ໂຣມ 5
5
ການຊົງຖືວ່າເປັນຄົນຊອບທຳ
1ດ້ວຍເຫດນີ້ ເມື່ອພວກເຮົາໄດ້ຊົງຖືວ່າເປັນຄົນຊອບທຳ ເພາະດ້ວຍຄວາມເຊື່ອແລ້ວພວກເຮົາຈຶ່ງມີ ສັນຕິສຸກກັບພຣະເຈົ້າໂດຍທາງອົງພຣະເຢຊູຄຣິດເຈົ້າຂອງພວກເຮົາ. 2ໂດຍທາງພຣະອົງ ເຮົາຈຶ່ງໄດ້ເຂົ້າໄປໃນຮົ່ມພຣະຄຸນ ຊຶ່ງບັດນີ້ພວກເຮົາຕັ້ງໝັ້ນຢູ່ດ້ວຍຄວາມເຊື່ອ ແລະພວກເຮົາຊື່ນຊົມຍິນດີ ໃນຄວາມຫວັງວ່າຈະໄດ້ມີສ່ວນໃນສະຫງ່າຣາສີຂອງພຣະເຈົ້າ 3ຫລາຍກວ່ານັ້ນອີກ ພວກເຮົາກໍມີຄວາມຊົມຊື່ນຍິນດີໃນຄວາມຍາກລຳບາກດ້ວຍ ເພາະຮູ້ແລ້ວວ່າຄວາມຍາກລຳບາກນັ້ນ ເຮັດໃຫ້ເກີດມີຄວາມອົດທົນ 4ແລະຄວາມອົດທົນນັ້ນ ເຮັດໃຫ້ເຮົາເປັນຄົນທີ່ພຣະເຈົ້າຊົງເຫັນຊອບ ແລະການທີ່ຊົງເຫັນຊອບນັ້ນເຮັດໃຫ້ມີຄວາມໄວ້ວາງໃຈ. 5ແລະຄວາມໄວ້ວາງໃຈ ບໍ່ຫ່ອນເຮັດໃຫ້ມີຄວາມເສຍໃຈ ເພາະຜິດຫວັງ ເພາະເຫັນວ່າພຣະເຈົ້າຊົງເປັ່ງຄວາມຮັກຂອງພຣະອົງເຂົ້າໃນໃຈຂອງພວກເຮົາໂດຍທາງພຣະວິນຍານບໍຣິສຸດເຈົ້າ ຊຶ່ງພຣະອົງໄດ້ຊົງປະທານໃຫ້ແກ່ເຮົາທັງຫລາຍແລ້ວ.
6ຂະນະທີ່ພວກເຮົາຍັງຂາດກຳລັງຢູ່ນັ້ນ ພຣະຄຣິດໄດ້ຕາຍເພື່ອຊ່ວຍຄົນບາບຕາມເວລາທີ່ເໝາະສົມ. 7ດ້ວຍວ່າ, ບໍ່ຄ່ອຍຈະມີຜູ້ໃດຍອມຕາຍແທນຄົນຊອບທຳ, ແຕ່ບາງທີອາດມີຄົນກ້າຕາຍແທນຄົນດີກໍໄດ້. 8ແຕ່ພຣະເຈົ້າໄດ້ຊົງສຳແດງໃຫ້ພວກເຮົາເຫັນວ່າ ພຣະອົງຊົງຮັກພວກເຮົາຫລາຍເທົ່າໃດ ຄືຂະນະທີ່ພວກເຮົາຍັງເປັນຄົນບາບຢູ່ນັ້ນ ພຣະຄຣິດໄດ້ຊົງຍອມຕາຍແທນເຮົາທັງຫລາຍ. 9ດ້ວຍເຫດນັ້ນ ເມື່ອພວກເຮົາໄດ້ຊົງຖືວ່າເປັນຄົນຊອບທຳແລ້ວ ດ້ວຍເລືອດຂອງພຣະອົງ ຫລາຍກວ່ານັ້ນອີກ ພວກເຮົາຈະໄດ້ພົ້ນຈາກຄວາມໂກດຮ້າຍຂອງພຣະເຈົ້າໂດຍພຣະອົງ. 10ພວກເຮົາເຄີຍເປັນສັດຕູຂອງພຣະເຈົ້າ ແຕ່ພຣະເຈົ້າໄດ້ເຮັດໃຫ້ພວກເຮົາຄືນດີກັບພຣະອົງ ຜ່ານທາງຄວາມຕາຍແຫ່ງພຣະບຸດຂອງພຣະອົງ. ເມື່ອເຮົາທັງຫລາຍໄດ້ຄືນດີກັບພຣະເຈົ້າແລ້ວ ຫລາຍກວ່ານັ້ນອີກ ພຣະອົງຈະຊົງໂຜດໃຫ້ພວກເຮົາໄດ້ພົ້ນໂດຍການຄືນພຣະຊົນຂອງພຣະອົງ. 11ບໍ່ພຽງແຕ່ເທົ່ານັ້ນ ພວກເຮົາຍັງຊື່ນຊົມຍິນດີໃນພຣະເຈົ້າໂດຍທາງອົງພຣະເຢຊູຄຣິດເຈົ້າຂອງພວກເຮົາ ຜູ້ຊົງເປັນເຫດໃຫ້ເຮົາທັງຫລາຍໄດ້ຄືນດີກັບພຣະເຈົ້າ.
