Marcos 14

Judío itenondewa reta uyemboemboe uyukaka waerä Jesús

(Mateo 26.1-5; Lucas 22.1-2; Juan 11.45-53)

1Mokui araño ma uata iko uwäe waerä pascua ara jare uyembɨpɨ waerä yemɨmandúa mbɨyape levadura mbae pewa jei chupe reta wae. Jare sacerdote itenondewa reta jare Moisés uikuatía wae re oporomboe wae reta ueka yureko kërái ipuere waerä uipɨsɨka tawɨ rupi Jesús uyukaka reta waerä. 2Jei reta iyupe: “Erëi awɨye yaipɨsɨka kua pascua ara rupi, awɨye waerä tëta wasu pewa reta uyembopochɨ yandekotɨ,” jei reta iyupe.

Pëti kuña upɨyere mbae utimbo kawi wae Jesús re

(Mateo 26.6-13; Juan 12.1-8)

3Ime iko tëta wasu raɨ Betania pe pëti kuimbae Simón jee wae tenonde yawe ipire okuise wae. Kua kuimbae uparea Jesús jare jemimboe reta pe yuweru ukaru waerä jae jëta pe.

Jayawe ukaru yureko reta rambuewe, uike ou pëti kuña mbae jɨru raɨ rewe. Jokua mbae jɨru raɨ tɨnee oï mbae utimbo kawi wae, jepɨete wae ko, nardo jee wae. Jayawe kuña oyoka mbae jɨru raɨ jare opa upɨyere mbae utimbo kawi wae Jesús iñäka re.

4Jare amokue joko pe ñonoï wae reta iarasɨ jokua re. Jei reta iyupe: “¿Maera pa opa upɨyere iyuwi kua mbae utimbo kawi wae? 5Jokua jepɨ ko mbapɨ chiëto ara uasa mii mbarawɨkɨ. Jae ipuereta tëi owaka, jare jokua korepoti pɨpe omborɨta tëi iparawete wae reta,” jei reta. Jayawe uñeengata reta kuña pe.

6Jayawe Jesús jei chupe reta: “Awɨye mbae pere chupe,” jei. “Pemaeño jese, echa’ä jae uyapo ma mbae ikawi wae chemaerä,” jei. 7“Iparawete wae reta jekuaeñota yureko pepɨte rupi, jare pepuere pemborɨ ipotawe ara rupi. Erëi che ndarau aiko jekuaeño pepɨte pe kuärái,” jei chupe reta.

8“Kua kuña upɨyere ma cheré kua mbae utimbo kawi wae, jare jukuärái uyapo ma chemaerä jae ipuere wae rupi. Añawe uyapɨkatu ma cherete teöwerenda pewarä ndei amano mbowe,”#14.8 Judío reta jeko pe kía umano yawe, uipichɨ reta jetekue re mbae utimbo kawi wae ndei oñotɨ reta mbowe. jei. 9“Che tae pewe añetete wae, opaete ɨwɨ rupi Tumpa iñee ikawi wae uyemɨmbeu wae rupi, uyemɨmbeuta wi kua kuña uyapo wae ïru wae reta imandúa waerä jese,” jei Jesús chupe reta.

Judas ipɨayemɨngeta umee waerä Jesús jowaicho reta pe

(Mateo 26.14-16; Lucas 22.3-6)

10Jayawe pëti Jesús jemimboe doce wae wi, Judas Iscariote jee wae, oë wɨari oo sacerdote itenondewa reta ñonoï wae pe. Echa’ä Judas uipota uyemɨngeta jae reta ndiwe uikuaa waerä kërái rupi ipuere omborɨ uipɨsɨ reta waerä Jesús. 11Jayawe jae reta uyandu yawe mbae Judas jei wae re, uyerowia reta, jare upɨta reta umee waerä korepoti Judas pe. Jayawe Judas umbɨpɨ ueka kërái ipuere waerä umee chupe reta Jesús.

