PANURIRANG JESAYA Bindu 1
Bindu 1
Parisuangon ni Jahowa mida halumlamon ni Israel 2-9.
Bias ni rohana mida peleannasida 10-15.
Panosoina mandokkon paubahon roha, jala diparbaga hasesaan ni dosa 16-20.
Lumbalumba dohot bagabaga 21-31.
1On do pangungkapon tu si Jesaya, anak ni si Amos, na niidana taringot tu Juda dohot Jerusalem, uju di ngolu ni si Usia, si Jotam, si Ahas, si Hiskia, angka raja ni Juda.
I. 2Tangihon, hamu ale angka langit, jala pinggol, ale tano on! Ai mangkuling ma Jahowa: Hupagodanggodang do angka anak, jala hupatimbul, hape marbalik do nasida sian ahu. #5Mus 32:1, 5-6 3Ditanda jonggi do nampuna ibana, jala diboto halode panggagatan binahen ni tuanna. Alai anggo Israel ndang tumanda ahu, jala ndang marroha bangsongku. 4Marjea ma bangso na mardosai, na sun marhajahaton! Pinompar ni angka parjahat, angka anak jea, angka na tumadingkon Jahowa, angka na mangaleai na badia ni Israel, angka na sumurut tu pudi. #Ps 78:8; Jes 57:3 5Tu aha i sai * datdatan linsingan hamu? Sai ditambai hamu do panundalion. Ganup ulu marsahit do, jala ganup roha bebenesan. #* Jer 2:30; Hes 21:18 6Sian * palak ni pat sahat ro di ulu, ndang adong na hisar di ibana, holan bugang do jala pangalilitan, jala marsalaon nambura; ndang manang dipuntari jala ndang dililiti, jala ndang dipalambok marhitehite miak. #* 5Mus 28:35 7Tarulang do ia tanomuna, masoksok ia hutamuna dibahen api dipangan halak sileban do haumamuna di jolomuna, gabe halongonan do i, songon na siniaphon ni halak sileban. #5Mus 28:51 8Jala tarpunjung do boru Sion, songon soposopo di porlak anggur, songon undungundung di parjelohan, songon huta na tartungkum. 9Tung sura so * ditebahon Jahowa Zebaot boni di hita otik, siol doshon + Sodom dohot Gumora hita. #* And 3:22; Rom 9:29; + 1Mus 19:24-25; 5Mus 29:21-27
II. 10Tangihon hata ni Jahowa, hamu ale angka * partogi ni Sodom! Pinggol hamu, ale bangso Gumora patik ni Debatanta. #* Jer 23:14; And 4:6 11Tudihangku do hinadeak ni peleanmu? ninna Jahowa. Nunga mahap rohangku di angka pelean situtungon sian birubiru tunggal dohot di tabotabo ni lombu angka na pinamokmok, jala ndang dihalomohon rohangku mudar ni angka lombu dohot birubiru dohot hambing tunggal. #Ps 50:8; Poda 15:8, 21:27; Jes 66:3; Jer 6:20; Am 5:22 12Molo ro hamu manopot tu jolongku, tung ise ma mangido i sian tanganmuna, luntahonmuna alamanku. 13Unang be datdati hamu mamboan pelean sipanganon so marniula, daupa hinabiashon ni rohangku. Poltak ni bulan dohot ari Sabbat, tingting palumba ari raya, ndang tudihangku hajahaton dohot luhutan ari raya. 14Dihagigihon rohangku do angka poltak ni bulan dohot angka tingki pararirayaonmuna; bebenesan do Ahu dibahen, ndang tartaon rohangku be. 15Jala nang dipaherbang hamu tanganmuna, padaoonku do matangku maradophon hamu; jala nang dijotjoti hamu martangiang, ndang tagamon tangihononku hamu; ai gok mudar do tanganmuna i. #Poda 1:28, 15:29; Jes 59:1-3; Jer 14:12; Mik 3:4; Joh 9:31
III. 16Marburi ma hamu, urasi hamu dirimuna, paholang hamu ma hinaroa ni pambahenanmuna sian jolo ni matangku, pasohot hamu ma manjahati. #Ps 34:15, 37:27; Joel 2:12-13; Am 5:15; Mik 6:6-8; Rom 12:9; 1Ptr 3:11 17Guruhon hamu ma mambahen na denggan, lulu i hamu ma uhum, pintori hamu na nirupa, patingkos hamu ma uhum tu nasopot so marama, ondingi hamu angka na mabalu. #1Sam 15:22; Jes 1:23; Jer 7:3-7 18Dung i sai ro ma hamu, asa mardabudabu hita, ninna Jahowa. Tung sura rara dosamuna songon abit bunga dapdap, * bontar do bahenonku songon itak; nang pe rara songon abit hasumba, gabe songon hapas do muse. #* Ps 51:9; Jes 43:25, 44:22 19Molo ringgas hamu tumangihon dohot mangihuthon, sai panganonmuna do hinadenggan ni gogo ni tano i. #3Mus 25:18-19; 5Mus 28:2-14 20Alai molo manjua hamu jala mangalo, sai na panganon ni podang do hamu sogot, ai pamangan ni Jahowa do palumbahon. #3Mus 26:14-39; 5Mus 28:15-68
IV. 21Tung beha pambahenna, huta na burju i gabe sibabijalang, gok uhum na sintong ia najolo hatigoran mian di bagasan ibana, hape anggo nuaeng gok angka * partodos. #* Mat 23:37 22Perakmi do muba gabe air, pinamindo ni aek do anggurmi. #Hes 22:18 23Angka sintuam gabe panggunturi dohot dongan ni angka panangko. Saluhut nasida mangapian di sisip, jala dilului angka silehonlehon; ndang dipatingkos nasida uhum tu na sopot so marama, jala parbadaan ni na mabalu, ndang ro tu jolonasida. #2Mus 22:22; Jes 1:17; Jer 5:28 24Dibahen i ninna Jahowa Zebaot na marhuaso di Israel: Oe, sai pasabamonku do rohangku maradophon angka alongku, jala sudolhononku tu angka musungku. #5Mus 28:23 25Jadi ingkon mangulahi ma tanganku mangonai tu ho, jala papitaonku * airmi, songon na sinabun, jala pasurutonku ma nasa simborami. #* Jes 1:22; Mal 3:2-3 26Jala pasuangonku ma angka siuhum ho, songon di na robi dohot angka panuturim songon di mulana. * Dung i targoar ma ho huta ni hatigoran, huta na bonar. #* Sak 8:3 27Tartobus do sogot Sion marhitehite habonaron, jala angka na mulak tu ibana marhitehite hatigoran. #Jes 46:13 28Alai hinamago ni angka pangalaosi dohot pardosa sahali ro do, jala siap do sogot angka na manadingkon Jahowa. #Ps 1:6, 92:10, 104:35 29Ai ingkon tarurak nasida sogot maradophon angka hariara, angka na hinalomohonmuna na sai laon, jala ingkon maila hamu maradophon porlak, angka na pinillitmuna. #Jes 65:3 30Ai doshon hariara i na marurus bulungna do hamu sogot, jala songon porlak na so adong aek di bagasan. 31Jadi doshon hori na so hasea ma parhuaso hian, jala jadijadianna gabe gurasa, gabe rap gor duansa, jala ndang adong na tuk mangintopi. #Jes 33:11
Currently Selected:
PANURIRANG JESAYA Bindu 1: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.