ໂຢຮັນ 8
8
ຍິງຄົນໜຶ່ງຖືກຈັບໃນຖານຫລິ້ນຊູ້
1ສ່ວນພຣະເຢຊູເຈົ້າໄດ້ສະເດັດໄປທີ່ພູເຂົາໝາກກອກເທດ. 2ພໍຮຸ່ງເຊົ້າມາ ພຣະອົງກໍເຂົ້າໄປໃນພຣະວິຫານອີກ ປະຊາຊົນທັງໝົດໄດ້ເຕົ້າໂຮມອ້ອມພຣະອົງ ແລະພຣະອົງກໍນັ່ງລົງຕັ້ງຕົ້ນສັ່ງສອນ. 3ພວກທຳມະຈານແລະພວກຟາຣີຊາຍ ໄດ້ພາຍິງຄົນໜຶ່ງມາຫາພຣະອົງ ຍິງຄົນນີ້ຖືກຈັບໃນຖານຫລິ້ນຊູ້ ພວກເຂົາໃຫ້ຍິງຄົນນີ້ຢືນຢູ່ຕໍ່ໜ້າປະຊາຊົນທັງໝົດ. 4ພວກເຂົາກ່າວຕໍ່ພຣະເຢຊູເຈົ້າວ່າ, “ອາຈານເອີຍ ຍິງຄົນນີ້ຖືກຈັບໃນເວລາກຳລັງຫລິ້ນຊູ້. 5ຕາມກົດບັນຍັດຂອງພວກເຮົາແລ້ວ ໂມເຊໄດ້ສັ່ງວ່າ, ‘ຍິງເຊັ່ນນີ້ຕ້ອງຖືກແກວ່ງກ້ອນຫີນໃສ່ໃຫ້ຕາຍ,’ ສ່ວນທ່ານເດຈະວ່າຢ່າງໃດ?” 6ພວກເຂົາເວົ້າຢ່າງນີ້ເພື່ອຫາເຫດຟ້ອງພຣະເຢຊູເຈົ້າ, ແຕ່ພຣະອົງກົ້ມລົງໃຊ້ນິ້ວມືຂຽນລົງທີ່ພື້ນດິນ.
7ເມື່ອພວກເຂົາຂຸ້ນຂ້ຽວຖາມຢູ່ນັ້ນ ພຣະອົງຈຶ່ງເງີຍໜ້າຂຶ້ນ ແລະກ່າວຕໍ່ພວກເຂົາວ່າ, “ມີຄົນໃດແດ່ໃນພວກເຈົ້າ ທີ່ບໍ່ໄດ້ເຮັດບາບ ໃຫ້ຜູ້ນັ້ນເປັນຜູ້ທຳອິດແກວ່ງກ້ອນຫີນໃສ່ຍິງຄົນນີ້.” 8ແລ້ວພຣະອົງກໍກົ້ມລົງໃຊ້ນິ້ວມືຂຽນລົງທີ່ພື້ນດິນຕໍ່ໄປ. 9ເມື່ອໄດ້ຍິນດັ່ງນັ້ນແລ້ວ ພວກເຂົາຈຶ່ງໜີອອກໄປເທື່ອລະຄົນຈົນໝົດ ເລີ່ມແຕ່ຄົນແກ່ໄປຈົນເຖິງຜູ້ສຸດທ້າຍ ຍັງເຫລືອແຕ່ພຣະເຢຊູເຈົ້າ ແລະແມ່ຍິງທີ່ຢືນຢູ່ທີ່ນັ້ນ. 10ເມື່ອພຣະອົງເງີຍໜ້າຂຶ້ນ ຈຶ່ງຖາມນາງວ່າ, “ນາງເອີຍ ພວກເຂົາໄປໃສໝົດ ບໍ່ມີຜູ້ໃດລົງໂທດເຈົ້າບໍ?”
11ນາງຕອບວ່າ, “ພຣະອົງເຈົ້າເອີຍ ບໍ່ມີຜູ້ໃດແລ້ວ.”
ພຣະເຢຊູເຈົ້າເວົ້າວ່າ, “ດີແລ້ວ ເຮົາກໍບໍ່ລົງໂທດເຈົ້າເໝືອນກັນ ຈົ່ງໄປສາ ຕໍ່ໄປຢ່າເຮັດບາບອີກ.”]
