Lucas 2

Jesús oa tëta wasu raɨ Belén pe

(Mateo 1.18-25)

1Jokua ara reta rupi romano reta imburuwicha wasu Augusto jee wae oyokui opaete wae uyepapaka reta waerä. Kua uyeyapota iko opaete ɨwɨ kiape jae uyembɨiya jese wae rupi. 2Kua tenondewa yepapa uyeyapo Cirenio iko yawe ɨwɨ Siria pewa reta imburuwicharä. 3Jayawe opaete wae yuraa jëta jëtái rupi uyepapaka reta waerä.

4Jare jukuärái uyapo José wi. Jae oë oo Nazaret wi – jokua tëta wasu oï ɨwɨ Galilea pe. Jare oo ɨwɨ Judea kotɨ tëta wasu raɨ Belén pe, echa’ä jae ko David iñemoñaa pewa ramo, jare David jëta wasu raɨ ko jae Belén. 5Jáeramo José oo Belén pe uyepapaka waerä, jare wɨraa wi jembirekorä wae María. Jare María ipurúa wasu oï.

6Jare Belén pe ñonoï reta rambuewe, uwäe ara María imembɨ oa waerä. 7Erëi mbaetɨ chupe reta o ipotawe tëta pe. Jáeramo María imembɨrɨpɨ kuimbae mii oa pëti o mbaemɨmba reta jokai japɨpe oï wae pe. Jare María oñoma imembɨ mii ñomaka reta pe jare umbɨyapakua mbaemɨmba reta ikaruarɨru pe.

Araɨwa reta uyekuaa owecha iyandarekoa reta pe

8Jare jokua pɨ̈tu etei amokue owecha iyandarekoa reta uyandareko ñonoï iowecha reta re koiño Belén wi. 9Jayawe aramoiño uyekuaa chupe reta pëti araɨwa Tumpa ombou wae. Jare Tumpa imbaepuere jupiete wae uyekuaa chupe reta pëti tembipe uwerasɨ wae rami jare umbɨembipe chupe reta. Jáeramo jae reta opa ukɨyete upɨta.

10Jayawe araɨwa jei chupe reta: “Awɨye pekɨye,” jei. “Mase, amɨmbeuta pewe pëti ñee ikawiete wae, yerowia wasu pewa ko. Kua ñee opaete wae pewarä ko. 11Echa’ä kua pɨ̈tu etei oa ma Upuruepɨ wae David jëta wasu pe. Jae ko yandeYa etei jare Cristo pere chupe wae,” jei. 12“Jare pikuaata kuärái: pewäeta sambiaɨ mii uñeñoma oï ñomaka reta pe jare uyapakua oï pëti mbaemɨmba reta ikaruarɨru pe,” jei araɨwa chupe reta.

13Jare jupiwoiño uyekuaa jae ndiwe jetaete ye araɨwa reta. Jare opaete jae reta umbutuicha Tumpa jee jei rewe: 14“¡Tuyembutuichaka Tumpa ara pe oï wae jee! Jare tipɨakatu ɨwɨ pewa reta Tumpa ipɨakawi chupe reta wae,” jei araɨwa reta.

15Jare opa ma umɨngeta reta yawe, araɨwa reta opa ye yuraa chuwi reta ara pe. Jayawe owecha iyandarekoa reta jei iyupe: “Ya jayawe Belén pe yaikuaa waerä kua mbae uasa oï wae, Tumpa uikuaaka ma yandewe wae,” jei reta.

16Jayawe jawoi pewa opa yuraa reta Belén kotɨ. Jare yuraa ma uwäe reta yawe, uwäe chupe reta María jare José, jare sambiaɨ mii. Jokua sambiaɨ mii uyapakua oï mbaemɨmba reta ikaruarɨru pe. 17Jare uecha reta ma yawe, opa ye yuraa reta umɨmbeu waerä ïru wae reta pe araɨwa jei chupe reta sambiaɨ mii rewa wae. 18Jare opaete uyandu wae reta ipɨakañɨ owecha iyandarekoa reta umɨmbeu chupe reta wae re. 19Erëi María upi ipɨa pe opaete kua mbaembae jare jukuärái iñakañɨ'ä chuwi reta.

