ໂຢຮັນ 16

1“ເຮົາໄດ້ບອກເຊັ່ນນີ້ ເພື່ອວ່າພວກເຈົ້າຈະບໍ່ໄດ້ເກີດຄວາມສະດຸດໃຈ. 2ພວກເຈົ້າຈະຖືກໄລ່ອອກຈາກທຳມະສາລາ ແລະເວລາໜຶ່ງຈະມາເຖິງ ເມື່ອຜູ້ທີ່ຂ້າພວກເຈົ້າຈະຄິດວ່າ ການກະທຳຂອງຕົນຢ່າງນັ້ນ ເປັນການຖວາຍກຽດແກ່ພຣະເຈົ້າ. 3ພວກເຂົາຈະເຮັດສິ່ງເຫຼົ່ານີ້ ເພາະພວກເຂົາບໍ່ຮູ້ຈັກພຣະບິດາເຈົ້າຂອງເຮົາແລະບໍ່ຮູ້ຈັກເຮົາດ້ວຍ. 4ແຕ່ເຮົາໄດ້ບອກສິ່ງເຫຼົ່ານີ້ແກ່ພວກເຈົ້າ ເພື່ອວ່າເມື່ອເວລານັ້ນມາເຖິງ ພວກເຂົາຈະເຮັດສິ່ງເຫຼົ່ານີ້ ພວກເຈົ້າຈະສຳນຶກໄດ້ວ່າ ເຮົາໄດ້ບອກພວກເຈົ້າໄວ້ແລ້ວ.”

ພາລະກິດຂອງພຣະວິນຍານບໍຣິສຸດເຈົ້າ

“ເຮົາບໍ່ໄດ້ບອກສິ່ງເຫຼົ່ານີ້ແກ່ພວກເຈົ້າຕັ້ງແຕ່ຕົ້ນ ເພາະວ່າເຮົາຍັງຢູ່ກັບພວກເຈົ້າ. 5ແຕ່ບັດນີ້ ເຮົາໃກ້ຈະໄປຫາພຣະອົງ ຜູ້ທີ່ໃຊ້ເຮົາມາ ແຕ່ບໍ່ມີຜູ້ໃດໃນພວກເຈົ້າຖາມເຮົາວ່າ ເຮົາກຳລັງຈະໄປໃສ? 6ແລະບັດນີ້ ຈິດໃຈຂອງພວກເຈົ້າກໍເຕັມໄປດ້ວຍຄວາມທຸກໂສກ ເພາະເຮົາໄດ້ບອກເລື່ອງນີ້ແກ່ພວກເຈົ້າ. 7ເຖິງຢ່າງໃດກໍຕາມ ເຮົາບອກພວກເຈົ້າຕາມຄວາມຈິງວ່າ, ການທີ່ເຮົາຈາກໄປນັ້ນ ກໍເປັນປະໂຫຍດແກ່ພວກເຈົ້າ ເພາະຖ້າເຮົາບໍ່ຈາກໄປ ອົງພຣະຜູ້ຊ່ວຍກໍຈະບໍ່ມາຫາພວກເຈົ້າ, ແຕ່ຖ້າເຮົາຈາກໄປແລ້ວ ເຮົາຈະໃຊ້ພຣະອົງມາຫາພວກເຈົ້າ. 8ເມື່ອພຣະອົງສະເດັດມາແລ້ວ ພຣະອົງນັ້ນແຫລະ ຈະຊົງບັນດົນໃຫ້ໂລກຮູ້ແຈ້ງໃນເລື່ອງຄວາມຜິດບາບ, ຄວາມຊອບທຳ ແລະການພິພາກສາ. 9ໃນເລື່ອງຄວາມຜິດບາບນັ້ນ ຄືເພາະພວກເຂົາບໍ່ວາງໃຈເຊື່ອໃນເຮົາ, 10ໃນເລື່ອງຄວາມຊອບທຳນັ້ນ ຄືເພາະເຮົາໄປຫາພຣະບິດາເຈົ້າ ແລະພວກເຈົ້າຈະບໍ່ເຫັນເຮົາອີກ. 11ສ່ວນເລື່ອງການພິພາກສານັ້ນ ຄືເພາະຜູ້ປົກຄອງໂລກນີ້ໄດ້ຖືກພິພາກສາແລ້ວ.”

