Matiu 2
2
Befɔ asa nɛ b shi epeŋilarkpa m ba na be asheŋ
1Bɛtlɛhɛm nɛ k wɔ Judiya be kasawule so na to nɛ b daŋ kurge Yesu, saŋɛ nɛ Ewura Hɛrɔd daa ji ndoŋ be kuwura na. B ka kurge Yesu k maŋ chɛr ko nɛ basa ko nɛ b daa koya achɛkpabi be asheŋ na shi epeŋilarkpa m ba Jerusalɛm m ba bishi: 2“Nnɛ nɛ kebia nɛ b kurge nɛ e la Juwebi be ewura na wɔ? Mbe kechɛkpabi e lar epeŋilarkpa be kasawule so nɛ an wu kumo nseŋ ba nɛ an ba bunyaŋ mo.” 3Ewura Hɛrɔd ka nu kesheŋ na nɛ mbe kagbene kaa. Loŋ koŋwule na malɛ e daŋ wora Jerusalɛmebi kikɛ. 4Ndoŋ nna nɛ Ewura Hɛrɔd tre bɔrɛmatapowuraana na nɛ mbraŋinipoana na kikɛ m ba shɛr m bishi bumo le: “Nnɛ nɛ baaŋ kurge Ebɔrɛ be esa laraso Kristo na?” 5Nɛ b kaŋɛ mo le: “Bɛtlɛhɛm nɛ k wɔ Judiya be kasawule so na, ŋkpal manɛ so, le nɛ Ebɔrɛ daŋ bɔla anebi Maika so ŋ kaŋɛ:
6‘Fo Bɛtlɛhɛm nɛ fo wɔ Judiya so na, fo maŋ la Juda be kasawule so be bewuraana be ebibiso kuraa,
ŋkpal manɛ so, fo to nɛ ejuŋkparpo beeŋ lar
n juŋkpar ma basa Israɛlebi.’ ”
7Ewura Hɛrɔd ka nu asheŋ ere nɛ e tre befɔ nɛ b shi epeŋilarkpa be kasawule so m ba na n lar ekarso ŋ ŋana m bishi bumo jemanɛ gbagba nɛ kechɛkpabi na lar. 8Kede be kaman nɛ e kaŋɛ bumo le nseŋ shin nɛ b yɔ Bɛtlɛhɛm be kade to: “Men ya keni nɛnɛ n fin kebia na. Nɛ men kaŋ ya wu mo, men shin nɛ n nu. Saŋɛ na so ma alɛ gba beeŋ ya bunyaŋ mo.” 9B ka nu ewura na be kamalga na n loge nɛ b lar m pɛ ekpa a yɔ. Ndoŋ nna nɛ kechɛkpabi koŋwule nɛ b daŋ kewu epeŋilarkpa be kasawule so na naŋ lar n juŋkpar bumo nɛ b bɛ kumo so loŋ m ba wu fanɛ k ba yili kakpa nɛ kebia na daa wɔ na. 10B ka wu kechɛkpabi na nɛ bumo be ŋgbene fuli bumo alegaiso. 11B ka luri laŋ na to n wu kebia na nɛ mo nio Mɛɛri nɛ b gbir m bunyaŋ kebia na. Kumo be kaman nɛ b bugi bumo be asɔ to n lara shuwa nɛ asɔ ko nɛ baa tre fraŋkinsensi nɛ mir ŋ kɛ kebia na. 12B ka loge nɛ Ebɔrɛ fiɛ bumo so edare to ŋ kaŋɛ fanɛ b sa maŋ naŋ bɛta n yɔ Ewura Hɛrɔd kutɔ. Amoso b daŋ bɔla ekpa popɔr so nna m bɛta n yɔ bumo be efuli so.
Kegelge n yɔ Ijipt na be asheŋ
13Basa na ka yɔ nɛ Enyɛnpe be malaika lar Josɛf so edare to ŋ kaŋɛ mo le: “Niŋi to n ta kebia na nɛ mo nio n shile n yɔ Ijipt be efuli so n ya kaa wɔ ndoŋ hale nɛ m ba kaŋɛ fo fanɛ fo naŋ lar ndoŋ. Ŋkpal manɛ so Ewura Hɛrɔd bee fin kebia na nɛ e mɔ.” 14Ndoŋ nna nɛ Josɛf koso n ta kebia na nɛ mo nio kanyɛso na kikɛ n yɔ Ijipt. 15Ndoŋ nɛ e daŋ ya kaa wɔ loŋ hale nɛ Ewura Hɛrɔd ya wu. Le be asheŋ ere daŋ wora nna nɛ kusɔ nɛ Enyɛnpe daŋ bɔla anebi Hoziya to ŋ kaŋɛ le na e bɔla ekpa. E yɛ: “N tre m pibinyɛn ashi Ijipt to n lar.”
Mbiwurbi be kemɔ be asheŋ
16Ewura Hɛrɔd ka pin fanɛ epeŋilarkpa be kasawule so be befɔ na fule mo nna nɛ agbo pɛ mo ga nɛ e sa ekpa ŋ kaŋɛ fanɛ b mɔ Bɛtlɛhɛm to nɛ ndoŋ be kasawule na so kikɛ to be mbinyɛnsobi nɛ b daŋ fo nfɛ anyɔnyɔ nɛ bumo nɛ b daa maŋ naŋ fo loŋ na kikɛ nyam. Ewura Hɛrɔd daŋ sa le be mbra ere nna fanɛ b mɔ mbia nɛ b fo nɛ bumo nɛ b daa maŋ naŋ fo nfɛ anyɔnyɔ na nna ŋkpal e ka daŋ bishi befɔ na wulo to m pin saŋɛ nɛ kechɛkpabi na daŋ lar na so. 17Le e shin nɛ kusɔ nɛ anebi Jɛremaya daŋ kaŋɛ na bɔla ekpa fanɛ:
18“Awɔr shi Raama to n cha m ba,
baa boŋ to nna a shu.
Reechel e naa kpal mbe mbia kikɛ ka maŋ naa wɔtɔ so a shu,
nɛ basa bee wushi mo kagbene a gben.”
Kebɛta n shi Ijipt n yɔ Nazarɛt be asheŋ
19Josɛf nɛ Mɛɛri nɛ kebia na daa wɔ Ijipt na loŋ nɛ Ewura Hɛrɔd ba wu nɛ Enyɛnpe be malaika lar Josɛf so edare to ndoŋ 20m ba kaŋɛ mo le: “Koso n ta kebia na nɛ mo nio m bɛta n yɔ Israɛl be kasawule so, ŋkpal manɛ so, basa nɛ b daa sha kemɔ mo na wu.” 21Ndoŋ nna nɛ Josɛf koso n ta kebia na nɛ mo nio m bɛta n yɔ Israɛl. 22Ama Josɛf ka nu fanɛ Ewura Hɛrɔd pibi Aakileeyes e sɔ mo tuto so n ji Judiya be efuli so be kuwura nɛ e ŋana kechena kasawule na so. Ama edare to nɛ Ebɔrɛ daŋ naŋ kaŋɛ mo kusɔ nɛ k daga fanɛ e wora, 23amoso, Galili be kasawule so nɛ e daŋ ya chena, kade ko to nɛ baa tre Nazarɛt. Loŋ daŋ wora nna nɛ kusɔ nɛ anebiana na daŋ kaŋɛ na e bɔla ekpa. B yɛ:
“Baaŋ ba kaa tre mo Nazarin na.”
Currently Selected:
Matiu 2: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