ພຣະເຢຊູເຈົ້າເປັນຄວາມສະຫວ່າງຂອງໂລກ
12ພຣະເຢຊູເຈົ້າໄດ້ກ່າວຕໍ່ພວກຟາຣີຊາຍອີກວ່າ, “ເຮົານີ້ແຫຼະ ເປັນຄວາມສະຫວ່າງຂອງໂລກ ຜູ້ທີ່ຕາມເຮົາມາຈະມີຄວາມສະຫວ່າງແຫ່ງຊີວິດ ແລະຈະບໍ່ເດີນຢູ່ໃນຄວາມມືດຈັກເທື່ອ.”
13ແລ້ວພວກຟາຣີຊາຍກໍກ່າວຕໍ່ພຣະອົງວ່າ, “ເຈົ້າເປັນພະຍານໃຫ້ຕົນເອງ ສິ່ງທີ່ເຈົ້າເວົ້ານັ້ນ ພິສູດຫຍັງບໍ່ໄດ້.”
14ພຣະເຢຊູເຈົ້າໄດ້ຕອບພວກເຂົາວ່າ, “ເຖິງແມ່ນເຮົາເປັນພະຍານໃຫ້ຕົນເອງ ຄຳພະຍານຂອງເຮົາກໍເປັນຄວາມຈິງ ເພາະເຮົາຮູ້ວ່າເຮົາມາແຕ່ໃສ ແລະຈະໄປໃສ ສ່ວນພວກເຈົ້າບໍ່ຮູ້ວ່າ ເຮົາໄດ້ມາແຕ່ໃສ ແລະຈະໄປໃສ. 15ພວກເຈົ້າຕັດສິນຕາມທາງຂອງມະນຸດ, ເຮົາບໍ່ຕັດສິນຜູ້ໃດ. 16ແຕ່ເຖິງແມ່ນເຮົາຕັດສິນ ການຕັດສິນຂອງເຮົາກໍຖືກຕ້ອງ ເພາະບໍ່ແມ່ນເຮົາຜູ້ດຽວທີ່ຕັດສິນ ແຕ່ເຮົາຕັດສິນຮ່ວມກັບພຣະບິດາເຈົ້າຜູ້ທີ່ໄດ້ໃຊ້ເຮົາມາ. 17ໃນກົດບັນຍັດຂອງພວກເຈົ້າມີຄຳຂຽນໄວ້ວ່າ ເມື່ອພະຍານສອງປາກໃຫ້ການກົງກັນ ສິ່ງທີ່ເຂົາເວົ້ານັ້ນກໍເປັນຄວາມຈິງ. 18ຝ່າຍເຮົາເປັນພະຍານໃຫ້ຕົນເອງ ແລະພຣະບິດາເຈົ້າຜູ້ທີ່ໄດ້ໃຊ້ເຮົາມາ ກໍເປັນພະຍານໃຫ້ເຮົາເໝືອນກັນ.”
19ພວກເຂົາຖາມພຣະອົງວ່າ, “ພຣະບິດາເຈົ້າຂອງທ່ານຢູ່ໃສ?”
ພຣະເຢຊູເຈົ້າໄດ້ຕອບວ່າ, “ພວກເຈົ້າບໍ່ຮູ້ຈັກເຮົາແລະພຣະບິດາເຈົ້າຂອງເຮົາ ຖ້າພວກເຈົ້າຮູ້ຈັກເຮົາ ພວກເຈົ້າກໍຄົງຮູ້ຈັກພຣະບິດາເຈົ້າຂອງເຮົາເໝືອນກັນ.”
20ພຣະເຢຊູເຈົ້າໄດ້ກ່າວຄຳເຫຼົ່ານີ້ ໃນຂະນະທີ່ພຣະອົງສັ່ງສອນໃນພຣະວິຫານ ຢູ່ຫ້ອງບ່ອນທີ່ວາງຫີບຖວາຍຊັບ, ແຕ່ບໍ່ມີຜູ້ໃດຈັບພຣະອົງ ເພາະບໍ່ເຖິງກຳນົດເວລາຂອງພຣະອົງເທື່ອ.
ບ່ອນທີ່ເຮົາຈະໄປນັ້ນພວກເຈົ້າໄປບໍ່ໄດ້
21ພຣະເຢຊູເຈົ້າໄດ້ກ່າວຕໍ່ພວກເຂົາວ່າ, “ເຮົາຈະຈາກໄປ ເຈົ້າທັງຫລາຍຈະຊອກຫາເຮົາ, ແຕ່ພວກເຈົ້າຈະຕາຍໃນບາບກຳຂອງພວກເຈົ້າ ພວກເຈົ້າໄປບ່ອນທີ່ເຮົາຈະໄປນັ້ນບໍ່ໄດ້.”
