Lukas 24

Yexus Sawv huv Qhov Tuag Rov Lug

(Mathais 28.1-10; Malakaus 16.1-8; Yauhaas 20.1-10)

1Nubkaaj thaus kaaj ntug txoog, cov quaspuj txawm nqaa tej tshuaj tsw qaab kws puab tub npaaj tseg hab puab moog rua tom lub qhov ntxaa. 2Puab pum dlaim txag zeb kws npug lub rooj ntxaas tub dlov rua ib saab lawm, 3puab moog saib huv; tabsis tsi pum Tswv Yexus lub cev lawm. 4Puab sawv ntsug huv hab xaav tsi thoob le, taamsim ntawd muaj ob tug txivneej naav rig tsho ci ntsaa ab lug sawv ntawm puab ib saab. 5Cov quaspuj ntawd ntshai kawg, hab nyo taubhau rua huv aav saib tsi taug ob tug txivneej ntawd le, ob tug txivneej ntawd has rua puab tas, “Ua le caag mej tuaj nrhav tug tuabneeg caj ntawm cov tuabneeg tuag nuav? 6Nwg tsi nyob ntawm nuav; nwg tub sawv lawm. Mej ncu ntsoov tej lug kws nwg has rua mej, thaus tseem nyob peg lub xeev Kalilais has tas, #Mat 16.21; 17.22-23; 20.18-19; Mak 8.31; 9.31; 10.33-34; Luk 9.22; 18.31-33 7‘Yeej yuav muaj tuabneeg nteg Tuabneeg Leej Tub coj moog rua cov tuabneeg txhum muab nwg ntsa rua sau ntoo khaublig, hab peb nub tom qaab, nwg yuav sawv huv qhov tuag rov qaab lug.’ ”

8Cov quaspuj ntawd ncu dlheev txug Yexus tej lug, 9hab puab tawm huv lub qhov ntxaa rov lug qha tej ntawd rua kaum ib tug thwjtim hab cov tuabneeg kws nrug puab nyob noog. 10Cov quaspuj ntawd yog, Malis Madalas, Yau-anas, hab Malis kws yog Yakaunpaus nam; hab muaj dlua ob peb tug quaspuj lug qha tej nuav rua cov timthawj. 11Tabsis cov thwjtim xaav has tas, tej kws cov quaspuj ntawd has yog tso dlaag xwb, puab txhaj tsi ntseeg cov quaspuj ntawd tej lug. 12Tabsis Petus ca le sawv tseeg dlha moog rua tom lub qhov ntxaa; nwg nyo xauj huv lub qhov ntxaa, ua cav tsi pum dlaabtsi, tsuas pum cov ntaub kws qhwv Yexus lub cev nyob huv xwb. Nwg rov qaab lug tsev, hab xaav tsi thoob rua tej kws nwg pum ntawd.#24.12 tej phoo qub tsi muaj nqai 12.

Yexus Taug Kev Moog Peg Lub Zog Ema-us

(Malakaus 16.12-13)

13Tuab nub ntawd Yexus ob tug thwjtim taabtom taug kev moog rua peg lub zog Ema-us kws nyob nrug dleb ntawm lub nroog Yeluxalees kwvlaam le kaum ib kilumev, 14hab obtug sis thaam txug tej kws tub tshwm muaj lawm. 15Thaus obtug tseem sis thaam hab sis nug txug zaaj ntawd, Yexus txawm lug nrug obtug taug kev moog; 16obtug pum Yexus, tabsis zoo le muaj tej yaam ua rua obtug cim tsi tau nwg. 17Yexus nug obtug has tas, “Meb pheej thaam dlaabtsi taug kev?”

Obtug txawm nreg ua ntsejmuag mluag mlob. 18Ob tug ntawd, tug kws hu ua Kelupas, nug Yexus has tas, “Taagnrho cov tuabneeg kws nyob huv lub nroog Yeluxalees, puavleej paub tej kws nyavnyuas muaj tau ob peb nub lug nuav huv tuabsi, tsuas yog koj tuab leeg txhaj tsi paub tej ntawd xwb los?”

