Chivkeeb 22

Vaajtswv Kuas Anplahaas Muab Ixaj Fij

1Tau ib ntus tom qaab nuav Vaajtswv txawm sim Anplahaas sab. Vaajtswv hu Anplahaas has tas, “Anplahaas!” Anplahaas teb has tas, “Kuv nyob ntawm nuav.”

2Vaajtswv has tas, “Koj ca le coj koj tuab leeg tub Ixaj kws koj hlub tshaaj plawg, moog rua peg tebchaws Mauliyas. Koj ca le muab nwg tua hlawv fij pub rua kuv sau lub roob kws kuv yuav qha rua koj.”#2 Xvn 3.1

3Nub tom qaab thaus sawv ntxuv Anplahaas sawv lug txav tawg npaaj coj moog hlawv khoom fij, muab tawg nog rua nwg tug neeg luav thauj, coj Ixaj hab coj nwg ob tug tubkhai nrug nwg moog. Puab txawm sawv kev moog rua peg qhov chaw kws Vaajtswv tau qha rua Anplahaas lawm. 4Thaus puab moog tau peb nub ke lawm, Anplahaas tsaa qhovmuag saib pum thaaj chaw kws Vaajtswv qha rua nwg tseem nyob dleb. 5Ces nwg txawm has rua ob tug tubkhai has tas, “Meb nrug tug neeg luav nyob ntawm nuav. Kuv tug tub hab kuv yuav moog pehawm Vaajtswv nyob rua peg, thaus wb pehawm taag, wb maam rov qaab lug.”

6Anplahaas muab cov tawg kws yuav hlawv khoom fij rua Ixaj kwv, Anplahaas nqaa rag hab suavtawg, ces obtug txawm moog rua peg roob lawm, 7Ixaj has tas, “Txiv!”

Anplahaas teb has tas, “Tub, koj has dlaabtsi?”

Ixaj nug has tas, “Txiv, kuv pum koj muaj suavtawg hab muaj tawg, tabsis tug mivnyuas yaaj kws yuav coj moog tua hlawv fij nyob qhov twg?”

8Anplahaas teb has tas, “Vaajtswv yuav muab ib tug mivnyuas yaaj rua wb.” Ces obtug ob txiv tub txawm ua ke taug kev moog lawm.

9Thaus obtug moog txug ntawm qhov chaw kws Vaajtswv qha rua Anplahaas lawm, Anplahaas txhaj teeb tau ib lub thaaj hab muab tawg tso rua sau lub thaaj ntawd. Nwg txhaj muab nwg tug tub paav hab coj moog tso rua sau cov tawg, sau lub thaaj.#Yak 2.21 10Ces Anplahaas txawm khaws nkaus rag lug yuav nkaug Ixaj. 11Taamsim ntawd tug TSWV tug timtswv hu tawg ntho sau ntuj tuaj rua Anplahaas has tas, “Anplahaas, Anplahaas!”

Anplahaas teb has tas, “Kuv nyob ntawm nuav.”

12Tug timtswv has tas, “Tsi xob tua tug mivtub ko hab tsi xob ua le caag rua nwg hlo le, nwgnuav kuv paub has tas koj yeej noog lug hab fwm Vaajtswv heev, rua qhov koj tsi khauvxwm koj tuab leeg tub, koj zoo sab hlo coj tuaj pub rua kuv.”

13Anplahaas tig hlo saib puagncig, nwg pum ib tug laug yaaj kub dlaig ntawm ib xyov maab. Anplahaas txhaj moog muab lug tua hlawv fij rua Vaajtswv hloov nwg tug tub chaw.#Hen 11.17-19 14Anplahaas txhaj tis npe rua qhov chaw ntawm hu ua, “Tug TSWV npaaj tseg.”#22.14 npaaj tseg; lossis nwg pum. Hab txawm yog naj nub nwgnuav los tuabneeg tseem pheej hu has tas, “Sau tug TSWV lub roob kws nwg npaaj tseg.”#22.14 npaaj tseg; lossis tub pum lawm.

15Tug TSWV tug timtswv rov hu sau ntuj tuaj rua Anplahaas dlua zag ob has tas, 16“Kuv coglug lug ntawm kuv lub npe, kuv yuav foom koob moov nplua mag rua koj, tug TSWV yog tug has le nuav. Rua qhov koj tau ua lawv le kuv has hab koj tsi khauvxwm koj tuab leeg tub kws koj muab fij rua kuv. 17Kuv txhaj coglug tseg rua koj has tas, kuv yuav pub koj muaj xeebntxwv coob npaum le tej nubqub sau nruab ntug, lossis npaum le tej xuabzeb nraag ntug havtxwv. Koj cov xeebntxwv yuav ntaus yeej puab cov yeebncuab.#Hen 6.13,14#Hen 11.12 18Hab kuv yuav foom koob moov ntawm koj cov xeebntxwv moog rua txhua tsaav tuabneeg kws nyob huv qaab ntuj nuav, vim koj noog kuv lug.”#Ten 3.25 19Anplahaas txhaj rov qaab lug rua nraag nwg ob tug tubkhai, hab puab rov lug rua nraag Npesenpas kws yog Anplahaas qhov chaw nyob lawm.

Nahaus Cov Xeebntxwv

20Tau tsi ntev lug tom qaab nuav muaj tuabneeg moog qha rua Anplahaas has tas, “Milekas yug tau yim leej mivnyuas rua koj tug kwv Nahaus.” 21Uxes yog tug tub hlub, Npuxes yog tug kwv, Kemuyees kws yog Alaas txiv, 22Khexes, Haxaus, Filedas, Yilafes, hab Npethu-ees. 23Npethu-ees yog Lenpekas txiv. Milekas yug tau yim leej tub nuav rua Nahaus kws yog Anplahaas tug kwv. 24Nahaus tug nam yau Lehumas, yug tau Tenpas, Nkahas, Tahases hab Ma-akas.

Currently Selected:

Chivkeeb 22: HNJ2000

Highlight

Copy