Luka 1
1
1Musambazi Teofilo, antu aingi yezya na maka kulemba pa vintu vino vyacitika pakasi kitu. 2Antu yaa yalemba vino tuvwile kuli yakambone aviweni kufuma ku utandiko, yano ali yakakosola. 3Lyene pano nani kwene nalondelezya ningo mulandu onsi kufuma ku utandiko. Caleka nelenginye kuti cingazipa kukulembela vintu vyonsi muno vyacitikile. 4Nacita cii pakuti umanye cumi ca pali vyonsi vino wasambiliziwa.
Mungeli Gabilieli Wasowela Kuvyalwa kwakwe Yoane Kawatizya
5Mu manda yakwe Helodi umwene wa Yudeya, kwali simapepo umwi izina lyakwe a Zakaliya, uwamu mpuka yakwe yasimapepo yakwe Abiya. Nu muci nawe kwene wali uwamu luko lwakwe Aloni, izina lyakwe a Elizabeti. 6Nao oili yali aololoke pa manso yakwe Leza, nu kuya ni cuvwilo ku mazwi ya Mwene yonsi. 7Lelo yatakweti umwana, pano Elizabeti wali ng'umba, nupya yonsi oili yali akoloci.
8Wanda umwi Zakaliya waombanga mulimo wa usimapepo pa manso yakwe Leza. Lwali uluti lwi umba lyakwe ilya usimapepo lwakutumikila. 9Wene wasolwilwe kupitila mu usilizi kuti aingile mu Ng'anda ikulu yakwe Leza nu koca ubani. 10Lyene iumba lyonsi lya antu lyali panzi, ala likupepa pa kasita ka koca ubani. 11Mungeli wa Mwene aloleka kuli Zakaliya, aimilila kwi kasa lilunji lya kavuwa kakocelapo ubani. 12Lino Zakaliya wamulola acintukila auvwa intete. 13Lelo mungeli amunena ati, “Utoopa Zakaliya, pano ipepo lyako lyati lyuvwika. Muci wako Elizabeti alakuvyalila umwana umonsi, alino naawe ulamutemela izina uti a Yoane. 14Lyene ulaya nu luzango ni nsansa, na antu aingi yalazanga pa kuvyalwa kwakwe, 15#Mpe 6:3 pano alaya mukulu pa manso ya Mwene. Wene atalamwa waini nanti cikakola lelo alaya na maka ya Mupasi Wamuzilo kufuma lino atali avyalwe. 16Alasenula aina Izlaeli aingi kuti yawelele ku Mwene Leza wao. 17#Mal 4:5 Nupya wene alakolelela Mwene, mu kuposya kwa mwenzo nu mu maka wakwe vino kasema Eliya wali. Nupya alakundanya ana na ya isi, nu kusenula yacipote kuti yatandike kulondela inzila zyawololoke, pakuti ateyanyizizye antu ku kwiza kwa Mwene.” 18Zakaliya auzya mungeli ati, “Uzye namamanya uli cintu cico kuti ca cumi? Pano nakota, nu muci wane nawe kwene wakota.”
19 #
Dan 8:16; 9:21 Lyene mungeli amwaasuka ati, “Nene Gabilieli, wino akaikala pipi na Leza, nupya natumwa kuti nize nkumanyisye nu kukunena Ilandwe Lisuma lii. 20Lyene ndakai umaya ciulu, nupya utalavwanga kufika nu wanda uno vintu vii vilayako, pano utataile mazwi yane yano alafikiliziwa mu kasita kakweyo.”
21Insita iyo antu yalolelanga Zakaliya nga yazunguka pano walengela kufuma mu Ng'anda ikulu yakwe Leza. 22Lino wafuma cimuposya kuvwanga kunoyali. Nao yamanya ukuti watalola icilolwa mu Ng'anda ikulu yakwe Leza, pano wayakapizyanga na makasa.
23Lyene lino uluti lwa kutumikila kwakwe lwasila, apita ukwakwe. 24Lino papisile manda, Elizabeti muci wakwe asenda indilwa, nga afisama mu ng'anda pa myezi isano. 25Elizabeti avwanga ati, “Ndakai Mwene wataya na mizu kunondi, wanzeulula insonyi ku antu.”
