Lukas 23

Philaj Taug Yexus Zaaj

(Mathais 27.1-2; Malakaus 15.1-5; Yauhaas 18.28-38)

1Taagnrho cov tuabneeg kws tuaj saablaaj ntawd txawm sawv tseeg coj Yexus moog cuag Philaj, 2puab nkaug Yexus rua Philaj has tas, “Peb nteg tug txivneej nuav thaus nwg taabtom ntxag kuas peb tsaav tuabneeg ua yuam kev, hab txwv tsi pub puab them se rua Xixas, hab nwg khaav has tas nwg yog tug Mexiyas kws yog vaajntxwv.”

3Philaj nug Yexus has tas, “Koj yog cov Yudais tug vaajntxwv los?”

Yexus teb has tas, “Koj has yog lawm.”

4Ces Philaj has rua cov thawj ntawm cov povthawj hab cov tuabneeg coob coob ntawd has tas, “Kuv tsi pum tug txivneej nuav muaj ib qhov txhum le.”

5Tabsis puab hajyam has tawv tawv has tas, “Nwg tej lug qha ua rua suavdlawg muaj kev kub ntxhuv thoob lub xeev Yudas. Nwg pib qha peg xeev Kalilais hab tuaj txug rua ntawm nuav.”

Helauj Taug Yexus Zaaj

6Thaus Philaj nov puab has le ntawd, nwg nug has tas, “Tug txivneej nuav yog tuabneeg Kalilais los?” 7Thaus Philaj paub has tas Yexus tuaj peg cheebtsaam kws Helauj kaav tuaj, ces nwg txawm xaa Yexus moog cuag Helauj, rua qhov lub sijhawm ntawd Helauj tuaj su huv lub nroog Yeluxalees. 8Thaus Helauj pum Yexus, Helauj zoo sab kawg le, rua qhov nwg ibtxwm nov Yexus lub moo hab xaav pum Yexus ntev lug lawm. Helauj xaav has tas nwg yuav pum Yexus ua ib yaam txujci tseemceeb. 9Helauj nug Yexus ntau zaaj, tabsis Yexus tsi teb le. 10Cov thawj ntawm cov povthawj hab cov xwbfwb kws qha Vaajtswv txuj Kevcai txaav zog moog nkaug Yexus rua Helauj. 11Helauj hab nwg cov tubrog thuam Yexus hab ua saib tsi taug Yexus; puab muab ib lub tsho ntev kws zoo nkauj heev rua Yexus naav, hab xaa nwg rov qaab moog rua Philaj. 12Txij nub ntawd lug Helauj hab Philaj txawm sis raug zoo lawm; yaav taag lug obtug ua yeebncuab.

Txav Txim Muab Yexus Tua

(Mathais 27.15-26; Malakaus 15.6-15; Yauhaas 18.39–19.16)

13Philaj hu cov thawj ntawm cov povthawj, cov thawjcoj hab cov pejxeem tuaj, 14hab nwg has rua puab tas, “Mej has tas nwg ntxag kuas cov pejxeem yuam kev. Nwgnuav kuv tub taug nwg zaaj taabmeeg mej suavdlawg lawm, hab kuv tsi pum nwg muaj ib qhov txhum lawv le kws mej nkaug nwg ntawd. 15Helauj los tsi pum nwg muaj ib qhov txhum le hab, Helauj txhaj xaa nwg rov lug rua peb. Tug txivneej nuav yeej tsi tau ua ib qhov txhum kws tsimnyog yuav muab nwg tua povtseg. 16Yog le ntawd, kuv yuav kuas luas muab nwg nplawm hab tso nwg moog.” 17[Lawv le ibtxwm, txhua zag kws ua Kevcai Hlaa Dlhau, Philaj yuavtsum tso ib tug tuabneeg raug txim lawv le cov pejxeem thov.]#23.17 Tej phoo qub tsi muaj nqai 17 nuav (saib Mak 15.6).

18Cov tuabneeg coob coob ntawd has nrov nrov has tas, “Muab nwg tua povtseg! Hab tso Npalanpas lug rua peb.!” 19[Npalanpas raug kaw rua huv tsev lojcuj, vim nwg ntxeev num ntxeev tswv huv lub nroog hab nwg tua tuabneeg.]