Jesús jou tembiu pascua pewa

(Mateo 26.17-30; Lucas 22.7-23; Juan 13.21-30)

12Jayawe uwäe ara tenondewa yemɨmandúa mbɨyape levadura mbae pewa jei chupe reta wae. Jare jokua ara judío reta uyukañoi owecha pascua pewa. Jayawe Jesús jemimboe reta upɨrandu chupe: “¿Kiape pa ndipota nduyapo waerä yandewe tembiu pascua pewa?” jei reta chupe.

13Jayawe Jesús omondo mokui jemimboe reta tëta wasu Jerusalén pe, jare jei chupe reta: “Peo pewäe tëta wasu pe yawe, pëti kuimbae ɨ wɨraa oï wae outa perowäiti oï kuri,” jei chupe reta. “Peota jaɨkue jae oo uwäe tëta pe rewa. 14Joko pe pereta tëta iya pe: ‘Oporomboe wae upɨrandu oï kiape ra ime oï o jae jou waerä tembiu pascua pewa jemimboe reta ndiwe,’ pere chupe,” jei. 15“Jayawe tëta iya uechakata oï pewe pëti o tuicha wae jae joo ɨwate oï wae, opaete mbaembae yaiporuta ñaï wae rewe. Jare joko pe piyapɨkatuta yandewe yakaru waerä kuri,” jei Jesús chupe reta.

16Jayawe Jesús jemimboe reta yuraa uwäe yawe tëta wasu pe, uyeyapo opaete Jesús jei chupe reta wae rupi etei. Jare uyapo reta tembiu pascua pewa joko pe.

17Jare pɨ̈tu ma oï yawe, Jesús ou uwäe jokua doce jemimboe reta ndiwe. 18Jare ukaru yureko reta rambuewe mesa pe, Jesús jei chupe reta: “Che tae pewe añetete wae, pëti yandepɨte pe ukaru oï yande ndiwe wae chemeeta oï cherowaicho reta pe,” jei chupe reta.

19Jayawe jokua uyandu reta yawe, Jesús jemimboe reta ipɨatɨtɨ. Jare pëti pëti wae umbɨpɨ upɨrandu chupe: “¿Che ra ko jae?” jei reta.

20Jare Jesús jei chupe reta: “Pëti pepɨte pe oï wae ko jae. Mbɨyape che ndiwe umäkɨ oï karúa pe wae ko jae,” jei chupe reta. 21“Che kuimbaerä ayeyapo wae amano ñotái ko kërái Tumpa iñeerɨru pe uyekuatía oï cheré wae rami. Erëi jokua kuimbae chemeeta oï wae uiporaraeteta ko. Ikawi tëi ko jokua kuimbae awɨye etei oa waerä ichɨ wi,” jei chupe reta.

22Jare ndei opa ukaru reta mbowe, Jesús uipɨsɨ mbɨyape jare umee yasurupái Tumpa pe jese. Joko wi upɨsäa jare umee jemimboe reta pe, jare jei chupe reta umbɨjaanga rewe: “Pipɨsɨ peu. Kua mbɨyape ko jae cherete,” jei chupe reta.

23Jayawe Jesús uipɨsɨ wi copa, jare umee wi yasurupái jese, jare umee jemimboe reta pe. Jare opaete jae reta jou jokua copa wi. 24Jare Jesús jei wi chupe reta umbɨjaanga rewe: “Kua ko jae cheruwɨ uyepɨyereta oï wae. Kua cheruwɨ pɨpe Tumpa uyapo oï pëti yemɨngeta ipɨau wae jeta wae reta pewarä,” jei chupe reta. 25“Che tae pewe añetete wae, ndarau ye ma che jau uva tɨkue Tumpa oï rewa opaete wae imburuwicha wasurä jaeño mái pewa. Jokua ara ramo jau yeta aï kuri,” jei chupe reta.

26Jare opa ma ukaru reta yawe, ukäta reta pëti himno Tumpa pe. Jare joko wi oë yuraa reta ñaipe Olivorenda jee wae kotɨ.