Gabilieli wasowela kuvyalwa kwakwe Yesu
26Lyene pipi nu mwezi uwalenga mutanda pano Elizabeti wasendile indilwa, Leza atuma mungeli Gabilieli ku muzi waku Galile, izina lyauko Nazaleti. 27#Mat 1:18 Mungeli wii wasenzile ilandwe ku mukazyana umwi atamanyile umonsi, uwataisiwe nu monsi wi zina lyakwe Yosefu, uwamu luko lwakwe Davidi. Ni zina lya mukazyana wilya wali a Maliya. 28Mungeli aiiza kunoli nga amunena ati, “Kwaita wemuno Leza wakumbusuka pakalamba! Mwene ali nawe.” 29Maliya asakamikwa pa mazwi yaa, asiima nu kuvwanga ati, “Nga ukulamuka ku kwa musango ci?” 30Lelo mungeli amunena ati, “Utoopa, Maliya, pano Leza watakukumbusuka. 31#Mat 1:21 Lola, umasenda indilwa, ulavyala umwana umonsi, ulamutemela izina uti a Yesu. 32#2Sam 7:12, 13, 16; Eza 9:7 Alaya mukulu nupya alaamwa u Mwana wakwe Leza uwa papelapela. Mwene Leza alamupeela uwene wakwe Davidi cikolwe cakwe, 33nawe alaya umwene wa ina Izlaeli pe na pe. Uwene wakwe utalatala uwe.”
34Lelo Maliya auzya mungeli ati, “Uzye ci cilaya uli, vino nemo intaya na monsi?”
35Mungeli amwaasuka ati, “Mupasi Wamuzilo uliza panuli, na maka yakwe Leza uwa papelapela yalakuvimba. Pamulandu uu, umwana wamuzilo alaamwa u Mwana wakwe Leza. 36Lola umunyonko Elizabeti. Nawe kwene watasenda indilwa nanti angala mukoloci. Camanyikwe vino atangavyala ana, lelo ndakai ali ni myezi mutanda kufuma pano wasendile indilwa. 37Pano pataya cintu nanti cimwi cino Leza angaposiwa.”
38Maliya avwanga ati, “Nene muomvi wa Mwene, kaciye ndi vino watuvwanga.” Lyene mungeli amusya apita. 39Pacisila ca manda yanono Maliya, acincila akatuka aya ku musumba uwali mu myamba ya mpanga ya Yudeya, 40aingila mu ng'anda yakwe Zakaliya nu kulamuka Elizabeti. 41Lyene walanga lino Elizabeti uvwa kulamuka kwakwe Maliya, umwana asukana umunda yakwe. Elizabeti nawe azuziwa na Mupasi Wamuzilo, 42nga asanzika izwi ati, “Walongo kuluta a wewe mu anaci onsi, nupya walongo u mwana wino ulavyala. 43Uzye nene weni, uwakuti nyina wa Mwene wane aliwe aiize ku kundola? 44Pano lino nuvwa izwi lya ulamuko wako nu mwana munda yane wasukana nu luzango. 45Walongo awewe wemuno wataila ukuti vino Mwene wakunenyile vilafikiliziwa!”
Ulwimbo lwakwe Maliya lwa Kulumbanya Leza
46 #
1Sam 2:1
Maliya wimvile ati,
“Nkulumbanya Mwene nu mwenzo wane onsi;
47nupya untu wane ukuzangila muli Leza Katuula wane,
48 #
1Sam 1:11
pano watankumbusuka ne muomvi wakwe uwaicefya!
Kufuma ndakai antu amu nkulo zyonsi yamangamanga yati wewe walongo,
49pano Leza Wamaka yonsi watancitila vintu vikulu.
Izina lyakwe Leza ilya muzilo.
50Kufuma ku nkulo yonga kufika ku yuze akalanga mizu kuli yano akamucindika.
51Mwene wataomvya ikasa lyakwe lya maka pa kusalanganya antu a myenzo ya cilumba.