20Philaj xaav tso Yexus, nwg txhaj rov has rua cov tuabneeg coob coob ntawd ib zag ntxiv hab. 21Tabsis puab hajyam qw nrov nrov has tas, “Muab nwg ntsa rua sau ntoo khaublig! Muab nwg ntsa rua sau ntoo khaublig!”

22Philaj rov has rua puab ib zag has tas, “Vim le caag? Nwg ua txhum dlaabtsi? Kuv tsi pum nwg muaj ib qhov txhum kws tsimnyog yuav muab nwg tua! Kuv yuav kuas luas muab nwg nplawm hab tso nwg moog.”

23Tabsis cov tuabneeg coob coob ntawd qw taag zug kuas Philaj muab Yexus ntsa rua sau ntoo khaublig. Thaus kawg puab kovyeej Philaj. 24Philaj txawm txav txim rua Yexus lawv le puab thov. 25Hab Philaj tso tug txivneej kws puab thov rua puab. Tug ntawd yog tug kws raug kaw rua huv tsev lojcuj, nwg ntxeev num ntxeev tswv hab tua tuabneeg. Ces Philaj muab Yexus rua puab lawv le puab sab nyam.

Muab Yexus Ntsa rua sau Ntoo Khaublig

(Mathais 27.32-44; Malakaus 15.21-32; Yauhaas 19.17-27)

26Thaus puab taabtom coj Yexus tawm moog; puab ntsib ib tug txivneej hu ua Ximoos kws nyob huv lub nroog Kulenes kws nyob peg yaajsaab tuaj yuav moog rua huv lub nroog. Puab nteg nwg hab yuam kuas nwg kwv tug ntoo khaublig nrug Yexus moog.

27Cov tuabneeg coob coob kws lawv Yexus qaab ntawd, muaj ib cov quaspuj tsaa suab hlo quaj nrov nrov, rua qhov puab hlub Yexus heev. 28Yexus tig moog saib puab hab has tas, “Cov quaspuj kws nyob huv lub nroog Yeluxalees! Mej tsi xob quaj kuv, tabsis ca le quaj mej hab mej tej mivnyuas. 29Thaus txug lub sijhawm ntawd, suavdlawg yuav has tas, ‘Cov quaspuj kws ibtxwm xeeb tsi taug mivnyuas, hab cov quaspuj kws tsi tau xeeb dlua mivnyuas, hab tsi tau pub dlua mig rua mivnyuas noj, yog cov kws moov zoo!’ 30Lub sijhawm ntawd, yuav muaj tuabneeg has rua tej roob has tas, ‘Nphau lug tsuam peb!’ Hab yuav has rua tej pov roob has tas, ‘Pob lug txhub peb!’ #Hau 10.8; Tsm 6.16 31Yog puab tub ua le nuav rua tsob ntoo kws tseem nyoog, thaus tsob ntoo qhuav lawm, puab yuav ua le caag rua?”

32Puab coj ob tug txivneej kws ua tubsaab moog tua nrug Yexus. 33Thaus puab moog txug ntawm qhov chaw kws hu ua “Pobtxhaa Taubhau,” puab muab Yexus ntsa rua sau ntoo khaublig hab muab txhus rua qhov ntawd, hab muab obtug tubsaab ntsa rua sau ntoo khaublig, muab ib tug txhus rua ntawm Yexus saab xis, hab muab ib tug txhus rua ntawm Yexus saab txhumphem. 34Yexus has tas, “Txiv, thov koj zaam txim rua puab! Rua qhov puab tsi paub has tas puab ua dlaabtsi.”#23.34 Tej phoo qub tsi muaj cov lug, Yexus has tas, “Txiv, thov koj zaam txim rua puab! Rua qhov puab tsi paub has tas puab ua dlaabtsi”.#Pnk 22.18

Puab muab Yexus cev rig tsho lug twv saib leejtwg yuav tau yaam twg. 35Tej tuabneeg suavdlawg sawv ib caag saib. Cov Yudais cov thawjcoj thuam Yexus has tas: “Nwg tub cawm tau lwm tug; yog has tas nwg yog tug Mexiyas kws Vaajtswv xaiv tag, nwg ca le paab kuas nwg dlim!”#Pnk 22.7

36Cov tubrog thuam Yexus hab puab muab cawv txiv maab qaub lug cev rua Yexus haus, #Pnk 69.21 37hab has tas, “Yog koj yog cov Yudais tug vaajntxwv tag, koj ca le paab kuas koj dlim!”

