यूहन्ना 17
17
रङ्सेजे लागि येशूदे चेब प्रार्थना
1अम्ब पो य जेनमेस्ये येशूदे तो-स्वर्गतेले लेत्देबे यदे, “ओ, पाइ, बील फ्योरीक ख्यङ्, नैजे चजे महिमा तङ्लाबे चीम्मी, मेस्ये चदे नैजे महिमा तङ्लाबे चीम्मीस्य। 2चेनेयलो नदे ङूने मीयू फ्यानेने हुकुम चील्लेब चीम्मे ख्यङ्, मेस्ये नदे ङूने पीनब मीयू क्वानेने ङूदे पीन्स्य। 3जेम्से कलङ्बेये अन्सीबब जीया अम्ब ख्यङ्, यी थमयूदे न, तीत्यात्या सत्य परमेश्वरने स्येस्य, मेस्ये नदे कूल्बेब येशू ख्रीष्टने स्येस्य। 4नदे ङैने चै काम पीन्दे, हम्ब काम पूरा चीत्देबे पृथ्वीने नने महिमा चीन्न ख्यङ्। 5जेम्से ओ पाइ, संसार सृष्टि क्यूर यली खूम् नैजे खूम्ने ङैजे कर महिमा ख्य, ङैने नेप्रे येत्देबे हम्ब महिमा पीम्मी।
स्यूस्स्यायूजे लागि येशूजे प्रार्थना
6“संसारजे कम्ब मीयू नदे ङैने पीन्दे, थमयूने ङैदे नैजे मीन् स्येला चीम्मे ख्यङ्। थमयू नैजे ख्य, होर्दे थमयू नदे ङैने पीन्दे, मेस्ये थमयूदे नैजे वचन मन्दे ख्यङ्। 7नदे ङैने पीनब साप्ता पोयू न ख्यब नेदे रब ख्यङ्, थमयूने जेम्से था क्यूर ख्यङ्। 8चेनेयलो कम्ब पो नदे ङैने पीन्दे, हम्ब पो ङैदे थमयूने पीन ख्यङ्, मेस्ये थमयूदे अम्ब मन्दे ख्यङ्। नदे कूल्बीदेबे ङ र ख्यङ् यब पो थमयूदे पक्कने कोक ख्यङ्, होर्दे नदे ङैने कूल्बे ख्यङ् यदेबे थमयूदे विश्वास चे ख्यङ्। 9ङ थमयूजे लागि प्रार्थना चीक्क्य, संसारजे लागि ङ प्रार्थना अन्ची, तर कम्ब मीयू नदे ङैने पीन्दे थमयूजे लागि त्या प्रार्थना चीक्क्य। चेनेयलो थमयू नैजे ख्यङ्। 10ङैने ख्यब साप्ता थोकयू नैजेने ख्यङ् मेस्ये नैजे साप्ता थोकने ङैजे ख्यङ्। ङैजे महिमा थमयूने तङ ख्यङ्।
11“नै ट्याने ङ रेन ख्यङ्, जेम्से ङ संसारने कूम अन्टोङ्, तर थमयू अम्ब संसारने टूङ्क्य। येरेक्यूत्देबे ओ पवित्र प, ङैने पीनब मीयूने नैजे मीन्जे शक्तिदे जूक्तीमी, मेस्ये नेप्रे ङ त्या क्यूरप्रने थमयूये त्या क्यूस्स्य। 12#भजनसंग्रह 41:9; यूहन्ना 13:18थमयूप्रे ङ क्यून्नूतासेमे, नदे ङैने पीनब नैजे मीन्जे शक्तिदे थमयूने जूक्दीदे हीत्दे, तर नाश क्यूर पर्देब च त्यामे, सूजो सूत्यानेये नाश क्यूस्से अम्पीन्, चेनेयलो धर्मशास्त्र पूरा क्यूर पर्दे ख्य।
13“तर जेम्से ङ नैट्याने रेन ख्यङ्। थमयूजे सेम्ने ङैजे आनन्द पूरा क्यून्नूस्य यदेबे ङैदे अम्ब पो संसारने क्यूप्पने यीय। 14ङैदे थमयूने नैजे वचन पीन्दे, तर संसारदे थमयूने ह्यल चीत्दे, चेनेयलो ङ संसारजे तेप्रने थमयूये संसारजे दी। 15थमयूने संसारदे योन्देबे कूब यदेबे ङ नने प्रार्थना अन्ची, तर दुष्टजे शक्तिदे चैये चे अङ्ख्व चीत्देबे जूक्तीमी यब प्रार्थना चीक्क्य। 16ङ संसारजे तेप्रने थमयूये संसारजे दी। 17नैजे सत्यदे थमयूने पवित्र चीम्मी, नैजे वचन सत्य ख्यङ्। 18नदे ङैने संसारने कूल्बेप्रने थमयूनेये ङैदे संसारने कूल्बे ख्यङ्। 19थमयूजे लागि ङ रङ्सेने पवित्र चीक्क्य, चेनेयलो थमयूये तम्दम्ने पवित्र क्यूस्स्य।
विश्वास चेबयूजे लागि येशूजे प्रार्थना
20“ङ अम्बयूजे लागित्यामे प्रार्थना अन्ची, तर अम्बयूदे यब वचन ङ्यीन्देबे ङैने विश्वास चेब मीयूजे लागिये प्रार्थना चीक्क्य, 21होर्दे थमयू क्वाने त्या क्यूस्स्य। ओ पाइ, न केर्बे ङैप्रे ख्यङ्, मेस्ये ङैये नैप्रे ख्यङ्, होरप्रने थमयूये ङीनप्रे क्यूस्स्य, मेस्ये नदे ङैने कूल्बे ख्यङ् यदेबे संसारदे विश्वास चीस्स्य। 22कर महिमा नदे ङैने पीन्दे, हम्ब ङैदे थमयूने पीन ख्यङ्, ङीन त्या क्यूरप्रने थमयूये त्या क्यूस्स्य। 23ङ थमयूप्रे, होर्दे न ङैप्रे ख्यङ्। होरप्रने थमयूये च्याप्पाने त्या क्यूस्स्य। येर्बेने नदेने ङैने कूल्बे ख्यङ्, होर्दे नदे ङैने प्रेम चेप्रने थमयूनेये प्रेम चीक्क्य यब पो संसारदे क्व खूस्य।
24“पाइ, नदे ङैने पीनब मीयू क्वाने ङ केने क्यूक्क्य थमयूये ङैप्रेने क्यूस्स्य, मेस्ये ङैजे महिमा थमयूदे तङ खूस्य मेन ख्यङ्, हम्ब महिमा, संसारजे सृष्टि क्यूरयली खूम्मेस्येने ङैने प्रेम चेब क्यूत्देबे नदे ङैने पीन्क ख्य।
25“धार्मिक प, संसारदे नने अन्स्ये, तर ङैदे नने स्ये ख्यङ्, होर्दे नदे ङैने कूल्बे ख्यङ् यदेबे अम्बयूदेये स्ये ख्यङ्। 26कर प्रेमदे नदे ङैने प्रेम चीत्दे, होर प्रेम थमयूने क्यून्नूस्य, मेस्ये ङ थमयूप्रे क्यून्नूस्य यदेबे ङैदे नैजे मीन् अम्बयूने तम्मीक ख्यङ्, होर्दे नैजे मीन् अम्बयूने येतार्ने तम्मीनीय।”
Currently Selected:
यूहन्ना 17: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