20Jare owecha iyandarekoa reta opa ye yuraa Belén wi Tumpa jee umbutuicha rewe opaete uyandu jare uecha reta wae re. Echa’ä jae reta uecha ma sambiaɨ mii kërái araɨwa jei chupe reta rami etei.

José jare María wɨraa Jesús tupao wasu pe

21Jayawe sambiaɨ mii juri ara ma onoi yawe, ichɨ jare tu umbɨcircuncidaka. Jare umbɨjee reta Jesús, echa’ä jukuärái araɨwa umɨmbeu María pe umbɨjee waerä ndei María ipurúa mbowe.

22-24Moisés arakae uikuatía kuärái: Pëti kuña imembɨ oa yawe, jare jokua imembɨ kuimbae mii yawe, kuña ipuere’ä oo tupao wasu pe cuarenta ara rupi. Jare cuarenta ara uasa ma yawe, imeta ko wɨraa mokui pɨkasu taurusu wae Jerusalén pe umee waerä Tumpa pe jokua tupao wasu pe. Jayawe ramo kuña ikɨa’ä ma oï Tumpa kotɨ, jare joko wi ramo ipuere umbutuicha ye Tumpa jee tupao wasu pe. Jukuärái uyekuatía oï Tumpa iñeerɨru pe.#Levítico 12.8

Jayawe cuarenta ara ma Jesús oa wae uasa yawe, José jare María uyapo kua Tumpa jei wae rupi. Opa yuraa reta tupao wasu pe. Jare joko pe ñonoï reta rambuewe, oñono tee reta Jesús Tumpa pewarä. Echa’ä Tumpa iñeerɨru pe jei kuña imembɨrɨpɨ kuimbae mii oa yawe, jokua sambiaɨ uñeñono teeta ko Tumpa pewarä.#Éxodo 13.2

25Jare iko Jerusalén pe pëti kuimbae Simeón jee wae. Jae jupi jare uyeyokui kawi Tumpa pe. Jae uäro iko ikɨrëɨ rewe Tumpa umbɨpɨakatu waerä Israel iñemoñaa reta. Jare Espíritu Santo iko jese. 26Jare Espíritu Santo uikuaaka ma chupe jae umanota’ä iko ndei uecha mbowe Cristo Tumpa ombouta iko wae.

27Jayawe jokua ara Espíritu Santo uikuaaka ma yepe Simeón pe oo waerä uike tupao wasu joka pe. Jare joko pe oï rambuewe, uecha María jare José ueru ñonoï Jesús tupao wasu kotɨ uyapo reta waerä Moisés arakae uikuatía wae rupi. 28Jayawe Simeón oo owäiti. Jare owoɨ Jesús jare umbutuicha Tumpa jee jei rewe:

29“CheYa mii, añawe ramo chepuereta amano chepɨawiwe rewe.

Echa’ä añawe ndiyapo ma nde ndere chewe wae.

30Añawe aecha ma kua nde nembou orerepɨ waerä wae.

31Kua ndiyapo ma opaete wae reta jowake.

32Jae ikota pëti tembipe rami judío mbae wae reta#2.32 Judío mbae wae reta jae’ä ko Israel iñemoñaa reta. pe, echa’ä jae ndekuaakata oï chupe reta.

Jare jae orembutuichata oï, ore Israel pewa nduiko wae reta, echa’ä ore ko jae nde oreparawo wae reta.”

Jukuärái jei Simeón.

33Jesús ichɨ jare José ipɨakañɨ upɨta kua Simeón jei sambiaɨ re wae. 34Jayawe Simeón jei chupe reta: “Tumpa tuyapo ikawi wae pewe,” jei chupe reta. Jare joko wi jei María pe: “Mase, Tumpa ombou kua nemembɨ yanembɨyao tee waerä yandeyuwi, yande Israel pewa yaiko wae reta. Echa’ä jeta wae reta wɨrɨ̈rota kua nemembɨ, jare jokua jeko pewa Tumpa umɨmichikata oï reta. Erëi ïru wae reta wɨrowiata jese, jare Tumpa umbutuichata oï reta,” jei. “Kua nemembɨ uyekuaakata oï Israel pewa reta pe kía ko jae wae mbaembae uyapota oï wae rupi. Erëi jeta wae reta wɨrɨ̈rota, 35jare jukuärái ikatu pe etei uyekuaata ipɨayemɨngeta reta. Jare nde ndepɨatɨtɨta neï kuri nemembɨ re uiporara wae re, jare ndikuasɨ katuta neï kuri jese.” Jukuärái jei Simeón María pe.