22ດັ່ງນັ້ນ ພວກຢິວຈຶ່ງເວົ້າວ່າ, “ລາວບອກວ່າ ພວກເຮົາຈະໄປບ່ອນທີ່ລາວຈະໄປນັ້ນບໍ່ໄດ້ ຄຳເວົ້ານີ້ໝາຍຄວາມວ່າ ລາວຈະຂ້າຕົວຕາຍຊັ້ນບໍ?”
23ພຣະເຢຊູເຈົ້າໄດ້ກ່າວຕໍ່ພວກເຂົາວ່າ, “ພວກເຈົ້າເປັນຝ່າຍເບື້ອງລຸ່ມຄືໂລກນີ້ ແຕ່ເຮົາມາຈາກເບື້ອງເທິງ, ພວກເຈົ້າເປັນຝ່າຍໂລກນີ້ ແຕ່ເຮົາບໍ່ເປັນຝ່າຍໂລກນີ້. 24ດ້ວຍເຫດນີ້ ເຮົາຈຶ່ງບອກເຈົ້າທັງຫລາຍວ່າ, ພວກເຈົ້າຈະຕາຍໃນບາບກຳຂອງພວກເຈົ້າ ເພາະວ່າຖ້າພວກເຈົ້າບໍ່ໄດ້ເຊື່ອວ່າ ‘ເຮົາເປັນຜູ້ທີ່ເຮົາເປັນ’ ພວກເຈົ້າຈະຕາຍໃນບາບກຳຂອງຕົນ.”
25ພວກເຂົາຖາມພຣະອົງວ່າ, “ທ່ານແມ່ນຜູ້ໃດ?”
ພຣະເຢຊູເຈົ້າໄດ້ຕອບພວກເຂົາວ່າ, “ເຮົາເປັນຜູ້ທີ່ເຮົາໄດ້ບອກພວກເຈົ້າແລ້ວຕັ້ງແຕ່ຕົ້ນນັ້ນແຫຼະ. 26ເຮົາມີຫລາຍຂໍ້ທີ່ຈະເວົ້າກ່ຽວກັບພວກເຈົ້າ ແລະຕັດສິນພວກເຈົ້າ, ແຕ່ຜູ້ທີ່ໄດ້ໃຊ້ເຮົາມານັ້ນກໍສັດຈິງ ເຮົາບອກໃຫ້ໂລກຮູ້ສິ່ງທີ່ເຮົາໄດ້ຍິນຈາກພຣະອົງເທົ່ານັ້ນ.”
27ພວກເຂົາບໍ່ໄດ້ເຂົ້າໃຈວ່າ ພຣະເຢຊູເຈົ້າກຳລັງກ່າວແກ່ພວກເຂົາເຖິງພຣະບິດາເຈົ້າ. 28ດັ່ງນັ້ນ ພຣະເຢຊູເຈົ້າຈຶ່ງໄດ້ກ່າວຕໍ່ພວກເຂົາວ່າ, “ເມື່ອໃດເຈົ້າທັງຫລາຍຍົກບຸດມະນຸດຂຶ້ນແລ້ວ ເມື່ອນັ້ນແຫຼະ ພວກເຈົ້າຈຶ່ງຈະຮູ້ວ່າ, ‘ເຮົາເປັນຜູ້ທີ່ເຮົາເປັນ’ ແລ້ວພວກເຈົ້າກໍຈະຮູ້ວ່າ ເຮົາບໍ່ໄດ້ເຮັດສິ່ງໃດຕາມໃຈຂອງເຮົາເອງ, ແຕ່ເຮົາກ່າວຕາມທີ່ພຣະບິດາເຈົ້າໄດ້ສອນໃຫ້ເຮົາກ່າວເທົ່ານັ້ນ. 29ພຣະອົງຜູ້ທີ່ໄດ້ໃຊ້ເຮົາມາກໍສະຖິດຢູ່ກັບເຮົາ, ພຣະອົງບໍ່ເຄີຍປະປ່ອຍເຮົາໃຫ້ຢູ່ຜູ້ດຽວ ເພາະເຮົາເຮັດຕາມຄວາມປະສົງຂອງພຣະອົງຢູ່ສະເໝີ.”
