Chivkeeb 42

Yauxej Cov Tijlaug Moog Yuav Nplej Huv Tebchaws Iziv

1Thaus Yakhauj nov tas nyob huv tebchaws Iziv muaj nplej, nwg txhaj has rua nwg cov tub has tas, “Uacaag mej pheej yuav nyob hlwb-hluav le ko xwb? 2Kuv nov tas huv tebchaws Iziv muaj nplej. Cale moog lawm nraag hab moog yuav nplej lug rua peb, sub peb txhaj tsi tuag tshaib.” #Tegnum 7:12 3Yogle ntawd, Yauxej kaum leej tijlaug txhaj moog yuav nplej huv tebchaws Iziv. 4Tabsis Yakhauj tsi tso Yauxej tug kwv Npeeyamees nrug cov tijlaug moog, ruaqhov Yakhauj ntshai nyobtsaam muaj tej yaam tsi zoo lug raug Npeeyamees.

5Yakhauj cov tub nrug luas lwmpaab tuabneeg moog yuav nplej rua huv tebchaws Iziv, ruaqhov kuj muaj kev tshaib nqhes nyob huv tebchaws Kana-aas hab. 6Yauxej kws yog tug tswvxeev huv lub tebchaws Iziv, yog tug muag nplej rua txhua tsaav tuabneeg kws nyob thoobplawg tebchaws. Yogle ntawd, Yauxej cov tijlaug txhaj tuaj hab txhuscaug ndlua pe ntawm nwg xubndlag nyo hau ua ntsejmuag ti nkaus huv aav. 7Thaus Yauxej pum dlheev nwg cov tijlaug, nwg tseem ncu tau puab, tabsis nwg txhobtxwm ua tug tsi paub puab le. Nwg nug puab nyaav ncawv has tas, “Mej tuaj qhovtwg tuaj?”

Puab teb tas, “Peb tuaj peg tebchaws Kana-aas tuaj yuav mov noj.”

8Yauxej tseem ncu tau nwg cov tijlaug, tabsis puab ncu tsi tau nwg lawm. 9Nwg ncu txug ob zaaj npausuav kws nwg tau ua txug puab, nwg has rua puab tas, “Mej yog cov tuabneeg kws soj tebchaws lov sav! Mej tuaj soj peb lub tebchaws seb qhovtwg yog qhov tsi muajzug xwb los sav!” #Chiv 37:5-10

10Puab teb tas, “Tug tswv, tsi yog le ko; peb yog koj cov tubqhe, peb tuaj nuav yog peb tuaj thov yuav mov moog noj xwb. 11Peb cov nuav puavleej yog kwvtij. Peb yog tuabneeg ncaajnceeg, peb tsi yog tuabneeg tuaj soj tebchaws.”

12Yauxej has rua puab tas, “Yeej tsi yog le mej has! Yeej yog mej tuaj soj peb lub tebchaws seb qhovtwg yog qhov tsi muajzug xwb ntaag!”

13Puab has tas, “Tug tswv, peb muaj kaum-ob leeg kwvtij, peb koom tuableeg txiv kws nyob huv tebchaws Kana-aas xwb. Peb ib tug kwv tuag lawm, hab tshuav tug kwvntxawg nrug peb txiv nyob peg tsev.”

14Yauxej teb tas, “Yeej yog le kuv has tag lau; mej yog tuabneeg soj tebchaws xwb-xwb le! 15Kuv yuav sim mej le nuav: kuv thov tuav Falaus lub npe coglug has tas, yog mej tsi coj mej tug kwvntxawg tuaj rua ntawm nuav, mas kuv yuav tsi tso mej moog tsev le. 16Mej cov ib tug yuavtsum moog coj mej tug kwv tuaj. Dlua le cov mas yuavtsum coj moog kaw txug nub kws tshuaj meej tas tej lug kws mej has ntawd puas tseeb tag. Tsi le ntawd, yog Falaus tseem muaj sa nyob, tes mej yeej yog tuabneeg tuaj soj peb lub tebchaws xwb ntaag.” 17Yauxej txhaj coj puab moog kaw rua huv tsev lojcuj tau peb nub.

18Nub thib peb Yauxej txhaj has rua puab tas, “Kuv yog ib tug tuabneeg kws fwm Vaajtswv, yog mej ua tau yaam nuav, mej txhajle yuav muaj sa nyob moog ntxiv. 19Yog tas mej yeej yog tuabneeg ncaajnceeg tag, ca mej cov nuav ib tug nyob huv lub tsev lojcuj nuav, dlua le cov, mej cale thauj tej nplej kws mej yuav tau lawm moog cawm mej tsev tuabneeg kws taabtom muaj kev tshaib nqhes. 20Tabsis mej yuavtsum coj kuas tau mej tug kwvntxawg tuaj rua kuv. Qhov nuav txhaj yuav qha tau has tas tej lug kws mej has lawm yeej muaj tseeb, hab kuv txhaj yuav tsi muab mej tua povtseg.” Puab pumzoo ua lawvle Yauxej has.

