Génesis 37

1Joko wi Jacob ou ye ɨwɨ Canaán pe iko waerä. Jokua ɨwɨ pe tu Isaac ikose ambɨe ɨwɨ pewa echa rami.

José jare tɨkeɨ ichɨ tee tee wae reta rewa

2Kua ko jae Jacob iñemoñaa reta rewa: José ime wɨreko diecisiete año yawe, uyandarekose tu iowecha reta re jare ikapura reta re tɨkeɨ ichɨ tee tee wae reta ndiwe. Jae reta ko José tu Jacob ïru jembireko reta Bilha jare Zilpa jee wae reta imembɨrae reta. Jare José umɨmbeuse tu pe tɨkeɨ ichɨ tee tee wae reta jeko kachi wae rewa.

3Jacob uauete José opaete ïru isambiaɨ reta wi, echa’ä José oa ichɨ wi yawe, Jacob indechi ma iko ramo. Jáeramo Jacob uyapo chupe pëti iñepëwakarä maepöraete wae. 4Erëi José tɨkeɨ reta uecha tu uauete José chuwi reta. Jáeramo uñamɨtäa reta tɨwɨ jare umɨngeta kawi’ä reta. Uipota mii äwe uecha reta tɨwɨ.

5Pëti wese José oke iko rambuewe, upau. Joko wi imiäri tɨkeɨ reta pe ipau rewa. Jayawe jae reta jeiete uñamɨtäa reta. 6Echa’ä José imiäri chupe reta kuärái: “Piyapɨsaka kua chepau re,” jei. 7“Opa rewe yaparawɨkɨ ñaï yandeko pe yayokua ñaï trigo. Aramoiño che ayokua wae uyemboɨ, jare pe reta piyokua wae reta uyembatɨ jese iyɨpɨ rupi jare itindɨ reta che ayokua wae jowai.” Jukuärái jei imiäri chupe reta.

8Jayawe tɨkeɨ reta uñeengata reta chupe kuärái: “¿Ndikota ra nde oremburuwicha wasurä aramoi? ¿Nenoita ra mbaepuere oreré? ¡Ndarau etei!” jei reta chupe. Jare jeiete uñamɨtäa reta José ipau re imiäri chupe reta ramo.

9Joko wi upau ye José, jare imiäri ye tɨkeɨ reta pe ipau rewa kuärái: “Apau ye jare aecha warasɨ, yasɨ, jare once yasɨtata reta uñeñono reta cherowai uipɨu rewe,” jei imiäri chupe reta.

10Kua wese José imiäri yawe tɨkeɨ reta pe, tu joko pe uyapɨsaka iko jese wi. Jayawe tu umbɨeta chupe jei rewe: “¿Mbae ra ndere neï ndepau rupi orekotɨ? ¿Aramoi che, jare ndesɨ, jare nderɨkeɨ reta imeta ra nuñemɨmichi nderowai nduipɨu rewe?” jei chupe.

11Jáeramo tɨkeɨ reta jeiete uñamɨtäa umae reta tɨwɨ re. Erëi Jacob jeta uyemɨngeta ipɨa pe José ipau rewa.

Jacob taɨ reta owaka tɨwɨ José

12Pëti ara José tɨkeɨ reta wɨraa mbɨrɨ tu iowecha reta umɨngaru waerä tëta wasu raɨ Siquem jee wae iɨwɨ rupi. 13-14Jare mbowɨ ara ma yuweru yewɨ'ä yureko reta. Jayawe Jacob jei José pe: “Nderɨkeɨ reta ime uyandareko ñonoï cheowecha reta re Siquem pe,” jei. “Ekua emae nderɨkeɨ reta re kërái ra oï reta wae. Jare eru che kuri ñee ipɨau wae jesewa reta jare cheowecha reta rewa,” jei chupe.

Jayawe José jei tu pe: “Taa jayawe,” jei chupe. Jayawe Jacob omondo José ɨwɨ ipe tuicha Hebrón jee wae wi.

15Joko wi José oo uwäe tëta wasu Siquem wi koiño. Jare jokoropi uwata iko rambuewe, aramoiño oñowäiti pëti kuimbae ndiwe. Jare jae upɨrandu José pe: “¿Mbae pa ndeka neï koropi?” jei chupe.

16José jei chupe: “Aeka aï cherɨkeɨ reta. ¿Ndikuaa pa nde kiape ra umɨngaru ñonoï iowecha reta wae?” jei José chupe.

17Jare jokua kuimbae jei chupe: “Aecha jae reta, erëi yuraa reta ma kua wi. Ayandu jei reta, ‘Ya tëta wasu Dotán iɨwɨ kotɨ,’ jei reta,” jei. Jayawe José oo tɨkeɨ reta jaɨkue Dotán kotɨ.

Jare Dotán wi koiño, mbɨrɨ wiwe José uecha tɨkeɨ reta. 18Jare tɨkeɨ reta uecha wi mbɨrɨ wiwe tɨwɨ ou oï wae. Erëi ndei José ou uwäe mbowe jae reta ñonoï wae pe, tɨkeɨ reta uyemɨngeta uyuka waerä tɨwɨ. 19Jei iyupe reta: “Mase, pe ou oï ipause wae,” jei iyupe reta. 20“Ya yayuka jare yamombo jetekue pëti ɨwɨkua kɨpe wae pe. Jare yambeuta kuri yanderu pe pëti mbaemɨmba pochɨ wae ñana rupiwa ndipo uyuka jou. Yaecha tuyeyapo kuri jokua ipau reta,” jei iyupe reta.

