ማርቆሴ 3

ዬሱሴ ኩቺ ዎቦ ዓሲ ዻቂሼሢ

(ማቲ. 12፥9-14፤ ሉቃ. 6፥6-11)

1ዬካፓ ዬሱሴ ዓይሁዶ ዓሶኮ ቡኪንቶ ቤዞ ማዒ ጌሌኔ፤ ዒኢካ ፔቴ'' ኩቺ ዎቦ ዓሲ ዓኣኔ። 2ዓይሁዶ ዓሶኮ ቡኪንቶ ቤዞይዳፓ ፔቴ'' ፔቴ'' ዓሳ ዬሱሴ ዎጎና ዓይሢሳኒ ኮዓዖ፦ «ሂንዳ ሓኖ'' ዒዚ ሓውሾ ዓቦና ሓያ ዎቦ ዓሢ ፓሣቴ ኑ ዛጎም» ጌዒ ዒዛ ካፔኔ። 3ዬሱሴ ኩጮ ዎቦ ዓሢም፦ «ሓይካ ሙኪ ባኣካ'' ዔቄ» ጌዔኔ። 4ዬካፓ ዒዚ ዔያቶ ዖኦጫዖ፦ «ዓይሁዶኮ ሓውሾ ኬሎ''ና ዓይሢንቴሢ ኮሺ ማዻንዳጉዲሞ ፑርታ ማዻንዳጉዲዳይ? ሼምፖ ዻዻቂሾምሞ ባባይዞምዳይ?» ጋዓዛ፥ ዔያታ ጋዓንቴ ዚቲዮ ጌዔኔ። 5ዬሱሴ ዔያቶኮ ዒና'' ዔኩዋያ ማዒ ዶጬሢሮ ዖዪጋፓ ዒኢካ ዓኣ ዓሶ ዻጋዺ ዛጋዖ ዎቦ ዓሢም፦ «ኩጮ ኔኤኮ ፒሼ» ጌዔኔ። ዒዚያ ፒሼ ዎዶ''ና ኩጫ ዻቄኔ። 6ዬያሮ ፔርሴ ዓሳ ዓይሁዶ ዓሶኮ ቡኪንቶ ቤዛፓ ኬስካዖ ዑኬና ዎማይዲ ዬሱሴ ዔያታ ባይዛንዳቴያ ካኣታ''ሢ ሄሮዲሴ ዓሶና ዎላ'' ዞርቴኔ።

ዴራ'' ባዞ'' ዓጫ ዬሱሴ ባንሢ ቡኪንቴሢ

7-8ዬሱሴ ዒዛኮ ጊንፆ ሓንታዞንሢና ዎላ'' ጌሊላ ባዞ'' ባንሢ ዴንዴኔ። ዒማ''ና ዒዚ ማዻ ባኮ ዋይዜ ዓሳ ሚርጌሢ ዒዛ ባንሢ ሙኬኔ፤ ዔያታ ሙኬሢ፦ ጌሊላይዳፓ፥ ዪሁዳይዳፓ፥ ዬሩሳላሜይዳፓ፥ ዔዶሚያሴይዳፓ፥ ዮርዳኖሴ ዎሮኮ ሱካ ዓኣ ዓጫ''ፓ ሓሣ ፂሮሴና ሲዶና ጌይንታ ካታማፓኬ። 9ዴሮ''ኮ ኮሺ'' ዺቢፆይዳፓ ዔቄያና ዓሳ ዒዛ ቱቺ ሜታሱዋጉዲ ዋኣፆና ፒንቆ ጎንጎ ዒዛም ጊኢጊሻንዳጉዲ ዒዛኮ ጊንፆ ሓንታዞንሢ ዒ ዓይሤኔ። #ማር. 4፥1፤ ሉቃ. 5፥1-3። 10ሚርጌ ዓሶ ዒዚ ቤርታ ዓውሴሢሮ ሓርጌና ሜታዻ ዓሳ ቢያ ዒዛኮ ዑፆ ካኣማኒ ኮዒ ሒዒንታኔ። 11ፑርቶ ዓያና'' ዬሱሴ ዛጌ ዎዶ''ና ቢያ ዒዛኮ ቤርታ ሎኦሚ ሎኦሚ፦ «ኔኤኒ ፆኦሲ ናዓሢኬ» ጌዒ ጌዒ ዒላቴኔ።

