Tegnum 6

Xaiv Xyaa Leej Ua Num

1Lub sijhawm ntawd muaj tuabneeg lug ua Yexus le thwjtim coob zujzug ntxiv, tes cov Yudais kws haslug Kilis hab cov Yudais kws haslug Henplais txawm tsi sishum. Cov Yudais kws haslug Kilis ywg has tas txhua nub kws faib zaub-mov, puab tsi faib rua cov pujntsuag kws yog tuabneeg Yudais kws haslug Kilis. 2Tes kaum-ob tug timthawj txhaj hu taagnrho cov ntseeg tuaj uake hab has tas, “Tsi tsimnyog kws peb cov timthawj cale tso kev qha Vaajtswv Txujlug tseg es moog ua cov saib txug kev noj kev haus. 3Yogle ntawd, cov kwvtij, mej cale xaiv xyaa leej huv mej cov lug rua peb; puab yuavtsum yog cov kws suavdlawg fwm, puvnpo Vaaj Ntsujplig tug Dlawbhuv hab muaj tswvyim. Peb yuav tsaa puab ua tegnum nuav, 4sub peb txhaj yuav muaj sijhawm thov Vaajtswv hab qha Vaajtswv Txujlug.”

5Suavdlawg pumzoo ua lawvle cov timthawj has. Yogle ntawd, puab txhaj xaiv Xatefanus, tug kws puvnpo txuj kev ntseeg hab Vaaj Ntsujplig tug Dlawbhuv, hab xaiv Filiv, Paukhaulus, Nikanaus, Timoos, Pamenas, hab Nikaulus kws nyob peg lub nroog Aati-aukias tuaj, nwg yog Lwmtsaav Tuabneeg kws yaav taag lug tau kaavxeem lug coj Yudais txuj kev ntseeg. 6Cov ntseeg txawm coj xyaa leej ntawd lug rua cov timthawj, tes cov timthawj txhaj tsaa teg rua sau puab hab thov Vaajtswv rua puab.

7Vaajtswv Txujlug txawm nthuav dlaav moog zujzug. Cov ntseeg kws nyob huv lub nroog Yeluxalees tau fuamvaam coob heev ntxiv, hab muaj cov povthawj hlub coob leej tau lug ntseeg Yexus.

Xatefanus Raug Nteg

8Xatefanus yog ib tug kws puvnpo Vaajtswv txuj moovhlub hab fwjchim, nwg tau ua tej txujci tseemceeb hab ua tej kws tuabneeg xaav tsi thoob rua suavdlawg pum. 9Tabsis muaj qeeleej kws yog tswvcuab huv cov Tuabneeg Ywjxeeb#6:9: Tuabneeg Ywjxeeb: Yog cov Yudais kws luas nteg coj moog ua qhev, tabsis puab tau raug txhwv rovqaab lug lossis cale tau txais txuj kev ywjpheej rov lug ua puab tug lawm. lub tsev saablaaj (luas ibtxwm hu le ntawd), kws yog muaj cov Yudais kws tuaj huv lub nroog Kulenes hab huv lub nroog Alexaadias nyob rua huv. Puab cov ntawd hab cov Yudais kws tuaj peg lub tebchaws Kilikias hab huv lub xeev Exias tuaj, txawm nrug Xatefanus siscaav. 10Tabsis Vaaj Ntsujplig tau pub tswvyim zoo heev rua Xatefanus thaus nwg tsaa ncauj haslug, ua rua puab caav tsi tau nwg.

11Yogle ntawd, puab txawm ndlav qeeleej ua timkhawv dlaag has tas, “Peb nov nwg thuam Mauxes hab thuam Vaajtswv!” 12Puab ua le ntawd kuas cov pejxeem, cov txwjlaug hab cov xwbfwb kws qha Kevcai muaj kev kubntxhuv. Puab txhaj sau nthwv lug nteg Xatefanus hab coj nwg moog cuag cov thawjcoj huv Koomhum qebsab. 13Puab tseem coj ob-peb tug lug ua timkhawv dlaag has tas, “Tug txivneej nuav najnub thuam peb lub Tuamtsev kws dlawbhuv hab thuam Mauxes txuj Kevcai. 14Peb nov nwg has tas tug Yexus kws yog tuabneeg Naxalev nuav yuav muab lub Tuamtsev nuav rhuav hab yuav hloov Mauxes txuj kevcai kws Mauxes tau muab rua peb lawm!” 15Taagnrho cov tuabneeg kws nyob huv lub Koomhum Qebsab ntawd saibntsoov Xatefanus, puab pum tas nwg lub ntsejmuag zoo ib yaam le ib tug timtswv ceebtsheej lub.

Currently Selected:

Tegnum 6: HNJ2022

Highlight

Copy