लूका 17
17
पाप, विश्वास मेस्ये चेपर्देब काम
1येशूदे रङ्से स्यूस्स्यायूने यदे, ‘पाप चेने लैदेब जाँचयू तम्दम्ने रीय। तर धिक्कार, सूजोयूने पापने फस्तीस्ये पीनब मीने! 2कम्ब मीदे अम्ब चीदयू नङ्ने त्याने पाप चेने लैदीय ङूजे नीजीने रान्ताजे लूङ् च्यून्देबे ङूने समुद्रने छाबीलो ङूजे लागि सोरो ज्य क्यूक्क्य। 3#मत्ती 18:15रङ्सेजे बारेने होस्स्यार क्यूरो।
“नैजे च्योन्दे अपराध चीत्दे यलो ङूने फ्राची, मेस्ये ङूदे पश्चाताप चीत्दे यलो नदे ङूने क्षमा ची। 4नैजे च्योन्दे तीयाने ङ्यीफे सेमे नैजे विरुद्धने अपराध चीत्दे, मेस्ये ङ्यीफेने नैट्याने ल्वारदेबे ‘ङ पश्चाताप चीक्क्य’ यदेबे यलो, नदे ङूने क्षमा चीम्मी।”
5मूल स्यूस्स्यायूदे प्रभुने यदे, “ङीयूजे विश्वास बढ्दीमी।”
6प्रभुदे यदे, “नमयूने रोयोजे ल थोच्चेत्या विश्वास ख्यङ्लो नमयूदे अम्ब कीम्बूजे तङ्बोने, न ह्वाबदेबे समुद्रने फीप्प’ यलो, ङूदे ङ्यीन्क्य।
7“नमयू नङ्ने कोइजे त्वो रङ् यूदेबे या स्वान् छदेबे रङ्दे रदेयलो, ङूदे हम्ब त्वोने तुरुन्तै रदेबे चसे चने टूङ्’ यीया स्व? 8ङूदे ङूने बरू येरे अन्-यया? ‘ङैजे लागि चसे तयार ची, मेस्ये कूच्यू चेलाबे ख्या ङैदे चथूङ चे अन्जेन्दासेमे ङैजे सेवा ची। होर्दे ङ्येदे नदे च-थूङ ची।’ 9ङूदे च्योलप्रने काम चेमेस्ये ङूदे हम्ब त्वोने स्याबास पीन्क्या स्व? 10होरप्रने नमयूने च्योलब साप्ता काम जेन ङ्येदे नमयूदेये येरे य: ‘ङी काम अन्लादेब त्वो ख्यङ्, ङीदे रङ्सेदे चेपर्देप काम त्या चे ख्यङ्’।”
कुष्ठ बीदजे नव च्यू
11येशू यरूशलेमतेले प्रेन ख्य। ङू सामरिया मेस्ये गालीलजे चूम् क्यूत्देबे गीलीदे। 12येशू त त्याने गीलीब हैयाने ङूदे कुष्ट बीद लादीकब मी च्यू तूदे। चीन्तङ्ने मेर्देबे थमयूदे 13के केन्दे यदे, “ओ येशू गुरुज्यू, ङीयूने कृपा चीम्मी।”
14 #
लेवी 14:1-32
येशूदे थमयूने तङ्देबे यदे, “प्र, पूस्र्या ट्याने प्रदेबे रङ्सेने तन्।” थमयू प्रेनूबने तम् क्यूरी।
15थमयू नङ्ने त्यादे ङू तम् क्यूरेब तङ्दे, मेस्ये के केन् योन्देबे परमेश्वरजे महिमा चीदे-चीदे ङू ल्वारदे।
16मेस्ये येशूने धन्यवाद पीन्देबे ङूजे तोप्ने स्यूव पीन्दे। ङू सामरी ख्य।
17येशूदे यदे, “तम् क्यूरेब मी च्यू ते स्व? सूजो मी गू केने ख्यङ्? 18अम्ब फीदेश मीत्यामे ल्वारदेबे परमेश्वरजे सार्या चेब सूजो सूये अन्क्यूर्?” 19होर्दे येशूदे ङूने यदे, ‘लङ्, मेस्ये रङ्से लम् लादीकी। नैजे विश्वासदे नने तम् चीक्क ख्यङ्।”
