Matiu 4
4
Alubipo ka chɔ Yesu ŋ keni be asheŋ
(Maak 1:12-13; Luuk 4:1-13)
1Ndoŋ nna nɛ Kiyoyu na shin nɛ Yesu yɔ kiyi to nɛ alubipo na e ya chɔ mo ŋ keni. 2Nchɛ adena nɛ nnyɛ adena nɛ Yesu daŋ ta ŋ kishi ndoŋ. Nchɛ na be kaman nɛ akoŋ pɛ mo. 3Ndoŋ nna nɛ echɔŋkenipo na ba mo kutɔ m ba kaŋɛ mo le: “Nɛ fo baa la Ebɔrɛ Pibinyɛn gbagba nna, fo shin nɛ ajembu ere e ki ebodobodo.” 4Nɛ Yesu kaŋɛ mo le:
“Abɔrɛsibɛ na bee kaŋɛ fanɛ a maŋ daga nyiŋgbasa ka wɔtɔ
ŋkpal ajibi nawule so,
ama e wɔtɔ nna ŋkpal kamalga kikɛ
nɛ k bee shi Ebɔrɛ be kɔnɔ to a lar so.”
5Ndoŋ nna nɛ alubipo na naŋ shin nɛ b yɔ kadegboŋ cheembi na to n ya shin nɛ Yesu yili bɔrɛlambu na be kakpa jeŋgreŋ ko so nseŋ kaŋɛ mo le: 6“Nɛ fo baa la Ebɔrɛ Pibinyɛn gbagba nna, fo shi nfe n tɔr kasawule, ŋkpal manɛ so, abɔrɛsibɛ na bee kaŋɛ:
‘Ebɔrɛ beeŋ shin nɛ mbe emalaika e keni fo so n suse fo to hale
nɛ fo sa maŋ doro fo anashibi kejembu so.’ ”
7Nɛ Yesu kaŋɛ mo le: “Le nɛ abɔrɛsibɛ na gba bee kaŋɛ:
‘Sa maŋ kaŋ wora Enyɛnpe fo Ebɔrɛ ŋ keni kikɛ.’ ”
8Ndoŋ nna nɛ alubipo na naŋ shin nɛ b ya dii kebee jeŋgreŋ ko so n yili nɛ e ŋini Yesu durnya ere to be kuwurjiana kikɛ nyam nɛ amo be kemaŋkura 9nseŋ kaŋɛ mo le: “Nɛ fo baŋ gbir m bunyaŋ ma, meeŋ ta asɔ ere kikɛ nyam n sa fo.” 10Ndoŋ nna nɛ Yesu kaŋɛ mo: “Shile ma anishito Setani! Abɔrɛsibɛ na bee kaŋɛ fanɛ: ‘Bunyaŋ Enyɛnpe fo Ebɔrɛ na nseŋ shuŋ mo nawule.’ ” 11Ndoŋ nna nɛ alubipo na yige mo nɛ emalaika ba chɛ mo to.
Yesu ka fara mbe kushuŋ ashi Galili be asheŋ
(Maak 1:14-15; Luuk 4:14-15)
12Kachako Yesu ka nu fanɛ b ti Jɔn kabɔrɛbɛrpo ebu nɛ e yɔ Galili be kasawule so. 13Mannɛ Nazarɛt be kade to nɛ e daŋ ya chena. Kapɛɛniam nɛ k mata Galili be kepagboŋ na, Zɛbyulɔn nɛ Naftali be kasawule so nɛ e daŋ yɔ. 14E daŋ wora loŋ nna nɛ kusɔ nɛ anebi Aizaaya daŋ kaŋɛ na e bɔla ekpa. 15Le nɛ e daŋ kaŋɛ:
“Zɛbyulɔn nɛ Naftali be nsawule
nɛ a wɔ teku ase ashi Jɔɔdan be kaba ndoŋ na,
Nnyamase be Galili,
16basa nɛ b wɔ tentembiri to na wu kefulto gboŋ ko.
Kefulto na nyaŋɛ a yuu
basa nɛ b wɔ luwu be tentembiri be kasawule so na.”
17Yili jemanɛ na so a yɔ nɛ Yesu fara a bɔ mbe kubɔya a kaŋɛ le: “Men lar menyi be alubi to, ŋkpal manɛ so, ebɔrɛso be kuwura na taga to.”
Yesu ka tre bebɛsopo ana be asheŋ
(Maak 1:16-20; Luuk 5:1-11)
18Yesu ka na Galili be kepagboŋ na ase nɛ e wu benyɛn anyɔ ko, Saimɔn nɛ baa tre Pita na nɛ mo sipo Andru ka bee lɛ keshewu kepagboŋ na to, ŋkpal manɛ so, b daa la ekɔrɔtɔpɛpoana nna. 19Ndoŋ nna nɛ e kaŋɛ bumo le: “Men ba bɛ ma so nɛ ŋ ŋini menyi kananɛ menyeeŋ baa keta basa a ba ma kutɔ.” 20Epul na to nɛ b yige bumo be ashewu na nseŋ bɛ mo so.
21E ka naŋ yɔ anishito nɛ e naŋ ya wu benyɛn anyɔ ko, Jeems nɛ mo sipo Jɔn, Zɛbedi be mbia. Bumo nɛ bumo tuto Zɛbedi e daa wɔ bumo be ekuloŋ to a lɔŋɛ bumo be ashewu to nɛ e tre bumo. 22Epul na to nɛ b yige bumo tuto nɛ ekuloŋ na nseŋ bɛ Yesu so.
Kananɛ Yesu ŋini basa abɔrɛsheŋ nseŋ chɛ basa be asheŋ
(Luuk 6:17-19)
23Ade be kaman nɛ Yesu nite Galili be kasawule so kikɛ to a ŋini basa abɔrɛsheŋ ashi bumo be nshɛrbuana to nsaa bɔ Ebɔrɛ be kuwura na to be baru lela na a sa basa nseŋ chɛ basa na to be alɔ nɛ ebesa be yiri kikɛ. 24Amoso mbe ketre daŋ sɔ Siriya kikɛ to nna nɛ basa bar mo belɔpo nɛ bumo be alɔ be nnaŋ to kikɛ, bumo nɛ b daa wɔ ebesa to nɛ bumo nɛ mbuibi lubiana daŋ tɔr so nɛ kegbuŋgbuŋwuraana nɛ eyurwusowuraana kikɛ nɛ e chɛ n chɛ bumo. 25Ndoŋ nna nɛ jimaŋ damta ko shi Galili nɛ Dɛkapɔlis nɛ Jerusalɛm nɛ Judiya nɛ nde nɛ a ya kaa wɔ Jɔɔdan be kaba ndoŋ ere na kikɛ to m bɛ mo so.
Currently Selected:
Matiu 4: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