30ມີຫລາຍຄົນທີ່ໄດ້ຍິນພຣະເຢຊູເຈົ້າກ່າວຄຳເຫຼົ່ານີ້ ກໍເຊື່ອໃນພຣະອົງ.
ຄວາມຈິງເຮັດໃຫ້ເປັນອິດສະຫລະ
31ດັ່ງນັ້ນ ພຣະເຢຊູເຈົ້າຈຶ່ງກ່າວຕໍ່ພວກຢິວທີ່ເຊື່ອໃນພຣະອົງວ່າ, “ຖ້າພວກເຈົ້າຕັ້ງໝັ້ນຢູ່ໃນຖ້ອຍຄຳຂອງເຮົາ ພວກເຈົ້າກໍເປັນສາວົກແທ້ຂອງເຮົາ, 32ແລ້ວພວກເຈົ້າຈະຮູ້ຈັກຄວາມຈິງ ແລະຄວາມຈິງນັ້ນຈະເຮັດໃຫ້ພວກເຈົ້າເປັນອິດສະຫລະ.” 33ພວກເຂົາຕອບພຣະອົງວ່າ, “ພວກເຮົາເປັນເຊື້ອສາຍຂອງອັບຣາຮາມ ແລະບໍ່ໄດ້ເປັນທາດຂອງຜູ້ໃດຈັກເທື່ອ ເປັນຫຍັງທ່ານຈຶ່ງເວົ້າວ່າ, ‘ພວກເຈົ້າຈະເປັນອິດສະຫລະ?”’
34ພຣະເຢຊູເຈົ້າໄດ້ຕອບພວກເຂົາວ່າ, “ເຮົາບອກເຈົ້າທັງຫລາຍຕາມຄວາມຈິງວ່າ ທຸກຄົນທີ່ເຮັດການບາບກໍເປັນທາດຂອງບາບກຳນັ້ນ. 35ຂ້ອຍໃຊ້ບໍ່ຫ່ອນຢູ່ໃນເຮືອນຕະຫລອດໄປ ແຕ່ລູກຊາຍກໍຢູ່ໃນເຮືອນຕະຫລອດໄປ. 36ເຫດສະນັ້ນ ຖ້າບຸດມະນຸດຈະເຮັດໃຫ້ພວກເຈົ້າເປັນອິດສະຫລະ ພວກເຈົ້າກໍຈະເປັນອິດສະຫລະຢ່າງແທ້ຈິງ. 37ເຮົາຮູ້ຢູ່ວ່າ ພວກເຈົ້າເປັນເຊື້ອສາຍຂອງອັບຣາຮາມ, ແຕ່ພວກເຈົ້າຊອກຫາທາງຈະຂ້າເຮົາ ເພາະຄຳສັ່ງສອນຂອງເຮົາບໍ່ເຂົ້າສູ່ໃຈຂອງພວກເຈົ້າ. 38ເຮົາເວົ້າໃນສິ່ງທີ່ພຣະບິດາເຈົ້າຊົງສຳແດງໃຫ້ເຮົາເຫັນ, ແຕ່ຝ່າຍພວກເຈົ້າປະຕິບັດຕາມສິ່ງທີ່ພວກເຈົ້າໄດ້ຍິນຈາກພໍ່ຂອງພວກເຈົ້າ.”
39ພວກເຂົາຕອບພຣະອົງວ່າ, “ພໍ່ຂອງພວກເຮົາແມ່ນອັບຣາຮາມ.”
ພຣະເຢຊູເຈົ້າໄດ້ຕອບຄືນວ່າ, “ຖ້າເຈົ້າທັງຫລາຍເປັນລູກຫລານຂອງອັບຣາຮາມເຈົ້າກໍຈະເຮັດ ໃນສິ່ງທີ່ອັບຣາຮາມໄດ້ເຮັດ. 40ເຮົາພຽງແຕ່ບອກພວກເຈົ້າເຖິງຄວາມຈິງ ທີ່ເຮົາໄດ້ຍິນຈາກພຣະເຈົ້າ, ພວກເຈົ້າກໍຫາທາງທີ່ຈະຂ້າເຮົາ, ການຢ່າງນີ້ອັບຣາຮາມບໍ່ໄດ້ເຮັດ. 41ພວກເຈົ້າເຮັດໃນສິ່ງທີ່ພໍ່ຂອງພວກເຈົ້າໄດ້ເຮັດ.”
