Mat. 13
13
Muedzaniso woMukushi
(Mk. 4:1-9; Ruka 8:4-8)
1Ngeiro zuva Jesu wakabuda mumhatso, akagara ngeparuandhle. 2Kwakaungana kwaari mbungano zhinji, ndizvo wakapotera mungarava, akagara nembungano yeshe yakaema ngepamhiri. 3Naye wakaereketa kwavari zviro zvakawanda ngemiedzaniso, akati, “Ringirai, kwakabuda mukushi kookusha. 4Kwakati mukukusha kwake mbeu dzimweni dzakawira munjira, neshiri dzakauya dzikadzidya. 5Nedzimweni dzakawira paruware apo pedzaiya dzisina mavhu mazhinji, nadzo dzakamera ngokukasira, ngokuti dzaiya dzisina mavhu akadzama. 6Naapo zuva rakwira dzakapishwa, ngokuti dzaiya dzisina nzinde, dzakazeketera. 7Dzimweni dzakawira pane minzwa; neminzwa yakakura yakadzizingizira. 8Nedzimweni dzakawira mumavhu akanaka, nadzo dzakabereka tsangu, dzimweni zana rakapetwa, dzimweni makumi matanhatu akapetwa nedzimweni makumi matatu akapetwa. 9Uwo unenzee dzokuzwa, ngaazwe.”
Biningidzo reMiedzaniso
(Mk. 4:10-12; Ruka 8:9-10)
10Nevadzidzi vakauya kwaari, vakati, “Unoereketa kwavari ngenyi ngemiedzaniso?” 11Naye wakapingura akati kwavari, “Ngokuti kunopuwa kwomuri kuzia zvakafishika zvoumambo hwomudenga, asi kwavari avo akuzi kupuwa. 12Ngokuti kwaari unacho kunozopuwazve, naye unozoa nezvakawanda. Asi uwo usina, neicho chaanacho chinozoduswa kwaari. 13Ngeiyi ndaa ndinoereketa kwavari ngemiedzaniso, ngokuti vechinyaona avaoni, vechinyazwa avazwi, zve avazwisisi. 14Kwavari kwakazadzisika kuprofeta kwaIsaya, ukwo kunoti, ‘Ngokuzwa munozozwa, nemwi musikazwisisi, mwechinyaona munozoona, musikaonisisi. 15Ngokuti mwoyo yaavo vanhu yakaita gwizhimbira, nenzee dzavo dziri madziiranzee, nemadziso avo akatswatira, kuti pamweni vangazoona ngemadziso avo, vazwe ngenzee dzavo nokuzwisisa ngemwoyo yavo, vatenderuke, neni ndivaponese.’
16“Asi anomuchena madziso enyu, ngokuti anoona, nenzee dzenyu, ngokuti dzinozwa. 17Ngokuti ngegwinyiso ndinoti kwomuri, vaprofeti vazhinji nevanhu vakarurama vakadisisa kuona zvomunoona imwimwi, navo avazi kuzviona, nokuzwa zvomunozwa navo avazi kuzvizwa.
Jesu Unodudzira Muedzaniso woMukushi
(Mk. 4:13-20; Ruka 8:11-15)
18“Ndizvo zvinopano izwai muedzaniso womukushi. 19Apo munhu kunyazwi ngouri arizwa izwi roumambo, asikarizwisisi, naapo unouya uwo wakashata unovhomora izvo zvakakushwa mumwoyo mwake; uyu ndiye wakakushwa panjira. 20Nouwo wakakushwa paruware, uyu ndiye unorizwa izwi, ngokukasira unoriashira ngokudakara. 21Asi aana kuita nzinde mukati mwake, asi unogara kamukuwo; naapo kunouya kutambudzwa ngendaa yeizwi, ngokukasira unopumhunwa. 22Iye wakakushwa muminzwa uyu ndiye unorizwa izwi, asi kudembatemba ngezvenyika nokuchengedzerwa kwoupfumi kunodzipa izwi, naro aribereki. 23Asi iye wakakushwa pamavhu akanaka, uyu ndiye unorizwa izwi, naye unorizwisisa; zve unobereka michero ngegwinyiso, vamweni zana rakapetwa, vamweni makumi matanhatu akapetwa, vamweni makumi matatu akapetwa.”
Muedzaniso weSenga Rakakushwa muKoroni
24Muedzaniso umweni waakaronza kwavari echiti, “Umambo hwomudenga hunoedzaniswa nomunhu wakakusha mbeu dzakanaka mumunda wake. 25Asi apo vanhu vachaata, gaa rake rakauya, rakakushawo senga mukati mwezviyo, rakaenda. 26Asi apo miningwi yoomera, yechitumbuka, naapo senga rakaonekawo naro. 27Naapo varanda vomune wemhatso vakauya, vakati kwaari, ‘Mambo, auzi kukusha mbeu dzakanaka mumunda wako here? Ndizvo senga rinobva pari?’ 28Asi iye wakati kwavari, ‘Munhu uri gaa wakaita izvi.’ Ndizvo varanda vakati kwaari, ‘Ungada here kuti tiende tiribvite?’ 29Asi wakati, ‘Haiwa, ngekuti apo mwechibvita senga mungabvita nekoroni nayo. 30Chirekerai zveshe zvikure pamwepo metsa mukuwo wokukukura. Ngomukuwo wokukukura ndinozoti kuvacheki, mwechiunganidza senga kutanga, murisunge kuita mwanda kuti ripishwe. Asi mwechiunganidza koroni mutsapi yangu.’ ”
Muedzaniso weTsangu yoMustadhi
(Mk. 4:30-32; Ruka 13:18-19)
31Muedzaniso umweni waakaronza kwavari echiti, “Umambo hwomudenga hunoedzaniswa kudai ngetsangu yomustadhi,#13:31 Tsangu yomustadhi:Ndiyo inodaidzwa kuti repu. iyo yaakatora munhu, akaisima mumunda wake. 32Iyo ngegwinyiso idoko kunetsangu dzeshe, asi apo yakura inopinda mapfiba eshe kukura, inoita muti, kuti shiri dzomudenga dziuye, dzimate nokuaka zvisaki munhai dzawo.”