ອາດາມກັບພຣະຄຣິດ
12ດ້ວຍເຫດນັ້ນ ຄວາມບາບໄດ້ເຂົ້າມາໃນໂລກ ເພາະດ້ວຍມະນຸດຄົນດຽວ ແລະຄວາມຕາຍກໍໄດ້ເກີດມາຍ້ອນຄວາມຜິດບາບນັ້ນ. ຢ່າງນັ້ນແຫຼະ ຄວາມຕາຍຈຶ່ງໄດ້ລາມໄປເຖິງມະນຸດທຸກຄົນ ເພາະວ່າທຸກຄົນໄດ້ເຮັດບາບແລ້ວ. 13ແທ້ຈິງແລ້ວ ຄວາມຜິດບາບມີຢູ່ໃນໂລກນີ້ກ່ອນມີກົດບັນຍັດ, ແຕ່ວ່າເມື່ອບໍ່ມີກົດບັນຍັດ ກໍບໍ່ຖືວ່າມີຜິດ. 14ເຖິງຢ່າງໃດກໍຕາມ ຄວາມຕາຍໄດ້ຄອບງຳຕະຫລອດມາ ຕັ້ງແຕ່ອາດາມຈົນເຖິງໂມເຊ ແມ່ນວ່າຄົນທີ່ບໍ່ໄດ້ເຮັດບາບຢ່າງດຽວກັບການລະເມີດຂອງອາດາມຜູ້ຊຶ່ງເປັນແບບ ໝາຍເຖິງພຣະຜູ້ທີ່ຈະມາພາຍຫລັງນັ້ນ. 15ແຕ່ວ່າຂອງປະທານທີ່ມາດ້ວຍພຣະຄຸນນັ້ນບໍ່ເໝືອນກັບການລະເມີດ ເພາະຖ້າຄົນຈຳນວນຫລວງຫລາຍຕ້ອງຕາຍ ເພາະການລະເມີດຂອງມະນຸດຄົນດຽວ ຫລາຍກວ່ານັ້ນອີກ ພຣະຄຸນຂອງພຣະເຈົ້າ ແລະຂອງປະທານທີ່ມາດ້ວຍພຣະຄຸນຂອງພຣະອົງຜູ້ດຽວ ຄືພຣະເຢຊູຄຣິດເຈົ້າກໍມີບໍຣິບູນແກ່ຄົນຈຳນວນຫລາຍດ້ວຍ. 16ແລະຂອງປະທານນັ້ນ ກໍບໍ່ເໝືອນກັບຜົນທີ່ເກີດຈາກບາບກຳຂອງມະນຸດຜູ້ດຽວ ເພາະວ່າການຊົງພິພາກສາ ທີ່ຈະເກີດຂຶ້ນເນື່ອງຈາກການລະເມີດພຽງເທື່ອດຽວ ໄດ້ນຳໄປສູ່ການລົງໂທດ, ແຕ່ຂອງປະທານຈາກພຣະເຈົ້າ ພາຍຫລັງການລະເມີດຫລາຍຄັ້ງນັ້ນ ກໍນຳໄປສູ່ຄວາມຊອບທຳ. 17ຖ້າຫາກວ່າໂດຍການລະເມີດຂອງມະນຸດຄົນດຽວ ເປັນເຫດໃຫ້ຄວາມຕາຍໄດ້ຄອບງຳເພາະຄົນຜູ້ດຽວນັ້ນ ຫລາຍກວ່ານັ້ນອີກ ຄົນຈຳນວນຫລາຍທີ່ຮັບພຣະຄຸນອັນບໍລິບູນ ແລະຮັບຂອງປະທານຄືຄວາມຊອບທຳ ກໍຈະດຳລົງຊີວິດແລະຄອບຄອງໂດຍພຣະອົງຜູ້ດຽວ ຄືພຣະເຢຊູຄຣິດເຈົ້າ.
18ເພາະສະນັ້ນ ການພິພາກສາລົງໂທດໄດ້ມາເຖິງຄົນທັງປວງ ເພາະການລະເມີດພຽງເທື່ອດຽວສັນໃດ ການກະທຳອັນຊອບທຳເທື່ອດຽວ ກໍນຳຄວາມຊອບທຳທີ່ໃຫ້ມີຊີວິດ ມາເຖິງທຸກຄົນສັນນັ້ນ.
19ດ້ວຍວ່າ, ມະນຸດທຸກຄົນຕົກເປັນຄົນມີບາບກຳ ເພາະມະນຸດຄົນດຽວທີ່ບໍ່ເຊື່ອຟັງສັນໃດ, ຄົນຈຳນວນຫລາຍ ກໍຈະໄດ້ຊົງຖືວ່າເປັນຄົນຊອບທຳ ເພາະພຣະອົງຜູ້ດຽວທີ່ໄດ້ຊົງເຊື່ອຟັງສັນນັ້ນ.
20ກົດບັນຍັດຖືກນຳເຂົ້າມາສູ່ໂລກ ກໍເພື່ອໃຫ້ການເຮັດຜິດຈະປາກົດຫລາຍຂຶ້ນ, ແຕ່ບ່ອນໃດມີບາບຫລາຍຂຶ້ນ ບ່ອນນັ້ນກໍມີພຣະຄຸນຂອງພຣະເຈົ້າຫລາຍເພີ່ມຂຶ້ນ. 21ເພື່ອວ່າບາບກຳໄດ້ຄອບງຳໃຫ້ເຖິງຊຶ່ງຄວາມຕາຍສັນໃດ, ພຣະຄຸນຂອງພຣະເຈົ້າກໍຄອບງຳໃຫ້ເຖິງຊຶ່ງຄວາມຊອບທຳ ທັງນຳພວກເຮົາໄປສູ່ຊີວິດນິຣັນດອນ ໂດຍທາງພຣະເຢຊູຄຣິດເຈົ້າ ອົງພຣະຜູ້ເປັນເຈົ້າຂອງພວກເຮົາສັນນັ້ນ.
Currently Selected:
ໂຣມ 5: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.