Lukas 7
7
Yexus Khu tug Thawj Tubrog Loos tug Tubkhai
(Mathais 8.5-13)
1Thaus Yexus qha tej ntawd rua suavdlawg noog taag lawm, nwg txawm moog rua peg lub nroog Kapena-us. 2Nyob huv lub nroog ntawd, muaj ib tug thawj tubrog pawg pua kws yog tuabneeg Loos, nwg muaj ib tug tubkhai kws nwg hlub heev, tug tubkhai ntawd mob heev tub yuav tuag. 3Thaus tug thawj tubrog ntawd nov luas has txug Yexus, nwg txawm khaiv cov Yudais cov txwjlaug qee leej moog thov Yexus tuaj paab khu nwg tug tubkhai. 4Puab moog cuag Yexus hab thov taag zug has tas, “Tsimnyog koj moog paab tug thawj tubrog ntawd, 5rua qhov nwg hlub peb tsaav tuabneeg, hab nwg ua ib lub tsev saablaaj pub rua peb.”
6Yexus txawm nrug puab moog. Thaus Yexus moog yuav laug txug tug thawj tubrog lub tsev, tug thawj tubrog khaiv nwg ob peb tug phoojywg moog cheem Yexus has tas, “Tug Tswv, nyob tsaam taabkaum koj, kuv yog ib tug kws tsi tsimnyog koj yuav moog huv kuv lub tsev, 7hab kuv yog ib tug kws tsi tsimnyog tuaj cuag koj. Thov koj has tuab lus xwb, ces kuv tug tubkhai yeej yuav zoo. 8Txawm yog kuv los tseem muaj cov thawj kws kaav kuv, hab kuv muaj ib cov tubrog kws kuv kaav. Yog kuv has rua tug nuav has tas, ‘Moog!’ nwg txawm moog. Yog kuv has rua tug tod has tas, ‘Lug!’ nwg txawm lug. Hab yog kuv has rua kuv tug tubkhai has tas, ‘Ua le nuav!’ nwg txawm ua le ntawd.”
9Thaus Yexus nov puab has le ntawd, nwg xaav tsi thoob le; nwg tig moog has rua cov tuabneeg coob coob kws lawv nwg qaab has tas, “Kuv qha rua mej has tas, txawm yog huv cov Yixalayees los kuv tsi tau pum ib tug kws muaj kev ntseeg npaum le tug nuav!”
10Cov kws tug thawj tubrog khaiv tuaj ntawd rov moog txug tom tug thawj tubrog tsev, ua cav tug tubqhe tub zoo lawm.
Yexus Tsaa tug Puj Ntsuag tug Tub Sawv Rov Qaab Lug
11Tom qaab ntawd tsi ntev#7.11 Tom qaab ntawd tsi ntev; tej phoo qub has tas, Nub tom qaab. Yexus moog huv lub nroog Na-is, Yexus cov thwjtim hab ib cov tuabneeg coob coob nrug nwg moog. 12Thaus Yexus moog txug ntawm roojvaag kws moog rua huv lub nroog, txawm muaj tuabneeg kwv ib tug tuag tawm tuaj txug ntawd. Tug tuag ntawd yog ib tug puj ntsuag tug tub, tug puj ntsuag ntawd muaj tuab tug tub xwb. Cov tuabneeg coob coob kws nyob huv lub nroog ntawd nrug nwg tuaj. 13Thaus tug Tswv pum tug puj ntsuag ntawd, Tug Tswv hlub nwg heev hab has tas, “Koj tsi xob quaj.” 14Yexus txawm txaav zog moog tuav nkaus lub hleb, ces cov tuabneeg kws kwv lub hleb txawm nreg. Yexus has tas, “Tug hluas, kuv has rua koj tas, koj ca le sawv tseeg!” 15Tug tuag ntawd txawm sawv tseeg nyob quastsawg nrug puab thaam. Yexus coj nwg moog rua nwg nam.
16Cov tuabneeg ntawd ntshai kawg le, hab puab qhuas Vaajtswv has tas, “Muaj ib tug cev Vaajtswv lug kws muaj fwjchim heev tub lug rua huv peb cov lawm!” Hab puab has tas, “Vaajtswv tub lug cawm nwg tsaav tuabneeg lawm!”
17Zaaj kws Yexus ua nuav nrov nchaa moo lug moog thoob plawg huv lub xeev Yudas hab tej cheebtsaam kws nyob ibncig ntawd.
Yauhaas Khaiv Nwg Cov Thwjtim Moog Nug Yexus
(Mathais 11.2-19)
18Yauhaas cov thwjtim qha tej nuav huv tuabsi rua Yauhaas noog. 19Yauhaas hu nwg ob tug thwjtim lug hab kuas obtug moog cuag tug Tswv hab has tas, “Koj puas yog tug kws Yauhaas has tas yuav lug lossis peb tseem yuav tog dlua lwm tug?”
20Thaus obtug moog txug ntawm Yexus, obtug has tas, “Yauhaas tug kws muab tuabneeg ua kevcai raus dlej kuas wb tuaj nug saib, koj puas yog tug kws yuav lug lossis peb tseem yuav tog dlua lwm tug?”
21Lub sijhawm ntawd Yexus khu cov tuabneeg muaj mob ntau leej zoo, nwg ntab dlaab tawm ntawm cov tuabneeg kws raug dlaab, hab nwg khu cov tuabneeg dligmuag ntau leej rov pum kev. 22Yexus teb ob tug kws Yauhaas khaiv tuaj has tas, “Meb ca le rov qaab moog qha tej kws meb pum hab meb nov rua Yauhaas has tas: cov tuabneeg dligmuag rov pum kev, cov tuabneeg tuag ceg moog taug kev, cov tuabneeg mob ruas zoo,#7.22 cov tuabneeg mob ruas zoo; Saib 5.12.#Yay 35.5-6; Yay 61.1 cov tuabneeg laag ntseg nov lug, cov tuabneeg kws tuag lawm sawv rov lug, hab tub muaj tuabneeg moog qha Txujmoo Zoo rua cov tuabneeg txomnyem lawm. 23Tug kws ntseeg kuv, tug ntawd yuav tau koob moov!”
24Thaus ob tug kws Yauhaas khaiv tuaj rov qaab moog lawm, Yexus qha Yauhaas zaaj rua cov tuabneeg coob coob ntawd noog has tas: “Thaus mej moog cuag Yauhaas tom roob mojsaab qhua, mej moog saib dlaabtsi? Mej moog saib tug lojkov kws cua tshuab rawv moog rawv lug los?” 25Mej moog saib dlaabtsi? Mej moog saib tug tuabneeg kws naav tej tsoog tsho zoo zoo los? Tsuas yog cov tuabneeg kws nyob huv vaajntxwv lub loog, txhaj tau naav zoo hab tau noj seem noj sos xwb! 26Mej qha rua kuv saib, mej moog saib dlaabtsi? Mej moog saib ib tug kws cev Vaajtswv lug los? Yog lawm, tabsis kuv qha rua mej has tas, tug kws mej pum ntawd muaj fwjchim luj dlua ib tug cev Vaajtswv lug. 27Rua qhov tug Yauhaas nuav yog tug kws Vaajtswv txujlug tub xub qha tseg lawm: “Vaajtswv has tas, kuv yuav khaiv kuv tug tubkhai ua koj ntej moog khu kev tog koj.” #Mal 3.1 28“Kuv qha rua mej has tas, txhua tug kws yug lug ntawm quaspuj, tsi muaj ib tug muaj fwjchim luj npaum le Yauhaas; tabsis tug kws yau tshaaj Yauhaas sau Vaajtswv lub Tebchaws, tug ntawd tseem muaj fwjchim luj dlua Yauhaas hab.”
29Taagnrho cov tuabneeg kws nov Yauhaas qha; tsuas yog cov pejxeem hab cov sau se txhaj ntseeg has tas Vaajtswv yog tug ncaaj nceeg, hab puab thov kuas Yauhaas muab puab ua kevcai raus dlej.#Mat 21.32; Luk 3.12 30Tabsis cov Falixais hab cov xwbfwb kws qha Vaajtswv txuj Kevcai tsi kaam ua tej kws Vaajtswv kuas puab ua, hab tsi kaam Yauhaas muab puab ua kevcai raus dlej.
