Akts 18

Faŋ Pɔɔl nə fɨ̀ꞌtə nu Nwi ntɨꞌ Kɔrint

1Pɔɔl kɨ nii ndɔ̀ fɨ ntɨꞌ Atens, shɔ̀ɔ gə Kɔrint. 2Faŋ ŋwə nə ziꞌ yifi, yè wuu Jus mɔ́ꞌ faŋ yizii yi luu Akwila. Vɨ nə bì ŋwə shɨ Pɔntɔs. Ŋwə nə bɨ kɨ jɨjwi fɨ shɨ Itali ghɔ zu wi Prisila, buꞌ faŋ fwàŋ Klɔɔdiɔs nə kɔ̀ sɔꞌ laa vɨɨ Jus vənshə fuu fɨ shɨ Rom, faŋ lùu nsi Itali. Pɔɔl nə gə ye vəŋ, 3kɨ nii gòꞌ ghɔ vɨ vəŋ, buꞌ laa vəfaꞌ vəvəŋ nə luu maa məba njwisə vəbèe, faŋ nə luu jɨɨ ŋkəə Pɔɔl nɨzi. Nɨniŋ, Pɔɔl shi taa ŋii vəŋ, ghɔ vɨ vəŋ faꞌ mɔ́ꞌ. 4Maa vəshi və zwisə və vɨɨ Jus, ŋwə gə taa ŋii məshɔꞌtə Nwi vɨɨ Jus, gi tɨ́ vɨɨ kɔ̀ŋ nu Nwi, faŋ vɨɨ Jus nə vɨɨ Griik nə luu shɔ. 5Yighee njyə faŋ Silas ghɔ Timoti nə ndɔ̀ fɨ shɨ Makedonia, bèꞌsə Pɔɔl, jwì Kɔrint, Pɔɔl faꞌ maa nu Nwi ŋkee nə wutə, fɨꞌtə̀ tɨ́ vɨɨ Jus laa Yeso lùu Kristo, wuu məbweysə vɨɨ, ŋgwə faŋ Nwi nə kɔ̀ꞌnə tɨ́ vɨɨ nə. 6Vəŋ nə shìasə yigi yi yɔ́, gì vənu vəbwəvə buꞌ ŋwə. Ŋwə kwitə butə fɨ maa njwisə si, maa shwenə tɨ́ vəŋ, ndɔ̀ gì laa, «Viŋ ndɔ nɨndi, buu kɨ yɨsə viŋ, kee luu nsɔꞌ nyaa me, zì ndwə mə taa gə maa vɨɨ mbɨə faŋ vəŋ kee lùu vɨɨ Jus me.» 7Ŋwə meꞌtə vəŋ, ndɔ̀ gə̀ taa ŋii wə mɔ́ꞌ faŋ ŋwə nəə bəŋsə Nwi, kee lùu wuu Jus me. Yizii wə ghɔ́ luu Titiɔs Justɔs. Ŋii yi nə luu sheꞌ yɨ ŋii məshɔꞌtə Nwi vɨɨ Jus nee. 8Luu nə, Krispɔs faŋ nə luu tɨɨ ŋii məshɔꞌtə Nwi vɨɨ Jus, nuŋ fwi yi maa tɨta Yeso ghɔ vɨ ŋii yi yinshə. Vɨɨ Kɔrint vəyaŋ faŋ vəŋ nə zɔ̀ yigisə Pɔɔl, nuŋ fwisə vəŋ maa Kristo nɨzi, fì muu mə Nwi. 9Vətuꞌ shi mɔ́ꞌ, tɨta Yeso jwi maa Pɔɔl taa njyəə, gì tɨ́ ŋwə laa, «Kɨ ghɔ fee nu me, kɨ gisə! Kɨ shitə shuu wə me, 10buꞌ laa mə luu yɨ ghɔ. Kaꞌ wə kee yɨ̀ nu maa ghɔ me, buꞌ laa vɨɨ vaŋ lùu vəyaŋ taa ntɨꞌ nyə̀.» 11Nɨniŋ, ŋwə shi shɔ ŋuꞌ ŋkwəŋ nə yiŋuu ntɔfə, deesə nu Nwi tɨ́ vɨɨ.

12Yighee njyə faŋ Galio nə bɨ jwì lùu goməna shɨ Akaya, vɨɨ Jus nə shə̀ŋtə, kà yighaw tɔ Pɔɔl, ndì ŋwə, gə̀ nə ŋwə taa ŋii nsɔꞌsə, 13gə gì laa, «Wə ŋwə̀ toꞌ dɔɔ vɨɨ laa vəŋ bəŋsə Nwi maa kəŋ jɨɨ yimɔ́ꞌ faŋ nyə kee yikuꞌnə maa nuŋsə shɨ me.» 14Pɔɔl nəə kəə ŋaꞌ shuu wi, goməna Galio gi tɨ́ vɨɨ Jus vɔ́ laa, «Nu kiŋ nii toꞌ lùu nu laa wə yɨ̀ nu bwə, buu mə bìŋ yigisə yiŋ. 15Luu nə, ŋkə luu sheꞌ ntay maa yigi yimɔ́ꞌ nə yizii yimɔ́ꞌ nə nuŋsə yiŋ, bàw laa shia sheꞌ viŋ ŋgɨɨ-viŋ, mə kee taa luu tɨɨ məshia nsɔꞌ maa kəŋ vənu vɔ́ me.» 16Nɨniŋ, ŋwə jɔŋ vəŋ, vəŋ fuu fɨ taa ŋii nsɔꞌ. 17Vɨɨ vənshə kɨ nii jìa Sɔsteniis, faŋ nə luu tɨɨ ŋii məshɔꞌtə Nwi vɨɨ Jus, sàŋ ŋwə shuu ŋii nsɔꞌsə. Luu nə, goməna Galio kee kwìa me.

