Mataio 11

1Iesuꞌa ane tahiꞌa 12 ihoze hauḡirotene, deꞌeanoꞌo iḡunadu ne uhiḡauhiḡano ihozifine zu haramifine omamiro.

Iesu zu Ioane Babatiso

(Luka 7:18-35)

2Ioane Babatisoꞌa ḡuꞌa neḡano radiroteꞌe zamaḡano, Kerisoꞌa nagini haḡairoteꞌe hariḡa igiro. Ebu ani Iesu ḡadinoga veize tahiꞌaḡa tuḡuziro. 3Ebu ze Iesu mazao feurirotene ḡadiniro, raenaꞌa “Ioane Babatisoꞌa ꞌahige ḡadiꞌeꞌohe, 'Onaiꞌuma reiroteꞌe vazeḡaꞌe ḡahe ga eme vaze ꞌahoga guhiniꞌuma?'”

4Iesuꞌa naenaeziro, raenaꞌa, “Bare onamadu zaeꞌa egateꞌe zu horonateꞌe Ioane ihonoꞌi: 5Ubuma kuru azaḡaꞌe ehamuꞌohe, oda sauꞌa azaḡaꞌe ragaveꞌohe, lefera azaḡaꞌe manoreꞌohe, teḡaze uhuḡa azaḡaꞌe igiꞌohe zu rune azaḡaꞌe bare ḡabozeꞌohe. Ebu zahara azaḡa hari manoḡa haramoziniꞌohe. 6Eḡe mazao fieꞌetaꞌaꞌe mene modeꞌeteꞌe vazeḡaꞌe manohugaḡeta.

7Ioane tahiꞌaꞌa iḡunirotene, Iesuꞌa Ioane moneo vaze ḡuḡuvaḡa ziro, raenaꞌa, “Za vaze nagiḡa horonoga veize haba bohaꞌa onamiro? Zavaraꞌa Imi veḡa hudi naeninaeniꞌeteꞌe horonoga radu onamirohe? Mene. 8ꞌOugadu za vaze nagiḡa horonoga veize onamiro? Dabua manomano vidauꞌeteꞌe vazeḡahe? Mene. Dabua manomano vidauꞌeteꞌe azaḡaꞌe kini neo radiuꞌohe. 9ꞌOugadu vaze nagiḡa horonoga veize onamiro? Peroveta vazeḡahe? Oꞌe. E ziꞌohe, peroveta azaḡa niduꞌa vitizeꞌeteꞌe vazeḡaꞌe Ioane. 10Ioane moneo Buka Zaḡoḡano ꞌahige mirihiro, raenaꞌa,

'Ḡianoꞌi. Badiꞌaꞌa ḡae zamao vaze ꞌahoga ibite tuḡuniꞌuma.

Aniꞌe ḡae zamao ḡae ibi ruhibiꞌuma.' #11:10 Malaki 3:1

11E hube hune ziꞌohe, Ioaneꞌa Keriso ibi ruhibiroteꞌe uꞌano, aniꞌe rahao ꞌada radiuꞌeteꞌe vazeḡa boꞌaḡano vaze niduꞌa vitinoga. Rehano, Badiꞌaꞌa ibitoziniꞌeteꞌe zamaḡano ḡonaga vazeḡa zuni Ioane vitinoga raꞌohe. 12Ioane Babatisoꞌa haramiroteꞌe madaḡaonoꞌo onao izidi, Badiꞌaꞌa ibitoziniꞌeꞌetaꞌaꞌe riḡa harame onaeꞌohe. Ebu Badiꞌaꞌa ibitoziniꞌeteꞌe uratihi radu vazeꞌa gigau edauꞌenaꞌa, inareꞌohe. 13Ioane Babatisoꞌa izema onairoteꞌe madaḡano, peroveta azaḡa zu Mose goro ḡoeꞌaꞌe Badiꞌaꞌa ibitoziniꞌetaꞌaꞌe ihoziro. 14Ebu zae eḡeꞌa raꞌeteꞌe ḡoeꞌa mae ḡihinine, egoꞌi. Ioaneꞌe, vaze anoganiꞌa ariꞌuma rae reirotaꞌaꞌe, Elia heuḡa.#11:14 Malaki 4:5 15Teḡaḡeta vazeḡaꞌe faifaine egadu huga ederoꞌi.

16Izidi egaꞌe naginio idaziꞌuma? Zeꞌe tahiꞌa komeꞌakomeꞌaniꞌa ne hunio ehoradu araheꞌeteꞌe heuḡa. Ze rovonadu none tahiꞌaḡaniꞌa mone tahiꞌaḡa mazao harae huhuꞌuhiꞌohe, raenaꞌa,

17'Eme muio zavonoga radu suraꞌi hodeha, rehano za mene zavoneha.

