Yoane 21

Yesu waloleka ku alondezi cinimbali

1Pacisila cakwe cii, Yesu aloleka nupya ku alondezi yakwe pali yemba wa Tibelyasi. Kuloleka kwakwe kwacitike ndi vii. 2Simoni Petulo, Tomasi (wino akaamwa ukuti Didimo), Natanaeli (uwafumile ku Kana, uwaku Galile), yamwana Zebedi aonsi, nga na alondezi yauze yaili, yaa yonsi yali pamwi. 3#Luk 5:5 Alino Simoni Petulo anena alondezi yauze ati, “Nemo naya ku kuvuwa.”

Nao yamunena yati, “Naswe kwene katukulondele.” Caleka yapatama mu wato, yapita. Lelo usiku ulya yatumile nanti inswi yonga. 4Lino kwaca ala ni lanzi litacili litunke, Yesu aimilila pa nkumba yakwe yemba, lelo alondezi yene yatamanyile vino a Yesu. 5Lyene ayauzya ati, “Mwe yacuza, uzye mutumile nanti inswi yonga?” Nao yaasuka yati, “Awe, mukwai twawela sile minwe mitupu.”

6 # Luk 5:6 Nawe ayanena ati, “Sumbilini isumbo linu kwi lunji lya wato nga mumauma zimwi.” Nao yasumbila isumbo, nga ni nswi zilemyamo izingi cakuti yaposiwa kukula isumbo.

7Alino mulondezi wino Yesu watemilwe kuluta anena Petulo ati, “Ala wii Umwene!” Lino Simoni Petulo uvwa vino umuntu wii Umwene, azwala ikoti (pano walanga watasamwila) nga aisumba muli yemba. 8Lelo alondezi yauze iiza ku nkumba yakwe yemba mu wato ala yakukula isumbo ilizilemo ni nswi. Yatali kutali ni nkumba yakwe yemba, yali manye mamita mwanda onga. 9Lino yakookela ku nkumba yakwe yemba nu kupatuka mu wato, iyalola kweneko moto wa malasya ni nswi penepo, nga yalola ni mikate. 10Alino Yesu ayanena ati, “Letini inswi zimwi zino mwati muma.”

11Caleka Simoni Petulo apatama mu wato nga akulila isumbo ukunzi ala lizilemo ni nswi zikulu mwanda onga na makumi yasano na zitatu. Lelo nanti zyali zingi cuze, isumbo litalepwike. 12Yesu ayanena ati, “Izini mulye.” Lelo patali umwi uwamu alondezi wakuti amuzye ati, “Uzye wewe weni?” Pano yonsi yamanyile vino wene Umwene. 13Yesu apalama atoola umukate nga aupela kunoyali. Alino atoola inswi acita cili conga kwene.

14Lii, lili ila lyakwe citatu lino Yesu walolike ku alondezi yakwe pacisila ca kuzyukuka kufuma ku afwe.

Yesu na Petulo

15Pacisila lino yalya, Yesu auzya Simoni Petulo ati, “We Simoni mwana wakwe Yoane, uzye wantemwa kuluta vino yaa yauze yantemwa?”

Awe aasuka ati, “Endi Mwene, wamanya vino nakutemwa.” Yesu nawe amunena ati, “Uwalisya ana ya mfwele akwane.” 16Nupya amuuzya iila lyakwe ciili ati, “We Simoni mwana wakwe Yoane, uzye wantemwa?”

Nawe aasuka ati, “Endi Mwene, wamanya vino nakutemwa.” Yesu amunena ati, “Uwasunga mfwele zyane.” 17Yesu amuuzya iila lyakwe citatu ati, “We Simoni mwana wakwe Yoane, uzye wantemwa?”

Petulo auvwa ulanda pano Yesu wamuzya iila lyakwe citatu ati, “Uzye wantemwa?” Alino Petulo amunena ati, “Mwene wamanya vintu vyonsi. Wamanya vino nakutemwa!”

Alino Yesu amunena ati, “Uwalisya mfwele zyane. 18Cumi nakunena, vino wemo lino wali mulumendo wainyepanga musipi nu kuya kuno ukasi. Lelo lino ulakota, ulololola makasa yako nga umuntu muze alakunyepa nu kukusenda kuno utakasi kuya.” 19(Yesu wavwanzile vii kuti alange musango wa mfwa ino Petulo alafwa nu kuleta lulumbi kuli Leza.) Walanga wavwanga vii, anena Petulo ati, “Ndondela.”

Yesu nu Mulondezi Muze

20 # Yoa 13:25 Petulo aseleuka, nga alola mulondezi wino Yesu watemilwe kuluta ala alondile. Wikwene ali wino watenzi pipi na Yesu lino yali pa cipango yakulya, auzya ati, “Mwene, uzye aweni amakukoopa?” 21Lino Petulo wamulola, auzya Yesu ati, “Mwene, uzye ku muntu wii nawe cilaya uli?”

22Yesu amwaasuka ati, “Ndi nkasi kuti alali kufika na lino ndiza, uzye cikupazi? Wemo ndondela.” 23Caleka mpwelo isalangana konsi mu alondezi yakwe Yesu ukuti wii wene atalafwa. Lelo Yesu atavwanzile vino wii wene atalafwa. Wene wavwanzile ati, “Ndi nkasi kuti alali kufika na lino ndiza, uzye cikupazi?”

24Mulondezi kwene wii aliwe wapela umboni nga nu kulemba vintu vii vyonsi. Twamanya vino umboni wakwe uwa cumi.

Mazwi akusyalikizya

25Kuli vintu navyuze vino Yesu wacisile. Ndi vyonsi vyalemvilwe, nkwelenganya vino pano nsi ponsi patangaya incende ya kwikamo mpapulo zino zingalembwa.

Currently Selected:

Yoane 21: MamL13

Highlight

Copy