غُرْتَاکِ 8
8
1جَوْمِرَاوٛ وِعِ مُوسَى: «عُمْرُ هَـٰرُونَ ڢٛرْتَ جُنغٛ مُوطُمْ بٜى سَوْرُ مُوطُمْ دٛوْ مَاجٜ عٜ عِلْدُطٜ عٜ غَاوِ نغَمْ ݠَاࢡِ عُکَّنٛ لٜسْدِ مِصْرَ ڢُو؞» 2هَـٰرُونَ ڢٛرْتِ جُنغٛ مُوطُمْ دٛوْ ندِيَمْجِ مِصْرَ؞ ݠَاࢡِ مبَعِّ، شُدِّ لٜسْدِ مِصْرَ؞ 3حِيلَعٜنْ لٜسْدِ مِصْرَ بٛو مبَطِ بَنَ نٛنْ بٜى حِيلَاجِ مُوطُمْعٜنْ، ࢡٜمبَعِّنِ ݠَاࢡِ دٛوْ لٜسْدِ مِصْرَ؞
4ڢِرْعَوْنَ عٜوْنِ مُوسَى عٜ هَـٰرُونَ، عٛوِعِ ࢡٜ: «تٛرٜ جَوْمِرَاوٛ حَا عٛعِتَّنَ مِنْ ݠَاࢡِ طِعِ، مِنْ عٜ عُمَّاتٛورٜ عَمْ ڢُو؞ ندٜنْ مِعَشَّنْ إِسْرَاءِيلَعٜنْ نجَحَ لِيعَنٛ جَوْمِرَاوٛ کِرْسٜتٜىٰطِ؞» 5مُوسَى وِعِ ڢِرْعَوْنَ: «بَرْکَامَ، وِعَمْ ندٜيْ طُمْ ڢٛتَّنْتٜ مِتٛرٛ جَوْمِرَاوٛ نغَمْ دَلِيلَ مَاطَ عٜ سَرَاکِعٜنْ مَ عٜ عُمَّاتٛورٜ مَ ڢُو، حَا عٛسٛتِّنَ ݠَاࢡِ دِغَ مَ عٜ دِغَ شُوطِ مَ، طِ لُتَّ ندٜرْ مَايٛ نِيلْ تَنْ؟» 6ڢِرْعَوْنَ جَابِ: «جَنغٛ؞» مُوسَى وِعِ: «بَنَ مبِعْطَ؞ ندٜنْ عَعَنْدَنْ وَلَا نَنْدُطٛ بٜى اَللَّه جَوْمِرَاوٛ عَمِنْ! 7ݠَاࢡِ عَشّٜتٜ، عَنْ عٜ شُوطِ مَ عٜ سَرَاکِعٜنْ مَ عٜ عُمَّاتٛورٜ مَ ڢُو؞ طِ لُتَّنْ ندٜرْ مَايٛ نِيلْ تَنْ؞»
8مُوسَى عٜ هَـٰرُونَ نغُرْتِ سَارٜ ڢِرْعَوْنَ؞ مُوسَى تٛرِ جَوْمِرَاوٛ نغَمْ دَلِيلَ ݠَاࢡِ طِ عٛوَدِّ دٛوْ ڢِرْعَوْنَ؞ 9جَوْمِرَاوٛ وَطِ ڢٛدّٜ تٛرْندٜ مُوسَى، ݠَاࢡِ مبَاتِ ندٜرْ شُوطِ عٜ دَلْدٜ عٜ حَا لَطّٜ ڢُو؞ 10مِصْرَعٜنْ مبَاغِ طِ بَاغَاجٜ بَاغَاجٜ، لٜسْدِ حَشِّ دُسْ؞ 11ندٜ ڢِرْعَوْنَ يِعِ عٛحٜࢡِ ڢٛوڢْتٜرٜ، عٛسَاتِنِ حٛورٜ مَاکٛ، عٛنَنَنَايْ مُوسَى عٜ هَـٰرُونَ، بَنَ جَوْمِرَاوٛ وِعْنٛ؞
مَسِيبٛووٛلْ تَتَࢡٛلْ: مَسِيبٛ شُڢِ
