ዛካሪያሴ ማፃኣፖ 9
9
ዒስራዔኤሌኮ ዓሺኖ ማዔ ሞርኮይዳ ፆኦሲ ዓጋኒ ጊኢጌ ሜቶ
1ናንጊና ናንጋ ጎዳ ሃድራኬ ዓጮና ዴማስቆ ካታሞናይዳ ሜቶ ዓጋንዳኔ፤ ዒስራዔኤሌ ፃጶ ሌሊቱዋንቴ ሶኦሪያኮ ዼኤፖ ካታማኣ ናንጊና ናንጋ ጎዳም ማዓንዳኔ። #ዒሲ. 17፡1-3፤ ዔር. 49፡23-27፤ ዓሞ. 1፡3-5። 2ዬይ ሜታ ሃድራኬ ዓጮ ኮይላ ዓኣ ሃማቴና ሚርጌ ዔራቶ ዓኣ ፂሮሴና ሲዶና ካታሞይዳ ኬዳንዳኔ። 3ፂሮሴ ፔና ካፓኒ፥ ዴይ ካፖ ዼጌ ቤሲ ዋርዲያ ማሂ ኮሼኔ፤ ሚርጉማ ዓጪጉዴ ሹቺ ቢራንታ ዎርቄንታኣ ቡኩሴኔ። 4ጋዓንቴ ዒዛ ዬያ ቡኩሴ ባኮ ናንጊና ናንጋ ጎዳ ዒዞፓ ዔካንዳኔ፤ ባዞይዳ ዓኣ ዒዞኮ ዎልቆ ማዔ ባኮ ዒኢካ ዱኡኪ ዒ ባይዛንዳኔ፤ ካታሜላ ታሚና ሚቺንቲ ዲቢንሢ ማዓንዳኔ። #ዒሲ. 23፡1-18፤ ሂዚ. 26፡1—28፡26፤ ዒዩ. 3፡4-8፤ ዓሞ. 1፡9-10፤ ማቲ. 11፡21-22፤ ሉቃ. 10፡13-14።
5ዓስቄሎና ካታማ ዬያ ዛጋዖ ዲቃቲ ዒጊጫንዳኔ፤ ጋኣዛ ካታማኣ ዬያ ዛጋዖ ዎኦቶንዶ ካራ ባይዛንዳኔ፤ ዔቆሮኔያ ዬያጉዲ ሃጋኣ ዎዛ ባኣያ ማዓንዳኔ፤ ጋኣዛ ካታማኣ ካኣቲ ባኣያ ማዓንዳኔ፤ ዓስቄሎና ካታማ ዓሲ ናንጉዋ ጉሪ ቤሲ ማዒ ዓታንዳኔ። #ዒሲ. 14፡29-31፤ ዔር. 47፡1-7፤ ሂዚ. 25፡15-17፤ ዒዩ. 3፡4-8፤ ዓሞ. 1፡6-8፤ ሶፖ. 2፡4-7። 6ዔሽዶዴይዳ ሲኢሪንቴ ዴሬ ናንጋንዳኔ፤ ናንጊና ናንጋ ጎዳ ሂዚ ጋዓኔ፦ «ሃኣቶ፥ ዖቶርቃ ፒሊስፄኤሜ ዓሶ ታኣኒ ዻውሲሳንዳኔ፤ 7ሱጉሢ ጊዳ ዓኣ ዓኣዔ ዓሽኮ፥ ጊንሣ ሃሣ ዳምቦ ጎይፆና ሙይንቱዋጉዲ ላኣጊንቴ ሙዖ ዔያቶ ዻንጋፓ ታኣኒ ኬሲሳንዳኔ፤ ዔያቶፓ ፒኢጫዺ ዓቴ ዓሳ ታ ዓሶና ዎላ ሲኢሪንቲ ዪሁዳ ፃጶይዳ ፔቴ ቶኦኪ ማዓንዳኔ፤ ዔቅሮኔ ዴራ ዓዳ ዒያቡሳ ዓሶጉዲ ዴሮና ዎላ ሲኢሪንታንዳኔ። 8ዬካፓ ታ ዓጮኮ ዓጮ ታኣኒ ዋርዲ ዔቂ ካፓንዳኔ፤ ዓጮ ዎልቄና ጌሊ ዓርቃ ዎልቆ ዓሳ ዒኢና ዴንዱዋጉዲ ታኣኒ ላኣጋንዳኔ። ታኣኮ ዴራ ዎማዺ ዋኣዬቴያ ታኣኒ ዛጌሢሮ ሃይካፓ ሴካ ዎልቆና ሄርቂ ዎይሣ ዓሳ ዔያቶ ዎልቄና ጌሊ ዓርቃዓኬ።»
ሃጊ ሙካኒ ዓኣ ፂዮኔ ካኣታሢ
9ፂዮኔ፥ ዎዛዼ!
ዬሩሳላሜ፥ ዎዛና ዒሊሼ!
