila cakwe kuti zikalande ziti, ‘Tusikulonda umuntu wii, kuti aye mwene witu.’

15“Walanga lino wawela, pacisila cakupeelwa uwene, apeela ilamulo kuti aomvi yakwe yano wapile impiya iize kunoli, pakuti amanye vino yasyala yalonka kupitila mu uculuzi. 16Uwankolelo aiiza ati, ‘Mwene, nati nzanilapo impiya ikumi pali luno wampile.’ 17Mwene wakwe amunena ati, ‘Waomba ningo, we muomvi musuma! Pano wali uwakutailwa mu vintu vinono. Namakucita kangalila wa misumba ikumi.’ 18Wakwe ciili aiiza ati, ‘Mwene, nati nzanilapo impiya zisano pali luno wampile.’ 19Mwene wakwe amunena ati, ‘Umaya kangalila wa misumba isano.’ 20Muomvi muze nawe kwene aiiza ati, ‘Mwene, lupiya lwako luno wampile aulu. Nalunyefile mu citambala. 21Noofile, pano wewe mutale. Ukatola cino utika nupya ukazombola pano utakomile.’ 22Mwene wakwe amunena ati, ‘We muomvi mwipe! Namakupingula pa mazwi yako! Wamanya vino nene muntu mutale, nkatola cino ntika nupya nkazombola pano ntakomile. 23Uzye, lyene icani cino utaile uwika lupiya lwane ku banki? Lyene nani pakuwela nange ndutole pamwi nu muzano.’ 24Lyene anena yano aimi pipi ati, ‘Mupokini lupiya mupele muomvi wino ali ni mpiya ikumi.’ 25Lelo nao yamunena yati, ‘Mwene, wi wene akweti impiya ikumi!’ 26#Mat 13:12; Mk 4:25; Luk 8:18 Nawe ayanena ati, ‘Wensi akweti cimwi wene alapeelwa navyuze; lelo wino atakweti cimwi, nawe alapokwa na cino akwelenganya kuti akweti. 27Lelo anisi yane yano atalondanga kuti inje mwene wao yaletini kuno nu kuyakoma pa manso yane.’”

Yesu wingila nu ucindami mu Yelusalemu

(Mat 21:1-11; Mk 11:1-11; Yoa 12:12-19)

28Lyene lino wavwanga vii, akolelela alondezi yakwe ku Yelusalemu. 29Lino wafisile pipi na Betifage na Betaniya pa Mwamba wa Olivi, atuma alondezi yaili nkolelo ayanena ati, 30“Yangini ku muzi ulya uuli inkolelo inu. Lyene lino mwafika kuku, mumaya mukazane mwana punda anyefilwe, wino umuntu atatala wakwelapo. Mumusapule mumulete kuno. 31Muntu umwi ndi wamuzya wati, ‘Uzye pacani mukumusapwila?’ Mumunene muti, ‘Mwene akumulonda.’”

32Caleka yapita, yazana vintu vyonsi ndi vino Yesu wayanenyile. 33Lino yasapulanga mwana punda, aineco yayauzya yati, “Uzye pacani mukusapwila mwana punda?” 34Nao yaasuka yati, “Mwene akumulonda.” 35Lyene yamusenda kuli Yesu, yaanzapo ni insalu zyao pali mwana punda, nga yakwezya Yesu penepo. 36Lyene lino akupita, antu yaanza insalu zyao mu museo kuti yalange mucinzi kunoli.

37Lino wapalama ku Yelusalemu, pipi na pa mutantamuko wa Mwamba wa Olivi, iumba likulu lya alondezi lyonsi litandika kutaizya nu kulumbanya Leza na mazwi akulu pa vizungusyo vyonsi vino yaweni, 38#Mas 118:26 ala likuti, “Walongo a kateeka akwiza mwi zina lya Mwene! Mutende uye mwiyulu, nu lulumbi kuli Leza mwiyulu papelapela!”

39Lyene yamwi Afaliseo ali mwi umba yanena Yesu yati, “Kasambilizya, kalipila alondezi yako kuti yate kucita cii.”

40Yesu ayanena ati, “Namunena vino ndi yaa yamyalala, ale amawe kwene yaa yamapundanga.”

Yesu walilila Yelusalemu

41Lyene lino wapalama ku musumba, aulolekesya, nga aulilila, 42ati, “Owee! Ndi wamanyile ilelo ivikaleta umutende! Lelo vyene vyafiswa kunuli. 43Manda yaliza lino anisi yalakwizila nu kukukulilila ilinga. Yalakuzinguluka nu kukuyalila konsi. 44Yalakuwisya pansi nu konona antu yano aikala mwenemo. Nupya yatalasya iwe pa lyuze, pano utilwike kasita kakwiza kwakwe Leza kuti akutuule.”

Yesu wazinga aculuzi mu Ng'anda Ikulu yakwe Leza

(Mat 21:12-17; Mk 11:15-19; Yoa 2:13-22)

45Lyene Yesu aingila mu Ng'anda ikulu yakwe Leza atandika ukuzinga aculuzi, 46#Eza 56:7; Yel 7:11 ayanena ati, “Calembwa mu malembelo cati, ‘Ing'anda yane ilaamwa ing'anda ya mapepo.’ Lelo mwemo mwaicita ininga ya iivi.” 47#Luk 21:37 Manda onsi Yesu wasambilizyanga mu Ng'anda ikulu yakwe Leza. Yasimapepo akalamba, yakasambilizya ya Masunde, ni ntunguluzi zya antu amu Yudeya, yalondanga ukumukoma. 48Lelo yatazanyile nzila yakucita cii, pamulandu wakuti insita zyonsi wikalanga na antu ala yakuuvwa kunoli.

Currently Selected:

Luka 19: MamL13

Highlight

Copy