Faŋ Pɔɔl nə bəŋ gə Antiɔk fɨ shɨ Siria

18Nu kɔ́ kɨ me, Pɔɔl baa shi yifi tày, baa kɨ nii kɔ̀ bwey-jəə tɨ́ vɨɨ məbiŋ nu Kristo, siꞌ gə̀ ntɨꞌ Keŋkria, kɔ̀ŋ tɔ ki, buꞌ laa ŋwə nə kɔ̀ꞌnə nu tɨ́ Nwi, ghɔ vɨ Prisila nə Akwila, kɨ nii ŋìi taa bay kwalə, tɔŋ gə njɨɨ Siria. 19Faŋ vəŋ nə ziꞌ shɨ Efesɔs, ŋìi taa ŋii məshɔꞌtə Nwi vɨɨ Jus, gi tɨ́ vɨɨ Jus, kɨ nii mèꞌtə Prisila ghɔ Akwila shɨ Efesɔs. 20Vəŋ buꞌ ghɔ tɨ́ ŋwə laa ghɔ vɨ vəŋ shi bètə, ŋwə kee biŋ me, 21gì tɨ́ vəŋ laa, «Nwi taa biŋ, mə ndɔ baa jwi.» Sheꞌ nɨniŋ, ŋwə baa kii ŋii taa bay, ndɔ̀ fɨ shɨ Efesɔs, 22gə̀ ŋii ntɨꞌ Sisaria, fùu fɨ taa bay, toꞌ gə̀ ziꞌ ntɨꞌ Jerusalem, gə̀ shɔ̀ꞌtə məshəŋtə vɨɨ məbiŋ nu Kristo, baa kɨ nii bə̀ŋ gə̀ ntɨꞌ Antiɔk (fɨ shɨ Siria).

Ghuu yitoꞌ Pɔɔl beꞌsə ghee tia

Faŋ Apɔlɔs nə dèesə nu Nwi shɨ Efesɔs nə shɨ Akaya

23Pɔɔl nə shì Antiɔk vəshi vəmɔ́ꞌ, baa kii ndɔ fɨ fuŋ, gə̀ tòꞌ fɨ kwiŋ Galatia nə Frigia, toꞌ gisə tɨ́ vɨɨ məbiŋ nu Kristo, yɨsə vəŋ weꞌ maa nu Nwi.

24Maa yighee yɔ́ wuu Jus mɔ́ꞌ nə luu shɔ faŋ yizii yi luu Apɔlɔs, faŋ vɨ nə bi ŋwə ntɨꞌ Alesandria (fɨ shɨ Ijip). Wə ghɔ́ jwi shɨ Efesɔs, faŋ ŋwə nə luu wuu yigisə yijəənə baa lùu yineꞌtə, baa wèꞌ maa ŋwaꞌlə Nwi. 25Vɨ nə duꞌtə vɨ tɨ ŋwə nə jɨɨ tɨta Yeso. Zwitə Ley Nwi lwaŋ taa fwi ŋwə, ŋwə gisə baa deesə vənu və Yeso ŋkee vəloomə, faŋ ŋwə nə kɔlə kɨ̀ɨ nə nu məfi muu mə Nwi sheꞌ maa jɨɨ Jɔn. 26Ŋwə tey kɨ gisə taa ŋii məshɔꞌtə Nwi vɨɨ Jus nə fwi yiweꞌ. Prisila ghɔ Akwila zɔ yigisə yi, tii ŋwə taa ŋii vəŋ, baa twèlə nu tɨta Yeso tɨ́ ŋwə ŋkee jəə.

27Shi mɔ́ꞌ Apɔlɔs nə kəə gə shɨ Akaya. Vɨɨ məbiŋ nu Kristo fɨ shɨ Efesɔs nyɔꞌ ŋwaꞌlə tɨ́ vaŋ-nshwi vəŋ fɨ shɨ Akaya laa vəŋ jia Apɔlɔs ŋkee jəə. Nɨniŋ, ŋwə gə nə ŋwaꞌlə ghɔ́, gə̀ ziꞌ Akaya. Faŋ ŋwə nə luu yifi, gaŋtə vɨɨ məbiŋ nu Kristo ŋkee jəə nə wutə ki kɔ́, faŋ Nwi nə key ŋwə shɔ nə. 28Ŋwə nə ghɔ̀ꞌ vɨɨ Jus ntee, faŋ ŋwə nə twèlə fɨ taa ŋwaꞌlə Nwi ŋkee ley, laa Yeso lùu Kristo, wuu məbweysə vɨɨ, ŋgwə faŋ Nwi nə kɔ̀ꞌnə nə.

Currently Selected:

Akts 18: bav

Highlight

Copy