21Erëi José tɨkeɨ tenondewa Rubén jee wae uyandu yawe ïru reta iyemɨngeta rewa, uipota tëi uepɨ José chuwi reta. Jayawe Rubén jei tɨwɨ reta pe: “Awɨye yayuka yanderɨwɨ,” jei. 22“Awɨye yapɨyere yanderɨwɨ juwɨ. Yamomboño kua ɨwɨkua pe jekowe rewe, jare tumano kuri joko pe marái yayapo mbae rewe,” jei chupe reta. Jukuärái Rubén jei chupe reta, echa’ä jae ipɨayemɨngeta iko oo onoe waerä José ɨwɨkua wi ïru reta joko pe’ä ma ñonoï yawe. Joko wi wɨraa yeta tëi José jekowe rewe tu pe.

23Jayawe José ou uwäe yawe tɨkeɨ reta ñonoï wae pe, jae reta uesapɨa tɨwɨ jare ueki reta chuwi iñepëwaka ipöraete wae. 24Jare wɨraa omombo reta pëti ɨwɨkua ipo mbae jare utini oï wae pe.

25Joko wi uwapɨ ukaru reta waerä. Jare ukaru reta rambuewe, aramoiño uecha reta yuweru ñonoï amokue Ismael iñemoñaa reta. Jae reta yuweru ñonoï ɨwɨ Galaad jee wae wi jare yuraa ñonoï ɨwɨ Egipto kotɨ. Jae reta jɨmba camello reta re wɨraa ñonoï mbaembae utimbo kawi wae, jare ɨwɨrayaɨsɨ bálsamo jare mirra jee wae owaka reta waerä ɨwɨ Egipto pe.

26Jayawe pëti José tɨkeɨ Judá jee wae jei ïru reta pe: “¿Mbae ra yamɨnganata yayuka wɨari yawe yanderɨwɨ?” jei. “Yamɨnganata’ä mbae awe. 27Awɨye yayuka. Yawaka kua kuimbae reta pe. Jukuärái yambɨpereta’ä, echa’ä añetete yanderɨwɨete mii ko kua,” jei Judá ïru reta pe. Jare Judá jei wae jaekawi chupe reta.

28Jayawe kuimbae reta yuweru ma uwäe yawe jae reta ñonoï wae pe, José tɨkeɨ reta onoe tɨwɨ ɨwɨkua wi jare owaka chupe reta veinte riare korepoti pe. Jayawe wɨraa reta José joko wi ɨwɨ Egipto kotɨ.

29Erëi kua uyapo reta yawe, Rubén mbaetɨ joko pe iko. Jare jae ou umae jese yawe ɨwɨkua pe, José mbaetɨ ma joko pe iko. Jayawe ipɨatɨtɨ pɨpei omondoro iyuwi jemimonde.

30Jare oo ye tɨwɨ reta ñonoï wae pe yawe, Rubén jei chupe reta ipɨatɨtɨ rewe: “Taurusu wae mbaetɨ ma joko pe oï. Añawe, ¿mbae pa che ayapota?” jei chupe reta. 31Jayawe jae reta uyuka pëti kapura jare umäkɨ reta José iñepëwaka maepöra wae kapura juwɨ pe.

32Joko wi wɨraa reta tu pe, jare jei reta chupe: “Nuwäe chupe kua temimonde. ¿Jae ra ko José iñepëwaka?” jei reta tu pe.

33Jare uecha yawe, Jacob jei: “¡Cheraɨ mii iñepëwaka ko! Pëti mbaemɨmba pochɨ wae ñana rupiwa ndipo uyuka jou cheraɨ. Añetete ko, José umano ma,” jei.

34Jayawe Jacob ipɨatɨtɨ pɨpei omondoro iyuwi jemimonde, jare omonde temimonde jaimbe wae mbɨatɨtɨ pewa.#37.34 Temimonde jaimbe wae mbɨatɨtɨ pewa jae ko kapura jare camello jawe jü wae pewa. Arakae omonde reta uikuaaka waerä ipɨatɨtɨ ñonoï pëti jëtara umano wae re. Jayawe ɨma rupi Jacob ipɨatɨtɨñoi iko taɨ José re. 35Jáeramo opaete Jacob taɨ reta jare tayɨ reta yuweru ipɨ umbɨpɨakatu waerä tëi tu. Erëi Jacob ikueri’ä uyao, jare jei chupe reta: “Tuicha rupi chepɨatɨtɨta ko amano rewa jare awäe chupe rewa cheraɨ amɨri umanokue wae reta ñonoï wae pe,” jei chupe reta. Jukuärái tuichaete ipɨatɨtɨ Jacob José re.

36Jokua rambuewe, jokua Ismael iñemoñaa reta wɨraa José ɨwɨ Egipto pe. Joko pe owaka yuapɨ ye reta mburuwicha wasu isɨndaro reta itenondewa pe. Jae ko jee Potifar.

Currently Selected:

Génesis 37: gnwPB

Highlight

Copy