31Yexus has ntxiv tas, “Kuv yuav muab cov tuabneeg tam nuav pev rua dlaabtsi?” Hab puab zoo le caag? 32Puab zoo ib yaam le tej mivnyuas yau kws ua si tom tshaav puam. Paab nuav has rua paab tom has tas, “Peb tub tshuab raaj lawm, tabsis mej tsi seev cev le! Peb quaj nyav, tabsis mej tsi mob sab! 33Yauhaas tug kws muab tuabneeg ua kevcai raus dlej, nwg lug, nwg ua kevcai yoo mov, hab nwg tsi haus cawv txiv maab, mej txhaj has tas, ‘Nwg raug dlaab lawm!’ 34Tuabneeg Leej Tub lug, nwg noj hab haus, mej txhaj has tas, ‘Mej saib, tug tuabneeg nuav! Nwg noj luj hab haus luj, nwg nrug cov tuabneeg sau se hab cov tuabneeg txhum ua phoojywg!’ 35Txhua tug kws leeg yuav Vaajtswv lub tswvyim, puab teg num yuav ua rua suavdlawg pum has tas, Vaajtswv yog tug kws muaj tswvyim tag.”
Yexus Moog Huv tug Falixais Tsev
36Muaj ib tug Falixais hu Yexus moog nrug nwg noj mo, Yexus txawm moog rua huv tug Falixais tsev, hab nyob quastsawg noj mov. 37Muaj ib tug quaspuj nyob huv lub nroog ntawd, nwg yog ib tug tuabneeg ua txhum. Nwg nov has tas, Yexus moog noj mov huv tug Falixais tsev, nwg nqaa ib fwj roj tsw qaab #Mat 26.7; Mak 14.3; Yhs 12.3 38tuaj sawv saab tom qaab ncaaj ntawm Yexus kutaw, nwg quaj kua muag lug ntub Yexus ob txhais kutaw, hab muab nwg cov plaubhau so, nwg nwj Yexus kutaw hab muab cov roj tsw qaab laub ywg Yexus kutaw. 39Thaus tug Falixais kws hu Yexus lug noj mov pum le ntawd, nwg xaav has tas, “Yog tug nuav yog ib tug cev Vaajtswv lug tag, nwg yeej yuav paub has tas tug quaspuj kws kov nwg ntawd yog ib tug tuabneeg txhum!”
40Yexus has rua tug Falixais ntawd tas, “Ximoos, kuv muaj ib lu lug xaav has rua koj.” Ximoos teb has tas,
“Tau los mas Xwbfwb, koj ca le has.” 41Yexus txawm has tas, “Muaj ob tug txivneej tshuav ib tug yawm nqe. Ib tug tshuav tsib puas lub nyaj, ib tug tshuav tsib caug lub nyaj. 42Obtug puavleej tsi muaj nyaj them tug yawm ntawd, ces tug yawm ntawd txawm zaam nqe rua obtug huv tuabsi. Yog le, ob tug ntawd, tug twg yuav ncu tug yawm ntawd txaj ntsig heev dlua?”
43Ximoos teb has tas, “Kuv xaav has tas, yog tug kws tug yawm ntawd zaam nuj nqes ntau dlua rua.”
Yexus teb has tas, “Yog le koj has lawm.” 44Yexus tig moog saib tug quaspuj ntawd, hab has rua Ximoos has tas, “Koj puas pum tug quaspuj nuav? Kuv tuaj txug huv koj tsev, koj tub tsi muab dlej ntxuav kuv kutaw, tabsis tug quaspuj nuav muab nwg cov kua muag ntxuav kuv kutaw, hab muab nwg cov plaubhau so. 45Kuv tuaj, koj tsi nwj kuv, tabsis txij thaus kuv tuaj txug huv koj tsev, tug quaspuj nuav nwj kuv txhais kutaw tsi tseg le. 46Koj tub tsi muab roj tsw qaab pleev kuv taubhau, tabsis tug quaspuj nuav muab roj tsw qaab laub ywg kuv ob txhais kutaw. 47Kuv qha rua koj has tas, qhov kws tug quaspuj nuav muaj kev hlub luj npaum le nuav, qha has tas Vaajtswv tub zaam nwg tej kev txhum huv tuabsi lawm. Tabsis tug kws Vaajtswv zaam txim tsawg, tug ntawd yeej ncu Vaajtswv txaj ntsig tsawg.”
48Yexus has rua tug quaspuj ntawd has tas, “Kuv tub zaam txim rua koj lawm.”
49Cov tuabneeg kws nrug Yexus noj mov ntawd, puab xaav has tas, “Tug nuav yog leejtwg, nwg txhaj zaam txim tau?”
50Yexus has rua tug quaspuj ntawd has tas, “Koj txujkev ntseeg tub cawm tau koj dlim lawm; koj ca le moog kaaj sab lug.”
Currently Selected:
Lukas 7: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