52 #
1Sam 2:1; Yob 5:11; 12:19 Watasisya asambazi pa vilimba vyao vya wene, lelo watakwezya antu aicefya.
53Wataikusya anzala ni vintu visuma, na akama watayazinga yapita iminwe itupu.
54Wataazwa yaomvi yakwe aina Izlaeli kuti aiusye kuya na mizu kunoyali.
55 #
Uta 17:7; 1Sam 2:1 Vii avino walavile kucitila Abulaamu na yonsi amu mupanda wakwe, amanda pe.”
56Maliya watenzi na Elizabeti myezi itatu nga pacisila aswilila kumwao.
Kuvyalwa kwakwe Yoane Kawatizya
57Lino insita yafisile yakwe Elizabeti kuti alele, nga avyala umwana umonsi. 58Auze na akazi kakwe yuvwile vino Mwene wamuyela mizu, nga yazangila pamwi nawe.
59 #
Levi 12:3
Pa wanda uwalenga cinani izile ku kusilamula umwana, nga yakasi yamutemele izina lyakwe isi, ilya kuti Zakaliya. 60Lelo nyina akana ati, “Awe! Izina lyakwe lino tumamutemela a Yoane.”
61Lyene yamunena yati, “Mutatala mwakwata mu luko lwinu umwi wi zina lilyo.” 62Alino yavwanga na makasa kuli isi, yamuzya kuti yamanye izina lino angatemela umwana.
63Lyene Zakaliya ayalenga cakuti alembepo, nga alino alemba ati, “Izina lyakwe a Yoane.” Awe na antu yonsi yazunguka. 64Lilyo kwene lulimi lwakwe Zakaliya lusapuka nawe avwanga, atandika ukulumbanya Leza. 65Auze yonsi yuvwa intete, ni landwe lya pa vintu vii lisalangana konsi ku misumba iyali ku myamba ya mpanga ya Yudeya. 66Na yonsi yano auvwile vintu vii yavisunga mu myenzo yao nu kuyuzya aisikulu yati, “Uzye umwana wii alaya uli?” Pano calolike paswe vino amaka ya Mwene yali panoli.
Ulwimbo lwakwe Zakaliya
67Lyene Zakaliya isi wakwe Yoane azuziwa nu Mupasi Wamuzilo nga avwanga mazwi afumile kuli Leza ati,
68“Lekini tulumbanye Mwene Leza wa Izlaeli, pano
wataiza ku kutandalila nu kukulula antu yakwe.
69Watapela kunotuli Katuula wa maka, uwamu luko lwakwe Davidi.
70Ku mpiti wavwanzile kupitila muli yakasema yakwe amuzilo.
71Walavile ukuti alatutuula kufuma ku anisi itu, kufuma ku maka yakwe yano atupata.
72Watile alaya na mizu ku antu itu, nu kwiusya upangano wakwe uwamuzilo.
73Nupya walavile Abulaamu, cikolwe citu, nu mulapo,
74kututuula kufuma ku anisi itu, kuti twamutumikila ukwaula intete,
75kuti twaikala mu umi wamuzilo nu wololoke pa manso yakwe, mu manda ya umi witu onsi.
76 #
Mal 3:1
Nawe mwana we, ulaamwa kasema wakwe Leza uwapapelapela, pano ulakolelela Mwene kuya muteyanyizizya museo wakwe.
77Ulamanyisya antu yakwe ukuti Leza alayelela maifyo yao, nga mu musango kwene uu amuno Leza alayatuulila.
78Leza witu wakwatisya mizu. Alatutumila luswepo kufuma kwiyulu ululaengesa panotuli wa micalalazi yi lanzi katondo
79 #
Eza 9:2
nu kuyengesa pali yonsi yano aikala mu mfinzi nu mu cinzingwa ca mfwa, nga nu kututungulula mu kwikala umi wa mutende.”
80Lino Yoane wakulanga, Mupasi Wamuzilo wamupile maka akulu cuze. Watenzi mu lwanga kufika uwanda uno wizile aloleka paswe ku ina Izlaeli.
Currently Selected:
Luka 1: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
