Utandiko 23
23
Sala wafwa na Abulaamu wakala icifulo ukwa kumuzikako
1Sala watenzi imyaka umwanda onga na makumi yaili na cinimbali. 2Wafwilile ku Kilyati Aliba (kuli kuti Hebuloni) mu mpanga ya Kenani. Lyene Abulaamu aingila mu ndosya nu kulila impoma.
3Abulaamu afuma mu ndosya aya ku ina Hiti avwanga ati, 4#Aye 11:9, 13; Mil 7:16 “Nene mwinamasi nupya mwenyi kunomuli. Nkazini impanga iya kuzikapo pakuti ningazika umuci wane.”
5Aina Hiti yazumila yati, 6“Musambazi uvwa kunotuli, swemo twakumanya vino wewe ntunguluzi ya maka. Ufwile kuzika mama wako mwi lindi lisuma. Ali wensi muli sweswe angatemwa ukupeela ilindi kuti uzike Sala.”
7Nga Abulaamu akontama inkolelo ya ina Hiti, akaya ya mpanga iya, 8ayanena ati, “Nga mwalola camuzanzya ukuti ningafumya icala ca muci wane mu ng'anda nu kumuzika, munganguvwa mumvwangile kuli Efuloni mwina Hiti, umwana umonsi wakwe Zoyali 9kuti ankazye icele lyamu Makipela lino wakwata. Lili lino lyaya ku mbali ya musonso wakwe. Mumuzye kuti ankazye pa mutengo ulinzile pakwene pa manso inu, kuti ciye icifulo cakuti nazikilapo akazi.”
10Efuloni umwina Hiti umwisikulu pano wali pakasi ka antu yakwe aina Hiti lino yakomanyile pa mpongolo ya musumba, nawe aasuka pa manso ya antu yakwe aina Hiti ati, 11“Asi avino cingaya musambazi. Namakupeela icalo consi ni cele kumwi pakwene pa manso ya antu yane. Namakupeela kuti uzike umuci wako.”
12Lelo Abulaamu nupya akontama inkolelo ya antu ya mpanga ilya, 13nga avwanga kuli Efuloni, ala yonsi yakuvwa, ati, “Uvwa kunondi ndu mauvwa vino nkulanda. Napapata uvwa kunondi namakala icalo consi. Zumila ukunkazya nani namazika umuci wane kuku.”
14Efuloni azumila ati, 15“Musambazi, impanga ilya ingakaziwa pa mutengo wa kulingana ni mpiya imyanda ini zyakwe siluva. Lelo uzye cico cingatucitila cani, wewe nani? Toola umuci wako umuzike mwenemo.” 16Lyene Abulaamu azumila nga apima cipimo kulingana vino Efuloni walanzile, nga amupeela pa manso ya ina Hiti impiya imyanda ini izyamutengo wa calo, kulingana ni cipimo icazumiliziwe cino aculuzi yaomvyanga.
17Vi avino impanga iyali yakwe Efuloni pa Makipela, ku ufumondaka wa Mamule, izile iya impanga yakwe Abulaamu. Yali ni calo, icele, ni miti yonsi yazingulwike ukufika nu ku mupaka. 18Cimanyika pa manso ya ina Hiti yonsi ali pa ukongano ulya ukuti lyene yaya impanga yakwe Abulaamu.
19Lyene Abulaamu azika umuci Sala mwi cele lilya mu musonso uwaku Makipela lwaku ufumondaka wakwe Mamule (uwaya mu Hebuloni) mu mpanga ya Kenani. 20Caleka icalo ni cele mukasi, icali ca ina Hiti, ciya icakwe Abulaamu caku matawa.
Currently Selected:
Utandiko 23: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