Jesús umɨmbeu Pedro pe uikuakuta oï wae

(Mateo 26.31-35; Lucas 22.31-34; Juan 13.36-38)

27Jayawe yuraa yureko reta rambuewe, Jesús jei chupe reta: “Tumpa iñeerɨru pe uyekuatía oï kuärái: ‘Ayukata owecha reta iyandarekoa, jare owecha reta opata uñemɨái.’#Zacarías 13.7 Jukuärái uyekuatía oï cheré. Jare kua pɨ̈tu woi jokua uyeyapota oï, echa’ä pe reta opata chereya peï,” jei chupe reta.

28“Che amano ñotái aï. Erëitu Tumpa chembɨjekowe yeta chereru umanokue wae reta ipɨte wi. Jare aikowe ye ma yawe, che rani ata pewi ɨwɨ Galilea pe,” jei chupe reta.

29Jayawe Pedro jei Jesús pe: “Yepe tëi opaetei ïru wae reta ndereyata, erëi che ndarau etei ndueya,” jei chupe.

30Jayawe Jesús jei chupe: “Che tae ndewe añetete wae, kua pɨ̈tu woi, ndei mokui wese uru kuimbae uñee mbowe, mbapɨ wese ma nde chekuakuta neï kuri,” jei chupe.

31Erëitu Pedro jeiete jei chupe: “Yepe tëi aramoi amanota nde ndiwe, erëi che ndarau etei ndukuaku,” jei chupe. Jare jukuärái wi jei tëi opaete Jesús jemimboe reta.

Jesús oo Getsemaní pe uyerure waerä

(Mateo 26.36-46; Lucas 22.39-46)

32Jayawe yuraa uwäe reta temitɨ reta jenda Getsemaní jee wae pe. Jare Jesús jei jemimboe reta pe: “Pewapɨ kua pe che a ayerure rambuewe Tumpa pe,” jei chupe reta.

33Jayawe joko wi Jesús wɨraa Pedro, Jacobo, jare Juan ïru wae reta wi kutɨ katu mii. Jare jae umbɨpɨ ipɨatɨtɨ ikuasɨ katu rewe. 34Jare jei jokua mbapɨ jemimboe reta pe: “Tuicha rupi chepɨatɨtɨ aï jare amano pota echa. Pepɨta mii kua pe, jare awɨye peke wi,” jei chupe reta.

35Jayawe Jesús usɨrɨ katu chuwi reta, jare uñeñono ipɨtía re ɨwɨ re. Jae uipota tëi uasa waerä chuwi jokua uiporaraeteta iko wae ipuere yawe. Jáeramo uyerure Tu pe kuärái: 36“CheRu mii, nde ndepuere ndiyapo opaete mbaembae. Embɨasa mii chewi kua aiporarata aï wae. Erëi awɨye tuyeyapo che jae waeño. Tuyeyapo chewe nde ndere wae,” jei.

37Joko wi Jesús ou ye jokua mbapɨ jemimboe reta ñonoï wae pe, jare uecha oke ñonoï reta. Jayawe jei Simón Pedro pe: “Simón, ¿ndeke yerá neï? ¿Ndepuere’ä yerá pëti orawe yepe ndeke mbae neï?” jei chupe. 38Jare jei wi jemimboe reta pe: “Awɨye peke. Piyerure Tumpa pe, echa’ä jarei katu mii imeta penoi kɨrëɨ chererɨ̈ro waerä. Jayawe piyerure Tumpa pe jokua re awɨye waerä piñemɨamɨrika jokua kɨrëɨ pe. Echa’ä pepɨa pe peratangätu ko tëi, erëi perete ipɨräta’ä,” jei chupe reta.

39Jayawe Jesús usɨrɨ ye chuwi reta, jare oo uyerure ye Tu pe kërái tenonde uyerure wae rami. 40Jare joko wi jekuae ou ye jemimboe reta ñonoï wae pe. Jare uecha oke ñonoï reta ye, echa’ä topeɨ opa umɨamɨri reta ramo. Jare jae reta uikuaa’ä mbae jei waerä Jesús pe.

41Jayawe Jesús usɨrɨ ye chuwi reta mbapɨ wesea ma. Jare ou ye yawe, jei chupe reta: “¿Jekuaeño yerá peke jare peputuu peï?” jei chupe reta. “Jokuaño ma. Uwäe ma ora. Che kuimbaerä ayeyapo wae, pëti wae chemee oï jeko kachi wae reta ipo pe,” jei. 42“Pepüa. Mase, chemee wae ko uwäe ma ou. Ya ñawäiti,” jei chupe reta.

