Mataio 24

Kuru Neḡa Fahe Hauḡiꞌuma rae Reiro

(Mareko 13:1-2, Luka 21:5-6)

1Iesuꞌa kuru neḡanonoꞌo iḡune buau onamirotene, ane tahiꞌatahiꞌa ani vaḡe onaadu kuru neḡa iraḡa nunu manomano ihoniro. 2Rehano aniꞌa ziro, raenaꞌa, “Za ḡau ꞌadi niduꞌa horoneꞌehehe? Eꞌe hube hune ziꞌohe, hadi ꞌahoganiꞌa hadi ꞌahoga ranao mene radiꞌuma madaḡa onaiꞌuma. Agire azaḡaniꞌa eꞌe niduꞌa fahe ruruniꞌuma!”

Mada Ḡonaḡano Haḡai Nu Badeḡa

(Mareko 13:3-13, Luka 21:7-19)

3Iesuꞌa Olive maḡano ehorirotene, ane tahiꞌatahiꞌa zeḡe daꞌo ani vaḡe sifu onamadu ḡadiniro, raenaꞌa, “Ḡa efoꞌi, kuru neḡa mazao ꞌahi ḡauḡaꞌe naniꞌa fureraꞌuma? Mada ḡonaḡano zu ḡaꞌa bare onaiꞌuma madaḡano, nagi haḡai nu badeḡaniꞌa fureraꞌuma?”

4Aniꞌa naenaeziro, raena'a, “Vazeꞌa zae mene tutuze veꞌozoga veize ḡianoꞌi. 5Vaze ḡehaḡaniꞌa eḡe nio aradu, 'Eꞌe Keriso' rae reꞌuma. Ebu zeꞌa vazevaze tutuze veꞌoziꞌuma. 6Zaꞌe uti hariḡa zu uti ḡoeꞌa nunu raꞌeteꞌe igiꞌuma, rehano ago rihanoꞌi. ꞌAhiguḡaꞌe ibite fureraꞌuma, rehano mada ḡonagaꞌe zogone mene ariꞌuma. 7Habaꞌa ꞌahoganiꞌa habaꞌa ꞌahoga teite utitiꞌuma, zu gavamani ꞌahoganiꞌa gavamani ꞌahoga teite utitiꞌuma. Haba nunu zamaḡano zagaꞌa hiaꞌuma zu habaꞌa hagareteꞌeꞌa fureraꞌuma. 8Eꞌe niduꞌaꞌe aduga ḡadaheḡa rae reꞌuma, rehano aduga nu ize fureraꞌuma.

9Ebu vazeꞌa za oboze teadu sausauziꞌuma, zu zimi ruziꞌuma. Eḡe uꞌano haba azaḡa niduꞌaniꞌa heꞌeheꞌeziꞌuma. 10Eꞌe madaḡano vaze ḡehaḡaniꞌa eḡe mazao fieꞌeteꞌeꞌa dauḡiꞌuma, revotitiꞌuma zu heꞌeheꞌetitiꞌuma. 11Ḡuriro peroveta azaḡa ḡehaḡa zuni iḡunadu vaze ḡehaḡa soꞌoziꞌuma. 12Vaze sauꞌaniꞌa ufeta bororuꞌeteꞌe uꞌano, vaze ḡehaḡaniꞌa zeḡe nabudize mene zamariꞌuma. 13Rehano iniuꞌa zamaḡa obone gigane onamo ḡonaga meine, aniꞌe ḡabone tuḡutuḡu hidiꞌuma. 14Ebu Badiꞌaꞌa ibitoziniꞌeteꞌe hari manoḡaꞌe raha ꞌadi niduꞌa zamaḡano bororanadu habaꞌahabaꞌa azaḡa niduꞌa igiꞌuma. Eꞌe enogano mada ḡonaganiꞌa onaiꞌuma.

Ierusalema Ruiniꞌuma

(Mareko 13:14-23, Luka 21:20-24)

15Ibite peroveta vazeḡa, Danielaꞌa ḡau niduꞌa ruineꞌeteꞌe vazeḡa sauꞌa ꞌahoga moneo ḡoeriro.#24:15 Daniela 9:27, 11:31, 12:11 Vaze eꞌeꞌa haba zaḡoḡa sausauneꞌeteꞌe zaꞌa horoniꞌuma madaḡaniꞌa ariꞌuma. (Buka Zaḡoḡa meꞌodeꞌeteꞌe vazeḡa, ḡoere huga ꞌadi faine ederoꞌi.) 16Eꞌe madaḡano Iudea habaꞌano radiuꞌeteꞌe azaḡaꞌe maḡa ferau itoꞌi. 17Iniuꞌa ne enona radiuꞌeteꞌe vazeḡaꞌe ḡauḡa mouga veize neḡa zamaḡa ago diuḡoꞌi. 18Meba zamaḡano hiheꞌeteꞌe vazeḡa zuni dabua mouga veize ago bare onamoꞌi.