12“ເຮົາຍັງມີຫລາຍເລື່ອງທີ່ຈະບອກພວກເຈົ້າ ແຕ່ໃນເວລານີ້ພວກເຈົ້າບໍ່ສາມາດຈະທົນໄດ້. 13ແຕ່ເມື່ອພຣະອົງນັ້ນ ຄືພຣະວິນຍານແຫ່ງຄວາມຈິງຈະສະເດັດລົງມາ ແລ້ວພຣະອົງຈະນຳເຈົ້າທັງຫລາຍໄປສູ່ຄວາມຈິງທັງໝົດ ເພາະພຣະອົງຈະບໍ່ກ່າວແຕ່ລຳພັງຂອງພຣະອົງເອງ ແຕ່ພຣະອົງໄດ້ຍິນສິ່ງໃດກໍຈະກ່າວສິ່ງນັ້ນ ແລະຈະປະກາດໃຫ້ເຈົ້າທັງຫລາຍ ຮູ້ເຖິງສິ່ງເຫຼົ່ານັ້ນທີ່ຈະເກີດຂຶ້ນ. 14ພຣະອົງຈະໃຫ້ເຮົາໄດ້ຮັບສະຫງ່າຣາສີ ເພາະພຣະອົງຈະນຳສິ່ງທີ່ເຮົາກ່າວນັ້ນ ມາປະກາດແກ່ເຈົ້າທັງຫລາຍ. 15ທຸກສິ່ງທີ່ພຣະບິດາເຈົ້າມີຢູ່ນັ້ນ ກໍເປັນຂອງເຮົາ. ສະນັ້ນ ເຮົາຈຶ່ງກ່າວວ່າ, ພຣະວິນຍານຈະນຳເອົາສິ່ງ ຊຶ່ງເປັນຂອງເຮົານັ້ນ ມາປະກາດແກ່ເຈົ້າທັງຫລາຍ.”

ຄວາມທຸກໂສກຈະກາຍເປັນຄວາມຊົມຊື່ນຍິນດີ

16“ຍັງບໍ່ດົນ ເຈົ້າທັງຫລາຍຈະບໍ່ເຫັນເຮົາຕໍ່ໄປ ແລະຕໍ່ມາອີກບໍ່ດົນ ພວກເຈົ້າກໍຈະເຫັນເຮົາ ເພາະເຮົາໄປຫາພຣະບິດາເຈົ້າ.”

17ສາວົກຂອງພຣະອົງບາງຄົນຈຶ່ງຖາມກັນວ່າ, “ການທີ່ພຣະອົງໄດ້ກ່າວແກ່ພວກເຮົາວ່າ, ‘ຍັງບໍ່ດົນ ພວກເຈົ້າຈະບໍ່ເຫັນເຮົາ ແລະຕໍ່ມາອີກບໍ່ດົນ ພວກເຈົ້າກໍຈະເຫັນເຮົາ’ ແລະຍັງເວົ້າອີກວ່າ, ‘ເພາະເຮົາໄປຫາພຣະບິດາເຈົ້າ.’ ຂໍ້ຄວາມເຫຼົ່ານີ້ໝາຍຄວາມວ່າຢ່າງໃດ? 18ຄຳວ່າ, ‘ຍັງບໍ່ດົນ’ ໝາຍຄວາມວ່າຢ່າງໃດ? ພວກເຮົາບໍ່ເຂົ້າໃຈເລີຍວ່າເພິ່ນກຳລັງເວົ້າຫຍັງ?”

19ພຣະເຢຊູເຈົ້າຮູ້ຈັກວ່າພວກເພິ່ນຢາກຖາມພຣະອົງ ແລ້ວພຣະອົງຈຶ່ງກ່າວແກ່ພວກເພິ່ນວ່າ, “ເຮົາໄດ້ເວົ້າວ່າ ຍັງບໍ່ດົນ ພວກເຈົ້າຈະບໍ່ເຫັນເຮົາ ແຕ່ຕໍ່ມາອີກບໍ່ດົນ ພວກເຈົ້າກໍຈະເຫັນເຮົາ. ພວກເຈົ້າຖາມກັນໃນເລື່ອງນີ້ແມ່ນບໍ? 20ເຮົາບອກພວກເຈົ້າຕາມຄວາມຈິງວ່າ, ພວກເຈົ້າຈະຮ້ອງໄຫ້ຮໍ່າໄຮ ແຕ່ໂລກນີ້ຈະຊົມຊື່ນຍິນດີ, ພວກເຈົ້າຈະໂສກເສົ້າຫລາຍ ແຕ່ຄວາມໂສກເສົ້າຂອງພວກເຈົ້າຈະກາຍເປັນຄວາມຊົມຊື່ນຍິນດີ. 21ເມື່ອແມ່ຍິງໃກ້ຈະເກີດລູກ ນາງກໍໂສກເສົ້າເພາະເວລາແຫ່ງຄວາມເຈັບປວດໄດ້ມາເຖິງ, ແຕ່ເມື່ອລູກເກີດມາແລ້ວ ນາງກໍບໍ່ຄິດເຖິງຄວາມເຈັບປວດນັ້ນອີກ ເພາະນາງຊົມຊື່ນຍິນດີທີ່ຄົນຜູ້ໜຶ່ງເກີດມາສູ່ໂລກ. 22ພວກເຈົ້າກໍເໝືອນກັນນັ້ນແຫຼະ ໃນເວລານີ້ພວກເຈົ້າໂສກເສົ້າ ແຕ່ເຮົາຈະເຫັນພວກເຈົ້າອີກ ແລະພວກເຈົ້າກໍຈະຊົມຊື່ນຍິນດີຢ່າງເຕັມລົ້ນ ເປັນຄວາມຍິນດີທີ່ບໍ່ມີຜູ້ໃດເອົາໄປຈາກພວກເຈົ້າໄດ້.

