Chivkeeb 19

Lub Nroog Xaudoos Tej Kev Txhum

1Thaus ob tug timtswv moog txug rua huv lub nroog Xaudoos tub yuav tsaus ntuj, Lauj tseem taabtom nyob ntawm roojvaag nroog. Thaus nwg pum dlheev obtug, nwg txawm sawv tseeg moog cuag obtug. Nwg moog txhus caug ndlua ntawm obtug xubndlag 2hab has tas, “Ob tug tswv, kuv tuaj ntawm nuav yog yuav tu meb. Thov meb moog su huv kuv tsev. Meb lug ntxuav kutaw hab pw ib mos huv kuv tsev. Pigkig kaaj ntug meb maam le sawv ntxuv moog.”

Tabsis obtug teb has tas, “Wb tsi moog, mo nuav wb yuav pw ntawm tshaav puam huv lub plawv nroog nuav xwb.”

3Vim Lauj muaj sab caw obtug tag, obtug txhaj nrug Lauj moog su huv nwg tsev. Lauj kuas nwg cov tubkhai ci ncuav hab ua zaub ua mov qaab rua ob tug qhua ntawd noj. Thaus ua tau sav lawm obtug txhaj le noj mo.

4Thaus ob tug qhua tseem tsi tau nce chaw pw, taagnrho tej txivneej kws nyob huv lub nroog Xaudoos, tsi has laug hab hluas, puavleej dlha nroo ntwg tuaj vij nkaus Lauj lub tsev. 5Puab hu Lauj tawm tuaj hab nug has tas, “Ob tug txivneej kws mo nuav tuaj su huv koj tsev nyob qhov twg? Ca le coj obtug tawm tuaj rua peb, peb yuav ntxag obtug.”

6Lauj tawm moog rua saab nrau hab muab qhovrooj kaw rua. 7Lauj has rua puab tas, “Cov phoojywg, thov mej tsi xob ua phem le nuav lauj! 8Mej noog kuv has, kuv muaj ob tug ntxhais tseem yog nkaujxwb tsi tau thaam dlua hluas nraug le. Thov ca kuv coj obtug tuaj rua mej, hab mej xaav ua le caag rua obtug los mej ca le ua lawv le mej sab nyam. Tabsis thov mej tsi xob ua le caag rua ob tug txivneej ntawd, obtug tuaj ua qhua txug huv kuv tsev, kuv yuavtsum tsomkwm obtug.”#Ctt 19.22-24

9Tabsis puab teb Lauj has tas, “Nyuas tuabneeg txawv tebchaws ko, ca le txaav kev rua peb! Koj yog leejtwg, koj muaj cai tuaj cheem peb ua dlaabtsi? Ca le txaav kev. Yog koj tsi txaav kev, peb yuav ua phem rua koj tshaaj peb ua rua obtug hab.” Puab ca le thawb ntag Lauj rov qaab hab naam zog moog tsoo kuas qhovrooj tawg. 10Tabsis ob tug txivneej kws nyob huv tsev qheb hlo qhovrooj moog nqug kag Lauj rov qaab lug rua huv tsev hab muab qhovrooj kaw nkaus rua. 11Ces taamsim ntawd obtug txawm ua rua cov txivneej kws nyob saab nrau dligmuag taag huv tuabsi, puab txhaj tsi pum kev nrhav lub qhovrooj.#2 Vnt 6.18

Lauj Tsiv Tawm huv Lub Nroog Xaudoos

12Ob tug txivneej ntawd has rua Lauj has tas, “Yog koj tseem tshuav tej tub, tej ntxhais, tej vauv, lossis kwvtij neejtsaa kws nyob huv lub nroog nuav, kuas puab ca le tawm tsiv taamsim nuav moog, 13rua qhov wb taabtom yuav ua kuas lub nroog nuav puamtsuaj moog. Tug TSWV tau nov has tas cov tuabneeg huv lub nroog nuav ua phem ua qas kawg nkaus le, nwg txhaj khaiv wb lug rhuav lub nroog Xaudoos nuav kuas puamtsuaj.”

14Ces Lauj txawm moog has rua ob tug tub hluas kws qhab nwg ob tug ntxhais lawm has tas, “Meb ca le tsiv tawm huv lub nroog nuav moog, rua qhov tug TSWV taabtom yuav rhuav lub nroog nuav kuas puamtsuaj.” Tabsis obtug xaav has tas, yog Lauj laam tso dlaag xwb.

15Thaus kaaj ntug txoog ob tug timtswv tub lug txhib kuas Lauj maaj nrooj ntaag. Obtug has tas, “Kawgkag maj! Ca le coj koj quaspuj hab koj ob tug ntxhais tawm taamsim nuav, mej txhaj yuav tsi tuag thaus lub nroog nuav raug kev puamtsuaj.” 16Lauj tseem pheej ua xyem xyaav. Txawm le ntawd los tug TSWV tseem taabncuab Lauj heev, yog le ntawd, ob tug txivneej txhaj tuav Lauj, Lauj quaspuj hab Lauj ob tug ntxhais teg hab coj puab tawm huv lub nroog moog.#2 Pet 2.7 17Ces ib tug timtswv txawm has tas, “Tsiv tag kuas dlim! Tsi xob tig saib rov tom qaab hab tsi xob su huv lub haav nuav. Tsiv moog kuas nto plawg sau cov ncov roob mej txhaj yuav tsi tuag.”