12ዬሱሴ ፑርቶ ዓያኖም ዒዛኮ ዖኑሞ ኬኤዙዋጉዲ ዶዲሺ ጎሬኔ።

ዬሱሴ ታጶ ላምዖ ዳኪንቴዞንሢ ዶኦሬሢ

(ማቲ. 10፥1-4፤ ሉቃ. 6፥12-16)

13ዬሱሴ ጌሜሮ ኬስካዖ ዒዚ ኮዔዞንሢ ፔ ባንሢ ዔኤሌ''ኔ፤ ዔያታኣ ዒዛ ባንሢ ሙኬኔ። 14ዔያታ ዒዛና ዎላ'' ማዓንዳጉዲ፥ ዔርዛንዳጉዲ ዔያቶ ዳካኒ ታጶ ላምዖንሢ ዶኦሪ፦ «ዳኪንቴዞንሢ» ጋዓ ሱ'ንሢ ጌሤኔ። 15ሓሣ ፑርታ ዓያና ኬሳንዳጉዲ ዎልቄና ዓኣ ቢታንቶ ዔያቶም ዒንጌኔ።

16ታጶ ላምዖ ዳኪንቴዞንሢ ማዒ ዶኦሪንቴዞንሢ ሓንሢኬ፦ ጴፂሮሴ ጌዒ ሱ'ንፆ ጌሦና ሲሞኦኔ፥ 17ቦዖኔርጌሴ ጌይፃ ጉጉንሢጉዲ ማዔ ዓሶንሢ ጌዒ ሱ'ንፃ ጌሢንቴ ዜብዲዮሴ ናኣቶ'' ያይቆኦቤና ዒዛኮ ጌርሲ ዮሓኒሴ፥ 18ዒንዲራሴ፥ ፒሊጶሴ፥ ቤርቴሌሞሴ፥ ማቲዮሴ፥ ቶኦማኣሴ፥ ዒልፒዮሴ ናኣዚ'' ያይቆኦቤ፥ ታዲዮሴ፥ ፔ ዓጮ'' ሚጪንታ ሲሞኦኔ፥ 19ዬሱሴ ዓኣሢ ዒንጌ ዓስቆሮንቶ ዪሁዳንታኬ።

ዬሱሴና ቤዔልዛቡሌ ጌይንታ ፑርቶ ዓያኖኮ ሱኡጋሢና

(ማቲ. 12፥22-32፤ ሉቃ. 11፥14-23፤ 12፥10)

20ዬካፓ ዬሱሴ ማኣሪ ጌላዛ ሚርጌ ዓሲያ ሙኪ ቡኬሢሮ ዒዛና ዒዛኮ ጊንፆ ሓንታዞንሢናም ዴዒ ሙዓኒ ማጌኔ። 21ዬሱሴኮ ማኣሮ ዓሳ፦ «ዒዚ ዣኣሽካኔ» ዓሳ ጋዓሢ ዋይዚ ዒዛ ዓርቂ ዔካኒ ሙኬኔ።

22ዬሩሳላሜፓ ሙኬ ሙሴ ዔርዜ ዎጎ ዔርዛዞንሢ፦ «ዒዛይዳ ቢዔልዛቡሌ ዓኣኔ፥ ዒዚ ፑርቶ ዓያኖ ኬሳ''ሢ ሓያ ፑርቶ ዓያኖኮ ሱኡጋሢ ማዔ ቤዔልዛቡሌናኬ» ጌዒ ጌዒ ጌስታኔ። #ማቲ. 9፥34፤ 10፥25።