19Eꞌe madaḡano ahiꞌeta roḡaeḡa zu nune hina ene guraḡa ḡubuzeꞌeteꞌe roḡaeḡa, zeꞌe fase vetuḡaḡa, feranoga mene idaḡa uꞌano, aduga hidiꞌuma. 20Irugu madaḡano#24:20 Girikio, Nahune madaḡa, Isaraela habaꞌano nahune madaḡaꞌe nahune boro zu irugu boro radu vazeꞌa ragavogaꞌe riḡa ga Bana Madaḡano mene feranoga veize kuranoꞌi, 21mazaḡa eꞌe madaḡano vaze niduꞌa aduga boro hidiꞌuma. Badiꞌaꞌa ḡadaheḡano ḡau niduꞌa haḡairoteꞌeꞌonoꞌo onao izidi, aduga ꞌahiguḡa mene fureraro. Vehuꞌu zuni mene bare fureraꞌuma. 22Zuhiꞌa Boroꞌa eꞌe madaḡa mene futufine, vaze tiba zuni mene ḡabode radiꞌuma. Rehano aneꞌa mae ohotiroteꞌe azaḡa uꞌano, eꞌe madaḡa futufiꞌuma.

23Ebu vaze ꞌahoganiꞌa zinaꞌa, 'Ḡianoꞌi, Kerisoꞌe ꞌahi eꞌe!' ga 'Omo ꞌeꞌe!' rae zoꞌidene, eꞌe ḡoeꞌa ago mae ḡihinoꞌi. 24Mazaḡa ḡuriro kerisoḡa zu ḡuriro peroveta azaḡaniꞌa fureranadu haḡai nu badeḡa boro bagaḡa zu zaguzagaꞌuma haḡaiḡa haḡaeꞌenaꞌa, vaze soꞌoziꞌuma. Zeꞌa, Badiꞌaꞌa ohotiroteꞌe azaḡa zuni tutuze soꞌozoga idaḡa reine, ꞌougiꞌuma. 25Zamare radoꞌi! Eꞌe madaḡaniꞌa izema furarogano, eḡeꞌa zae ibite ihozeha. 26Eꞌanoꞌo vaze ꞌahoganiꞌa zinaꞌa, 'Ḡianoꞌi, Kerisoꞌe haba bohaꞌano,' roꞌidene, ḡianihi radu ago onamoꞌi, ga 'Ḡianoꞌi, aniꞌe ne zamaḡano,' roꞌidene, eꞌe ḡoeꞌa ago mae ḡihinoꞌi. 27E, Vaze Ubuganiꞌa bare onaine, vaze niduꞌa huneꞌa horohiꞌuma. Aꞌe, viriꞌa vazahadu madaꞌa iteꞌeteꞌe moneꞌonoꞌo ovoeꞌeteꞌe moneo aganadu vaze niduꞌa horoneꞌeteꞌe heuḡa. 28Naginiꞌa rudanateꞌe habaꞌano gaozaꞌa nuꞌoraꞌuma.

Vaze Ubuganiꞌa Ovaiꞌuma

(Mareko 13:24-27, Luka 21:25-28)

29Ebu aduga madaḡaniꞌa hauḡine, zogone ꞌahaꞌa fureraꞌuma:

'Madaꞌa uzaboraꞌuma ebu batoꞌe mene agaraꞌuma.

Buzuvaꞌe adureonoꞌo rururu buaꞌuma, ebu inaraḡa adureo hagahaganiꞌuma.'#24:29 Isaia 13:10, 34:4; Joel 2:10

30Ebu haḡai nu badeḡaniꞌa adureo fureranadu eḡe, Vaze Ubuganiꞌa ovaeꞌeteꞌe ihoziꞌuma. Eꞌe horozine, raha ꞌahao habaꞌahabaꞌa azaḡa niduꞌa niau ḡouriꞌuma. Ebu eḡe, Vaze Ubuganiꞌa adureo ḡoze zamaḡano gigiꞌa zu agaḡa manoḡa madu ovaiꞌuma ebu vazevazeꞌa eꞌe horoniꞌuma. 31Ebu hena, suraꞌi boro ḡihau hudadu eḡeꞌa eḡe tuḡure viga tuḡuziꞌuma. Ebu zeḡeꞌa haba niduꞌa, haba ḡonaganonoꞌo haba ḡonagano, Badiꞌaꞌa ohotiroteꞌe azaḡa nuꞌoziꞌuma.