ሃይሾ፥ ኔኤኮ ካኣቲ ኮሹሞና ሼሌዔ ማዒ
ሃሬሎ ዑፃ፥ ጌይፃ ሃሮ ናዖ ዑፃ ዴይ
ዎልቄና ባሻያ ማዒ ኔ ባንሢ ሙካኔ። #ማቲ. 21፡5፤ ዮሃ. 12፡15።
10ናንጊና ናንጋ ጎዳ ሂዚ ጋዓኔ፦
«ታኣኒ ሳርጌሎ ዖይቶ ዒስራዔኤሌፓ
ዖሎ ፓራሢያ ዬሩሳላሜፓ ዔኪ ሺኢሻንዳኔ፤
ዖሎ ዖላ ሂኢዦዋ ታኣኒ ሜንሣንዳኔ፤
ኔኤኮ ካኣቲ ሜሌ ዴሮ ባኣካ ዴይ
ኮሹሞ ሳዖይዳ ዔኪ ዬዓንዳኔ፤
ዒ ዎይሣ ዓጮኮ ዛጳ ባዛፓ ዴንዲ ሜሌ ባዞ ሄላንዳኣና
ዔፕራፂሴ ዎራፓ ዓርቃዖ ዴንዲ
ዓጮኮ ጋፒንፆ ሄላያ ማዓንዳኔ።» #ዓይኑ. 72፡8።
ናንጊና ናንጋ ጎዳኮ ዴራ ዲዒንቲ ዴንዴ ዓጫፓ ማዓንዳሢ
11«ዒንጎ ባኣዚ ማዒ ዒንጊንቴ ሱጉሢና ታ ኔኤም ጫኣቄሢሮ
ዋኣፃባኣ ጉሮ ዔታ ኔኤኮ ቱኡቲ ዓኣ ዓሶ ታኣኒ ኬሳንዳኔ። #ኬሲ. ማፃ 24፡8።
12ዒንሢ፥ ሃጋኣ ዎዛ ዴንቄ፥ ቱኡዞ ዓሳ!
ታኣኒ ቤርታ ዒንሢኮ ዓኣሢፓ ጳንጬ ማሂ ሃኖ ዒንሢም ዒንጋንዳሢሮ
ዒኢካ ዴዒ ካታሞ ዒንሢኮ ካፖ ዼጌ ቤዞ ባንሢ ማዑዋቴ።
13ዪሁዳ ታኣኒ ሂኢሺ ጎይሢ
ዒስራዔኤሌ ጊንሣ ሃሣ ዓኣዛ ማሂ ዔያቶና ዖላንዳኔ፤
ጊሪኬ ዓጮ ዓቲንቆ ዖላኒ
ፂዮኔፓ ዓቲንቆ ናኣቶ ጬንቻ ዓራፖ ማሂ ታኣኒ ዳካንዳኔ።»
14ናንጊና ናንጋ ጎዳ ዴሮ ዑፃ ማዒ ፔጋዺ ጴዻንዳኔ፤
ዒዛኮ ዓኣዛ ዜኤሊንሢጉዲ ፖዒ ዴንዳያ ማዓንዳኔ፤
ናንጊና ናንጋ ጎዳ ማዔ ፆኦዛሢ ዛዬ ዋርቃንዳኔ፤
ዓጮኮ ዾኦሎ ዛላፓ ቱሮ ሙካ ዓልጎ ዢባሬጉዲ ዢባርሺ ዴንዳንዳኔ።
15ቢያ ባኮ ዎይሣ ጎዳሢ ፔ ዴሮ ዛሎ ዖልታንዳኔ፤
ዒዛኮ ዴራ ፔ ሞርኮ ዎዺ ባይዛንዳኔ፤
ሞርኮኮ ዎሮ ሹዎ ቶኪና ሄርቃንዳኔ፤
ዔያታ ዖሎይዳ ማሢንቴ ዓሲ ጎይሢ ሜርታንዳኔ፤
ዔያቶ ሞርኮኮ ሱጉፃ ፆኦሲም ዒንጋኒ ሳኣኔይዳ ኩንሢ ዔኪ ዬይ
ዒንጎ ባኮ ዒንጎ ቤዞይዳ ዋሂንታ ሱጉሢጉዲ ሾኦታንዳኔ።
16ዬና ኬላ ሄላኣና ቆልሞ ሄንቃሢ ቆልሞ ፔኤኮ ሙዓ ቦዖይዳፓ ዓውሳሢጉዲ
ናንጊና ናንጋ ጎዳ ማዔ ዔያቶኮ ፆኦዛሢ ፔ ዴሮ ዓውሳንዳኔ።
ቦንቾሮ ቶኦካ ዓጎ ባኮይዳ ጳርቂ ኮሾና ዓንጋ ፖዓሢጉዲ
ዔያታ ፔኤኮ ናንጊና ናንጋ ጎዳሢኮ ዓጮይዳ ፖዓያ ማዓንዳኔ።
17ዓጬሎኮ ኮሹሞና ሚዛጱሞና ዎዚ ሄርሺሳያ ማዓንዳይ!
ዒኢካ ዓኣያ ማዓንዳ ሃኣኮንታ ዎይኖ ዑዦንታ
ዓቲንቆንታ ዉዱሮ ዼጌሢንታኮ ዑፆ ሚዛጲሳያ ማዓንዳኔ።
Currently Selected:
ዛካሪያሴ ማፃኣፖ 9: ጌኤ.ማፃ
Highlight
Share
Copy
Want to have your highlights saved across all your devices? Sign up or sign in
Maale Full Bible © 2008 by The Word for the World International and The Bible Society of Ethiopia, 2008.