19Yexus nug obtug has tas, “Tej ntawd yog dlaabtsi?”

Obtug teb has tas, “Tej ntawd yog tej xwm kws Yexus tug kws yog tuabneeg Naxales tub raug lawm. Nwg yog ib tug cev Vaajtswv lug. Vaajtswv hab tej tuabneeg suavdlawg puavleej pum has tas, nwg tej lug muaj fwjchim hab nwg ua tau tej txujci tseemceeb. 20Peb cov thawj ntawm cov povthawj hab cov numtswv muab nwg rua Philaj txav txim tua nwg povtseg, hab puab muab nwg ntsa rua sau ntoo khaublig. 21Peb ca sab has tas nwg yog tug kws yuav paab cov Yixalayees dlim! Dlua le ntawd, txij le muaj tej ntawd lug, tub tau peb nub rua nub nua lawm. 22Cov quaspuj kws yog peb paab qee leej tau ua rua peb xaav tsi thoob le; thaus kaaj ntug txoog puab moog rua tom lub qhov ntxaa, 23tabsis puab tsi pum Yexus lub cev lawm. Puab rov lug qha rua suavdlawg has tas, puab pum cov timtswv ceebtsheej qha rua puab has tas, Yexus tub rov muaj sa lawm. 24Peb cov muaj qee leej moog saib lub qhov ntxaa, hab pum muaj lawv le cov quaspuj ntawd has tag, tabsis puab tsi pum Yexus.”

25Ces Yexus has rua obtug tas, “Ua le caag meb yuav ruag ua luaj le, ua le caag meb tsi ntseeg tej kws cov cev Vaajtswv lug tau qha tseg lawm! 26Puas yog tug Mexiyas yeej yuav raug tsimtxom hab tom qaab ntawd nwg yuav tau nwg tug tshwjchim kws ci ntsaa ab?” 27Yexus txawm pav Vaajtswv txujlug kws has txug nwg, nwg xub pib qha tej kws Mauxes sau hab tej kws cov cev Vaajtswv lug txhua tug sau tseg lawm.

28Thaus puab moog yuav txug lub zog kws puab moog ntawd, Yexus txawm ua le nwg yuav dlhau plawg moog. 29Tabsis obtug cheem has tas, “Koj nrug wb su ntawm nuav, rua qhov tub yuav tsaus ntuj.” Yexus txhaj moog nrug obtug su. 30Thaus Yexus nrug obtug nyob noj mov ntawm rooj, Yexus muab ib lub ncuav lug, nwg ua Vaajtswv tsaug, hab muab faib rua obtug noj. 31Yaam kws plooj ntawm obtug lub qhovmuag txawm tshem hlo lawm, obtug txhaj paub has tas yog Yexus. Taamsim ntawd Yexus ca le pluj ndlais ntawm obtug moog lawm. 32Obtug sis thaam has tas, “Thaus peb taug kev tuaj, nwg nrug wb thaam hab pav Vaajtswv txujlug rua wb noog, mas wb lub sab kub lug cuag le suavtawg hlawv puas yog?”

33Taamsim ntawd obtug txawm sawv tseeg rov qaab moog rua nraag lub nroog Yeluxalees, hab moog rua ntawm kaum ib tug thwjtim, hab lwm tug kws tuaj nyob ua ke ntawd, 34hab puab sis thaam has tas, “Tug Tswv tub sawv rov lug lawm tag tag! Nwg tub lug tshwm rua Ximoos pum lawm!”

35Obtug txawm pav tej kws obtug pum thaus obtug taug kev moog, hab thaus tug Tswv muab ncuav ndlais faib rua obtug noj, obtug txhaj paub has tas Yog Yexus tag rua puab noog.