23ເມື່ອເຖິງວັນນັ້ນ ພວກເຈົ້າຈະບໍ່ຖາມເຮົາເຖິງສິ່ງໃດໝົດ. ເຮົາບອກພວກເຈົ້າຕາມຄວາມຈິງວ່າ, ຖ້າພວກເຈົ້າຂໍສິ່ງໃດຈາກພຣະບິດາເຈົ້າໃນນາມຂອງເຮົາ, ພຣະອົງກໍຈະໂຜດສິ່ງນັ້ນໃຫ້ແກ່ພວກເຈົ້າ. 24ຈົນເຖິງບັດນີ້ ພວກເຈົ້າບໍ່ໄດ້ຂໍສິ່ງໃດໃນນາມຂອງເຮົາ, ຈົ່ງຂໍແລ້ວພວກເຈົ້າຈະໄດ້ຮັບ ເພື່ອຄວາມຍິນດີຂອງພວກເຈົ້າຈະຄົບບໍລິບູນ.”

ເຮົາໄດ້ຊະນະຕໍ່ໂລກແລ້ວ

25“ເຮົາໄດ້ກ່າວສິ່ງເຫຼົ່ານີ້ແກ່ພວກເຈົ້າເປັນຄຳອຸປະມາ, ແຕ່ເວລາໜຶ່ງຈະມາເຖິງ ເຮົາຈະບໍ່ໃຊ້ຄຳອຸປະມາກ່າວແກ່ພວກເຈົ້າ ແຕ່ຈະກ່າວແກ່ພວກເຈົ້າຢ່າງຈະແຈ້ງເຖິງເລື່ອງພຣະບິດາເຈົ້າ. 26ເມື່ອວັນນັ້ນມາເຖິງ ພວກເຈົ້າຈະຂໍຈາກພຣະອົງໃນນາມຂອງເຮົາ ແລະເຮົາຈະບໍ່ບອກພວກເຈົ້າວ່າ, ‘ເຮົາຈະທູນຂໍພຣະບິດາເຈົ້າເພື່ອພວກເຈົ້າ.’ 27ດ້ວຍວ່າ, ພຣະບິດາເຈົ້າເອງກໍຮັກພວກເຈົ້າ ເພາະພວກເຈົ້າໄດ້ຮັກເຮົາ ແລະໄດ້ເຊື່ອວ່າເຮົາມາຈາກພຣະເຈົ້າ. 28ເຮົາມາຈາກພຣະບິດາເຈົ້າ ແລະເຂົ້າມາໃນໂລກ ແລະບັດນີ້ເຮົາກຳລັງຈະຈາກໂລກໄປຫາພຣະບິດາເຈົ້າ.”

29ແລ້ວພວກສາວົກຂອງພຣະອົງເວົ້າວ່າ, “ບັດນີ້ພຣະອົງກ່າວຢ່າງຈະແຈ້ງ ໂດຍບໍ່ໃຊ້ຄຳອຸປະມາ. 30ດຽວນີ້ພວກຂ້ານ້ອຍຮູ້ແລ້ວວ່າພຣະອົງຮູ້ຈັກທຸກໆສິ່ງ ແລະບໍ່ຈຳເປັນໃຫ້ຜູ້ໃດຖາມພຣະອົງອີກ, ດ້ວຍເຫດນີ້ ພວກຂ້ານ້ອຍຈຶ່ງເຊື່ອວ່າ ພຣະອົງມາຈາກພຣະເຈົ້າ.”

31ພຣະເຢຊູເຈົ້າຕອບພວກເພິ່ນວ່າ, “ດຽວນີ້ພວກເຈົ້າເຊື່ອແລ້ວບໍ? 32ເວລາກຳລັງມາແລະກໍມາເຖິງທີ່ນີ້ແລ້ວ ເມື່ອພວກເຈົ້າຕ້ອງພັດພາກຈາກກັນໄປບ້ານເຮືອນຂອງໃຜລາວ ແລະປ່ອຍເຮົາໄວ້ແຕ່ຜູ້ດຽວ, ແຕ່ເຮົາບໍ່ໄດ້ຢູ່ຜູ້ດຽວ ເພາະພຣະບິດາເຈົ້າສະຖິດຢູ່ກັບເຮົາ. 33ເຮົາບອກເລື່ອງນີ້ແກ່ເຈົ້າທັງຫລາຍ ເພື່ອພວກເຈົ້າຈະມີຄວາມສະຫງົບສຸກໃນເຮົາ ໃນໂລກນີ້ພວກເຈົ້າຈະມີຄວາມທຸກລຳບາກ ແຕ່ຈົ່ງຊື່ນໃຈເທາະ ເພາະຝ່າຍເຮົາໄດ້ຊະນະໂລກແລ້ວ.”

Currently Selected:

ໂຢຮັນ 16: ພຄພ

Highlight

Copy