12جَوْمِرَاوٛ وِعِ مُوسَى: «عُمْرُ هَـٰرُونَ عٛڢٛرْتَ سَوْرُ مَاکٛ، عٛڢِيَ مبُلْوُلْدِ لٜسْدِ نغَمْ حَا ندِ لَاتٛ شُڢِ#8:12 شُڢِ مَلَّ بٛو بُرُمْطَ؞ ندٜرْ لٜسْدِ مِصْرَ ڢُو؞» 13مُوسَى عٜ هَـٰرُونَ مبَطِ بَنَ نٛنْ؞ هَـٰرُونَ ڢٛرْتِ جُنغٛ مُوطُمْ، عٛڢِيِ مبُلْوُلْدِ لٜسْدِ بٜى سَوْرُ مُمْ؞ مبُلْوُلْدِ لٜسْدِ لَاتِ شُڢِ، طِ نغَرِ دٛوْ يِمْࢡٜ عٜ دَبَّاجِ؞ مبُلْوُلْدِ لٜسْدِ ندٜرْ مِصْرَ ڢُو لَاتِ شُڢِ؞ 14حِيلَعٜنْ لٜسْدِ مِصْرَ بٛو کَࢡْدِ وَطُغٛ بَنَ نٛنْ بٜى حِيلَاجِ مُوطُمْعٜنْ، حَا ࢡٜنغُرْتِنَ شُڢِ؞ عَمَّا ࢡٜمبَاوَايْ؞ شُڢِ تٛکِّتِنِ عُکَّنْغٛ يِمْࢡٜ عٜ دَبَّاجِ ڢُو؞ 15ندٜنْ ࢡٜمبِعِ ڢِرْعَوْنَ: «طُمْ بَاوْطٜ اَللَّه! عَمَّا حٛورٜ ڢِرْعَوْنَ سَاتِ، عٛنَنَنَايْ مُوسَى عٜ هَـٰرُونَ، بَنَ جَوْمِرَاوٛ وِعْنٛ؞»
مَسِيبٛووٛلْ نَيَࢡٛلْ: مَسِيبٛ بُوبِ نغَتٛوجِ
16جَوْمِرَاوٛ وِعِ مُوسَى: «جَنغٛ دَوُ شُبْ، يَحْ دَرَ يٜىٰسٛ ڢِرْعَوْنَ يَاکٜ عٛوُرْتٛتٛ يَحُغٛ مَايٛ؞ وِعْ مٛ: ندَا نِي جَوْمِرَاوٛ وِعِ: عَشُّ يِمْࢡٜ عُمَّاتٛورٜ عَمْ نجَحَ نجَغَّنٛ يَمْ؞ 17تٛ عَيٛوڢْتَايْ ࢡٜ، مِنٜلَنْ بُوبِ نغَتٛوجِ دٛوْ مَاطَ عٜ سَرَاکِعٜنْ مَ عٜ عُمَّاتٛورٜ مَ عٜ ندٜرْ شُوطِ مَ؞ شُوطِ مِصْرَعٜنْ کٜىٰوَنْ بُوبِ نغَتٛوجِ، نٛنْ بٛو لٜسْدِ ندِ ࢡٜنجٛوطِ حَا مَارِ؞ 18ࢩَلَادٜ مَنْ مِڢَدَّنْ لٜسْدِ غٛوسَنْ حَا عُمَّاتٛورٜ عَمْ جٛوطِ، تَا بُوبِ نغَتٛوجِ نَسْتَ تٛنْ؞ بَنَ نٛنْ عَنْدِرْتَ مِنْ وٛنِ جَوْمِرَاوٛ مِطٛنْ کٛو ندٜرْ لٜسْدِ ندِعِ؞ 19مِحِسْنَنْ عُمَّاتٛورٜ عَمْ بٛنٜىٰجِ طِ مِتَمِّ عُکَّنْغٛ مَ؞ عَلَامَ کَعَ لَاتٛتٛ جَنغٛ؞#لُکَ 11:20؞» 20جَوْمِرَاوٛ وَطِ بَنَ عٛوِعْنٛ؞ مٛوࢡٜ بُوبِ نغَتٛوجِ مَوْطٜ نغَرِ ندٜرْ سَارٜ ڢِرْعَوْنَ عٜ ندٜرْ شُوطِ سَرَاکِعٜنْ مَاکٛ عٜ ندٜرْ لٜسْدِ مِصْرَ ڢُو؞ بُوبِ مَنْ مبٛنِّ لٜسْدِ مِصْرَ ڢُو؞
