मूल स्यूस्स्यायूजे कामजे किताब 6
6
सेवा चेने मी ङ्यी सेलब
1हम्ब दिनने कन्छ्वाब स्यूस्स्यायूजे संख्या थेप्-थेप् क्यूट्ट ख्य, हन्छ्वाब हिब्रूयूजे विरुद्धने ग्रीक-यहूदीयूदे गन्गन् चीत्दे, चेनेयलो चसे भा कोप्प येतार्ने थमयूजे प्ल्यङ् सीयेब मदीयूदे हर्जो ख्य अनुसारजे चसे अम्प्रे ख्य। 2हन्छ्वाब स्यूस्स्यायूजे हूल्ने फूङ् पूत्देबे यदे, “परमेश्वरजे वचन प्रचार चेब काम क्यादेबे च-थूङजे सेवा चेब ङीने ज्य अन्तङ्।” 3होरेक्यूत्देबे च्योन्यू, नमयूजे अन्द्रदे पवित्र आत्मा, मेस्ये कूम बुद्धि ख्यब मेस्ये क्वाजे गेसेन् प्रेब मी ङ्यी सेल् थमयू अम्ब कामने भर्न चीदे। 4तर ङीनब प्रार्थना मेस्ये वचनजे सेवा चेब कामने पूरा सेमे पीन्क्य।”
5अम्ब पो हम्ब हुलजे क्वादेने सेम् पर्दीदे मेस्ये फूङ् क्यूरब मीयू क्वादेने ज्य थेदे, होर्दे थमयूदे पवित्र आत्मा मेस्ये विश्वासने भरीपूर्ण ख्यब स्तिफनस, फिलिप, प्रखरस, निकनोर, तीमोन, पर्मिनास मेस्ये एन्टिओखियाजे यहूदी धर्म मन्देब निकोलाउसने सेल्दे। 6थमयूदे हम्ब मीयूने मूल स्यूस्स्यायूजे खूम्ने रेत्दे मेस्ये थमयूदे मीयू फ्याने रङ्से ला येत्देबे प्रार्थना चीत्दे।
7परमेश्वरजे वचन थेप्थेप् फ्याइ, मेस्ये यरूशलेमने स्यूस्स्यायूजे संख्या सोरो कूम क्यूट्टदे। पूस्र्यायू नङ्जे कूमदे अम्ब विश्वासने ग्रहण चीत्दे।
स्तिफनस चूङ्कब
8स्तिफनसदे अनुग्रह मेस्ये शक्तिदे भरीपूर्ण क्यूत्देबे मीयूजे अन्द्रने केन्-केन् हार्मन्देब कामयू मेस्ये च्यूनूयू चीत्दे। 9तर कोइ कोइब कम्ब स्वतन्त्र पाटीजे सभा-कीम्जे मीयू (अम्बजे मीन् अम्बने ख्य), मेस्ये कुरेनी, अलेक्जेन्ड्रिया, किलिकिया मेस्ये एशियाजे मीयू ख्य, थमयू मेर्देबे स्तिफनसप्रे सवाल-जवाफ चेमेदे। 10ङू येर बुद्धिदे मेस्ये पवित्र आत्मादे क्यम ख्य, थमयूदे हम्बजे सवाल-जवाफ चे अङ्खू।
11होर्दे थमयूदे मीयूने नङ्सू उक्सीतीदेबे येरे यसे पीन्दे, “परमेश्वर मेस्ये मोशाजे विरुद्धने स्तिफनसदे न प्वेब पो क्यमब ङीदे तदे।”
12हन्छ्वाब थमयूदे जनतायू, धर्म-गुरुयू मेस्ये पन्डेयूने त्वो प्लेत्दे, मेस्ये थमयूदे हमला चीत्दे होर्दे चूङ्देबे पात्ता केन् सभाने रेत्दे। 13थमयूदे येरे यब लूच्च साक्षीयू खूम्दे रेत्दे, “अम्ब मीदे पवित्र नेप्रे मोशाजे नियमजे विरुद्धने अन्ज्य पोयू क्यमब अन्क्यापी। 14चेनेयलो अम्बदे येरे यब पो ङीदे तदे, ‘नासरतजे येशूदे अम्ब नेने नाश चीक्क्य, मेस्ये मोशादे ङीनने पीनब पेये-गये सूजो चीप्पीय’।”
15पात्ता केन् सभाने टूनब हम्ब क्वादेने ङूने चेलाबे लेप्प ङूजे त्वा स्वर्गदूतजे त्वाप्र तङ्दे।
Currently Selected:
मूल स्यूस्स्यायूजे कामजे किताब 6: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
