غُرْتَاکِ 18
18
يٜتِرٛ يِلِّ مُوسَى
1يٜتِرٛ، لِمَنْجٛ حَا مٜدِيَنْ، عٜسِرَاوٛ مُوسَى، نَنِ کٛ اَللَّه وَطَنِ مُوسَى عٜ عُمَّاتٛورٜ مُوطُمْ إِسْرَاءِيلَ ڢُو، وَاتٛ نٛ جَوْمِرَاوٛ وُرْتِنِرِ إِسْرَاءِيلَعٜنْ دِغَ مِصْرَ؞ 2عٛحٛوعِ شِڢُورَ، دٜبّٛ مُوسَى، مٛ مُوسَى نٜلْدِنٛ طُمْ حَا بَابَ مُمْ؞ 3عٛحٛوعِ بٛو ࢡِࢡّٜ شِڢُورَ طِطٛ؞ مُوسَى وِعْنٛ: «مِ کٛطٛ ندٜرْ لٜسْدِ نجَنَنْدِ؞» عٛعِنْدِ عَڢٛ مَاکٛ غٜرْسٛمْ#غُرْتَاکِ 2:21-22؞ #کُوطٜ نٜلَاࢡٜ 7:29؞؞ 4عٛوِعْنٛ بٛو: «اَللَّه مٛ بَابَ عَمْ جَغَّنِ، وَلِّ يَمْ، حِسْنِ يَمْ کَاڢَحِ ڢِرْعَوْنَ؞» نغَمْ مَاجُمْ عٛعِنْدِ طِطَࢡٛ بٛو عٜلِعٜزٜرْ#18:4 عٜلِعٜزٜرْ يِطِ وِعْغٛ اَللَّه-عَمْ-وٛنِ-بَلَّلْ؞ ؞ 5يٜتِرٛ وَرْدِ بٜى ࢡِکّٛيْ عٜ دٜبّٛ مُوسَى، ࢡٜتَوِ مُوسَى حَا لَدّٜ، حَا نٛکُّورٜ ندٜ عٛسَنغِنِ حَا حٛوسٜىٰرٜ اَللَّه؞ 6يٜتِرٛ نٜلِ غٛطّٛ وِعَ مُوسَى: «مِنْ عٜسِرَاوٛ مَ يٜتِرٛ، مِوَرِ حَا مَاطَ، مِنْ بٜى دٜبّٛ مَ عٜ ࢡِکّٛيْ مُمْ طِطٛيْ؞» 7مُوسَى وَرِ، ڢٛتِّ بٜى عٜسُمْ؞ عٛتُرِ يٜىٰسٛ مَاکٛ، عٛحٜبِّمٛ؞ ࢡٜࢨَمْࢨَمْتِرِ حَالَ نجَمُ مَࢡّٜ، ندٜنْ ࢡٜنَسْتِ لَيْمَارُ مُوسَى؞
8مُوسَى لِمْتَنِ عٜسُمْ کٛ جَوْمِرَاوٛ وَطِ ڢِرْعَوْنَ عٜ مِصْرَعٜنْ نغَمْ دَلِيلَ إِسْرَاءِيلَعٜنْ، نٛنْ بٛو حَالَ تٛرَّاجِ کٜࢡْطِ ࢡٜ دٛوْ لَاوٛلْ عٜ نٛ جَوْمِرَاوٛ حِسْنِرِ ࢡٜ بٛو؞ 9يٜتِرٛ سٜيٛرِ حَيْرُ نغُ جَوْمِرَاوٛ وَطَنِ إِسْرَاءِيلَعٜنْ بٜى رِمْطِنْغٛ ࢡٜ دِغَ جُوطٜ مِصْرَعٜنْ؞ 10يٜتِرٛ وِعِ: «يٜتّٛورٜ لَاتَنٛ جَوْمِرَاوٛ مٛ حِسْنِ عٛنْ جُوطٜ مِصْرَعٜنْ عٜ جُنغٛ ڢِرْعَوْنَ؞ 11جٛنْتَ عَنْدُمِ جَوْمِرَاوٛ وٛنِ مَوْطٛ دٛوْ طٛوَنْتٜىٰࢡٜ ڢُو؞ عٛوَنغِنِ طُمْ يَاکٜ مِصْرَعٜنْ مبَطِ إِسْرَاءِيلَعٜنْ ࢨَغَّارٜ؞» 12ندٜنْ يٜتِرٛ لِيعَنِ اَللَّه نغُلٜتٜىٰنغَ عٜ کِرْسٜتٜىٰطِ؞ هَـٰرُونَ عٜ ندٛتِّعٜنْ إِسْرَاءِيلَ ڢُو نغَرِ ࢩَامْدُغٛ بٜى عٜسِرَاوٛ مُوسَى يٜىٰسٛ اَللَّه؞
دَرْنٜىٰکِ حٛورٜعٜنْ