Jesús jowaicho reta yuweru uipɨsɨ

(Mateo 26.47-56; Lucas 22.47-53; Juan 18.2-11)

43Jare Jesús uyemɨngeta iko rambuewe, ou uwäe Judas. Jae ko Jesús jemimboe doce wae wi pëti. Jare yuweru wi jae ndiwe jeta wae reta mburuwicha reta ombou wae ikɨsepuku rewe jare iɨwɨra rewe uipɨsɨ reta waerä Jesús. Jokua oporombou wae reta ko jae sacerdote itenondewa reta, jare Moisés uikuatía wae re oporomboe wae reta, jare judío itenondewa reta.

44Judas umɨmbeu kawi ma yepe jokua ïru kuimbae reta pe kërái jae reta ipuere waerä uikuaa kía nunga ra ko jae Jesús wae. Jei chupe reta: “Jokua jowa pe ayurupɨteta aï wae ko jae. Pipɨsɨ kawi jare peraa,” jei chupe reta.

45Jayawe Judas ou uwäe yawe, ou woi jei Jesús pe: “Oporomboe wae,” jei chupe. Jayawe uyurupɨte jowa pe. 46Jare jupiwoiño jokua ïru kuimbae reta uipɨsɨ Jesús. 47Jare pëti wae Jesús ndiwe iko wae ueki ikɨsepuku jɨru wi, jare uiporu sacerdote tenondewaete pe uyeyokui wae re, jare uyasɨa chuwi inambi.

48Jayawe Jesús jei yuweru wae reta pe: “¿Maera pa peyu kɨsepuku rewe jare ɨwɨra rewe chepɨsɨ waerä? ¿Jae yerá che imonda jeko kachi wae?” jei chupe reta. 49“Opa ara rupi che aporomboe aiko pepɨte rupi tupao wasu joka pe. ¿Maera pa joko pe chepɨsɨ'ä?” jei. “Erëi kua mbaembae uyeyapo ñotái ko kërái Tumpa iñeerɨru pe uyekuatía oï wae rupi,” jei chupe reta.

50Jayawe opaete Jesús jemimboe reta ueya jare opa osi reta.

51Erëi imeño pëti kunumi taurusu wae uñepëwa oï pëti ñepëwaka pe. Jae oo iko Jesús jaɨkue rupi. Jare amokue joko pe ñonoï wae reta uipɨsɨ tëi. 52Erëi jae reta uipɨsɨ ñepëwaka pe yawe, taurusu wae omboi jare ueya kuimbae reta ipo pe. Jayawe oë osi nani etei joko wi.

Jesús uyemboɨ judío imburuwicha reta jowai

(Mateo 26.57-68; Lucas 22.54-55,63-71; Juan 18.12-14,19-24)

53Jayawe wɨraa reta Jesús sacerdote tenondewaete jëta pe. Joko pe uyembatɨ opaete sacerdote itenondewa reta, Moisés uikuatía wae re oporomboe wae reta, jare judío itenondewa reta. 54Jare Jesús wɨraa rambuewe, Pedro uyerowa oo ye jaɨkue. Erëitu mbɨrɨ katu mii upɨta chuwi. Jare uike oo sacerdote tenondewaete joka pe, jare oo uwapɨ sɨndaro tupao wasu iyandarekoa reta uyepee ñonoï wae pe.

55Jayawe sacerdote itenondewa reta jare opaete ïru mburuwicha reta ueka yureko kërái uñeapo waerä Jesús re uyukaka reta waerä. Erëi ipuere’ä uwäe reta teko jese. 56Yepe tëi jeta wae reta umbɨjeko iyapu rewe, erëi uyemɨngeta’ä reta oyowake pëti ramiño.