18Tabsis Lauj teb has tas, “Tug TSWV, thov tsi xob ca peb tsiv moog rua tid. 19Koj hlub kuv kawg nkaus hab tub cawm kuv txujsa dlim lug txug txij nua lawm. Tabsis cov ncov roob ntawd nyob dleb heev, ntshai tsaam kev tuag caum cuag kuv, hab kuv tuag ua ntej kuv moog txug tid. 20Koj puas pum lub nyuas nroog tid? Lub nroog ntawd txhaj nyob ze dlua xwb. Thov ca kuv moog lawm tid, koj yeej pum has tas yog lub nroog miv, hab yuav cawm tau kuv txujsa.”

21Nwg teb has tas, “Tau los mas, kuv pum zoo ntaag. Kuv yuav tsi ua kuas lub nroog tid puamtsuaj. 22Kawgkag! Ca le moog! Kuv tog tsi ua ib yaam dlaabtsi moog txug thaus kws koj tsiv moog txug tid tsaiv.”

Rua qhov Lauj hu lub nroog tid ua lub nroog miv, txhaj muab lub nroog ntawd hu ua Xau-as.#19.22 Xau-as: Lub npe nuav, has le Henplais lu lug kws has tas, “miv.”

Xaudoos hab Kaumaulas Raug Puamtsuaj

23Thaus Lauj tsiv moog txug ndlua tim lub nroog Xau-as taabtom nub tawm plawg tim npoo ntuj. 24Taamsim ntawd tug TSWV tso suavtawg leejfaaj poob sau ntuj lug kub lub nroog Xaudoos hab lub nroog Kaumaulas, 25txhaj ua rua ob lub nroog ntawd hab taagnrho lub taj nraag, nrug tej tuabneeg kws nyob rua huv hab txhua yaam nroj tsuag qoobloo kws tuaj huv thaaj tsaam ntawd raug puamtsuaj taag.#Mat 10.15; 11.23,24; Luk 10.12; 17.29; 2 Pet 2.6; Yud 7 26Tabsis Lauj tug quaspuj tig saib tom qaab, nwg txawm ca le khov kag ua ib tug ncej ntsev.#Luk 17.32

27Nub tom qaab, thaus sawv ntxuv Anplahaas maaj ceev nrooj moog rua tom qhov chaw kws nwg sawv tim ntsej tim muag ntawm tug TSWV. 28Nwg tsaa qhovmuag saib lub nroog Xaudoos hab lub nroog Kaumaulas taagnrho rua lub taj nraag ntawd, nwg pum paa tawg nchu auv nab huv thaaj tsaam ntawd tuaj, cuag nkaus le hlawv ib dlaim teb. 29Txawm yog Vaajtswv rhuav ob lub nroog huv lub taj nraag kws Lauj nyob ntawd puamtsuaj taag lawm los nwg tseem ncu ntsoov Anplahaas rua nruab sab hab tso kev rua Lauj tsiv kuas dlim txujkev puamtsuaj.

Cov Mau-am hab Cov Amoos

30Vim qhov kws Lauj ntshai nyob huv lub nroog Xau-as, nwg hab nwg ob tug ntxhais txhaj tsiv moog nyob huv lub qhov tsua peg cov ncov roob. 31Tug ntxhais hlub has rua nwg tug nam hluas tas, “Wb txiv tub laug heev lawm, hab nyob thoob plawg huv nplajteb#19.31 thoob plawg huv nplajteb; lossis lub tebchaws nuav. nuav tsi muaj txivneej tuaj yuav wb kuas wb muaj mivnyuas le lawm. 32Ca le lug, wb muab cawv txiv maab rua txiv haus kuas qaug, ces wb moog nrug txiv pw kuas wb muaj mivnyuas.” 33Mo ntawd obtug txawm muab cawv txiv maab rua leej txiv haus, ces tug ntxhais hlub txhaj moog nrug nwg txiv pw. Leej txiv qaug cawv heev nwg txhaj tsi paub has tas nwg tug ntxhais lug nrug nwg pw.

34Nub tom qaab tug ntxhais hlub has rua nwg tug nam hluas tas, “Naag mo kuv tub moog nrug txiv pw lawm, ib chim tsaus ntuj wb rov muab cawv rua txiv haus dlua, ces koj tsua moog nrug nwg pw. Ua le ntawd wb nyag txhaj muaj nyag mivnyuas lug ntawm wb txiv.” 35Yog le ntawd, obtug rov muab cawv txiv maab rua leej txiv haus dlua, ces tug ntxhais yau txhaj moog nrug leej txiv pw. Leej txiv kuj rov qaug cawv heev nwg txhaj tsi paub has tas nwg tug ntxhais lug nrug nwg pw. 36Yog le ntawd, Lauj ob tug ntxhais txhaj xeeb tub lug ntawm obtug txiv. 37Lauj tug ntxhais hlub txawm yug tau ib tug tub, nwg muab tis npe hu ua Mau-am.#19.37 Mau-am: Lub npe nuav, has le Henplais lu lug kws has tas, “Yog chiv lug ntawm kuv txiv.” Mau-am yog yawmkoob rua tsaav tuabneeg Mau-am lug txug naj nub nua. 38Lauj tug ntxhais yau los yug tau ib tug tub hab, nwg muab tis npe hu ua Npeenamis.#19.38 Npeenamis: Lub npe nuav lug Henplais txhais has tas, “Kuv tug tub kwvtij” hab lub suab has le lu lug Henplais kws has tas “Cov Amoos.” Nwg txhaj yog tsaav tuabneeg Amoos tug yawmkoob lug txug naj nub nua.

Currently Selected:

Chivkeeb 19: HNJ2000

Highlight

Copy