Muedzaniso woMumera
(Ruka 13:20-21)
33Muedzaniso umweni waakaronza kwavari echiti, “Umambo hwomudenga hunoedzaniswa nomumera uwo waakatora mudzimai, akauisa mukati mwemitani mitatu youfu metsa hweshe hwakafema.”
Kushandisa kwaJesu Miedzaniso
(Mk. 4:33-34)
34Izvi zveshe Jesu wakazviereketa kunembungano ngemiedzaniso; naye aazikuereketa kwavari nachimwe ngepabanze pemiedzaniso, 35kuti kuzadzisike izwi iro rakaereketwa ngomuprofeti echiti, “Ndinozobeura muromo wangu kuereketa miedzaniso, ndinozoonisa zvakafishika kubvira pakusikwa kwenyika.”
Jesu Unodudzira Muedzaniso weSenga neKoroni
36Naapo wakaendisa mbungano, wakapotera mumhatso. Nevadzidzi vake vakauya kwaari, vakati, “Tidudzire muedzaniso wesenga romumunda.” 37Naye wakapingura akati kwavari, “Iye unokusha mbeu dzakanaka ndiye Mukororo woMunhu. 38Munda inyika. Mbeu dzakanaka vana voumambo, senga vana vouwo wakashata. 39Gaa iro rakarikusha ndiDhiabhorosi. Nokukukura kuri kupera kwenyika, nevacheki ingirosi. 40Ndizvo kudai ngesenga rinounganidzwa pamwepo rechipishwa ngemwoto; ndizvo zvinozoitwa mukupera kwenyika. 41Mukororo woMunhu unozotuma ngirosi dzake, nadzo dzinozounganidza kubva muumambo hwake zveshe zvinopumhunisa, naavo veshe vanoita zvinonyangadza. 42Nadzo dzinozovakandira muchoto chomwoto. Kunozoiteyo kuboorera nokukwetsana kwemazino. 43Naapo vakarurama vanozojeka kudai ngezuva muumambo hwaBaba avo. Uwo unenzee ngaazwe.
Muedzaniso woUpfumi Hwakafishwa
44“Zve, umambo hwomudenga hunoedzaniswa noupfumi hwakafishwa mumunda; uhwo hwaakaona munhu akahufishazve, ngokudakara kwake unoenda nokutengesa zveshe zvaanazvo, echitenga uwo munda.
Muedzaniso weBuwe rine Mutengo Mukuru
45“Zve, umambo hwomudenga hunoedzaniswa nomunhu mutengisi unotsvaka mapuwe akanaka. 46Uwo apo aona buwe rimwe rinomutengo mukuru, wakaenda, akatengesa zveshe zvaaiya nazvo, akaritenga.
Muedzaniso weChitaa
47“Zve, umambo hwomudenga hunoedzaniswa nechitaa chakakandirwa muruandhle, nacho chakaunganidza mbeu dzeshe dzehove. 48Icho apo chazara vakachikweera kuhumbikumbi, vakagara pashi, vakaunganidza dzakanaka muzvidziyo, asi dzakashata vakadzirasha. 49Ndizvo zvinozoitika mukupera kwenyika; ngirosi dzinozobuda dziparadzanise vakashata kubva mukati mwevakarurama, 50dzivakandire muchoto chomwoto. Kunozoiteyo kuboorera nokukwetsana kwemazino.
Kudzidzisa Kutsva neKwekaretu
51“Mwanasa kuzwa izvi zveshe here?” Navo vakati kwaari, “Eya.” 52Wakati kwavari, “Ndizvo munyori weshe uwo wakadzidziswa ngezvoumambo hwomudenga, wakadai ngomunhu uri munewemhatso, uwo unobudisa kubva kwoupfumi hwake zviro zvitsva nezvekaretu.”
Jesu Unorambwa muNazaretha
(Mk. 6:1-6; Ruka 4:16-30)
53Kwakaitika apo Jesu apedza iyi miedzaniso, wakabvapo. 54Naapo auya kunyika yake, wakavadzidzisa mumhatso yavo yokudira, zvakaita kuti vashamiswe, vakati, “Kunobva kuri uku kungwara kwouyu munhu neiyi mishando yesimba? 55Uyu andiyepi here mukororo womutsetsi? Mai ake avadaidzwi kuti Maria here? Nevanun'una vake ndiJakobe, Josefa, Simoni naJudhasi here? 56Nehanzvadzi dzake dziri panapa nesu dzeshe here? Ndizvo iye wakazviona pari izvi zveshe?” 57Navo vakapumhuniswa ndiye. Asi Jesu wakati kwavari, “Muprofeti aarekeri kuremeredzwa kwega munyika mwake nomumhatso yake.” 58Naye aazi kuita apo mishando ine simba yakawanda ngendaa yokusikatenda kwavo.
Currently Selected:
Mat. 13: Ndau
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in