Utandiko 14
14
Abulamu watuula Loti
1Mu manda yalya Amulafeli umwene waku Syinala, Alioki umwene wa Elasali, Kedolaomeli umwene wa Elamu na Tidali umwene wa Goimu 2yaile ku kulwisya yamwene yasano. Yamwene yaa yali a Bela uwamu Sodoma, Bilasya uwamu Gomola, Sinabu uwamu Adima, Syemebali uwamu Zeboimu nu mwene uwamu Belali (nanti Zoali). 3Yamwene yaa yasano yuvwana kuminkanya ivita vyao mu cifoloma ca Sidimi (Ndakai cikaamwa ukuti Yemba wa Musilya). 4Yamwene yaa yatesilwe nu mwene Kedolaomeli pa myaka ikumi na iili, lelo mwaka uwalenga ikumi na itatu yamukatukila. 5Mu mwaka uwalenga ikumi na ini Kedolaomeli ni vita vyakwe na yamwene yano yuvwananga nawe, yumana akapi yalwisya yacimvya aina Lefaimu mu Asyitaloti Kalinaimu, na Zuzimu mu Hamu, Emimu mu Syave Kilyataimu, 6na ina Holi mu myamba ya Seili ukufika nu ku Eli Palani, ku mpela ya lwanga. 7Lyene iyasenuka iza ku Kadesyi (kuno yamanga yati Enimisipati, kuli kuti kafukoka ka uputuzi) yacimvya impanga ilya yonsi ya ina Amaleke ni ya ina Amoli atenzi mu Hazazoni Tamala.
8Lyene yamwene amu Sodoma, Gomola, Adima, Zeboimu, na Bela nayo yuminkanya vita vyao mu cifoloma ca Sidimi ku kulwisya yamwene yao. 9Kedolaomeli umwene waku Elamu, Tidali umwene waku Goimu, Amulafeli umwene waku Syinala, nga na Alioki umwene waku Elasali, yamwene yani yalwisya yamwene yasano. 10Mu cifoloma ca Sidimi mwali viwina vya manenekela vivule, nga lino aina Sodoma na ina Gomola yatiyutuke ku ulwi, yaponelamo. Lelo auze apunsumwike yutukile ku myamba. 11Caleka yamwene yani yasampa vyuma vyamu Sodoma nu mu Gomola, vyonsi pamwi ni vyakulya, nga yapita. 12Yasenda Loti umwana wa mwina wakwe Abulamu uwikalanga mu Sodoma pamwi na vyonsi vino wakweti.
13Lelo umuntu umwi uwapunsumwike aya anena Abulamu Muyebulai. Abulamu wikalanga pipi nu ku miti yamuzilo yakwe Mamule mwina Amoli. Mamule na Esyikoli nga na Anele yali aina, apangine kulemana na Abulamu ku vya nkondo. 14Lino Abulamu uvwa ukuti yatiyasenda Loti umwana wa mwina ku uzya, akonganika akazi ni vita vyakwe, vyonsi pamwi 318 yalondela yamwene yalya mpaka kufika ku Dani. 15Lino yafika Abulamu apaatula vita vyakwe mu maumba maumba, nga yazanza anisi insita ya usiku, yayacimvya. Anisi yalya yutuka, nayo yayazinganya kufika ku Hoba, ku katutu kakwe Damasiko. 16Lyene Abulamu apokolola vyonsi vino yasenzile, awezya na Loti umwana wa mwina, ni vyuma vyakwe, pamwi na anaci nga na antu yauze asenzilwe ku uzya.
Mekisedeki wapolelela Abulamu
17Lino Abulamu akuwela ku kucimvya umwene Kedolaomeli na yamwene yano ali nawe, umwene uwamu Sodoma waile ukuya mukomanya mu cifoloma ca Syave (kuli kuti cifoloma ca mwene). 18#Aye 7:1-10 Na Mekisedeki umwene waku Salemu, nupya simapepo wakwe Leza uwapapelapela nawe aletela Abulamu umukate na waini. 19Alino apolelela Abulamu, avwanga ati, “Leza wapapelapela uwaumvile insi ni yulu, apolelele Abulamu! 20Leza wapapelapela uwakupezile ukucimvya pa anisi yako alumbanyiwe.” Lyene Abulamu apeela Mekisedeki icikumi ca muli vyonsi vino wapokolwile.
21Mwene waku Sodoma anena Abulamu ati, “Vyonsi vino wapokolwile sunga, lelo mbwezezye antu yane yonsi.” 22Abulamu aasuka ati, “Nkulapa pa manso yakwe Yawe, Leza wapapelapela kaumba wa nsi ni yulu, 23ukuti ntakusunga icintu nanti conga cakwako, nanti usavu nanti mukowa wa ndyatu. Lyene utalati, ‘Nene nalenzile Abulamu ukuya umukama.’ 24Kusi nanti cimwi cino namatoola, manye nazumila vino antu yane yatiyaomvya na vino yayalya, nga nu wankanyo wakwe yano twali nayo. Lekini Anele, Esyikoli na Mamule yatolepo wankanyo wao.”
Currently Selected:
Utandiko 14: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