21Puab txhaj sisthaam zumzawg has tas, “Yog lau, nwgnuav peb raug tej kev txomnyem nuav los tub yog vim tej kws peb tau ua rua peb tug kwv lawm. Peb yeej pum ntsoov nwg raug kev txomnyem luj heev hab nwg tub thov peb kawg, tabsis peb tsi quavntsej nwg le. Vimle nuav ntaag lau, nwgnuav peb txhaj raug kev txomnyem.”

22Lunpees has tas, “Kuv tub has rua mej tas tsi xob ua phem rua tug mivnyuas ntawd, tabsis mej tsi noog kuv has le ne! Zagnua peb yuav tau them tug nqe ntawm nwg txuj kev tuag lau!” #Chiv 37:21-22 23Yauxej yeej totaub tej kws puab has huv tuabsi, tabsis puab tsi paub xwb, ruaqhov thaus nwg nrug puab thaam, nwg kuas tuabneeg txhais lug xwb. 24Yauxej txawm tawm ntawm puab moog rua ib qho hab quaj. Thaus nwg rov has taug lug lawm, nwg txhaj tig rov lug haslug rua puab, hab muab Xime-oos khi kag taabmeeg puab.

Yauxej Cov Tijlaug Rov Moog Tsev

25Yauxej has kuas nwg cov tubqhe muab nplej ntim rua huv nwg cov tijlaug tej naab kuas puvnkaus, muab puab tej nyaj ntsaws rov rua huv puab tej naab, hab ntim su huv tuabsi rua puab tau noj taug kev moog tsev. Cov tubqhe ua tej nuav tavlog. 26Tes cov tijlaug tsaws tej nplej kws puab yuav ntawd rua sau puab cov neegluav hab txawm sawvkev moog tsev lawm.

27Thaus puab lug su ib mos ntawm ib tog kev, muaj ib tug txawm qheb nwg lub ncauj naab muab nplej lug rua nwg tug neegluav noj, uacav nwg cov nyaj tseem nyob ntawm lub ncauj naab. 28Nwg txhaj has rua nwg cov kwvtij has tas, “Uacaag leejtwg rov muab kuv cov nyaj tso rua huv kuv lub naab nuav!” Puab poobsab hab ntshai heev, puab txhaj sisnug zumzawg has tas, “Vaajtswv ua dlaabtsi le nuav rua peb?”

29Thaus puab rov lug txug ntawm puab txiv Yakhauj kws nyob huv tebchaws Kana-aas lawm, puab pav txhua yaam xwmtxheej kws puab moog ntsib rua puab txiv noog has tas, 30“Tug tswvxeev ntawm lub tebchaws Iziv haslug nyaum kawg rua peb hab lam has tas peb yog cov tuabneeg kws moog soj nwg lub tebchaws xwb. 31Peb txhaj teb tas, ‘Peb yog tuabneeg ncaajnceeg, peb tsi yog cov tuabneeg moog soj tebchaws. 32Peb cov kwvtij muaj kaum-ob leeg, hab peb puavleej koom tuableeg txiv xwb. Muaj ib tug tuag lawm, nwgnuav tshuav ib tug kwvntxawg nrug peb txiv nyob peg tebchaws Kana-aas.’

33“Tug nom ntawd teb tas, ‘Yog tas mej yog tuabneeg ncaajnceeg tag, mas mej yuavtsum ua le nuav: mej cov nuav ib tug yuavtsum tau nrug kuv nyob, dlua le cov, mej cale thauj tej nplej moog cawm mej tsev tuabneeg kws taabtom muaj kev tshaib nqhes. 34Tabsis mej yuavtsum coj kuas tau mej tug kwvntxawg tuaj rua kuv. Kuv txhaj paub tas mej yog tuabneeg ncaajnceeg, tsi yog tuabneeg tuaj soj tebchaws; kuv txhaj yuav tso mej tug tijlaug rov rua mej, mas mej txhaj tau nyob huv lub tebchaws nuav ua laag ua luam.’ ”

35Thaus puab muab puab cov naab nplej laub, nyag rov pum nyag cov nyaj nyob huv nyag lub naab; thaus puab hab puab txiv Yakhauj pum cov nyaj ntawd, puab ntshai kawg le. 36Puab txiv has rua puab tas, “Mej yuav ua kuas kuv nplaam kuv cov mivnyuas txhua tug nua lov? Yauxej los tsi nrug peb nyob lawm; Xime-oos los tsi nrug peb nyob lawm; zagnua mej tseem yuav coj Npeeyamees moog hab. Txhua yaam puavleej lug raug kuv huv tuabsi!”

37Lunpees has rua nwg txiv has tas, “Yog kuv tseem tsi coj Npeeyamees rov lug rua koj hab, tes koj muab kuv ob tug tub tua povtseg los tau. Tso nwg rua kuv ua tug saib, kuv yeej yuav coj nwg rovqaab lug xwb.”

38Tabsis Yakhauj has tas, “Kuv tsi kheev kuv tug tub ntxawg nrug mej moog, ruaqhov nwg tug tijlaug tub tuag lawm, tshuav nwg tuableeg xwb. Yog laam muaj xwm tsi zoo lug raug nwg tom tej tog kev, kuv tub laug heev lawm, yog tseem muaj tej kev quajntsuag lug raug kuv hab tes ntshe kuv yuav cale txhawm chim tuag le lau!”

Currently Selected:

Chivkeeb 42: HNJ2022

Highlight

Copy