Yexus Lug Tshwm rua Cov Thwjtim Pum

(Mathais 28.16-20; Malakaus 16.14-18; Yauhaas 20.19-23; Teg Num 1.6-8)

36Thaus obtug tseem taabtom pav txug tej kws obtug pum lawm rua cov thwjtim noog, taamsim ntawd tug Tswv lug sawv nruab nraab ntawm puab, hab has rua puab tas, “Mej ca le nyob kaaj sab lug.”#24.36 Tej phoo qub tsi muaj cov lug kws has tas, “Mej ca le nyob kaaj sab lug.”

37Puab poob sab hab ntshai kawg, puab xaav has tas yog puab pum dlaab. 38Tabsis Yexus has rua puab tas, “Ua le caag mej ntshai ua luaj le? Vim le caag mej tsi ntseeg? 39Mej ca le saib kuv txhais teg hab kuv txhais kutaw, mej txhaj yuav paub has tas yog kuv tag. Mej ca le cev teg kov kuv, mej txhaj le yuav paub, rua qhov dlaab tsi muaj nqaj tsi muaj txhaa le kws mej pum kuv muaj nuav.”

40Thaus Yexus has le ntawd, nwg txawm xyaab hlo nwg txhais teg hab txhais kutaw#24.40 Tej phoo qub tsi muaj nqai 40 nuav. rua puab saib. 41Puab zoo sab kawg hab xaav tsi thoob le, tabsis puab tseem tsi tau ntseeg tag; Yexus nug puab has tas, “Nyob ntawm nuav mej puas muaj dlaabtsi noj?” 42Puab muab ib dlaim nqaj ntseg ci cev rua Yexus, 43Yexus txais moog noj taabmeeg puab suavdlawg.

44Yexus has rua puab tas, “Tej nuav yog tej kws kuv tub qha rua mej thaus kuv tseem nrug mej nyob: rua qhov txhua yaam kws Mauxes has hab tej kws cov cev Vaajtswv lug sau tseg rua huv phoo Ntawv Nkauj kws has txug kuv ntawd puavleej yuav tav.”

45Yexus txawm ua rua puab totaub Vaajtswv txujlug, 46hab Yexus has rua puab tas, “Tub muaj lug sau tseg lawm has tas: Tug Mexiyas yeej yuav raug kev tsimtxom hab peb nub tom qaab, nwg yuav sawv huv qhov tuag rov qaab lug, 47mej yuavtsum tuav nwg lub npe moog qha txujmoo zoo rua txhua tsaav tuabneeg huv qaab ntuj nuav has tas, Vaajtswv yuav zaam txim rua tug kws tso nwg tej kev txhum tseg. Mej ca le pib qha huv lub nroog Yeluxalees. 48Mej yuavtsum ua timkhawv qha tej nuav rua suavdlawg paub. 49Kuv yuav muab yaam kws kuv Txiv coglug tseg lawm rua mej. Tabsis mej yuavtsum nyob huv lub nroog Yeluxalees tog moog txug thaus kws mej tau lub fwjchim kws yuav lug sau ntuj lug.”#Ten 1.4

Yexus Moog sau Ntuj

(Malakaus 16.19-20; Teg Num 1.9-11)

50Yexus coj puab tawm huv lub nroog Yeluxalees moog txug nraag lub zog Npethanis. Nwg tsaa teg foom koob moov rua puab. 51Thaus nwg taabtom foom koob moov rua puab, Vaajtswv txawm coj nwg ncaim puab moog rua sau ntuj lawm.#24.51 Tej phoo qub tsi muaj cov lug has tas, coj nwg moog rua sau ntuj lawm.#Ten 1.9-11 52Puab pehawm nwg hab rov moog rua peg lub nroog Yeluxalees, puab zoo sab kawg le, 53hab puab naj nub moog nyob huv lub Tuamtsev ua Vaajtswv tsaug.

Currently Selected:

Lukas 24: HNJ2000

Highlight

Copy