Ebu eme rune habaꞌano niau ḡoinaheha, rehano za mene nianeha.'

18Ioane Babatisoꞌa onaadu ogomu mene audo zu vaini vuḡa mene gagido. ꞌOugadu za raenaꞌa, 'Ioaneꞌe vine sauꞌaḡeta.' 19U eḡe, Vaze Ubugaꞌe onaadu ogomu auꞌohe ebu vaini vuḡa gageꞌohe. Rehano za raenaꞌa, 'Aniꞌe ogomu fuꞌa zu vaini vuḡa fuꞌa. Ebu ani takesi azaḡa zu haḡai sauꞌa azaḡa teite tiburuꞌohe.' Rehano Badiꞌa hegoteꞌeteꞌe azaḡa huhuzaḡaꞌe eḡe zu Ioaneꞌe duduḡa rae reꞌuma.

Sauꞌanonoꞌo Mene Ḡihureꞌeteꞌe Habaꞌa

(Luka 10:13-15)

20Ebu Iesuꞌe aneꞌa haḡai gigiꞌaḡa ḡehaḡa haḡairoteꞌe habaꞌahabaꞌano roziro, mazaḡa zeꞌe sauꞌanonoꞌo mene ḡihuriro. 21Aniꞌa zinaꞌa, “Korasini azaḡa zu Betesaida azaḡa, za fase vetuḡaḡa, aduga boro hidiꞌuma. Zae mazao haḡai gigiꞌaḡa haḡainutaꞌaꞌe Turo zu Sidona#11:21 Turo zu Sidonaꞌe mene Iuda habaꞌa azaḡa mazao haḡaro reifone, zeꞌe sauꞌaonoꞌo garihe zamare ḡihurifo. Ze dabua ḡuꞌa vidau ehoradu vega vadinizeo rurubeꞌenaꞌa, zeḡeꞌa zamare ḡihurifo. 22E ziꞌohe, Badiꞌa kota madaḡano, zaꞌe Turo zu Sodoma azaḡa aduga vitine hidiꞌuma. 23Kaperanauma azaḡa, za Badiꞌa habaꞌao gubaziꞌuma rae zamareꞌehe? Mene! Zaꞌe rune habaꞌano mae feuziꞌuma. Zae mazao haḡairoteꞌe haḡai gigiꞌaḡa Sodoma azaḡa mazao haḡaifo reifone, zeꞌe sauꞌaꞌonoꞌo ḡihuradu izidi ize radiuꞌefo. 24Rehano e ziꞌohe, Badiꞌa kota madaḡano, zaꞌe Sodoma azaḡa aduga vitine hidiꞌuma.

Eḡe Vaḡe Aradu Ahio Ohonoꞌi

(Luka 10:21-22)

25Eꞌe madaḡano Iesuꞌa kuraro, raenaꞌa, “Mama, ḡaꞌe adure zu raha Zuhiꞌaḡa. E niguꞌeꞌohe, mazaḡa ḡaeꞌa huhuzaḡa zu edeḡa boro azaḡa mazao huga ꞌahi uꞌuꞌrutiro. Rehano tahiꞌa teige, edeḡa oꞌoꞌa rae zamareteꞌe azaḡa mazaoꞌe fureniro. 26Mama, a hube, ꞌouge haḡairotaꞌe ḡaeꞌa urateꞌeteꞌe ḡauḡa.”

27Ebu aniꞌa vaze ziro, raenaꞌa, “Eḡe Mamaꞌa ḡau niduꞌa eḡe iniro. Vaze ꞌahogaꞌe eꞌe aḡuꞌa, rehano eḡe Mama daꞌo edeḡa. Ebu vaze ꞌahogaꞌe eḡe Mama aḡuꞌa, rehano eḡe, Ane Ubuga daꞌo edeḡa. Ebu e eḡe Mama moneo ihozoga veize ohoteꞌeteꞌe azaḡa daꞌo eḡe Mama edeḡa. 28Taoḡa zu aduga odoheꞌetꞌe azaḡa, eḡe vaḡe aroꞌi, ꞌougine eḡeꞌa ahirize ohoniꞌuma. 29-30Eḡe ihorogaꞌe mene riḡa zu eꞌe hegotogaꞌe mene aduga. Eꞌanoꞌo eḡe ihore mae ḡihinadu eḡeꞌonoꞌo ederoꞌi. ꞌOugine vineze ohoniꞌuma, mazaḡa eꞌe namiḡa zu roḡeḡa.

Currently Selected:

Mataio 11: KSJ

Highlight

Copy