ໂກໂລຊາຍ 4

1ຝ່າຍນາຍທັງຫລາຍ ຈົ່ງປະຕິບັດຕໍ່ຄົນຮັບໃຊ້ຂອງຕົນ ຢ່າງຖືກຕ້ອງແລະທ່ຽງທຳ, ຈົ່ງຮູ້ໄວ້ວ່າ ພວກເຈົ້າກໍມີນາຍອົງໜຶ່ງຢູ່ໃນສະຫວັນເໝືອນກັນ.

ຄຳເຕືອນສະຕິ

2ຈົ່ງອຸທິດຕົວໃນການພາວັນນາອະທິຖານ ຈົ່ງເຝົ້າລະວັງຢູ່ໂດຍການໂມທະນາຂອບພຣະຄຸນພຣະເຈົ້າ. 3ໃນເວລາດຽວກັນນັ້ນ ຈົ່ງພາວັນນາອະທິຖານເພື່ອພວກເຮົາດ້ວຍ ເພື່ອພຣະເຈົ້າຈະຊົງໂຜດໄຂປະຕູໄວ້ສຳລັບພຣະທຳນັ້ນ ໃຫ້ພວກເຮົາປະກາດຂໍ້ເລິກລັບເລື່ອງພຣະຄຣິດ, ການທີ່ເຮົາຖືກຄຸກຢູ່ກໍເພາະເລື່ອງນີ້ແຫຼະ. 4ເພື່ອເຮົາຈະໄດ້ກ່າວຂໍ້ເລິກລັບນັ້ນໃຫ້ຈະແຈ້ງ ຕາມທີ່ເຮົາຄວນຈະກ່າວ.

5ຈົ່ງປະຕິບັດຕໍ່ຄົນພາຍນອກດ້ວຍໃຊ້ສະຕິປັນຍາ ໂດຍສວຍໂອກາດ. 6ຈົ່ງໃຫ້ວາຈາຂອງເຈົ້າທັງຫລາຍ ປະກອບດ້ວຍເມດຕາຄຸນຢູ່ສະເໝີ ປະສົມດ້ວຍເກືອ ເພື່ອເຈົ້າທັງຫລາຍຈະໄດ້ຮູ້ວິທີຕອບທີ່ຖືກໃຈແກ່ທຸກຄົນ.

ຄຳທັກທາຍປາໄສສຸດທ້າຍ

7ຕີຂີໂກ, ພີ່ນ້ອງທີ່ຮັກຂອງພວກເຮົາ ຜູ້ຮ່ວມງານທີ່ສັດຊື່ ແລະທັງເປັນຜູ້ຮັບໃຊ້ຮ່ວມກັນໃນພາລະກິດຂອງອົງພຣະຜູ້ເປັນເຈົ້າ ຈະບອກຂ່າວທັງໝົດກ່ຽວກັບເຮົາໃຫ້ພວກເຈົ້າຮູ້. 8ເພາະເຫດນີ້ ເຮົາຈຶ່ງໃຊ້ລາວໄປຫາພວກເຈົ້າ ເພື່ອເຊີດຊູຈິດໃຈພວກເຈົ້າຂຶ້ນ ໂດຍໃຫ້ຮູ້ວ່າພວກເຮົາທຸກຄົນເປັນຢູ່ຢ່າງໃດ. 9ຄົນທີ່ໄປກັບລາວ ຄືໂອເນຊີໂມ ພີ່ນ້ອງຄຣິສຕຽນທີ່ຮັກແລະສັດຊື່ ລາວເປັນຜູ້ໜຶ່ງໃນກຸ່ມຂອງພວກເຈົ້າ ເຂົາທັງສອງຈະເລົ່າສູ່ພວກເຈົ້າຟັງ ເຖິງເຫດການທີ່ໄດ້ເກີດຂຶ້ນໃນທີ່ນີ້.