57Jare amokue wae reta upüa jare umbɨjeko tëi iyapu rewe kuärái: 58“Ore nduyandu kua pochɨ jei, ‘Kua tupao wasu kuimbae retaño uyapo wae, che opata arukachi aï. Erëi mbapɨ ara rupi che amupüa yeta ambɨe tupao wasu kuimbae reta’ä uyapo wae,’ jei,” jei reta. 59Erëi yepe tëi jukuärái jei reta, jesewe mbaetɨ oyowake uyemɨngeta reta umbɨjeko reta waerä Jesús.

60Jayawe sacerdote tenondewaete upüa uyemboɨ uyembatɨ wae reta jowai, jare upɨrandu Jesús pe: “¿Maera pa niñee nemoë'ä? ¿Maera pa nde ndere’ä mbae jae reta jei ndekotɨ wae re?” jei chupe.

61Erëi Jesús kïiño. Jei’ä mbae awe. Jayawe sacerdote tenondewaete upɨrandu ye chupe: “¿Nde pa ko jae Cristo yae chupe wae? ¿Nde pa ko jae Tumpa yambutuicha wae Taɨ?” jei chupe.

62“Jae ko che,” jei Jesús chupe. “Jare che kuimbaerä ayeyapo wae, pe reta etei cherechata peï kuri Tumpa opaetei mbaepuere onoi wae iyakata kotɨ. Jare cherechata wi ayu ye yawe ara wi amapɨ̈tu re,” jei chupe.

63Jayawe jokua uyandu yawe, sacerdote tenondewaete pochɨ pɨpei omondoro iyuwi jemimonde. Jare jei ïru mburuwicha reta pe: “¿Maera ye pa yaekata ïru wae reta uñeapo waerä jese? 64Mase, pe reta etei piyandu ma kërái jae jei iyupe tëi Tumpa ko. ¿Mbae pa pere añawe? ¿Ime ra teko onoi, ani mbaetɨ ra?” jei chupe reta.

Jayawe opaete jae reta jei: “Ime onoi teko. Jupi ko umano waerä,” jei reta.

65Jare amokue wae reta umbɨpɨ undɨwɨ Jesús re. Jare uesañoma reta jare okua reta jese jei rewe: “Yaecha Tumpa tuikuaaka ndewe kía ra okua oï nderé wae,” jei reta chupe. Jare sɨndaro tupao wasu iyandarekoa reta wi okua jese.

Pedro uikuaku Jesús

(Mateo 26.69-75; Lucas 22.56-62; Juan 18.15-18,25-29)

66Jayawe Pedro jekuaeño oka pe oï rambuewe, ou pëti kuñatái sacerdote tenondewaete pe uyeyokui wae. 67Jare uecha Pedro uyepee oï. Jayawe kuñatái umae ngatu jese jare jei chupe: “Nde ndiko wi jokua Jesús Nazaret pewa ndiwe,” jei chupe.

68Erëi Pedro uikuaku jei rewe: “Aikuaa’ä jokua kuimbae, jare aikuaa’ä mbae re ra ndiyemɨngeta neï wae,” jei chupe. Jayawe Pedro upüa oo oka jöke kotɨ. Jare uru kuimbae uñee.

69Jayawe kuñatái uecha ye, jare jei joko pe ñonoï wae reta pe: “Kua kuimbae, jae ko jokua Jesús ïru,” jei chupe reta. 70Erëi Pedro uikuaku ye.

Jare ndei ɨma mbowe amokue joko pe ñonoï wae reta jei ye Pedro pe: “Añetete nde wi ko jae Jesús ndiwe ndiko wae, echa’ä nde ko wi Galilea pewa,” jei reta chupe.

71Jayawe Pedro jei chupe reta: “Che tae pewe Tumpa jowake, ¡aikuaa’ä etei jokua kuimbae piyemɨngeta peï jese wae! Jare Tumpa tuiporaraka chewe kua che jae wae añetete’ä yawe,” jei chupe reta.

72Jayawe jawoi pewa uru kuimbae uñee ye. Jare Pedro imandúa Jesús jei chupe wae re: “Ndei mokui wese uru kuimbae uñee mbowe, mbapɨ wese ma nde chekuakuta neï kuri,” jei chupe. Jayawe Pedro umbɨpɨ uyao parawete.

Currently Selected:

Marcos 14: gnwPB

Highlight

Copy