23ዬሱሴ ዔያቶ ፔ ባንሢ ዔኤሊ'' ኮኦኪንሢና ሂዚ ዔያቶም ጌዔኔ፦ «ፃላሄ ፃላሄ ዎዲ'' ኬሳ''ኒ ዳንዳዓይ? 24ፔቴ'' ካኣቲ ዓጪ ዎሊና ፓቂንቲ ዖልቴቶ ዬኖ ዓጮ'' ካኣቱማ ዶዲ ናንጋኒ ዳንዳዑዋሴ። 25ሓሣ ፔቴ'' ማኣሪ ዓሲ ዎሊና ዣሊ ፓቂንቴቴ ዬና ማኣሬላ ማኣሪ ማዓኒ ዳንዳዑዋሴ፤ 26ዬያጉዲ ፃላሄ ዎሊና ፓቂንቴቶ ጋፒንሢ ማዓንዳኣፓዓቴም ዔቃኒ ዳንዳዑዋሴ፤

27«ሓሣ ፔቴ'' ዎልቄና ዓኣ ዓሲ ማኣሪ ጌላኒ ዒዛ ዎልቆሲ ቤርታዺ ቱኪ''ባኣዖ ዒዛኮ ዓኣ ባኮ ቡሪ ዔካኒ ዳንዳዒንቱዋሴ።»

28ዬሱሴ ሃሣ ኬኤዛዖ፦ «ጎኔ ታ ዒንሢም ጋዓኔ፤ ዓሳ ማዻ ጎሞና ሓሣ ፆኦሲ ጫሽካ ጫዣታዖ ዓቶም ጌዒንታንዳኔ። 29ጋዓንቴ ዓያና ጌኤሺ ጫሽካሢም ቢያ ናንጊና ጋሌ ማዓንዳኣፓዓቴም ጎማ ዓቶም ጌዒንታዓኬ» ጌዔኔ። #ሉቃ. 12፥10። 30ዬሱሴ ዬኖ ጌዔሢ ዓሳ፦ «ዒዛይዳ ፑርታ ዓያና ዓኣኔ» ጌዔሢሮኬ።

ዬሱሴኮ ዒንዶና ጌርሲንሢና

(ማቲ. 12፥46-50፤ ሉቃ. 8፥19-21)

31ዬሱሴኮ ዒንዶና ጌርሲንሢና ዒዚ ዓኣ ቤዞ ሙኪ ካራ'' ዔቃዖ ዓሲ ዳኪ ዒዛ ዔኤሊ''ሴኔ። 32ዒዛኮ ዓጫ ዴዒ ዓኣ ዓሳ ዒዛም፦ «ኔኤኮ ዒንዳኣ፥ ጌርሲንሢ፥ ጌሮንሢ#3፥32 ጌሮንሢ፦ ጋዓዞ ፔቴ'' ፔቴ'' ሚናኣ ማፃኣፓ ቃሱ''ዋሴ። ካራ'' ኔና ኮዓኔ» ጌዒ ኬኤዜኔ።

33ዬሱሴ ዔያቶም፦ «ዒንዳ ታኣኮ ዖናዳይ? ጌርሲንሢያ ዖናንሢዳይ?» ጌዒ ማሓዖ፥ 34ዒዛኮ ዓጫ ዴዔ ዓሶ ባንሢ ዛጊ ዛጊ፦ «ሓኣቶ ዛጉዋቴ፥ ታኣኮ ዒንዶና ጌርሲንሢና ሓኣቶኬ፤ 35ዖናታቴያ ፆኦሲ ዓይሢፆ ኩንሣዞንሢ ቢያ ታኣኮ ዒሾ ሚሾንታ ዒንዶንታኬ» ጌዔኔ።

Currently Selected:

ማርቆሴ 3: MNT

Highlight

Copy