Figi Ireḡa Hari Idaidaḡa

(Mareko 13:28-31, Luka 21:29-33)

32Figi ireḡa mazao naginiꞌa fureruꞌeteꞌe ḡianadu ederoꞌi. Ezaganiꞌa butiru itadu rouḡaniꞌa udufaꞌoga horonetene irugu madaḡa haniteha rae edereꞌohe. 33Eꞌe teige, eꞌa rateꞌe ꞌahiguḡaniꞌa fureranoga horonoꞌidene, eḡe, Vaze Ubuganiꞌa bare ovaiteꞌe haniteha rae ederoꞌi. 34E hube hune ziꞌohe, izidi egaꞌe mene hauḡiꞌuma onamo ꞌahiguḡa niduꞌaniꞌa fureraꞌuma. 35Adure zu rahaꞌe hauḡiꞌuma, rehano eḡe ḡoereꞌe mene hauḡiꞌuma.

Ruhibe Radoꞌi

(Mareko 13:32-37, Luka 12:39-44, 1:26-30)

36Rehano naniꞌa ꞌahiguḡaniꞌa fureraꞌumaꞌe emeḡe niduꞌa aḡuꞌa. Adureo tuḡure viga ebu eḡe, Badiꞌa Ubuga zuni#24:36 Fare mirihoga nuꞌe, “Badiꞌa Ubuga zuni” mene raꞌohe. aḡuꞌa. U eḡe Mama daꞌo edeḡa. 37Eḡe, Vaze Ubuganiꞌa bare onaiꞌuma madaḡanoꞌe Noa madaḡa teigiꞌuma. 38Zobo boroꞌa izema zubuzoga madaḡano vazevazeꞌa radiunuteꞌe radoneḡano ogaunu, gaginu zu hahurinu onamo Noaꞌa ḡasi boro diuḡiro. 39Rehano zeꞌa naginiꞌa fureraꞌuma mene ederiro, onamo zobo boroꞌa zubuzadu hunuhune ḡouriro. Eḡe, Vaze Ubuganiꞌa bare onaine, eꞌe madaḡa teigiꞌuma. 40Eꞌe madaḡano vaze ꞌaheuꞌe mebao gaue radiuꞌeteꞌe zamaḡano, ꞌahogaꞌe zamahaꞌuma, u ꞌahogaꞌe mode iḡuniꞌuma. 41Roḡae ꞌaheuꞌe uvahu mirune radiꞌuꞌeteꞌe zamaḡano, ꞌahogaꞌe zamahaꞌuma, u ꞌahogaꞌe mode iḡuniꞌuma

42Eꞌanoꞌo fairu ḡianoꞌi, mazaḡa za aḡuꞌa noꞌe madaḡano zae Zuhiꞌa Boroꞌa onaiꞌuma. 43Zaꞌe ꞌadi zamaroꞌi. Ne vazeḡaniꞌa ḡonore vazeḡaꞌe noꞌe madaḡano ani ne onaiꞌuma rae ederine, aniꞌe neḡa faine taufiꞌuma ebu ḡonore vazeḡaꞌe diuḡoga mene idaraꞌuma. 44Eꞌanoꞌo zae zuni ruhibe radoꞌi, mazaḡa eḡe, Vaze Ubugaꞌe zaꞌa mene edereꞌeteꞌe madaḡano bare onaiꞌuma.

45Tuḡure vazeḡa ꞌahogaꞌe huhuzaḡa zu zama tibano gauine, zuhiꞌaḡaꞌe ani teite matuꞌiꞌuma. Ebu vaze aꞌe tuḡure azaḡa ḡihiꞌaḡa mae ohonadu ꞌahige reꞌuma, raenaꞌa, 'Tuḡure azaḡa niduꞌa taufoꞌi. Ogomuze zuni mada idunane zenoꞌi.' ꞌOugadu aniꞌe haba ꞌahoga onamiꞌuma. 46Tuḡure vazeḡaꞌe ꞌouge gauine, zuhiꞌaḡaniꞌa bare feuradu horoniꞌuma ebu ani matuadu manohuga haꞌuma. 47E hube hune ziꞌohe, aniꞌe zuhiꞌaḡaniꞌa ane tohe niduꞌa taufeꞌeteꞌe vazeḡano ohoniꞌuma. 48Rehano tuḡure vazeḡaꞌe sauꞌa reine, aneꞌa bare raenaꞌa, 'Eḡe zuhiꞌaꞌe vehuꞌu faḡanobuꞌu onaiꞌuma,' rae zamariꞌuma. 49Ebu tuḡureḡa azaḡa niduꞌa bouziꞌuma zu gagone azaḡa teite ufeta ogau gage sautaꞌuma. 50Ebu zuhiꞌaḡaꞌe, aneꞌa mene edereꞌeteꞌe zu mene zamareꞌeteꞌe madaḡano bare onaadu, 51ahiriḡa udi tahitahiꞌuma ebu zama guhi azaḡaniꞌa radiuꞌeteꞌe habaꞌano ohoniꞌuma. Eꞌea, ani niaꞌuma zu ḡonone atitiꞌuma.”

Currently Selected:

Mataio 24: KSJ

Highlight

Copy