Genesis 13

Abram uthene Lot uthene-kenhe areye akalke-irremele alheke akerte

1-2Apmere Egypt-ngentyele, Abram itneke-akerte alpeke ayerrere-ikngerre apmere ahurratye Negev-werne. Re atnyeneke mane-arlke atningke, pweleke areye-arlke, kamule areye-arlke, merne akngerre-arlke, arne arrpenhe atningke-arlke. Kele Lot-eke-artweye areye inpe, ikwerenge apurte Negev-werne alherlte-iweke.

3-4Yanhe-ngentyele, itne ayerrere anteme alheke, apmere arrpe-anenhele inteke. Itne alpeke apmere arrkatye ikwere-werne apmere Bethel uthene Ai uthene mpwepele Abram-arle aneke arrekwele, rarle apwerte areye kwentye-kwentye-ileke YAHWEH-eke, ameke-ameke ikwere. Yanhe anthurreke Abram-ele YAHWEH utyernemele tnakeke.

5Alere atyeyikwe-ke Abram-kenhe Lot arritnye, re-inpe arne atningke atnyenetyarte, pweleke areye-arlke, yepe-yepe areye-arlke, urrkapentye akngerre atningke areye-arlke. Ratherre arne atningke anthurre atnyeneke. 6-7Apmere ikwerele, arrekwele anetyarte tyerrtye Canaan-arenye areye, arrpenhe areye-arlke, Perizzite areye, yanhe ikwerele itne-arlke apmere-ampinye ikwerele. Atherrke akweke ware anetyarte pweleke areyeke, arrpenhe areyele-arlke arlkwetyeke, kwatye akweke ware-arlke aneke. Alakenhe ikwerenge anteme, urrkapentye akngerre Abram-kenhe areye ante urrkapentye akngerre Lot-kenhe areye ahele angkerreke atherrkeke-arlke kwatyeke-arlke arrangkwenge. Itne uyarne apurte anetyarte apmere anyente ikwerele, atherrke-arlke kwatye-arlke akweke warenge. Alakenhe ikwerenge itne ahele angkerretyeke-irreke.

8Yanhenge anteme, Abram Lot-eke angkeke, “Anwerneke-artweye kwenhe anyente aneme, urrkapentye akngerre anwerne-kenhe ilterrerlenge ipmentyele aretyale. 9Apmere ahelhe kwenhe akngerre aneme anwerne ingkirrekeke. Apmere nhakwe araye ikngerre, antekerre, alturle, ayerrere uthene. Apmere ngkwenge akngakaye. Unte apeke alturle-werne alheme, ayenge ikngerre-werne-arle alhetyenhe.”

10-13Kele, Lot-ele apmere renhe areke. Re ahelhe akethe areke lhere anteke kwatye akngerre-akerte interlenge. Re areke arne akngerre atningke lhere iterele, lhere renhe-arle akenhe ileme Jordan, re antekerre-werne inteme apmere Zoar-werne-atheke. Apmere re mwerre akngerre nhenge Eden-arteke aneme nhenge YAHWEH-elarle mpwareke Adam uthene Eve utheneke, nhenge apmere arrpenhe Egypt-arlke-arteke. Kele Abram uthene Lot uthene akalke-irrerle-anerreke. Lot-ele apmere ahelhe akethe nhenge akngakeke lhere akngerre-akerte interlenge, antekerre-ikngerre-werne atheke aname-irreke apmere yanhele anetyeke, apmere nhenge Sodom itwele. Nhenhe renhe-arteke aneke, urreke Ngkartele apmere Sodom uthene Gomorrah uthene akethe ante arrernetyenhenge tyerrtye apmere yanhe atherre-arenye areye-arle akurne anthurre anerrirretyartenge. Kenhe Abram akenhe apmere Canaan-ele anetyarte.

14-15Ikwerenge-ntyele, Lot-arle kele alhekenge, YAHWEH Abram-eke angkeke, “Irntwarre anthurre araye apmere ayerrere-atheke, antekerre-atheke, ikngerre-atheke, alturle-atheke. The ngenhe antheme apmere ahelhe nhenhe ngkwenge akwerrke areye uthene ngkwenge-artweye areye-arlke. Kele apmere rarle ngkwenge-arle, ngkwenge-artweye areyeke-arlke akwete-ante anetyeke. 16Ngkwenge akwerrke areye atningke-irretyenhe yerre areye-arteke. Angwenhele ampe ngkwinhe areye alknge ikwerenhele anyente-ame-anyente aretyeke arrangkwe-arle, itne-arle atningke anthurre anerrirrerlenge. 17Unthetyeke alhaye apmere arrpe-anenhele, irntwarre antekerre-atheke, alturle-atheke, ayerrere-atheke, ikngerre-atheke. The apele ngenhe, ngkwenge-artweye areye-arlke apmere nhenhe ingkirreke anthetyenhe.”

18Kele, Abram alhetyeke-irreke alturle antekerre-atheke. Apmere arrpenhe atningkele re anetyarte. Re apetyeke apmere arrpenhe-werne apmere Hebron, yanhele anetyarte. Apmere Hebron ikwerele aneke arne ameke-ameke akngerre atningke. Arne nhenhe areye artwe Mamre-kenhe. Yanhe ikwere Abram-ele apwerte areye kwentye-kwentye-ileke YAHWEH-eke renhe utyernemele tnaketyeke.

Currently Selected:

Genesis 13: aer

Highlight

Copy