Génesis 16

Agar jare imembɨ Ismael jee wae

1Abram jembireko Sarai imeño imembɨ mbae iko. Jare Sarai ime wɨreko pëti kuña uyeyokui chupe wae Egipto pe owa iyupe wae, Agar jee wae. 2Jayawe pëti ara Sarai jei Abram pe: “Ndecha ma kërái Tumpa chapo chemembɨ mbae waerä. Jayawe ayerure ndewe ndeke waerä Agar ndiwe. Aramoi jae rupi anoita chemembɨ retarä,” jei chupe. Jare jokua Sarai jei wae jaekawi Abram pewarä.

3Jayawe Abram jembireko Sarai ueru chupe Agar jare umee ime pe jembirekorä. Kua uasa payandepo año ma Abram iko yawe ɨwɨ Canaán pe. 4Jayawe Abram iko Agar ndiwe Agar ipurúa rewa. Jare Agar uikuaa ipurúa ma yawe, uipɨu’ä ma iya Sarai wi. 5Jáeramo Sarai jei Abram pe: “¡Jupi’ä ko kua!” jei. “Mase, che etei amee ndewe Agar nembirekorä. Erëi añawe jae uikuaa ipurúa ma oï ramo, uipɨu’ä ma chewi. ¡Jare nemaeño kua uasa waerä! ¡Ndereko pewa ko kua ikawi mbae wae oï chekotɨ! Tumpa tuikuaaka yandewe kía ra ime onoi teko – nde ra ani che ra,” jei ime pe.

6Jare Abram jei Sarai pe: “Jaekawi,” jei. “Ime nenoi mbaepuere jese yewɨ. Jáeramo ndepuere ndiyapo nde ndere wae rupi,” jei chupe.

Jayawe Sarai umbɨpɨ uyuwanga jese. Jáeramo iko kawi’ä yawe jae ndiwe, Agar osi iya kuña Sarai wi. 7Joko wi Agar oo uwäe pëti ɨkua, tape tëta wasu Shur jee wae kotɨ oo wae iyɨpɨ pe. Jare joko pe araɨwa Tumpa etei wae uyekuaa chupe.

8Jare jae upɨrandu Agar pe: “Agar, Sarai pe ndiyeyokui wae, ¿kiawi pa ndeyu neï, jare ketɨ pa ndeo neï?” jei chupe.

Jare Agar jei chupe: “Asi aï cheya Sarai wi,” jei.

9Jayawe araɨwa Tumpa etei wae jei chupe: “Iñatima yewɨ ndeya Sarai kotɨ jare iyapo jae jei ndewe wae rupi,” jei. 10“Ameeta ndewe jetaete niñemoñaa retarä. Ndarau ndepuere opa ndipapa opaete, echa’ä jetaete yeta ko ramo,” jei. 11“Añawe ndepurúa neï jare oata nemembɨ kuimbae. Nembɨjeeta Ismael,#16.11 Tee Ismael uipota jei “Tumpa uyandu” hebreo ñee pe. echa’ä Tumpa uyandu ma tuicha ndepɨatɨtɨ rewe ndiyao wae,” jei. 12“Ismael ikota kuimbae ñana rupiwa echa. Mbaetɨta kiawe onoi mbaepuere jese wae. Jae pochɨ raita jare jowaichopotata opaete wae ndiwe. Jae jëtara reta ndiwe wi oyowaichota,” jei chupe.

13Jare Tumpa opa uyemɨngeta Agar ndiwe yawe, Agar uyemɨngeta ipɨa pe: “Yepe tëi aecha ma Tumpa cherecha wae, jesewe imeño aiko tekowe pe,” jei. Jáeramo Agar umbɨjee jae ndiwe uyemɨngeta wae: “Nde ko jae Tumpa cherecha wae.” 14Jáeramo joko wiwe jokua ɨkua jee ko: “Tekowe onoi wae jare cherecha wae iɨkua.” Jokua ɨkua oï tëta wasu Cades jee wae jare ɨwɨ Bered jee wae ipäu pe.

15Jayawe Agar uñatima ye iya Sarai kotɨ. Joko wi oa Agar imembɨ kuimbae, jare tu Abram umbɨjee Ismael. 16Abram ime wɨreko ochenta y seis año yawe, oa taɨ Ismael.

Currently Selected:

Génesis 16: gnwPB

Highlight

Copy