Mataio 28

Runeonoꞌo Bare Iḡuniro

(Mareko 16:1-8, Luka 24:1-12, Ioane 20:1-10)

1Bana Madaḡa ḡarugano, fura oherebau uzeuze, Magadala roḡaeḡa Maria zu Maria ꞌahoganiꞌa idu ḡianoga radu onamiro. 2Eꞌe madaḡano tabara habaꞌa borofe hagariro. Ebu Zuhiꞌa Boro tuḡure viganiꞌa adureꞌonoꞌo ovaadu idu hadiḡa kiune vaḡiniro ebu eꞌe rana ehoriro. 3Ani iraḡaꞌe vazavazaheꞌeteꞌe teige ebu dabuaḡaꞌe ḡoze teige uraro. 4Idu taufeꞌeteꞌe azaḡaꞌe ani rihanadu rereraro ebu rune azaḡa teigiro.

5Ebu tuḡure viganiꞌa roḡae ꞌaheu ziro, raenaꞌa, “Ago rihanoꞌi. Eḡe edeḡa zaꞌe satauroniroteꞌe vazeḡa, Iesu vaḡeꞌohe. 6Aniꞌe ahao oꞌoꞌa, mazaḡa ani reiroteꞌe teige, runeonoꞌo iḡuneha. Aroꞌi ebu aniꞌa bazateꞌe habaꞌa ḡianoꞌi. 7Ebu za ḡarihe onamadu ane tahiꞌatahiꞌa zoꞌi, raenaꞌa, 'Aniꞌe runeonoꞌo iḡuneha. Ebu ibite Galilea habaꞌa onamadu eꞌea zaꞌa ani horoniꞌuma.' Eḡeꞌa zeateꞌe faine egoꞌi.”

8Eꞌanoꞌo roḡaeroḡaeꞌa rihozeta zu matuꞌuzeta idu habaꞌanonoꞌo ḡarihe iḡunadu Iesu tahiꞌatahiꞌa zouga veize zeḡe vaḡe dure onamiro. 9Eꞌe madaḡano Iesuꞌa tabara ze hidiro, ebu raenaꞌa, “Za manoḡahehe?” ꞌOuge reirotene ze ani uhiḡa ariro ebu odaḡa obonadu matuꞌoharo. 10Ebu Iesuꞌa zinaꞌa, “Ago rihanoꞌi. Onamadu eḡe nego duḡuru zinaꞌa, 'Galilea habaꞌa onamoꞌi,' rae zoꞌi. Eꞌea zeḡeꞌa eḡe hidiꞌuma.”

Idu Taufiroteꞌe Azaḡa Hariḡa

11Roḡaeroḡaeꞌa onamiroteꞌe zamaḡano, idu taufiroteꞌe azaḡaniꞌa ne onamiro ebu naginiꞌa fureraroteꞌe hariḡa dibuo azaḡa ḡihiꞌaḡaḡihiꞌaḡa ihoziro. 12Dibuꞌo azaḡa ḡihiꞌaḡaḡihiꞌaḡaniꞌa vaze boroboro teite nuꞌoranadu ḡoaniro ebu idu taufiroteꞌe uti azaḡa moni boro ziniro. 13Ebu zinaꞌa, “Zaꞌe ꞌahiḡe rae roi, 'Ane tahiꞌatahiꞌa ohere aradu eme bazuꞌenona ani ahiri ḡonotu feraneha.' 14ꞌAhi hariḡaniꞌa Roma gavana vazeḡa mazao feurine, eme zae uꞌano ani mazao ḡoeriꞌuma ebu zaꞌa baziroteꞌe moneo aduga mene hidiꞌuma.” 15Eꞌanoꞌo idu taufiroteꞌe uti azaḡaniꞌa moni madu zeḡeꞌa ziroteꞌe idunaḡano ḡoeriro. Ebu eꞌe hariḡaꞌe Iuda azaḡa zamaḡano bororaro zu izidi madaḡano zuni vazeꞌa ꞌouge raꞌohe.

Iesuꞌa Tahiꞌaḡa Ḡoereziro

(Mareko 16:14-18, Luka 24:36-49, Ioane 20:19-23, Apostolo 1:6-8)

16Ebu Iesu tahiꞌa 11 Galilea habaꞌa onamadu aniꞌa reiroteꞌe maḡano feuriro. 17Feurirotene, ze ani horonadu ani mazao kuraro. Rehano nu zamazeꞌa tugahiro.

18Ebu Iesuꞌa ze vaḡe aradu ziro, raenaꞌa, “Gigiꞌaḡa adureo ebu rahao niduaꞌe eḡe eneha. 19Eꞌanoꞌo zaꞌe onamadu habaꞌahabaꞌa azaḡa niduꞌa eḡe tahiꞌatahiꞌa rouga veize zamazoꞌi. Moga, Ubuga zu Vine Zaḡoḡa niḡano bapatizozoꞌi, 20ebu eḡeꞌa ḡoereziroteꞌe ḡoeꞌa niduꞌa zeḡeꞌa hegotoga veize ihozoꞌi. Ebu ꞌahi zamaroꞌi: E iḡaiḡa zae teite radiuꞌohe onamo mada ḡonaga reꞌuma.”

Currently Selected:

Mataio 28: KSJ

Highlight

Copy