ປະຖົມມະການ 40:2-22

ສະນັ້ນ ເພິ່ນ​ຈຶ່ງ​ໃຈຮ້າຍ​ຂ້າຣາຊການ​ສອງ​ຄົນ​ນີ້ ແລະ​ສັ່ງ​ຂັງ​ພວກເຂົາ​ໃນ​ຄຸກ​ທີ່​ເຮືອນ​ຂອງ​ນາຍ​ທະຫານ​ຮັກສາ​ຣາຊວັງ ຊຶ່ງ​ເປັນ​ບ່ອນ​ດຽວກັນ​ກັບ​ທີ່​ໂຢເຊັບ​ຖືກ​ຂັງ​ຢູ່. ພວກເຂົາ​ຢູ່​ນຳ​ກັນ​ໃນ​ຄຸກ​ເປັນ​ເວລາ​ນານ ແລະ​ເຈົ້າໜ້າທີ່​ຮັກສາ​ໄດ້​ເອົາ​ໂຢເຊັບ ມາ​ເປັນ​ຜູ້ຮັບໃຊ້​ຂ້າຣາຊການ​ສອງ​ຄົນ​ນີ້. ຄືນ​ໜຶ່ງ ໃນ​ຫ້ອງ​ຂັງ​ນັ້ນ ຂ້າຣາຊການ​ສອງ​ຄົນ​ຕ່າງ​ກໍ​ຝັນ; ຄວາມຝັນ​ຂອງ​ແຕ່ລະຄົນ​ມີ​ຄວາມໝາຍ​ແຕກຕ່າງ​ກັນ. ຕອນເຊົ້າ​ມາ ເມື່ອ​ໂຢເຊັບ​ເຂົ້າ​ໄປ​ໃນ​ຫ້ອງ​ຂອງ​ພວກເຂົາ ລາວ​ກໍ​ສັງເກດ​ເຫັນ​ວ່າ​ເຂົາ​ທັງສອງ​ກະວົນ​ກະວາຍ​ໃຈ. ລາວ​ຈຶ່ງ​ຖາມ​ວ່າ, “ມື້ນີ້ ພວກທ່ານ​ມີ​ຄວາມ​ທຸກໃຈ​ເລື່ອງ​ຫຍັງ​ນໍ?” ພວກເຂົາ​ຕອບ​ວ່າ, “ພວກຂ້ອຍ​ຝັນ ແລະ​ບໍ່ມີ​ຜູ້ໃດ​ໃນ​ທີ່​ນີ້​ສາມາດ​ແກ້​ຄວາມຝັນ​ໄດ້.” ໂຢເຊັບ​ເວົ້າ​ຂຶ້ນ​ວ່າ, “ແມ່ນ​ພຣະເຈົ້າ​ເທົ່ານັ້ນ​ທີ່​ຈະ​ແກ້​ໄດ້ ພວກທ່ານ​ລອງ​ເລົ່າ​ຄວາມຝັນ​ສູ່​ຂ້ານ້ອຍ​ຟັງ​ເບິ່ງດູ.” ເມື່ອ​ໄດ້ຍິນ​ດັ່ງນັ້ນ ຫົວໜ້າ​ພະນັກງານ​ເຮັດ​ເຫຼົ້າ​ອະງຸ່ນ ຈຶ່ງ​ເລົ່າ​ຄວາມຝັນ​ຂອງຕົນ​ສູ່​ໂຢເຊັບ​ຟັງ​ວ່າ, “ຂ້ອຍ​ໄດ້​ຝັນ​ເຫັນ​ເຄືອ​ອະງຸ່ນ​ເຄືອ​ໜຶ່ງ​ຢູ່​ຕໍ່ໜ້າ​ຂ້ອຍ ແລະ​ມີ​ສາມ​ງ່າ. ໃນທັນໃດ ງ່າ​ເຫຼົ່ານັ້ນ​ກໍ​ປົ່ງ​ໃບ, ດອກ​ກໍ​ບານ ແລະ​ມີ​ພົ້ວ​ໝາກອະ​ງຸ່ນ​ສຸກ​ຢູ່​ເຕັມ​ງ່າ. ຂ້ອຍ​ຍົກ​ຈອກ​ຂອງ​ກະສັດ​ຂຶ້ນ ແລະ​ປິດ​ໝາກອະ​ງຸ່ນ​ບີບ​ລົງ​ໃສ່​ຈອກ​ນັ້ນ​ແລະ​ຍື່ນໃຫ້​ເພິ່ນ.” ໂຢເຊັບ​ເວົ້າ​ວ່າ, “ຄວາມຝັນ​ຂອງທ່ານ​ມີ​ຄວາມໝາຍ​ດັ່ງນີ້: ສາມ​ງ່າ​ນັ້ນ​ໝາຍເຖິງ​ສາມ​ວັນ. ພາຍ​ໃນ​ສາມ​ວັນ ກະສັດ​ຈະ​ປົດປ່ອຍ​ທ່ານ​ອອກ​ຈາກ​ຄຸກ ທັງ​ຍົກໂທດ​ໃຫ້​ແລະ​ມອບ​ຕຳແໜ່ງ​ເດີມ​ໃຫ້. ທ່ານ​ຈະ​ຍໍ​ຈອກ​ເຫຼົ້າ​ອະງຸ່ນ​ໃຫ້​ເພິ່ນ​ດັ່ງ​ທີ່​ເຄີຍ​ໄດ້​ເຮັດ​ມາ. ແຕ່​ຢ່າ​ລືມ​ຂ້ານ້ອຍ​ເດີ ເມື່ອ​ທຸກສິ່ງ​ຮຽບຮ້ອຍ​ໄປ​ດ້ວຍ​ດີ​ແລ້ວ. ຂໍ​ທ່ານ​ກະລຸນາ​ບອກ​ເລື່ອງ​ຂອງ​ຂ້ານ້ອຍ​ໃຫ້​ກະສັດ​ຮັບຮູ້​ນຳ​ແດ່ ແລະ​ຊ່ວຍ​ຂ້ານ້ອຍ​ໃຫ້​ອອກ​ຈາກ​ຄຸກ​ນີ້​ດ້ວຍ. ຕາມ​ທີ່​ຈິງ​ແລ້ວ ຂ້ານ້ອຍ​ຖືກ​ຂາຍ​ມາ​ແຕ່​ດິນແດນ​ຂອງ​ຊາວ​ເຮັບເຣີ; ແມ່ນແຕ່​ທີ່​ປະເທດ​ເອຢິບ​ນີ້ ຂ້ານ້ອຍ​ກໍ​ບໍ່ໄດ້​ເຮັດ​ຜິດ​ຫຍັງ​ເລີຍ ພໍ​ທີ່​ຈະ​ຖືກ​ຄຸກ​ຍ້ອນ.” ເມື່ອ​ຫົວໜ້າ​ພະນັກງານ​ເຮັດ​ເຂົ້າຈີ່​ເຫັນ​ວ່າ ຄວາມຝັນ​ຂອງ​ພະນັກງານ​ເຫຼົ້າ​ອະງຸ່ນ​ເປັນ​ເລື່ອງ​ດີ; ລາວ​ຈຶ່ງ​ເວົ້າ​ກັບ​ໂຢເຊັບ​ວ່າ, “ຂ້ອຍ​ກໍ​ຝັນ​ຄື​ກັນ ຂ້ອຍ​ຝັນ​ວ່າ​ໄດ້​ຖື​ຖາດ​ເຂົ້າຈີ່​ສາມ​ຖາດ​ເທິງ​ຫົວ​ຂ້ອຍ. ໃນ​ຖາດ​ໜ່ວຍ​ເທິງ​ມີ​ເຂົ້າຈີ່​ທຸກ​ຊະນິດ​ສຳລັບ​ກະສັດ ແຕ່​ນົກ​ໄດ້​ມາ​ກິນ​ເຂົ້າຈີ່​ນັ້ນ.” ໂຢເຊັບ​ຕອບ​ວ່າ, “ຄວາມຝັນ​ນັ້ນ​ມີ​ຄວາມໝາຍ​ດັ່ງນີ້: ຖາດ​ສາມ​ໃບ​ນັ້ນ​ໝາຍເຖິງ​ສາມ​ວັນ. ພາຍ​ໃນ​ສາມ​ວັນ ກະສັດ​ຟາໂຣ​ຈະ​ເອົາ​ທ່ານ​ອອກ​ມາ​ຈາກ​ຄຸກ ແລະ​ສັ່ງ​ຕັດ​ຄໍ​ທ່ານ​ເສຍ! ແລ້ວ​ເຂົາ​ກໍ​ຈະ​ເອົາ​ສົບ​ຂອງທ່ານ​ໄປ​ແຂວນ​ໄວ້​ທີ່​ຕົ້ນໄມ້ ແລະ​ຝູງນົກ​ຈະ​ມາ​ເຈາະ​ກິນ​ເນື້ອ​ຂອງທ່ານ.” ຫລັງຈາກ​ນັ້ນ​ສາມ​ວັນ ກໍ​ເປັນ​ວັນ​ເກີດ​ຂອງ​ກະສັດ ເພິ່ນ​ໄດ້​ຈັດ​ງານກິນລ້ຽງ​ຂຶ້ນ​ສຳລັບ​ຂ້າຣາຊການ​ທັງຫລາຍ​ຂອງ​ເພິ່ນ; ກະສັດ​ໄດ້​ປ່ອຍ​ພະນັກງານ​ເຮັດ​ເຫຼົ້າ​ອະງຸ່ນ ແລະ​ພະນັກງານ​ເຮັດ​ເຂົ້າຈີ່​ອອກ​ຈາກ​ຄຸກ ແລະ​ໃຫ້​ພວກເຂົາ​ມາ​ຢືນ​ຢູ່​ຕໍ່ໜ້າ​ຂ້າຣາຊການ​ທັງຫລາຍ. ເພິ່ນ​ມອບ​ຕຳແໜ່ງ​ເດີມ​ຄືນ​ໃຫ້​ພະນັກງານ​ເຮັດ​ເຫຼົ້າ​ອະງຸ່ນ ແຕ່​ສັ່ງ​ປະຫານ​ຫົວໜ້າ​ພະນັກງານ​ເຮັດ​ເຂົ້າຈີ່. ທຸກສິ່ງ​ເປັນ​ໄປ​ຕາມ​ທີ່​ໂຢເຊັບ​ໄດ້​ກ່າວ​ໄວ້.