36Jare oï wi joko pe pëti kuña Ana jee wae. Jae ko ñee Tumpa wi etei ou wae umɨmbeu wae. Jae ko Fanuel tayɨ, jare Aser iñemoñaa pewa ko. Kua kuña ukuakuaaete ma parawete. Jaeño yureko ime ndiwe chiu año. 37Jare ime umano chuwi wiwe wɨreko yewɨ ochenta y cuatro año ime mbae. Añawe jae usɨrɨ'ä tupao wasu joka wi. Jare oñono teeñoi ara reta ukaru mbae waerä, jukuärái umbutuicha waerä Tumpa jee. Jare uyerureñoi Tumpa pe ara rupi jare pɨ̈tu rupi. Jukuärái Ana uyeyokui Tumpa pe.

38Jayawe jokua ara jae wi oo oya María jare José re. Jare umee yasurupái Tumpa pe Jesús re. Jokua ara reta rupi jeta Jerusalén pewa reta uäro yureko Tumpa uepɨ reta waerä. Jayawe joko wiwe Ana imiäri Jesús rewa chupe reta.

39Jayawe José jare María opa uyapo reta yawe tupao wasu pe Tumpa iñeerɨru pe jei wae rupi, opa ye yuraa reta jëta wasu Nazaret kotɨ ɨwɨ Galilea pe. 40Jare sambiaɨ tuicha oo oo, jare ipɨräta, jare iyarakuaa katu wi. Jare Tumpa umae kawi jese.

Jesús oo tupao wasu pe taurusu yawe

41Opa año rupi José jare Jesús ichɨ yuraa reta tëta wasu Jerusalén pe umbɨasa reta waerä pascua ara reta yemɨmandúa pewa. 42Jare Jesús doce año ma onoi yawe, oo jae reta ndiwe Jerusalén pe jae reta jeko uyapoño mái wae rupi. 43Jare pascua ara reta uasa ma yawe, José jare Jesús ichɨ opa ye yuraa reta tëi jëta kotɨ. Erëi Jesús upɨtaño Jerusalén pe José jare María uikuaa mbae rewe. 44Jae reta wɨrowia tëi Jesús ou ko aipo oï jëtara reta ndiwe. Erëi pëti ara ma uwata reta yawe, ueka reta tëi jëtara reta ipɨte rupi jare uikuaa wae reta ipɨte rupi. 45Erëi uwäe’ä chupe reta.

Jayawe José jare María opa uñatima ye reta Jerusalén kotɨ ueka reta waerä Jesús. 46Jare mbapɨ ara rupi ma ueka reta yawe, uwäe wɨte reta chupe tupao wasu joka pe. Joko pe Jesús uwapɨ oï Moisés uikuatía wae re oporomboe wae reta ndiwe. Uyapɨsaka oï jese reta, jare uyapo oï chupe reta mbɨrandu. 47Jare jae reta upɨrandu chupe yawe mbae re, Jesús umɨmbeu kawi chupe reta. Jáeramo opaete uyapɨsaka jese wae reta ipɨakañɨ Jesús iyarakuaa re. 48Jare José jare Jesús ichɨ kua uecha yawe, jae reta wi ipɨakañɨ. Jayawe ichɨ jei chupe: “Chemembɨ, ¿maera pa kuärái ndiyapo orewe? Mase, che jare nderu ndueka tëi opaete kerupi orepɨatɨtɨ rewe,” jei chupe.

49Jayawe Jesús jei chupe reta: “¿Maera pa chereka piko? ¿Pikuaa’ä yerá cheRu iparawɨkɨ imeta ko che ayapo wi?” jei chupe reta. 50Erëi jae reta uikuaa’ä mbae ra Jesús uipota jei chupe reta wae.

51Jayawe Jesús oo ye Nazaret pe jae reta ndiwe, jare jekuaeño uyapo jae reta jei wae rupi. Jare Jesús ichɨ upi ipɨa pe opaete jokua mbaembae uasa wae. 52Jare Jesús jekuaeño tuicha oo oo iyarakuaa katu rewe. Jare Tumpa umae kawi jese, jare jëtáɨwa reta umae kawi jese wi.

Currently Selected:

Lucas 2: gnwPB

Highlight

Copy