ພວກເຂົາຕອບວ່າ, “ເຮົາມີພຣະບິດາພຽງອົງດຽວຄືພຣະເຈົ້າ ແລະພວກເຮົາເປັນລູກແທ້ໆຂອງພຣະອົງ.”
42ພຣະເຢຊູເຈົ້າໄດ້ກ່າວຕໍ່ພວກເຂົາວ່າ, “ຖ້າພຣະເຈົ້າເປັນພຣະບິດາຂອງພວກເຈົ້າແທ້ແລ້ວ ພວກເຈົ້າກໍຈະໄດ້ຮັກເຮົາ ເພາະເຮົາມາຈາກພຣະເຈົ້າ ແລະເຮົາຢູ່ທີ່ນີ້. ເຮົາບໍ່ໄດ້ມາຕາມລຳພັງໃຈຂອງເຮົາເອງ ແຕ່ພຣະອົງຊົງໃຊ້ເຮົາມາ. 43ດ້ວຍເຫດໃດພວກເຈົ້າຈຶ່ງບໍ່ເຂົ້າໃຈໃນຖ້ອຍຄຳຂອງເຮົາ ເພາະພວກເຈົ້າທົນຟັງຖ້ອຍຄຳຂອງເຮົາບໍ່ໄດ້. 44ເຈົ້າທັງຫລາຍມາຈາກພໍ່ຂອງພວກເຈົ້າຄືມານຮ້າຍ, ພວກເຈົ້າຢາກປະຕິບັດຕາມຄວາມປາຖະໜາຂອງພໍ່ເຈົ້າ ຄືຕັ້ງແຕ່ຕົ້ນເດີມມາມັນເປັນຜູ້ຂ້າຄົນ ແລະບໍ່ເຄີຍຢູ່ຝ່າຍຄວາມຈິງ ເພາະໃນຕົວຂອງມັນບໍ່ມີຄວາມຈິງ ເມື່ອມັນເວົ້າຕົວະມັນກໍເວົ້າຕາມສັນດານຂອງມັນ ເພາະມັນເປັນຜູ້ຕົວະ ແລະເປັນພໍ່ຂອງການຕົວະ. 45ແຕ່ເຈົ້າທັງຫລາຍບໍ່ໄດ້ເຊື່ອເຮົາ ເພາະຝ່າຍເຮົາກ່າວຄວາມຈິງ. 46ມີຜູ້ໃດແດ່ໃນພວກເຈົ້າທີ່ພິສູດໄດ້ວ່າ ເຮົາມີຄວາມຜິດ? ຖ້າເຮົາເວົ້າຄວາມຈິງເປັນຫຍັງພວກເຈົ້າຈຶ່ງບໍ່ເຊື່ອເຮົາ? 47ຜູ້ທີ່ມາຈາກພຣະເຈົ້າຍ່ອມຟັງຖ້ອຍຄຳຂອງພຣະເຈົ້າ, ແຕ່ເຈົ້າທັງຫລາຍບໍ່ໄດ້ມາຈາກພຣະເຈົ້າ ເຫດສະນັ້ນ ພວກເຈົ້າຈຶ່ງບໍ່ຟັງ.”
ພຣະເຢຊູເຈົ້າຊົງເປັນຢູ່ກ່ອນອັບຣາຮາມ
48ພວກຢິວໄດ້ຕອບພຣະອົງວ່າ, “ພວກເຮົາເວົ້າຖືກຕ້ອງແລ້ວ ທີ່ວ່າເຈົ້າເປັນຊາວຊາມາເຣຍ ແລະມີຜີມານຮ້າຍສິງຢູ່.”
49ພຣະເຢຊູເຈົ້າໄດ້ຕອບວ່າ, “ເຮົາບໍ່ມີຜີມານຮ້າຍສິງດອກ ເພາະເຮົາຖວາຍກຽດແກ່ພຣະບິດາເຈົ້າຂອງເຮົາ, ແຕ່ພວກເຈົ້າເວົ້າໝິ່ນປະໝາດເຮົາ. 50ເຮົາບໍ່ໄດ້ຊອກຫາກຽດໃສ່ຕົນເອງ, ແຕ່ມີຜູ້ໜຶ່ງທີ່ຫາໃຫ້ ແລະທັງເປັນຜູ້ຕັດສິນ. 51ເຮົາບອກພວກເຈົ້າຕາມຄວາມຈິງວ່າ, ຜູ້ທີ່ປະຕິບັດຕາມຄຳສັ່ງສອນຂອງເຮົານັ້ນ ຈະບໍ່ພົບຄວາມຕາຍຈັກເທື່ອ.”
