Lucas 14

Jesús umɨnguera pëti kuimbae opaete jete iruru wae

1Pëti mbutuu ara Jesús oo ukaru pëti fariseo reta itenondewa jëta pe. Jare ime ïru fariseo reta jare Moisés uikuatía wae re oporomboe wae reta joko pe ñonoï wi. Jae reta ueka yureko tëi kërái umbɨjeko waerä Jesús. Jáeramo umae ngatu yureko jese. 2Jare Jesús uecha joko pe oï pëti kuimbae opaete jete iruru wae. Tuicha uiporara parawete. 3Jayawe Jesús upɨrandu jokua mburuwicha reta pe kuärái: “Moisés arakae uikuatía wae rupi, ¿yandepuere pa yapurumɨnguera mbutuu ara pe, ani mbaetɨ?” jei chupe reta.

4Jayawe jae reta kïiño upɨta. Jayawe Jesús oñono ipo kuimbae imbaerasɨ wae re jare umɨnguera. Jare jei chupe: “Ekua ye nerëta pe,” jei chupe. 5Joko wi Jesús jei joko pe ñonoï wae reta pe: “Pemburika ani peweye oa yawe ɨwɨkua pe mbutuu ara pe, ¿peota’ä yerá penoe jupiwoi, yepe tëi jokua ara ko jae mbutuu ara?” jei chupe reta. 6Jare joko pe ñonoï wae reta ipuere’ä jei mbae awe Jesús pe kua rewa.

Uyembutuicha wae uñemɨmichikata

7Jayawe Jesús uecha opaete tëta iya uparea chupe wae reta uiparawo ñonoï iyupe tenda tenondewa ikawi wae reta mesa pe. Jayawe umbɨarakuaa reta kuärái: 8“Kía uparea ndewe yawe menda pe, jare ndeo yawe joko pe, awɨye ewapɨ tenda tenondewa pe. Echa’ä aramoi tëta iya uparea wi kía ɨwate oï ndewi wae pe,” jei. 9“Jayawe tëta iya ueruta jokua kuimbae jare jeita ndewe: ‘Emee nderenda kua kuimbae pe,’ jeita ndewe. Jayawe nde nemara rewe ndeota ko ndewapɨ tenda taɨkuewaete pe,” jei Jesús chupe reta.

10“Jáeramo uparea ndewe reta yawe, ewapɨ tenda taɨkuewaete pe. Echa’ä ou yawe tëta iya, aramoi jeita ndewe: ‘Tëtara, easa ewapɨ tenda tenondewa ikawiete wae pe,’ jeita ndewe. Jukuärái opaete yuweru ukaru wae reta umae kawita nderé,” jei. 11“Echa’ä opaete uyembutuicha wae reta, Tumpa umɨmichita yepe kuri. Jare opaete uñemɨmichi wae reta, Tumpa umbutuichata yepe kuri,” jei chupe reta.

12Jayawe Jesús jei tëta iya pe: “Nde ndeparea yawe, awɨye eparea neïru reta pe, jare nerëtara reta pe, jare nerëta ïru ikokatu wae reta pe. Echa’ä jae reta ipuere wi uparea ndewe nde ndeparea chupe reta ramoño, jare jukuärái rupi umɨñatimata ma ndewe,” jei chupe.

13-14“Erëi nde ndeparea yawe, eparea jokua ipuereta’ä umɨñatima ndewe wae reta pe,” jei. “Eparea iparawete wae reta pe, jare ipo chutu wae reta pe, jare iköcho wae reta pe, jare jesa mbae wae reta pe. Jare jukuärái ndiyapo yawe, ndiyekoueteta neï kuri. Echa’ä jokua ara jupi wae reta ikowe ye yawe umanokue wae reta ipɨte wi, Tumpa umɨñatimata oï ndewe jokua ndiyapo wae re,” jei Jesús jokua tëta iya pe.

Jesús umbɨjaanga mbarea re

(Mateo 22.1-10)

15Kua uyandu yawe, pëti wae uwapɨ iko Jesús ndiwe wae mesa pe jei chupe: “Tumpa oï ma yawe opaete wae imburuwicha wasurä jaeño mái pewa, ¡kërái eteita ndipo uyekou joko pe ukaruta oï wae reta!” jei chupe.

16Jayawe Jesús jei chupe kuärái: “Ime iko pëti karái jeta uyapoka tembiu wae. Jae uparea tëi jeta wae reta pe yuweru ukaru waerä jae ndiwe. 17Jare tembiu jae ma oï yawe, omondo uyeyokui chupe wae jei waerä jokua uparea chupe reta wae pe: ‘Peyu. Jae ma oï tembiu mesa pe,’ jei.

18“Erëi opaete wae uyeyopia reta. Pëti wae jei: ‘Chepuereta’ä a. Echa’ä jaeramo mii ɨwɨ awa cheyupe. Imeta ko a amae jese. Ere karái pe awɨye mii tipɨa’ä cheré,’ jei chupe.

19“Jare ïru wae jei chupe: ‘Chepuereta’ä a. Echa’ä jaeramo awa payandepo weye reta. Ata amboporowa reta aï. Ere karái pe awɨye mii tipɨa’ä cheré,’ jei chupe.