38Muaj ib cov lug sau rua ntawm ib dlaim txag kws nyob ncaaj ntawm Yexus taubhau rua sau has tas, “Tug nuav yog cov Yudais tug vaajntxwv.”

39Ob tug tubsaab kws puab muab ntsa rua sau ntoo khaublig ntawd, ib tug thuam Yexus has tas, “Koj tsi yog tug Mexiyas los? Koj ca le paab koj, hab paab kuas wb dlim!”

40Tabsis muaj dlua ib tug tshev has tas, “Koj tsi ntshai Vaajtswv los? Koj tub raug txim ib yaam nkaus le nwg hab. 41Wb raug txim le nuav yeej tsimnyog qhov kws wb ua txhum; tabsis tug nuav tsi tau ua txhum dlaabtsi le.” 42Nwg has rua Yexus has tas, “Thaus koj rov qaab lug ua Vaajntxwv, thov koj ncu txug kuv hab.”

43Yexus has rua nwg has tas, “Kuv qha tseeb rua koj has tas, ‘Nub nua koj yuav tau nrug kuv nyob sau qhov chaw kws kaaj sab lug.’ ”

Yexus Tuag

(Mathais 27.45-56; Malakaus 15.34-41; Yauhaas 19.28-30)

44Thaus nub ntseg, lub nub tsi ci lawm, hab lub tebchaws tsaus ntuj nti moog txug thaus peb teev; 45Dlaim ntaub kws thaiv huv lub Tuamtsev txawm ndluag rhe ua ob dlaig.#Tsd 26.31-33 46Yexus hu nrov nrov has tas, “Txiv, kuv muab kuv txujsa tso rua huv koj txhais teg!” Yexus has le ntawd taag, nwg txawm tuag lawm.#Pnk 31.5

47Tug thawj tubrog pum le ntawd, nwg qhuas Vaajtswv has tas, “Yog tag, tug nuav yeej yog tuabneeg ncaaj nceeg!”

48Thaus cov tuabneeg kws tuaj saib pum le ntawd, puab ntaus hauvsab hab rov qaab moog tsev lawm. 49Cov tuabneeg kws ibtxwm paub Yexus, hab cov quaspuj kws nrug Yexus tuaj peg lub xeev Kalilais tuaj, puab sawv dleb dleb saib tej nuav.#Luk 8.2-3

Log Yexus

(Mathais 27.57-61; Malakaus 15.42-47; Yauhaas 19.38-42)

50-51Muaj ib tug txivneej hu ua Yauxej tuaj peg lub nroog Alimathas huv lub xeev Yudas tuaj. Nwg yog ib tug tuabneeg zoo kws suavdlawg fwm, hab nwg naj nub tog Vaajtswv lub Tebchaws kws yuav lug, hab nwg yog cov Yudais ib tug numtswv, tabsis thaus puab saablaaj yuav txav txim rua Yexus, nwg tsi pum zoo tej kws puab ua ntawd. 52Nwg moog cuag Philaj hab thov Philaj muab Yexus lub cev rua nwg. 53Ces nwg muab Yexus lub cev txu, muab qhwv hab muab kwv moog tso rua huv lub qhov ntxaa kws luas txaug rua huv ib phaab pobzeb, yeej tsi tau muaj leejtwg coj tuabneeg moog tso rua huv le. 54Nub ntawd yog nub kws npaaj qhov txhua chaw tseg rua nub Xanpataus kws tub lug yuav txug.

55Cov quaspuj kws nrug Yexus tuaj peg Kalilais tuaj, puab nrug Yauxej moog, puab pum lub qhov ntxaa, hab Yauxej muab Yexus lub cev tso le caag los puab pum huv tuabsi. 56Puab rov moog tsev, puab npaaj tej tshuaj tsw qaab hab tej roj tsw qaab, yuav nqaa moog pleev Yexus lub cev.#Tsd 20.10; 2 Kev 5.14

Nub Xanpataus puab su lawv le Vaajtswv txuj Kevcai qha tseg lawm.

Currently Selected:

Lukas 23: HNJ2000

Highlight

Copy