10ອາຣິດຕາໂຂ ຜູ້ທີ່ຖືກຄຸກຢູ່ນຳເຮົາ ກໍຝາກຄວາມຄິດເຖິງ ມາຍັງພວກເຈົ້າດ້ວຍ, ມາຣະໂກນ້ອງຂອງບາຣະນາບາ ກໍຝາກຄວາມຄິດເຖິງ ມາຍັງພວກເຈົ້າເໝືອນກັນ. (ພວກເຈົ້າຄົງໄດ້ຮັບຄຳແນະນຳແລ້ວວ່າ ໃຫ້ຕ້ອນຮັບມາຣະໂກຖ້າລາວມາຫາພວກເຈົ້າ.) 11ແລະເຢຊູຜູ້ທີ່ຄົນເອີ້ນກັນວ່າ ຢູສະໂຕ ກໍຝາກຄວາມຄິດເຖິງ ມາຍັງພວກເຈົ້າເໝືອນກັນ ໃນບັນດາເພື່ອນຮ່ວມງານຂອງເຮົາເພື່ອອານາຈັກຂອງພຣະເຈົ້ານັ້ນ ມີແຕ່ຄົນເຫຼົ່ານີ້ເທົ່ານັ້ນ ທີ່ເປັນຄົນຢິວທີ່ໄດ້ຮັບເຊື່ອ ແລະພວກເຂົາໄດ້ຊ່ວຍຊູໃຈເຮົາຢ່າງຫລວງຫລາຍ.

12ເອປາຟາ ເປັນຄົນໜຶ່ງໃນພວກເຈົ້າ ແລະເປັນຜູ້ຮັບໃຊ້ຂອງພຣະຄຣິດເຈົ້າເຢຊູ ກໍຝາກຄວາມຄິດເຖິງ ມາຍັງພວກເຈົ້າເໝືອນກັນ ເພິ່ນພາວັນນາອະທິຖານຢ່າງຮ້ອນຮົນສຳລັບພວກເຈົ້າຢູ່ສະເໝີ ໂດຍຂໍພຣະເຈົ້າບັນດານໃຫ້ພວກເຈົ້າຕັ້ງໝັ້ນຢູ່ ເປັນຜູ້ໃຫຍ່ຄົບຖ້ວນ ແລະເປັນຜູ້ທີ່ມີຄວາມໝັ້ນໃຈ ປະຕິບັດຕາມນໍ້າພຣະໄທຂອງພຣະເຈົ້າ. 13ເຮົາເປັນພະຍານຝ່າຍເພິ່ນວ່າ ເພິ່ນໄດ້ເຮັດການໜັກໜ່ວງເພື່ອພວກເຈົ້າ ແລະເພື່ອຄົນທີ່ຢູ່ເມືອງລາວດີເກອາ, ທັງເພື່ອຄົນທີ່ຢູ່ເມືອງເຮຍຣາໂປລີ. 14ລູກາ ທ່ານໝໍທີ່ຮັກຂອງພວກເຮົາ ແລະ ເດມາ ກໍຝາກຄວາມຄິດເຖິງມາຍັງພວກເຈົ້າ.

15ເຮົາຝາກຄວາມຄິດເຖິງ ມາຍັງພວກພີ່ນ້ອງທີ່ຢູ່ໃນເມືອງລາວດີເກອາ ແລະນາງນິມຟາກັບພີ່ນ້ອງຄຣິສຕຽນທີ່ຢູ່ໃນເຮືອນຂອງນາງ. ດ້ວຍ. 16ເມື່ອພວກເຈົ້າອ່ານຈົດໝາຍສະບັບນີ້ແລ້ວ ກະລຸນາສົ່ງຕໍ່ໃຫ້ບັນດາພີ່ນ້ອງທີ່ເຊື່ອ ໃນເມືອງລາວດີເກອາອ່ານເໝືອນກັນ ຝ່າຍພວກເຈົ້າເອງ ກໍຈົ່ງອ່ານຈົດໝາຍທີ່ສົ່ງມາຈາກພີ່ນ້ອງທີ່ເມືອງລາວດີເກອາເໝືອນກັນ. 17ແລະໃຫ້ບອກອາຂີໂປວ່າ, “ສ່ວນພາລະກິດ ຊຶ່ງເຈົ້າໄດ້ຮັບມອບໝາຍ ເພື່ອບົວລະບັດຮັບໃຊ້ອົງພຣະຜູ້ເປັນເຈົ້ານັ້ນ ຈົ່ງເຮັດໃຫ້ບັນລຸຜົນສຳເລັດ.”

18ເຮົາຄືໂປໂລ ໄດ້ຂຽນຂໍ້ຄວາມທັງໝົດນີ້ ດ້ວຍມືຂອງເຮົາເອງ, ຢ່າລືມວ່າ ເຮົາກຳລັງຖືກຄຸກຢູ່ ຂໍໃຫ້ພຣະຄຸນ ຈົ່ງສະຖິດຢູ່ກັບພວກເຈົ້າເທີ້ນ.

Currently Selected:

ໂກໂລຊາຍ 4: ພຄພ

Highlight

Copy