13جَنغٛ مَنْ مُوسَى جٛوطِ حَا عٛوَطَنَ عُمَّاتٛورٜ کِيتَ؞ عُمَّاتٛورٜ دَرِ يٜىٰسٛ مُوسَى دِغَ ڢَجِرِ حَا کِيکِيطٜ؞ 14عٜسِرَاوٛ مُوسَى يِعِ کٛ عٛوَطَنِ عُمَّاتٛورٜ ڢُو، عٛࢨَمِمٛ: «نغَمْ طُمٜ مبَطَتَ بَنَ نِي؟ نغَمْ طُمٜ نجٛوطِيطَ ڢٜىٰرٜ مَ، عُمَّاتٛورٜ ڢُو طٛنْ دَرِ يٜىٰسٛ مَاطَ دِغَ ڢَجِرِ حَا کِيکِيطٜ؟» 15مُوسَى جَابِ عٜسُمْ: «يِمْࢡٜ طٛنْ نغَرَ حَا عَمْ نغَمْ عَنْدُغٛ مُويٛ اَللَّه؞ 16تٛ حَالَ طٛنْ حَکُّندٜ غٛطّٛ عٜ کٜىٰدِّطُّمْ، ࢡٜنغَرَنْ حَا عَمْ، مِتَعَ حَالَ مَنْ؞ مِعَنْدِنَنْ ࢡٜ ڢَرِلَّاجِ عٜ عُمْرٛوجٜ اَللَّه بٛو؞» 17عٜسِيکٛ وِعِمٛ: «کٛ مبَطَتَ طٛ، وٛوطَايْ! 18عَتَمْݠَنْ مَسِنْ، عَنْ عٜ عُمَّاتٛورٜ وٛنْدُندٜ بٜى مَاطَ ڢُو! کُوغَلْ نغَعَلْ تٜدَّنِ مَ#لِمْلٜ 11:11-30؛ تٛوکْتَاکِ تَوْرٜىٰتَ 1:9-18؛ 17:8-13؛ کُوطٜ نٜلَاࢡٜ 6:1-6؞، عَوَاوَتَا حُووُغٛ نغَلْ ڢٜىٰرٜ مَاطَ؞ 19حٜطِتَ سَوَرِ عَمْ، اَللَّه بٛو وٛنْدَ بٜى مَ! کُوغَلْ مَ، طُمْ دَرَاغٛ يٜىٰسٛ اَللَّه مبَتُّدِ عُمَّاتٛورٜ عٜ وَدَّنْغٛ مٛ حَالَاجِ مَارٜ؞ 20سٜيْ عَڢَامْتِنَ يِمْࢡٜ عُمَّاتٛورٜ بٛو ڢَرِلَّاجِ اَللَّه عٜ عُمْرٛوجٜ مُوطُمْ؞ عَنْدِنْ ࢡٜ نٛ ࢡٜتٛکّٛرْتٛ لَاوٛلْ مَاکٛ عٜ نٛ ࢡٜکُووْرَنْتَ مٛ بٛو؞ 21سُࢡْتُ ندٜرْ عُمَّاتٛورٜ ڢُو وٛرْࢡٜ مَرْࢡٜ دَرَجَ، حُلْࢡٜ اَللَّه، حٛولَاࢡٜ، وَࢩْࢡٜ رِبَ کَلُّکَ؞ دَرْنُ ࢡٜ حٛورٜعٜنْ دٛوْ يِمْࢡٜ عُجِنٜىٰرٜ عٜ حٛورٜعٜنْ دٛوْ يِمْࢡٜ تٜىٰمٜرّٜ عٜ حٛورٜعٜنْ دٛوْ يِمْࢡٜ شَݠَّنْطٜ نجٛوٛ عٜ حٛورٜعٜنْ دٛوْ يِمْࢡٜ سَݠّٛ؞ 22کَمْࢡٜ ࢡٜکِيتٛ يِمْࢡٜ وَکَّتِ ڢُو؞ ࢡٜنغَدَّ کِيتَ مَکَّ ڢُو يٜىٰسٛ مَاطَ، عَمَّا کِيتَ ݠَمَرَ، ࢡٜکِيتٛ بٜى کٛعٜ مَࢡّٜ؞ حٛيْنَنْ حٛورٜ مَ، عَشُّ ࢡٜندٛونْدٛ کَمْࢡٜ بٛو کَلِيڢَاکُ نغُعُ بٜى مَاطَ! 23تٛ عَوَطِ بَنَ نٛنْ، تٛ اَللَّه بٛو عُمْرِ مَ، عَحٜࢡَنْ سٜمْبٜ؞ يِمْࢡٜ عُمَّاتٛورٜ ندٜعٜ بٛو لٛرٛتٛ حَا نٛکُّورٜ مَࢡّٜ بٜى سَلَامَنْ؞» 24مُوسَى جَࢡِ سَوَرِ عٜسُمْ، عٛوَطِ کٛ يٜتِرٛ وِعِمٛ؞ 25عٛسُࢡِ وٛرْࢡٜ مَرْࢡٜ دَرَجَ ندٜرْ إِسْرَاءِيلَ ڢُو، عٛدَرْنِ ࢡٜ عَرْدِيࢡٜ عُمَّاتٛورٜ: حٛورٜعٜنْ دٛوْ عُجِنٜىٰرٜ، حٛورٜعٜنْ دٛوْ يِمْࢡٜ تٜىٰمٜرّٜ، حٛورٜعٜنْ دٛوْ يِمْࢡٜ شَݠَّنْطٜ نجٛوٛ عٜ حٛورٜعٜنْ دٛوْ يِمْࢡٜ سَݠّٛ؞ 26کَمْࢡٜ ࢡٜطٛنْ کِيتٛ يِمْࢡٜ وَکَّتِ ڢُو؞ کِيتَ شَطْکَ ࢡٜنغَدَّ کَ يٜىٰسٛ مُوسَى، کِيتَ ݠَمَرَ بٛو ࢡٜکِيتٛ بٜى کٛعٜ مَࢡّٜ؞ 27مُوسَى جَࢡِّتِ عٜسُمْ، عٛحٛوتِ لٜسْدِ مَاکٛ؞
Currently Selected:
غُرْتَاکِ 18: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.