20“Jare ïru wae jei chupe: ‘Opa ramo amenda. Jáeramo chepuereta’ä a,’ jei chupe.

21“Jayawe uyeyokui wae oo ye karái oï wae pe jare umɨmbeu chupe opaete kua mbaembae rewa. Jayawe karái pochɨ jare jei uyeyokui wae pe: ‘Ekua ye woi kua tëta wasu calle reta rupi jare eru kua pe iparawete wae reta, ipo chutu wae reta, iköcho wae reta, jare jesa mbae wae reta,’ jei chupe.

22“Jayawe uyeyokui wae oo uyapo karái jei wae. Jare opa ma uyapo yawe, jei karái pe: ‘Karái, ayapo ma opaete nde ndere chewe wae, erëitu imeño amokue tenda reta ipo mbae oï wae,’ jei chupe.

23“Jayawe jokua karái jei ye uyeyokui wae pe: ‘Ekua opaete tape wasu rupi jare koo reta rupi, jare ere neowäiti wae reta pe yuweru waerä tɨnee reta waerä cherëta pe,’ jei. 24‘Echa’ä che tae pewe, ndarau pëti awe jokua tenonde aparea tëi chupe reta wae ukaru che ndiwe cherëta pe,’ jei chupe.” Jukuärái Jesús jei.

Yawái ko kía iko waerä Jesús jemimboerä

(Mateo 10.37-38)

25Jokua ara reta rupi jetaete wae reta yuraa Jesús jupie. Jare pëti wese Jesús uyerowa umae jese reta jare jei chupe reta: 26“Ime yawe kía uipota oo che ndiwe wae iko waerä cheremimboerä, imeta ko cherauete tu wi, ichɨ wi, jembireko wi, isambiaɨ reta wi, jare jëtara reta wi. Jae nunga wi jaeño uyerauete yawe chewi, ndarau ipuere iko cheremimboerä,” jei. 27“Jare ime yawe kía mbaetɨ owoɨ wɨraa ikurusu oo cherupie wae, ndarau ipuere iko cheremimboerä,” jei chupe reta.

28“Ime yawe kía uipota iko cheremimboerä wae, tuyapo kua rami – yambɨjaanga: Pëti kuimbae uipota uyapo yawe tëta ɨwate wae, tenonde uwapɨta ko uyemboe jese waerä uikuaa waerä mbowɨ ra jepɨta jokua tëta, jare jukuärái uikuaa waerä ikorepoti uepitɨta ra opa uyapo waerä,” jei. 29“Echa’ä jae uyapo’ä yawe jukuärái, aramoi umbɨpɨta tëi tëta uyapo, erëi ndarau ikorepoti uepitɨ chupe opa uyapo waerä. Jáeramo opaete uecha wae reta upukata umae jese. 30Jare jeita reta: ‘Kua kuimbae parawete iyarakuaa’ä oï. Jae umbɨpɨ tëi uyapo tëta ɨwate wae, erëi ipuere’ä opa uyapo,’ jeita reta,” jei.

31“Jae ramiño wi pëti mburuwicha wasu uecha yawe ïru mburuwicha wasu ou oï ikotɨ 20.000 sɨndaro reta ndiwe, jare jae jaeño ime onoi 10.000 sɨndaro reta, jayawe ¿mbae ra jae uyapota?” jei. “Jayawe, ¿jae tenonde uwapɨta’ä yerá uyemɨngeta kawi waerä ipɨa pe ipuereta ra jokua 10.000 isɨndaro reta umɨamɨri waerä jokua 20.000 sɨndaro reta ñonoï wae? Jukuäraita ko,” jei. 32“Jare uikuaa yawe ipuereta’ä umɨamɨri wae, jae omondota amokue wae uyapɨkatu waerä jowaicho ndiwe mbɨrɨ wɨteño ñonoï chuwi reta rambuewe,” jei Jesús umbɨjaanga rewe.

33“Jae ramiño wi pe pipota cheremimboerä piko wae reta, piyemɨngeta kawi kua re pepɨa pe. Echa’ä ime yawe pepɨte pe kía uipota iko cheremimboerä wae, imeta ko jae ma oï opaete imbaembae ueya waerä. Erëi jukuärai’ä yawe, ndarau ipuere iko cheremimboerä,” jei chupe reta.

Jesús oporomboe yukɨ jembochɨ mbae wae re

(Mateo 5.13; Marcos 9.50)

34Jayawe Jesús jei wi chupe reta umbɨjaanga rewe: “Yukɨ ikawi ko. Erëi yukɨ opa ma jembochɨpa yawe, ¿këraita ra ipuere jembochɨ ye? Ndarau ipuere. 35Ikawi’ä ma ko jokua maeräwe. Yandepuere’äwe yaiporu abonorä. Imeta ko yamomboño,” jei. “Ipotawe kía uipota uikuaa kawi wae, tuyapɨsaka kua chiñee re,” jei chupe reta.

Currently Selected:

Lucas 14: gnwPB

Highlight

Copy