परमेश्वरजे राज्य रेन ख्यङ्
मत्ती २४:२३-२८,३७-४१
20परमेश्वरजे राज्य कलङ् रीय यदेबे फरिसीयूदे ल्वेब पोजे जवाफने येशूदे थमयूने यदे, “परमेश्वरजे राज्य तङ्लाबे अन्र, 21मीयूदे, ‘ले, परमेश्वरजे राज्य अने ख्यङ्!’ या होने ख्यङ्!’ यदेबे य-अङ्खू, चेनेयलो ले, परमेश्वरजे राज्य नमयूजे अन्द्रने ख्यङ्।”
22येशूदे स्यूस्स्यायूने यदे, ‘येर दिन रीय, हन्छ्वाब नमयूदे मीजे चजे दिनत्या लेब सेम् चीक्क्य, तर नमयूदे तङ्स्ये त्वो। 23मीयूदे नमयूने यीय, ‘ले, ङू होने ख्यङ्!’ या ‘ले, ङू अने ख्यङ् यीय।’ तर थमयूजे ङ्ये-ङ्ये अम्प्रलाची। 24चेनेयलो केर्बे क्यूलीङ् क्याब मूजे नत्यादे सूजो नसेमे ओथ्याङ् चीक्क्य, मीजे चये रङ्सेजे दिनने येरप्रने क्यूक्क्य। 25तर खूम् ङूदे कूम सकस् सैदे पर्दीय मेस्ये अम्ब पुस्तादे योम्बीय।
26 #
उत्पत्ति 6:5-8
“नोआजे दिनने कर क्यूर ख्य, मीजे चजे दिननेये होरने क्यूक्क्य। 27#उत्पत्ति 7:6-24नोआ क्यू जहाज नङ्ने अन्-क्योइदासेमे मीयू चेन, थूङ्न ख्य, ङ्येन् चीन्न ख्य। मेस्ये हन्छ्वाबने जो बेस्सेबे रदेबे हून्डदे क्वाने सेक्कदे।
28 #
उत्पत्ति 18:20—19:25
“लोतजे दिननेये होरेने क्यूर ख्य, मीयू चेन ख्य, थूङ्न ख्य, कीनसोङ चीन्न ख्य, लू सूग्न ख्य, बन्दीन ख्य, 29कन्छ्वाब लोत सदोमदे योङ्रदे, हम्ब दिनेने मूदे मी मेस्ये गन्धक थर्रदेबे थमयू क्वाने भस्सम् चीक्कदे।
30“मीजे च रब दिनने येरप्रने क्यूक्क्य। 31#मत्ती 24:17,18; मर्कूस 13:15,16हम्ब दिनने सू कीम्जे कौसी फ्याने ख्य, ङूजे सामान कीम्नङ्ने ख्यङ्दे यली हम्ब कीनने ङू मो अन्तल्रला चीस्य। होप्रने रङ्ने ख्यबये अन्ल्वारला चीस्य। 32#उत्पत्ति 19:26लोतजे मजने ह्वे ची! 33#मत्ती 10:39; 16:25; मर्कूस 8:35; लूका 9:24; यूहन्ना 12:25सूदे रङ्से प्राण जोग्दे मेय, ङूदे हम्ब मल्गीय, मेस्ये सूदे रङ्से प्राण अन्जूक्दी, ङूदे हम्ब जूक्तीदे येक्क्य। 34ङ नमयूने यीय, हम्ब मून्दे ङ्ही नैत्याने ङ्यूम्नब क्यूक्क्य। त्या कूबीय मेस्ये त्या पङ्गीय। 35मदी ङ्ही रान्ताने ता थानब क्यूक्क्य। त्या कूबीय, त्या पङ्गीय। 36[मी ङ्ही रङ्ने काम चीन्नब क्यूक्क्य, त्या कूबीय, त्याब पङ्गीय।”]#१७:३६ मीयूङ्जे कोइ कोइ ग्रीक पाण्डूलिपीयूने अम्ब पद अन्लीख्दीये ख्यङ्।
37होर्दे थमयूदे येशूने लोत्दे, “कने प्रभु?”
ङूदे थमयूने यदे, “कैयाने स्यूनू ख्य, हैयाने ख्यत्तयू फूङ् क्यूक्क्य।”
Currently Selected:
लूका 17: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