21ڢِرْعَوْنَ عٜوْنِ مُوسَى عٜ هَـٰرُونَ، عٛوِعِ ࢡٜ: «ندِلّٜ، لِيعَنٜ اَللَّه مٛوطٛنْ کِرْسٜتٜىٰطِ ندٜرْ لٜسْدِ ندِعِ!» 22مُوسَى جَابِ: «ڢٛتَّايْ مِنْ مبَطَ بَنَ نٛنْ، نغَمْ کٛ مِنْ لِيعَنْتٛ جَوْمِرَاوٛ اَللَّه عَمِنْ، طُمْ کَرَمْطُمْ حَا مِصْرَعٜنْ؞ تٛ مِنْ طٛنّٛ کِرْسَ يٜىٰسٛ مِصْرَعٜنْ کٛ وٛنِ کَرَمْطُمْ حَا مَࢡّٜ، ࢡٜݠِطَتَانٛ مِنْ بٜى کَاعٜ نَ؟ 23سٜيْ مِنْ نجَحَ ندٜرْ لَدّٜ جَحَانغَلْ ࢩَلْطٜ تَتِ حَا مِنْ لِيعَنٛ جَوْمِرَاوٛ اَللَّه عَمِنْ کِرْسٜتٜىٰطِ بَنَ عٛعُمْرِ مِنْ!» 24ڢِرْعَوْنَ وِعِ: «مِعَشَّنْ عٛنْ عٛنْ ندِلَّ لِيعَنَاغٛ جَوْمِرَاوٛ، اَللَّه مٛوطٛنْ کِرْسٜتٜىٰطِ ندٜرْ لَدّٜ؞ عَمَّا تَا نجٜحٜ دَايِيطُمْ! تٛرَنٜىٰطَمْ مٛ مِنْ بٛو؞» 25مُوسَى وِعِ: «مِدِلِّ، مِتٛرٛتٛ جَوْمِرَاوٛ؞ جَنغٛ بُوبِ نغَتٛوجِ عَشّٜتٜ، بَرْکَامَ، نٛنْ بٛو سَرَاکِعٜنْ مَ عٜ عُمَّاتٛورٜ مَ؞ عَمَّا يٜىٰسٛ طٛ، تَا مٜىٰتُ سَرْغُغٛ مِنْ، تَا عَسَلَ يٛوڢْتُغٛ إِسْرَاءِيلَعٜنْ يَحُغٛ لِيعَنٛ جَوْمِرَاوٛ کِرْسٜتٜىٰطِ!» 26مُوسَى وُرْتِ سَارٜ ڢِرْعَوْنَ، عٛتٛرِ جَوْمِرَاوٛ؞ 27جَوْمِرَاوٛ وَطِ ڢٛدّٜ تٛرْندٜ مُوسَى، بُوبِ نغَتٛوجِ عَشِّ ڢِرْعَوْنَ عٜ سَرَاکِعٜنْ مَاکٛ عٜ عُمَّاتٛورٜ مَاکٛ، وَلَا کٛو نغٛوتُ لُتِّ؞ 28ڢَحِنْ ڢِرْعَوْنَ سَاتِنِ حٛورٜ مُوطُمْ، عٛعَشَّايْ إِسْرَاءِيلَعٜنْ ندِلَّ؞
Currently Selected:
غُرْتَاکِ 8: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