52ພວກຢິວເວົ້າຕໍ່ພຣະອົງວ່າ, “ດຽວນີ້ພວກເຮົາຮູ້ຄັກແລ້ວວ່າ ຜີມານຮ້າຍສິງເຈົ້າຢູ່ ອັບຣາຮາມຕາຍໄປແລ້ວ ແລະພວກຜູ້ທຳນວາຍກໍຕາຍໄປແລ້ວເໝືອນກັນ ແຕ່ເຈົ້າຊໍ້າພັດເວົ້າວ່າ, ‘ຜູ້ທີ່ປະຕິບັດຕາມຄຳສັ່ງສອນຂອງເຈົ້າຈະບໍ່ພົບຄວາມຕາຍຈັກເທື່ອ.’ 53ອັບຣາຮາມພໍ່ຂອງພວກເຮົາຕາຍໄປແລ້ວ ເຈົ້າບໍ່ແມ່ນອ້າງຕົວຍິ່ງໃຫຍ່ກວ່າອັບຣາຮາມບໍ? ພວກຜູ້ທຳນວາຍກໍຕາຍໄປແລ້ວເໝືອນກັນ, ເຈົ້າຄິດວ່າເຈົ້າເປັນຜູ້ໃດ?”
54ພຣະເຢຊູເຈົ້າໄດ້ຕອບວ່າ, “ຖ້າເຮົາໃຫ້ກຽດແກ່ຕົນເອງ ກຽດນັ້ນກໍບໍ່ມີຄວາມໝາຍຫຍັງ ຜູ້ທີ່ໃຫ້ກຽດແກ່ເຮົາ ແມ່ນພຣະບິດາເຈົ້າຂອງເຮົາ ຄືຜູ້ທີ່ພວກເຈົ້າບອກວ່າ, ພຣະອົງເປັນພຣະເຈົ້າຂອງພວກເຈົ້ານັ້ນແຫຼະ. 55ພວກເຈົ້າຍັງບໍ່ເຄີຍຮູ້ຈັກພຣະອົງ ແຕ່ເຮົາຮູ້ຈັກພຣະອົງ ຖ້າເຮົາເວົ້າວ່າ ເຮົາບໍ່ຮູ້ຈັກພຣະອົງ ເຮົາກໍເປັນຄົນຂີ້ຕົວະເໝືອນກັນກັບພວກເຈົ້າ, ແຕ່ເຮົາຮູ້ຈັກພຣະອົງ ແລະເຊື່ອຟັງຖ້ອຍຄຳຂອງພຣະອົງ. 56ອັບຣາຮາມພໍ່ຂອງພວກເຈົ້າມີຄວາມຊົມຊື່ນຍິນດີ ທີ່ໄດ້ເຫັນການມາສຳແດງຂອງເຮົາ, ເພິ່ນໄດ້ເຫັນ ແລະມີຄວາມເບີກບານໃຈ.”
57ພວກຢິວໄດ້ກ່າວຕໍ່ພຣະອົງວ່າ, “ອາຍຸຂອງເຈົ້າຍັງບໍ່ທັນຮອດຫ້າສິບປີ ເຈົ້າໄດ້ເຫັນອັບຣາຮາມແລ້ວຊັ້ນບໍ?”
58ພຣະເຢຊູເຈົ້າໄດ້ກ່າວຕໍ່ພວກເຂົາວ່າ, “ເຮົາບອກພວກເຈົ້າຕາມຄວາມຈິງວ່າ ກ່ອນອັບຣາຮາມເກີດ ເຮົານີ້ກໍເປັນຢູ່ແລ້ວ.”
59ດັ່ງນັ້ນ ພວກເຂົາຈຶ່ງຈັບເອົາກ້ອນຫີນແກວ່ງໃສ່ພຣະອົງ, ແຕ່ພຣະເຢຊູເຈົ້າຫລີກໜີ ແລະສະເດັດອອກໄປຈາກພຣະວິຫານ.
Currently Selected:
ໂຢຮັນ 8: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
